iMbombo izya Vhatumwa 4
4
Avhapiti vhakuvhatwala avha Peeteli nu Yoohani mu lukuvhato ulwa vhalongozi
1Lwe uPeeteli nu Yoohani vhakuvhalumbiilila avhantu, avhapuuti#4:1 Avhapuuti: Vhaazya mu Ntantiho izya Mazwi aMajeni. na Vhasadukaayi#4:1 AVhasadukaayi: Vhaazya mu Ntantiho izya Mazwi aMajeni. vhahinza pooka nu mupiti uwa vhimiilizi avha Nyumba iMfinjile. 2Avhapiti ivho vhávisiitwe, mwe pe uPeeteli nu Yoohani vhahasambilizyaga nu kuvhalumbiilila avhantu kuuti uYeesu azyusile. Inongwa izi zihalolesyaga uvhwanalyoli kuuti vhe vhafuuye vhalizyuha. 3Pe vhahavhalema nu kuvhagalila mu jeela. Vhahavhaleha kufishila indaavhi inzanshi, mwe pe háamile havhaliilizyo ha hamazuuvha. 4Ileelo avhinji muli ivho vhe vhívuuye izwi ilya Mulungu, vhítisile. Pe uvhwinji vhwavho vhe vhámwitisile uYeesu, wuhafishila avhanaavuli vheeka 5,000 ishi.
5Lwe kwasha, avhapuuti na vhasongo na vhasambiilizi avha ndajizyo izya Moose#4:5 Avhapuuti na vhasongo na vhasambiilizi avha ndajizyo izya Moose: Avhantu ivho vháamile vhalongozi mu lukuvhato ulwa Vhayuuda. Vhaazya ulukuvhato mu Ntantiho izya Mazwi aMajeni. vhahavhungaana pa Yelusaleemu. 6Mu lukuvhato ulwa vhalongozi umwo, mwámile umupuuti umupiti uAanasi, pooka nu Kayaafa nu Yoohani nu Alekizanda na vhajenzi avha Aanasi avhanji. 7Lwe vhavhimiiliha avha Peeteli nu Yoohani pilongolela lyavho, vhahavhavhuziilizya vhahati, “Umulemazu we mwamuponia uyo, mwamuponia ku maha gooni, poosye kwi izina lya naanu?”
8Pe uPeeteli she ayizuuye uMupepo uMufinjile, ahavhaamula ahati, “Mwe vhapiti na vhasongo vha mu Isilayeeli imwe! 9Ileelo ili, mukutuvhuziilizya kuzya mbombo inyinza zye avhombeliilwe umuntu uno we aamile wu ntendya, kuuti vwe aponile. 10Pe imwe pooka na vhantu vhonti avha mu Isilayeeli, mumanye ahinza kuuti, umuntu uno we ayimiliiye pilongolela lyinyu aapona nu kuvha mwinza, ku maha aga izina ilya Yeesu Chilisiti uwa ku Naazaleeti. UYeesu uyo, imwe mwámuhomeleeye pa shihovhenkanyo, ileelo uMulungu ahamuzyusya. 11Uweene we livhwe ilya pa shipembe isha nyumba, ásimviliilwe kuuti,
‘Ivhwe lye mwálihaanile imwe vhazenzi,
lye lyavha livhwe ipiti ilya pa shipembe isha nyumba.#4:11 Ivhwe ipiti ilya pa shipembe isha nyumba: AVhayuuda vhahazenjelaga inyumba amavhwe ge vhahavhinzaga. Ivhwe ipiti ilyo lyáli livhwe lye lihasopenkanyaaga uluvhumba kuuti inyumba yigoloshe.’#4:11 iZabuuli 118:22
12Kwe kuuti, naawumo uwunji wonti we angatupoha, mwe pe ataliipo umuntu uwunji we avhantu vhahapeelwa pansi ipa, we angatupoha iswe mu vhutalamalandu.”
13Avhapiti vhaala lwe vhaalola uvhudandamazu uvhwa vha Peeteli nu Yoohani nu kumanya kuuti vhantu vhe vhatasambiliiye, vhahasukumila nkaani. Pe vhahamanyinsanya kuuti, ivha vháamile pooka nu Yeesu. 14Ileelo lwe vhamulola umuntu ula we áponile ayimiliiye pooka nu Peeteli nu Yoohani, vhatahavha ni izwi ilya kuvhaamula. 15Pe vhahavhafumwa pa lukuvhato#4:15 Ulukuvhato: Vhaazya mu Ntantiho izya Mazwi aMajeni. ulwa vhalongozi, avheene vhahasyala vhakupanzanya vheeka. 16Vhahavhuzilizanya vhahati, “Tuvhahonzye vhuli avhantu ivha? Avhantu vhonti vhe vhakutendama pa Yelusaleemu ipa vhamanyile kuuti vhavhomvile ishilolesyo ishipiti, tutangaahola kuhaana kuuti vhatavhomvile. 17Ileelo tuvhasoshe kuuti, vhaleshe kuyanga izya Yeesu, inga inongwa izya mafindango iga zitahajendeelele kukumuha.”
