uMataayi 20

Ishiholanyo isha kuvhalipa avhavhomba mbombo

1“Uvhumwene uvhwa Mulungu vhuholiine nu muhaata mugunda wumo we álavhiiye inzanshi nkaani kulambila avha kuvhomba imbombo mu mugunda waakwe uwa mampensya. 2Lwe avhaaga, umuhaata mugunda uyo ahivwana navho kuvhalipa idinaali yooka yooka,#20:2 Idinaali yooka yooka: Idinaali yooka gáamile malipilo aga isiku lyoka kwa muvhomvi. pe ahavhatwala ku mugunda waakwe. 3Lwe yaafiha saala taatu inzanshi, aheepa havhili ku kwakwe, ahasogola ku nsokooni, ahavhaaga avhantu avhamwavho vhimiliiye ishisita imbombo. 4Ahavhavhuuzya ahati, ‘Niimwe sogooli kuvhomba imbombo mu mugunda waane uwa mampensya. Kwe ninze imbalipe mwenti inza vwe yikwanzilwa.’ 5Pe vhoope vhahasogola. Lwe izuvha lyafiha pi itwe na lwe yaafiha saala 9, aheepa havhili ku kwakwe, ahavhatwala avhantu avhamwavho ku mugunda waakwe. 6Lwe haafiha ahavhaliilizyo aha hamazuuvha, ahasogola pa nsokooni havhili, ahavhaaga avhamwavho vhimiliiye. Ahavhavhuziilizya ahati, ‘Shooni she mwimiliiye ipa isiku lyonti ishisita imbombo?’ 7Avheene vhahamwamula vhahati, ‘Mwe pe nuumo we atulambiiye kuvhomba imbombo.’ Pe ahati, ‘Niimwe musogole kuvhomba imbombo mu mugunda waane uwa mampensya.’

8“Lwe izuvha lyinjila, umuhaata mugunda uyo ahamwita umwimiilizi, ahati, ‘Vhiite avhavhomba mbombo vhonti, inga uvhalipe amalipilo gaavho. Lwe ukuvhalipa, utalishe na vhe vhayagaasite ku vhusililishilo nu kumaliilizya na vhatanzi.’ 9Pe avhavhomba mbombo vhe vháyagaasite hamazuuvha, vhahaposheela idinaali yooka yooka. 10Lwe avhavhomba mbombo avhatanzi vhaafiha, vhahasiivhaga kuuti kwe vhaposheele inyinji kuluusya avhamwavho vhe vhínzile ku vhusililishilo. Ileelo vhoope vhahaposheela idinaali yooka yooka. 11Pe lwe vhaposheela, vhahanda kumukwinkwina umuhaata mugunda, vhahati, 12‘Yeenya, avha ku vhusililishilo vhavhomvile imbombo isaala lyoka vhweleele, ishi shooni she wavhalingaanya amalipilo niiswe swe tuvhomvile imbombo ingomu nkaani nu kulamilwa musanya wonti?’ 13Ileelo uweene umuhaata mugunda ahamwamula wumo mu vhavhomba mbombo ivho ahati, ‘We mumanyani, ntakushevwizye naashimo. Vhuli, tutiivwine kuuti kwe uvhombe imbombo ku malipilo aga dinaali yooka? 14Nyatuula impiiya yaaho ino, sogolaaga! Ine nkasiime kumulipa umuntu uwa ku vhusililishilo amalipilo ge galingiine na gaaho. 15Vhuli, ntakwitishilwa kuvhombela ivintu vwane inza vwe nkwanza? Uli nu mwone, mwe pe ne mupi nkaani ku vhanji?’ 16Vwe ziliivha, avhantu vhe vhatakushindikwa ahavhaliilizyo iha, vhaliivha vhantu vhe vhakushindikwa, vhoope vhe vhakushindikwa ahavhaliilizyo iha, vhaliivha vhantu vhe vhatakushindikwa.”

UYeesu akukuvhwa ulwa vhutatu izya kufwa nu kuzyuha kwakwe

(uMaaliko 10:32-34; uLuuka 18:31-34)

17Isiku limo, uYeesu na vhasundikwa vhaakwe 12 vhahazuvhaga kusogola ku Yelusaleemu. Lwe vhali mwi idala ahavhanyatula avhasundikwa vhaakwe kukwilu, ahavhavhuuzya ahati, 18“Yeenyi, tukuzuvha ku Yelusaleemu. Ukwo ne Mwana wa Aadamu nkusogola kulemwa nu kutwalwa ku vhapiti avha vhapuuti na vhasambiilizi avha ndajizyo izya Moose. Vhoope kwe vhandonje kuuti vhangoje. 19Kwe vhambiishe mu nyoovhe izya vhe te Vhayuuda nu kunjevhula. Havhili kwe vhankome nu muchaapu nu kunkomeela pa shihovhenkanyo. Ileelo isiku ilya vhutatu, uMulungu alinzyusya.”

