uMataayi 19

Insambiilizyo izya kumutavhula umwantanda

(uMaaliko 10:1-12)

1Lwe uYeesu aamala kuyanga amazwi igo, aheepa mu shigavho isha nsi isha Galilaaya, ahasogola mu shigavho isha nsi isha Yudeeya isyila ilyamwavho ilya ijenje uYoolodaani.#19:1 Isyila ilyamwavho ilya ijenje uYoolodaani: Kufuma mu Galilaaya kwinjila mu nsi iya Yudeeya, aVhayuuda avhinji vhahatuuhaga kwi ijenje uYoolodaani kuvhutukulo, inga vhatahinze vhatuushile pahati iya nsi iya Samaliya ye vhahayivhazyaga kuuti nkandamanu. 2Avhantu ivhungaana ipiti vhahamulandata ukwo, woope ahavhaponia vhe vháali vhavhinu.

3Pe aVhafalisaayi vhamo vhahasogola kwa Yeesu kumulinga, vhahati, “Vhuli, indajizyo izya Moose zikwitishila umulume kumutavhula umushi waakwe ku nongwa yonti yiila?” 4Uweene ahavhaamula ahati, “Vhuli, imwe mutavhaziizye uVhusimbe uVhufinjile vhwe vhukuti kufuma ku vhwandilo uvhwa vhupezi, ‘UMulungu ámupezile umwanaavuli nu mwantanda’?#19:4 uVhwandilo 1:27 5Ahonjezya ahati, ‘Kuli izyo, umwanaavuli alimuleha uyise nu nyina, nu kusopenkana nu mushi waakwe, vhavhili ivho vhaliivha umuvhili wooka.’#19:5 uVhwandilo 2:24 6Pe avhantu ivho vhatakuvha vhavhili havhili, vhakuvha umuvhili wooka. Kuli izyo, she uMulungu ashisopenkiinye, umuntu atahashilehaanye.” 7AVhafalisaayi vhahamuvhuziilizya havhili vhahati, “Inga vwe zili, pe shooni she uMoose áyitishiiye mu ndajizyo zyakwe kuuti, umwanaavuli amupanje umushi ukalaata uwa kulehaana nu kumuleha?” 8UYeesu ahavhaamula ahati, “UMoose ávhwenyi uvhugomu uvhwa mooyo giinyu, ye nongwa ávhitishiiye kuvhatavhula avhashi vhiinyu, ileelo kufuma ku vhwandilo uvhwa vhupezi yitáali isho. 9Ileelo ine nkuvhavhuuzya kuuti, umuntu wonti we akumutavhula umushi waakwe she atamulemile mu vhulugusu, nu kwimala umwantanda uwunji, akuvhomba uvhulugusu. Woope we akumwimala umwantanda we umulume amutavhuuye, akuvhomba uvhuvhembu.”#19:9 Woope we akumwimala umwantanda we umulume amutavhuuye, akuvhomba uvhuvhembu: IBiibiliya intanzi zye zisimviilwe mu njango iya Shiyunaani nyinji. Zimo muli izyo zitali na mazwi iga. Zyope iBiibiliya zimo izya manda iga zikugaleha amazwi iga ishisita kusimba.

10Pe avhasundikwa vhaakwe vhahamuvhuuzya vhahati, “Inga vwe zili vhwevhulo kwa mwanaavuli nu mushi, pe kwashi kuvha ishita kwimala!” 11UYeesu ahavhaamula ahati, “Te vhonti vhe vhangaliposheela izwi ili, nkandi vhevhaala vhe uMulungu avhapiiye amaha aga kuliposheela. 12Yeenya, vhamo vhatakwimala, mwe pe vhapaase kufuma kupaapwa kwavho. Avhamwavho vhatakwimala, mwe pe avhantu vhavhapaasile. Havhili avhamwavho vhatakwimala, inga vhavhe na havhaliilizyo ahapiti aha kuvhomba imbombo iya vhumwene uvhwa Mulungu. Umuntu wonti we angaliposheela izwi ili, aliposheele.”