18Pe vhahavhiita avha Peeteli nu Yoohani havhili, vhahavhasoha kuuti vhatahasheele havhili kuyanga, poosye kusambiilizya ku maha aga izina ilya Yeesu. 19Ileelo avha Peeteli nu Yoohani vhahaamula vhahati, “Mwamule mweneemwe inga mwe muumwo pilongolela ilya Mulungu kuvhashindiha imwe kuluusya kumushindiha uweene. 20Mwe pe iswe tutangaaleha kuziyanga ziila zye tuzivhwenyi nu kuzyivwa.”
21Avhapiti vhaala vhahavhasoha ku vhuhali, pe vhahavhaleha. Vháposiitwe kuuvhapa isunde, mwe pe avhantu vhonti vhahamutiimaga uMulungu nkaani ku mafindango ge avha Peeteli nu Yoohani vhávhomvile kwa muntu ula. 22Umuntu uyo we vhámuponiizye áamile na maaha 40 nu kushila.
Avhantu vhe vhámwitisile uYeesu vhakumulaavha uMulungu
23UPeeteli nu Yoohani, lwe vhasatulwa, vhahagaluha ku vhamwavho vhe vhámwitisile uMwene uYeesu. Vhahavhavhuuzya amazwi igo gonti ge avhapiti avha vhapuuti, pooka na vhasongo avha Vhayuuda vhávhavhuziizye. 24Lwe avhamwavho vhiivwa amazwi igo, vhonti pooka vhahamulaavha uMulungu vhahati, “Iwe we MWENE uwa Maha Gonti, we wápezile imwanya ni nsi nu sumbi, na vwonti vwe vili muumwo. 25Wáyanzile kwa Mupepo uMufinjile kutuushila kwa taata wiitu uDaavhudi, umuvhomvi waaho, kuuti,
‘Shooni she vhe te Vhayuuda vhakuvwalangana?
Havhili shooni she insi, zikusiivha izya shaaha vhweleele?
26Avhamwene avha nsi vhayisengiinye,
na vhapiti vhavhungiine pooka,
kulwa nu MWENE uMulungu nu Meesiya#4:26 UMeesiya: Vhaazya uChilisiti mu Ntantiho izya Mazwi aMajeni. waakwe.’#4:25-26 iZabuuli 2:1-2
27Nalyoli vwe zili! Umwene uHeelodi#4:27 Umwene uHeelodi izina ilyamwavho vhahatinji uHeelodi uAntipa. Ahakonzyaga mu nsi iya Galilaaya ni ya Peleeya. Umupiti waakwe áamile wu Kayisaali umwene umupiti uwa ku Luumi. Vhaazya uHeelodi mu Ntantiho izya Mazwi aMajeni. nu Pontiyo uPilaato#4:27 UPontiyo uPilaato ahakonzyaga mu nsi iya Yudeeya ni ya Samaliya. Umupiti waakwe áamile wu Kayisaali umwene umupiti uwa ku Luumi. pooka na Vhaisilayeeli na vhantu avha nsi izinji vhavhungiine mu nkaaya ino, kuzya Yeesu umuvhomvi waaho umufinjile. Havhili uyo we wámusevile kuuti avhe wu Chilisiti. 28Izyo zye vhavhomvile ivho zye iwe wásivhiliiye kufuma hali kuuti zivhombeshe, ku maha gaaho na ku lukasamo lwaho. 29Ileelo ishi MWENE Mulungu, yeenya vwe vhakutwogofwa! Utwavwe iswe swe vhavhomvi vhaaho, inga tulumbililaje izwi lyaho ku vhudandamazu. 30Lwe tukulumbiilila, ulolesyaje amaha gaaho aga kuvhaponia avhavhinu nu kuvhomba ivilolesyo ni zya kusukumizya kutuushila kwi izina ilya Yeesu umuvhomvi waaho umufinjile.”
31Avhantu ivho lwe vhaamala kumulaavha uMulungu, pe vhávhungiine paala pahayingaana. Vhonti vhahiizula uMupepo uMufinjile, vhahataliha kulumbiilila izwi ilya Mulungu ku vhudandamazu.
Uvhuliilani uvhwa vhantu vhe vhámwitisile uYeesu
32Avhantu vhonti vhe vhámwitisile uYeesu, vháamile umwoyo wooka ni nsiivho zyavho zyámile pooka. Atáliipo umuntu we ahayangaga kuuti ivintu vwe ali navwo vwakwe weeka, ivintu vwavho vwonti vhahasanganyaaga pooka. 33Avhatumwa avha Yeesu vhahafumwaga uvhwahoome uvhwa kuzyuha kwa Mwene uYeesu, ku maha nkaani. UMulungu woope ahavhafwilaga uvhwila nkaani vhonti. 34Atáliipo umuntu mu mpuga yaavho we ásovheliilwe ni shintu, mwe pe vhe vháamile na magunda poosye inyumba, vhahakazyaga. 35Impiiya zye vhaposheela, vhahavhapanga avhatumwa avha Yeesu. Impiiya izyo vhahagavhanaga, inza vwe wooka muli vhuuvho ásovheliilwe.
36Kwámile uMulaawi wumo, we áamile muhaaya wa mu nsi iya Kiipulo. Umuntu uyo izina lyakwe vhahatinji uYoosefu. Avhatumwa vhámupiiye izina ilya Balinaaba (kwe kuuti, “We Akusuvhaalizya”). 37UBalinaaba woope ahakazya umugunda waakwe. Impiiya zye áposheleeye, ahazitwala ku vhatumwa.
Currently Selected:
iMbombo izya Vhatumwa 4: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
