Lukas 13

Soysoy yaꞌ nawbat yaꞌ luu katimbuhan nyawa na

1Na ni waktu looy du siꞌ, luu na baw siga jama bay nuntutan si Isa pasal kasohean jama man Jalil bay sinohoꞌ pinapatoy meꞌ Gubnul Pilatu. Sila bay pinapatoy sasang da nongan kulban pa Tuhan.

2Yuk si Isa ninsila, “Na adakala, ni bistahan bi kon sila bay matoy meꞌ looy batan dusahan sila labi man mimon jama Jalil ilooy kasohean. 3Pamiki meꞌ looy ilay magsāꞌ. Sugaꞌ baan ta kam banahan, bong baw ina yaꞌ tawbatan bi mimon dusa bi, binasa du kam bbos-bbos.

4“Damikiyan, intomun bi doꞌ ga jama looy sikasapu-wawuꞌ ma bay matoy kalutlutan meꞌ lumaꞌ langkaw ni Silowam ndooy ni Jerusalem. Marean ta ni bistahan bi dusa da labi gi man mimon jama ndooy ni Jerusalem. 5Sugaꞌ meꞌ halling sambat ku na du siꞌ, magsāꞌ du jama bong sila mista meꞌ looy. Sugaꞌ baan ta kam banahan, bong baw ina yaꞌ tawbatan bi dusa bi, binasa du sina kam meꞌ karuha sila.”

Poon kayu ma yaꞌ buwaꞌ

6Pag-anu siꞌ, lay na baw si Isa ngandalil bangsa Yahudi pa poon igira, yuk na, “Luu jama bay nanom poon igira ni huma na. Sugaꞌ tuktuk na pilay ngandawun, yaꞌ luu buwaꞌ na. 7Dari yuk jama looy ni tindog na, ‘Uy, luu na la tallun taun halloman ku bay ngagad buwaꞌ igira tuu, sugaꞌ tud yaꞌ luu inagad. Gam na tabbongan nu na. Kalāt jaꞌ ya ni tanaꞌ.’

8“Sugaꞌ tindog na baw siꞌ tu sēng lagi nabbong. Dari yuk na, ‘Tuwan, bong anu ba, pabiya ta na doꞌ llum taun tuu. Intu ku sa paayad. Liput ku na doꞌ poon na kinali, boꞌ inannaan abunu, balangkali buwaꞌ na. 9Bong mintu lay na buwaꞌ pag taun balik, saribu salamat. Bong hati niyaꞌ, boꞌ na sa tabbongan ta.’ ”

Si Isa ngulian disu danda kokoꞌ

10Na pag taabut disu Llaw Pahali, sasang si Isa ni disu langga magnasihat, 11luu ndooy danda kokoꞌ na man sabapan disu seytan. Luu na sapu-wawun taun halloman na yaꞌ na san kapa-nnat. 12-13Pag takita meꞌ si Isa, lay linganan na danda looy nohoꞌ pa mman na. Luu jaꞌ siꞌ, lay na tappak si Isa baran na sambayan na halling, “Daꞌ, kaulian na sina ko.” Dari sarunduun du ya katangge intong sampay lay na ya mudji Tuhan.

14Sugaꞌ kuwan pa-mmean langga looy baw siꞌ tu, lasu sabap si Isa bay nguliꞌ ni Llaw Pahali. Dari yuk pa-mmean looy ni siga jamaa ndooy, “Njawom sakayi pituꞌ luu nnom ngallaw halliꞌ man buwat. Maka njawom nnom ngallaw looy dari na san jama pitu nohoꞌ inulian. Daa jaꞌ sasang Llaw Pahali!”

15Tampung Papuꞌ Isa niiya, “Uy la, kaam bitu magbawuꞌ-bawuꞌ jaꞌ intong pa Tuhan. Kira ku san gi Llaw Pahali, yaꞌ san kam luu san disu yaꞌ bay ngalakkahan ingkot sapiꞌ bi atawa kuraꞌ bi, boꞌ tinondaꞌ pa boheꞌ pinainum. 16Na bong sapiꞌ atawa kuraꞌ dari pinaddusan ni Llaw Pahali, labi na baw danda tuu saꞌ pataꞌ pinaddusan man kamalasahiyan. Boꞌ pagkahi tabi lagi ya panubuꞌ Nabi Ibrahim. Bistahun bi doꞌ, luu na sapu-wawun taun halloman na bay taingkot meꞌ Ibilis. Sangkon subay ya pinaddusan san gi magsabtan ka Llaw Pahali.”

17Pus si Isa siꞌ bay mitsala meꞌ looy, sagannap ma nguntra niiya tud bay hinaꞌ. Sugaꞌ kuwan kaekahan jama baw ndooy, tud bay gāk ni mimon pabuwatan kahaylan-haylan pinōꞌ meꞌ si Isa.