UYeesu akuvhaloota avhaana avhansi

(uMaaliko 10:13-16; uLuuka 18:15-17)

13Isiku limo, avhantu vhámuleteeye uYeesu avhaana, inga avhavhiishile inyoovhe, kuvhaloota nu kuvhalaavhila. Ileelo avhasundikwa vhaakwe vhahavhapilila vhe vhávhaleesite avhaana ivho. 14Ileelo uYeesu ahati, “Vhaleshi avhaana ivho vhinze kuli ine, mutavhadindaje ndaali, mwe pe uvhumwene uvhwa Mulungu vhwa vhantu vhe vhali inza avhaana ivho.” 15UYeesu ahavhavhiishila inyoovhe avhaana ivho, kuvhaloota, pe aheepa ipo.

Umujaaha udumbwe we akwanza uvhulanzi

(uMaaliko 10:17-31; uLuuka 18:18-30)

16Pe umujaaha wumo ahinza kwa Yeesu, ahamuvhuziilizya ahati, “We Musambiilizi, imbombe ishooni ishinza, inga mbwaje uvhulanzi uvhwa shiima?” 17UYeesu ahamwamula ahati, “Shooni she ukumbuziilizya izya shintu ishinza? Yeenya, ali wooka vhweleele we mwinza. Ileelo inga ukwanza kwinjila ku vhulanzi uvhwa shiima, uzilandate indajizyo zyakwe.” 18Uweene ahati, “Ndajizyo vhuli?” Pe uYeesu ahamwamula ahati, “Utagogaje, utavhembuhaje, utiivhaje, utahomeshezyaje izya ilenga. 19Umushindihaje utaata waaho nu maayi waaho havhili umukundaje umupalamani waaho inza vwe ukuyikunda weneewe.”#19:19 Kufuma 20:12-16; aVhalaawi 19:18; iNkumbushizyo izya Ndajizyo 5:16-20 20Umujaaha uyo ahati, “Indajizyo zyonti izyo nkazilema. Imbombe ishooni ishamwavho she nsovheliilwe?” 21UYeesu ahamwamula ahati, “Inga ukwanza kuvha we mulunjisu, sogoola ukazye ivintu vwonti vwe uli navwo, impiiya zye waposheela uuvhape avhapiina. Inga wavhomba vhwevhulo, ukuvha wayisengulila inkoma ku mwanya. Pe uyinze, undandate.” 22Lwe umujaaha uyo ayiivwa izyo, aheepa uku aswimiliilwe nkaani, mwe pe áamile ni vwuma ivwinji.

23Pe uYeesu ahavhavhuuzya avhasundikwa vhaakwe ahati, “Nalyoli shiliivha shigomu nkaani avhadumbwe kwinjila mu vhumwene uvhwa Mulungu. 24Havhili nkuvhavhuuzya kuuti, shipupuusu nkaani ingamila kutuuha pi indovhoolwi ilya nsindaani, kuluusya udumbwe kwinjila mu vhumwene uvhwa Mulungu.” 25Lwe avhasundikwa vhiivwa izyo, vhahasukumila nkaani, vhahati, “Ishi inga vwe zili vhwevhulo, pe wu naanu we angaapokwa?”#19:25 AVhayuuda vhahitihaga kuuti avhadumbwe vhonti vhaliipokwa. 26UYeesu ahavheenya, ahayanga ahati, “Ilyo ku vhantu litangavhombeha, ileelo kwa Mulungu zyonti zikuvhombeha.”

27UPeeteli ahamwamula ahati, “Yeenya, iswe tuvilesile vwonti, tukukulandata iwe! Ishi pe kwe tushaaje ishooni?” 28UYeesu ahavhaamula ahati, “Nalyoli nkuvhavhuuzya kuuti, lwe ne Mwana wa Aadamu natendama pa shitengo ishishindamu isha vhumwene mu nsi impwa, niimwe mwe mundandasite, mulitendama pa vitengo ivwa vhumwene 12 kuzikonzya inkolo 12 izya Vhaisilayeeli. 29Havhili umuntu we ayilesile inyumba yaakwe, poosye avhanine vhaakwe avhanaavuli, poosye avhantanda, poosye utaata waakwe, poosye umaayi waakwe, poosye avhaana vhaakwe, poosye amagunda gaakwe kuzya izina lyane, uyo aliposheela ivwinji nu vhulanzi uvhwa shiima. 30Yeenya, avhantu vhe vhatakushindikwa ahavhaliilizyo iha, vhaliivha vhantu vhe vhakushindikwa, vhoope vhe vhakushindikwa ahavhaliilizyo iha, vhaliivha vhantu vhe vhatakushindikwa.”

Currently Selected:

uMataayi 19: nih

Highlight

Copy