iMbombo izya Vhatumwa 1

UMupepo uMufinjile we uMulungu áfinzile

1Wamwitu Teyofiilo, mwi ikalaata lyane liila itanzi,#1:1 Ikalaata lyane liila itanzi kwe kuuti ikalaata ilya Luuka. nákusimbiiye vwe uYeesu ahavhombaga, na vwe ahasambilizyaga, kufuma ku vhwandilo uvhwa mbombo yaakwe, 2kufishila isiku lye ányatuliilwe kusogola ku mwanya. Lwe ashiili kunyatulwa, uMupepo uMufinjile#1:2 UMupepo uMufinjile: Vhaazya mu Ntantiho izya Mazwi aMajeni. ahamulongola kuvhalajizya avhatumwa vhaakwe vhe ávhasavhuuye, vwe yikwanzilwa vhavhombaje imbombo. 3Ku havhaliilizyo aha nsiku 40 kufuma pe ázyusile, ahavhaloleshelaga ulwinji avhatumwa vhaala. Ahavhahomelezyaga ulwinji kuuti uweene mupuuma, havhili ahavhasambilizyaga inongwa izya vhumwene uvhwa Mulungu.#1:3 Uvhumwene uvhwa Mulungu: Vhaazya mu Ntantiho izya Mazwi aMajeni.

4Isiku limo lwe uYeesu ahalyanga pooka navho, ahavhalajizya ahati, “Mutaheepe mu nkaaya iya Yelusaleemu, muguliilile munuumu, kufishila ahavhaliilizyo he muliposheela ishikunjilwa, kwe kuuti uMupepo uMufinjile. Isho she shikunjilwa she uTaata uMulungu áfinzile, ulufingwi ulwo lwe nkavhavhuzyaga. 5Nalyoli uYoohani ahavhozyaga avhantu na minzi, ileelo ku havhaliilizyo aha nsiku nyinsi vhweleele zye zikwinza, imwe muliyoozelwa nu Mupepo uMufinjile.#1:5 Muliyoozelwa nu Mupepo uMufinjile kwe kuuti uMulungu alimusonteelezya uMupepo uMufinjile kutendama muhati iya vhatumwa nu kuvhalongozya. Havhili alivhazelufwa imbiivhi zyavho, nu kuuvhapa amaha aga kumushindiha uMulungu.”

UYeesu akunyatulwa kusogola ku mwanya

6Lwe avhatumwa vhavhungiine pooka nu Yeesu, vhahamuvhuziilizya vhahati, “Vhuli, Mwene, ahavhaliilizyo iha he ukuvhavhiishila havhili aVhaisilayeeli uvhumwene vhwavho?” 7UYeesu ahavhavhuuzya ahati, “Amanda na havhaliilizyo aha nongwa, te mbombo yiinyu kumanya, nkandi uTaata wuuyo avhiisile ku maha gaakwe amapiti. 8Ileelo kwe muposheele amaha, lwe uMupepo uMufinjile akuvhiishila imwe. Pe muliivha mwe vhahoome vhaane mu Yelusaleemu, na mu shigavho isha nsi shonti isha Yudeeya ni sha Samaliya, nu kufishila kumpeleela iya nsi.”

9Lwe uYeesu ayanga izyo, pe ahanyatulwa kusogola ku mwanya, she avhatumwa vhonti vhakulola. Ivhingo lihamudindila, vhatahamulola havhili. 10Lwe vhakujendeelela kwenya ku mwanya vwe akusogola, naluvhiilo avhahavhizya vhavhili vhe vházwaye amenda amazelu vhahavhaloleshela vhimiliiye papiipi navho. 11Vhahati, “Mwe vhanaavuli vha mu Galilaaya, shooni she mwimiliiye ipa nu kutontomela ku mwanya? UYeesu uno we anyatulwa kufuma kuli imwe, aligaluha havhili vhwevhulo inza vwe mwamulola akusogola ku mwanya.”

Vhakumupwanizya uMatiiya pa Yuuda

12Pe avhatumwa avha Yeesu vhaheepa pi igamba ilya Mazayituuni,#1:12 Amazayituuni makwi aga mantonongwa amansi aga mafuta. vhahagaluha ku nkaaya iya Yelusaleemu, ye yáali uvhutali uvhwa kilomiita yooka#1:12 Uvhutali uvhwa kilomiita yooka: IShiyunaani shikuti intambwi iya Sabaato. kufuma pi igamba ilyo. 13Lwe vhinjila mu nkaaya, vhahazuvha mu shumba isha pamwanya mu nyumba injelenkanu, vhahinjila mu shumba isho, mwe vhahatendamaga. Ivho vháamile vhe vha Peeteli nu Yoohani nu Yaakobu nu Andeleeya nu Fiilipo nu Toomasi nu Batolomaayo nu Mataayi. Avhamwavho vháamile vhe vha Yaakobu umwana wa Alufaayo nu Siimoni we ahayikungulaga kulwila insi yaakwe#1:13 USiimoni we ahayikungulaga kulwila insi yaakwe: IShiyunaani shikuti uSiimoni uZeloote. nu Yuuda umwana wa Yaakobu. 14Ivho vhonti vhahavhungaanaga kulaavha, pooka na vhantanda vhamo nu Maliiya umaayi wa Yeesu na vhanine avha Yeesu.

