Panagnaan 31

Si Yaꞌkub patangkaw man matoa na

1Song hallom, taaka na baw meꞌ si Yaꞌkub siga anak si Laban mitsala iya. Yuk da konoꞌ, lay na kapa si Yaꞌkub mimon altaꞌ mmaꞌ da sampay ilooy na ga poonan man na magkadayahan. 2Maka si Laban pun, tabistu na du meꞌ si Yaꞌkub kulang na hōp na niiya.

3Yaꞌ gi siꞌ hallom, magpalman na baw Tuhan ni si Yaꞌkub, yuk na, “Pabeleng na ko pa lahat induꞌ-mmaꞌ nu ka lūng-kampung nu. Unungan ta sa ko.”

4Dari lay si Yaꞌkub nugun pa lumaꞌ nohoꞌ si Liya ka si Rakel pilay pa kahayangan man na biyasa ngipat baanan hayop na. 5Takka da ndooy, yuk na ninsila, “Ni lilingan ku, mmaꞌ bi ina yaꞌ na meꞌ maruhuꞌ hōpan aku. Lipara, luu na pin Tuhan ma sinumba meꞌ mmaꞌ ku ngunungan aku. 6Katoonan bi du, tud bay pupus hulas-sangsāꞌ ku buwat ni mmaꞌ bi, 7sugaꞌ lay gi ku taaku na llilu. Bistahun bi doꞌ, min sapū na bay baluba na meꞌ na nganggadjihan aku. Lipara, yaꞌ du ya bay nduwan meꞌ Tuhan makaat aku. 8Tandaꞌ luu tulung Tuhan njataꞌ ku, bong yuk mmaꞌ bi bahagiꞌ ku hayop ma tuktukan, pag taabut da hanak, tuktukan jaꞌ anak da. Maka bong yuk na na baw bahagiꞌ ku sagannap ma kabang, pag taabut da hanak, kabang jaꞌ du anak da. 9Sabap meꞌ looy, dari ko ngawon, siga hayop mmaꞌ bi lay na pasayin Tuhan pa mman ku.”

10Maka yuk si Yaꞌkub lagi, “Tuntutan ta doꞌ kam: Luu disu waktu sasang timpu ga hayop sikameek, lay ku ngupi. Njawom pandapat ku, kuwan ga kambing lalla ma meekan kambing danda, mimon sila kabang, bong saꞌ tuktukan. 11Maka njawom pandapat ku, luu malaikat Tuhan mitsala niyaku, yuk na, ‘Yaꞌkub.’ Yuk ku, ‘Oy lay siꞌ?’

12“Yuk malaikat looy niyaku, ‘Ndaun doꞌ ba mimon kambing lalla ma meekan ga kambing danda nnaa. Saꞌ ba, mimon sila kabang jaꞌ, bong saꞌ tuktukan? Aku silay bay nakdil meꞌ looy sabap takita ku na du bong pooy meꞌ si Laban buwat kau. 13Aku na situ Tuhan ma bay patammu ningkau ndooy ni Betel ni tagan man nu bay matangge batu looy, boꞌ bay tinumpahan insallan man nu maehe aku. Maka aku na situ man nu bay napa. Batnaa, panyap na ko, boꞌ nu pabeleng na pa lahat man nu bay pinamaddihan.’ ”

14Dari yuk si Rakel ka si Liya, “Mmeꞌ na kami ningkau. Ndang-ndang ina, yaꞌ na du kami kabahagian pusaka lakka man Simmaꞌ. 15Lay jaꞌ kami pabuwat na subay ga jama sampi. Maka subay ga kami dagangan jaꞌ. Lay na jaꞌ katisan na bay buwan kami. Yaꞌ san kami bay pinahampitan. 16Sangkon na ina mimon altaꞌ ma bay dean Tuhan kau lakka man Simmaꞌ, tabilang na du pamusaka Simmaꞌ ningkami sampay ni anak tabi. Sangkon pilayun na, asipun na jaꞌ oy-oy bay sohoꞌ Tuhan ningkau.”

17-18Dari siꞌ, magti du ga si Yaꞌkub matimmos mari tahan da pilay pa lahat mmaꞌ na si Isahak ndooy ni Kanan. Lay na sohoꞌ si Yaꞌkub kinumpo mimon siga baanan hayop na ka altaꞌ ma bay takoleꞌ na halloman na ni Paddan-Aram. Pus meꞌ looy, lay na pabakuraꞌ na ga anak-nda na taꞌ untaꞌ, 19-20boꞌ da patangkaw lakka sikamimon. Sila siꞌ tu bay palakka likutan si Laban bay ngukuhan siga bili-bili na ni katāhan. Boꞌ lay gi tinangkaw leꞌ si Rakel ga tuhan-tuhan mmaꞌ na. 21Ni bay kalakka ga si Yaꞌkub, lay na boo da mimon bbuwatan da sampay lay na sila pagattas pa dambilaꞌ Sōng Yupretes, boꞌ da pasōng pa kapunu-punuhan ndooy ni Giliyad.