Pamarinta Tuhan ndalil pa bigi mustard tinanom

(Matiyu 13.31-32; Malkus 4.30-32)

18Pag-anu, yuk si Isa, “Buwanan ta doꞌ kam dalil pasal pamarinta Tuhan. 19Sibuꞌ du sina karuha na ka bigi mustard bay tinanom njawom huma. Pag sulig na, lay na dari kayu mehe sampay pinagsangan na meꞌ siga manuk-manuk engas na.”

Pamarinta Tuhan ndalil pa pasulig

(Matiyu 13.33)

20Maka yuk si Isa, “Ngandalil gi ku pasal pamarinta Tuhan. 21Sibuꞌ du sina karuha na ka pasulig inaddun meꞌ danda jawom tallu tasa taligu. Minsan dangkitiꞌ du, pag ngassob na, sulig du mimon addunan na.”

Kiput lawang pa jawom pamarinta Tuhan

(Matiyu 7.13-14; 7.21-23)

22Pag-anu siꞌ, lān si Isa palanja pa Jerusalem, lay gi ya maghāsan ni siga daira ka ga kawum ma bay lingkaan na noan jama.

23Na disu llaw, luu na baw jama bay nilaw si Isa, yuk na, “Tuwan, dangkitiꞌ du kilay jama sinalamat bbos-bbos?”

Pag tampung si Isa, 24“Pamarinta Tuhan ina tadalil pa disu lumaꞌ ma kiput lawang na. Subay pagbuli-bulihan bi na paasok man lawang looy. Meka na sina mintu jama miha lawang sarī, sugaꞌ yaꞌ luu dapat da paasok. 25Pag mintu taabut waktu jama ma dapu lumaꞌ ngunsiꞌ lawang, bong kam masi ni poan, yaꞌ na luu dapat bi paasok. Tarasaw na kam. Bbuwatan bi ina mintu ngingan, yuk bi, ‘Papuꞌ, junjung kami na ningkau, bukisan nu na kami lawang.’

“Iya tampung na ina mintu, ‘Yaꞌ bina kam takila ku. Yaꞌ katoonan ku bong jama man ninggai kam.’

26“Pag-anu, yuk bi ina mintu, ‘Hati, bay gi kami haboy nginum-mangan ka kau sampay lay gi kami tinoan meꞌ nu ni daira kami.’

27“Sugaꞌ tampung na ina mintu, ‘Meꞌ halling sambat ku na siꞌ, basta yaꞌ baw sina kam takila ku. Lakka na kam mantuu. Kaam ina ndang nabiat buwat kalaatan.’

28“Dari magtangisan sina kam mintu sampay magkattop na ni kaehe sasso bi pag takita bi Nabi Ibrahim, Nabi Isahak, Nabi Yaꞌkub sampay mimon kanabi-nabihan njawom okoman pamarinta Tuhan. Boꞌ kaam ina mintu, ni poan sadjaꞌ kam. 29Boꞌ meka gi sina mintu jama saꞌ Yahudi takita bi pōꞌ man sika-mpat pidju alam mmeꞌ siharung-harung mangan ni paballangan jawom okoman pamarinta Tuhan.

30“Indanan bi. Meka sina jama ma ni dambulihan batnaa, pag taabut mintu ni ahirat, lay na sila ni duhuan. Damikiyan, meka du sina jama ma ni duhuan batnaa, pag ndooy mintu, lay na ni dambulihan.”

31Pus si Isa mitsala meꞌ looy, luu na baw pasōng pa mman na siga Parisi, yuk da, “Lakka na ko mantuu batan Gubnul Herod ilay doman mapatoy kau.”

32Sugaꞌ iya tampung si Isa, “Pilay na kam pa mman Gubnul Herod. Baan bi doꞌ pangakka looy, llaw tuu ka sumawung masi na pin ku malakka siga seytan man siga baran jama sampay ngulian jinisan saki. Pag ni katallu ngallaw na, lupus na ku. 33Maka njawom tallu ngallaw tuu du, subay du lanjahan ku luꞌ pilay pa Jerusalem. Ndang-ndang inaa du daira tanyag man kanabi-nabihan pinapatoy. Yaꞌ sina pataꞌ bong ku matoy ni daira sarī.”

Si Isa susahan ga jama Jerusalem

(Matiyu 23.37-39)

34Na sabap susa atay si Isa ni siga Yahudi ndooy ni Jerusalem, njawom atay na, “Kaam, siga jama Jerusalem, bbuwatan bi mapatoy kanabi-nabihan. Boꞌ hiyak bi lagi ka batu jama kasohean ma lay du sohoꞌ Tuhan pa mman bi. Daran na ku bay magkainagon ngaliyun kaam pa jawom okoman ku meꞌ hantang induꞌ manuk ngokoman anak na, sugaꞌ yaꞌ du kam kuhi. 35Sangkon tikutan Tuhan na sina kam sampay paglahat bi. Batnaa, ituu sa tapahalling ku ningkaam, yaꞌ na sina ku takita bi pabalik ngkod-ngkoran bi yaꞌ gi bay kapahalling, ‘Pudji mehe ni ilooy ma bay pinapitu meꞌ Tuhan!’ ”

Currently Selected:

Lukas 13: sjm

Highlight

Copy