15Isiku limo, avhantu 120 ishi vhe vhámwitisile uYeesu vhávhungiine pooka. Pe uPeeteli ahimiilila pahati yaavho, 16ahavhavhuuzya ahati, “Mwe vhamwitu, zye zyásimviilwe mu Vhusimbe uVhufinjile kuzya Yuuda, we ávhalongooye avhantu vhaala vhe vhámulemile uYeesu, zyaanziliilwe zivhombeshe. Izyo zye uMupepo uMufinjile áyanzile kwi ilomu ilya taata wiitu uDaavhudi.#1:16 UDaavhudi: Vhaazya mu Ntantiho izya Mazwi aMajeni. 17Ku vhwandilo uYuuda áamile pooka niiswe swe vhatumwa, ásavhuliilwe kuuti twavwane kuvhomba imbombo.”

18Uweene ahaposheela impiiya kuzya kuvhomba imbiivhi, pe impiiya izyo ahakalila umugunda. Mu mugunda uwo mwe ahagwa pansi, ulwanda luhatumbunkana, uvhula vhuhafuma panzi. 19Inongwa izyo zihamanyiha mu vhantu vhonti avha mu Yelusaleemu. Pe umugunda ula wuhiitwa ku njango yaavho kuuti Akeludaama, kwe kuuti uMugunda uwa Mavhanda.#1:18-19 Avhasambiilile avhinji vhakusiivha kuuti amazwi aga mu hansi aha 18-19, gatáyanziilwe nu Peeteli. Vhakusiivha kuuti wu Luuka áyinjiziizye genego, inga avhalovhosezye vhe vhakuvhaazya ikalaata ili.

20UPeeteli ahajendeelela kuyanga kuuti, “Izyo zye uDaavhudi ásimvile mwi ikalaata ilya Zabuuli kuuti,

‘Pa vhutendamo vhwakwe pasyale litongo,

patahaavhe umuntu we angatendama puupo.’#1:20 iZabuuli 69:25

Havhili yisimviilwe kuuti,

‘Imbombo yaakwe iya kulongozya anyatule umuntu uwunji.’#1:20 iZabuuli 109:8

21Kuli izyo, yikwanzilwa tumusevhe umuntu uwunji wooka we ajendaje pooka niiswe mu mbombo, avhanje akufumwa uvhwahoome kuuti uMwene uYeesu azyusile. Umuntu uyo, yikwanzilwa tumusevhe kufuma mu vhaala vhe vháamile niiswe ahavhaliilizyo honti lwe uMwene ahatandaalaga kuli iswe. 22Avhe áliipo kufuma lwe uYoohani ahozyaga avhantu, kufishila amanda gaala ge uYeesu ányatuliilwe kuli iswe kusogola ku mwanya.”

23Pe avhantu vhe vhámwitisile uYeesu, vhahasaavhula avhantu vhavhili. Wumo áamile wu Yoosefu we vhahatinji uBalisaaba, ileelo vhamo vhahatinji uYuusito, nu wamwavho, vhahatinji uMatiiya. 24Lwe vhavhasaavhula, vhahamulaavha uMulungu vhahati, “We MWENE, iwe umanyile zye zili mu mooyo aga vhantu vhonti. Ishi utulanje ula we umusevile muli ivha, 25inga apwanile pa mbombo iya vhutumwa ye uYuuda aayilesile, aafwa nu kusogola pe pamuhondeeye wuuyo kuposheela isunde.” 26Pe vhahahoma ulutambu,#1:26 Vhahahoma ulutambu kwe kuuti aVhayuuda vhahasimbaga amazina aga vhantu mu mavhwe amansi, nu kuvhiiha gonti mu lupindi. Vhahayinzanyaaga kufishila ivhwe lyoka lifume nu kugwa pansi. Umuntu we ivhwe lili ni izina lyakwe lyataliha kufuma, we vhahatinji atuuha. ulutambu luhamugwila uMatiiya, woope ahonjela ku vhatumwa 11.

Currently Selected:

iMbombo izya Vhatumwa 1: nih

Highlight

Copy