Si Laban nuhut si Yaꞌkub

22Luu jaꞌ siꞌ tallu ngallaw, lay na kabaan si Laban lay na lahi ga si Yaꞌkub. 23Dari ilooy ma lay du ya magti moo baanan kakampungan na nuhut. Paddus pituꞌ ngallaw, lay na taabut da ga si Yaꞌkub ni kapunu-punuhan ndooy ni Giliyad.

24-25Na ga si Yaꞌkub siꞌ tu lay na matangge lumaꞌ luna da ni kapunu-punuhan ndooy. Ga si Laban pun lay na du matangge lumaꞌ luna da tapit ndooy. Pag-anu, sangom looy du siꞌ, lay si Laban tinammuhan meꞌ Tuhan njawom upihan. Yuk Tuhan niiya, “Paayad-ayad ko. Daa usik-usikun si Yaꞌkub.”

26-27Pag taabut sayu, lay si Laban pilay pa mman si Yaꞌkub, maka yuk na niiya, “Ongoy doꞌ ina subay na pin ko patangkaw? Saꞌ ga bina oy, lay jaꞌ ku tipu nu. Meꞌ nu buwat siga anak ku, subay ga pilisu bay jaꞌ tasungkub nu ni bonoꞌ. Bong siꞌ ko bay doꞌ muhun niyaku, lay doꞌ ku ballang mehe man ku ngalak kaam ddas ka tagungguꞌ ka gital, boꞌ bi palakka ku njawom kasalassayan. 28Boꞌ inaa, yaꞌ san ku bay paūkan nu ga anak-mpu ku. Boꞌ na, yaꞌ na san sila bay kapuhun niyaku. Karupangan bilay bay pabuwat nu. 29Bong siꞌ ko taaku ku pinidjalaꞌ, yaꞌ sina luu dapat nu. Para na pin, dabuhiꞌ lay ku binandaan meꞌ Tuhan ma inisbat meꞌ mmaꞌ nu, yaꞌ ko nohoꞌ inusik-usik. 30Katoonan ku du bina hallom na pinagdautan meꞌ nu moleꞌ pa lumaꞌ mmaꞌ nu. Sugaꞌ ongoy baw taggahaꞌ lay gi tangkaw nu siga tuhan ku?”

31-32Na si Yaꞌkub siꞌ tu, yaꞌ bay tasayu na bay tangkaw si Rakel siga tuhan-tuhan si Laban. Dari yuk na ni si Laban, “Ilooy baw ba la man kami bay patangkaw sabap tawu ku taggahaꞌ yaꞌ na baw mintu patugutan nu ga anak-mpu nu. Boꞌ ni hāl siga tuhan nu, soysoy jaꞌ batnaa bay katammuhan meꞌ nu subay sina pinapatoy. Itu na du siga baanan ta saliꞌ-saliꞌ, sila sa saksiꞌ. Sigi, ngadkad na ko. Bong mintu bay luu tatammu nu pabuwatan nu, kaddoun na.”

33Pag-anu, ilooy ma lay du piniha meꞌ si Laban njawom lumaꞌ luna si Yaꞌkub, boꞌ na pa jawom lumaꞌ luna si Liya. Pag-anu, boꞌ na pa jawom ga lumaꞌ luna ga nda si Yaꞌkub, ilooy ma ata sikaduwa, sugaꞌ yaꞌ san bay tatammu na. Katapusan, lay na ya paasok pa jawom lumaꞌ luna si Rakel.

34Na bbuwatan si Rakel baw siꞌ tu, lay nnaꞌ na ga tuhan-tuhan looy ni diyoꞌ pako untaꞌ na, boꞌ lay tingkoan na. Dari lataꞌ na man si Laban bay miha njawom lumaꞌ luna na, sugaꞌ yaꞌ du luu bay tatammu na.

35Pag-anu yuk si Rakel ni mmaꞌ na, “Bong anu, daa doꞌ ku kalasuhan nu, Maꞌ. Yaꞌ ku la katangge ni pag-awpan nu batan lahaan ku.” Dari san du pooy meꞌ si Laban bay miha ga tuhan-tuhan na, yaꞌ du bay tatammu na.