Unyina uwa vhaana vha Zebedaayi akuvhalaavhila avhaana vhaakwe uvhupiti

(uMaaliko 10:35-45)

20Ahavhaliilizyo iho unyina uwa vhaana vha Zebedaayi#20:20 Avhaana vha Zebedaayi: Amazina gaavho vháali vhe vha Yaakobu nu Yoohani. ahasogola na vhavuli vhaakwe kwa Yeesu, ahasugamila nu kumulaavha kuuti amwavwe shimo. 21UYeesu ahamuvhuziilizya ahati, “Ukwanza inkwavwe ishooni?” Woope ahamwamula ahati, “Nkulaavha uvhitishile avhaana vhaane ivha, kuuti vhavhe vhalongozi pooka niiwe mu vhumwene vhwaho, wumo atendame ku luvhazu ulwa kundiilo, uwamwavho ulwa kumongo.” 22UYeesu ahavhaamula ahati, “Mutamanyile zye mukulaavha. Vhuli, mungayimba amayimba inza ge nandi nsogole kuyimba ine?”#20:22 Mungayimba amayimba inza ge nandi nsogole kuyimba ine? IShiyunaani shikuti, Mungamwelela ulupindi lwe nandi nsogole kumwelela ine? Vhoope vhahamwamula vhahati, “Eena tungayifumwa.” 23UYeesu ahavhavhuuzya ahati, “Nalyoli kwe muyimbe inza vwe nkusogola kuyimba. Ileelo kutendama ku luvhazu lwane ulwa kundiilo, poosye ulwa kumongo te mbombo yaane kuvhitishila. Uvhuzilo uvhwo vhwa vhaala vhe uTaata waane avhasenganiziinye nziila.”

24Lwe avhasundikwa avhamwavho vhaala 10 vhiivwa izyo, vhahavhaviitilwa avhanamuntu vhavhili ivho. 25Pe uYeesu ahavhiita, ahavhavhuuzya ahati, “Mumanyile vwe avhalongozi avha vhe te Vhayuuda vhakuvhakonzya avhantu vhaavho ku maha, havhili vwe avhapiti ivho vhakuvhavijiilizya avhantu kuvhomba. 26Ileelo kuli imwe zitahaavhe vhwevhulo. We akwanza kuvha mupiti wiinyu, avhe muvhomvi wiinyu. 27Havhili we akwanza kuvha mulongozi muli imwe, avhe muzya wiinyu. 28Vhwevhulo, niine ne Mwana wa Aadamu ntínzile kuvhombelwa, nkandi kuvhavhombela avhantu nu kufumwa uvhulanzi vhwane kuvhatavhula avhinji.”

UYeesu akuvhaponia avhantonko vhavhili

(uMaaliko 10:46-52; uLuuka 18:35-43)

29UYeesu na vhasundikwa vhaakwe vhahafiha mu nkaaya impiti iya Yeeliko. Pisinda, lwe vhakufuma mu nkaaya iyo, ivhungaana ipiti ilya vhantu lihamulandata. 30Ahavhaliilizyo iho, avhantonko vhamo vhavhili vhátendiime pa luvhazu pi idala lye uYeesu ahatuuhaga. Lwe vhiivwa kuuti uYeesu akutuuha, vhahavhilishila kwi izwi ipiti vhahati, “We Mwene, Mwana wa Daavhudi, utufwile uvhwila!” 31Ivhungaana ilyo lihavhapilila, inga vhapuume, ileelo avheene vhahonjezya kuvhilishila nkaani vhahati, “We Mwene, Mwana wa Daavhudi, utufwile uvhwila!” 32UYeesu ahimiilila nu kuvhiita. Ahavhavhuziilizya ahati, “Mukwanza imbavhombele ishooni?” 33Pe vhahamwamula vhahati, “We Mwene, tukulaavha utuponie tutalishe kulola havhili.” 34Pe uYeesu ahavhafwila uvhwila, ahavhalema aminso gaavho. Panaapo vhahanda kulola havhili, vhahamulandata uYeesu.

Currently Selected:

uMataayi 20: nih

Highlight

Copy