36Kuwan si Yaꞌkub siꞌ tu, yaꞌ na tasaggaꞌ na lasu na, sampay lay na ga ya kapanilaw, yuk na, “Meꞌ noy na doꞌ tu ehe dusa ku subay ga ku sugaru lay gi ku onse nu? 37Batnaa pagka lay na kadkad nu pangaltaꞌ ku, haplagun na sagannap ma bay tatammu nu ni awpan paglūng ta mari tabanding da soy kita sāꞌ. 38Ongoy ko os-os nanggap aku? Njawom duwampūꞌ taun halloman ku bay buwat mman nu, yaꞌ bay pingkaꞌ maglumba meꞌ siga bili-bili nu ka ga kambing nu hanak. Maka yaꞌ ku bay pingkaꞌ ngulang san disu binuwat lawuk. 39Bong luu bay sinabbat meꞌ halimaw, yaꞌ na san ku bay pingkaꞌ makitahan kau lagi. Atas ku jaꞌ bay magkalugian nganggantiꞌ. Luu-luu bay tinangkaw, sangom na ka llaw na ka, bay jaꞌ du sohoꞌ nu binayaran niyaku. 40Halloman ku bay ngipat ga hayop nu, tud bay tiksaꞌ ku. Tuwaꞌ pa llaw, wā ku naggaan pasuꞌ. Pag sangom, katannehan na baw ku, boꞌ yaꞌ na bay laddok meꞌ ku tuli. 41Njawom duwampūꞌ taun, meꞌ looy na jaꞌ bay kaadaan ku halloman ku bay njawman nu. Sibuwa ku buwat man nu, sapu-mpat taun banahan bong pin bay jaꞌ takoleꞌ anak nu sikaduwa. Pag-anu, pasunuꞌ lagi nnom taun halloman ku bay buwat bong pin lay jaꞌ ku koleꞌ bahagiꞌ ni baanan hayop nu. Ulihan mandooy, min sapū lagi bay baluba nu meꞌ nu bay nganggadjihan aku. 42Meꞌ nu ilay bay buwat aku, bong saꞌ bay man tabang Tuhan ma inisbat meꞌ mmaꞌ ku si Isahak ka Boꞌ ku Ibrahim, lay jaꞌ ku moleꞌ limboy-limboy tangan. Lipara, lay du kinanna meꞌ Tuhan katiksaan ku ka hulas-sangsāꞌ ku bay buwat ningkau. Ilooy silay kon nu bay sinaggong meꞌ na dabuhiꞌ.”

Pagsulutan si Yaꞌkub ka si Laban

43Yuk si Laban baw, “Si Liya ka si Rakel anak ku, maka siga anak da pun isi ku du. Siga baanan hayop naa pun lakka man aku du. Sampay mimon altaꞌ ma luntuu, lakka man aku du. Sugaꞌ yaꞌ na situ luu dapat ku mawiꞌ. 44Sangkon buwat doꞌ kita pagsulutan mari kita salassay na. Tu kam, nappuk kitabi batu mari luu pangindanan ni pagsulutan ta.”

45Dari siꞌ lay na ngaddoꞌ si Yaꞌkub disu batu tahaꞌ boꞌ pinatangge meꞌ na. 46Pag-anu, boꞌ na nohoꞌ tinabangan ni siga lūng-kampung na nappuk batu man ngaliput ilooy siꞌ ma bay pinatangge. Pag lupus, lay na ga si Yaꞌkub ka ga si Laban mangan-mangan ndooy ni bihing tappukan batu looy.

47Pag-anu, lay awnan si Laban tappukan batu looy Jegal Sahaduta, hatiyan na, “tappukan pangindanan” ni pallun Arameya. Si Yaꞌkub baw, meꞌ na bay ngawon, Galeed, hatiyan na, “tappukan pangindanan” ni pallun Hibrani.

48Dari yuk si Laban ni si Yaꞌkub, “Tappukan batu tuu, ituu na pangindanan ni pagsulutan ta llaw tuu. 49Tuhan sa nganjagahan kita. Na soysoy mintu kita bay maluba pagsulutan ta, hinisab du sina meꞌ Tuhan.” Dari ilooy na man lahat looy bay du ginalla Mispa, hatiyan na, “lumaꞌ langkaw man nganjaga.” 50Bay gi halling si Laban, “Na bong mintu bay sarī meꞌ nu ka ga anak ku atawa bay gi ko handa danda sarī, indanan nu, san ina yaꞌ takita ku, takita du sina meꞌ Tuhan.”

51Maka yuk si Laban lagi ni si Yaꞌkub, “Ndaun na batu tahaꞌ naa ma bay pinatangge ka tappukan batu ma ngaliput iya. 52Ituu na sikaduwa pangindanan ni pagsulutan ta. Pagsulutan ta meꞌ tuu: Basta yaꞌ ku dari palingkaꞌ man pangindanan tuu bong luu maksud ku ngalān kau. Damikiyan, yaꞌ du ko dari palingkaꞌ pa dambilaꞌ pangindanan tuu bong luu maksud nu ngalān aku. 53Na soysoy mintu kita bay maluba pagsulutan ta siꞌ, kalabuan jaꞌ du sina hukuman meꞌ Tuhan ma inisbat meꞌ Boꞌ nu Ibrahim ka Boꞌ ku Nahol, ka mmaꞌ da Boꞌ Tera.”

Dari lay na si Yaꞌkub napa pa Tuhan Sangat Kawasa ma inisbat meꞌ mmaꞌ na si Isahak, basta yaꞌ na baluba na pagsulutan na ka si Laban. 54Maka lay gi ya numbaliꞌ hayop man na ngulban pa Tuhan ndooy ni kapunu-punuhan lahat looy. Pag-anu, boꞌ lay na boo na sikamimon ndooy mangan-mangan. Pag lupus, lay na doꞌ sila tuli ndooy dambahangi.

55Pag taabut sayu, awwal lagi, lay na inūk meꞌ si Laban ga anak-mpu na boꞌ da pinakuhan supaat. Pag lupus, lay na ya muhun moleꞌ.

Currently Selected:

Panagnaan 31: sjm

Highlight

Copy