Panagnaan 28

Si Yaꞌkub sinohoꞌ pilay pa mman si Laban

1Pag lay jaꞌ siꞌ kabaan si Isahak meꞌ looy, lay du sohoꞌ na kinaddoꞌ si Yaꞌkub. Luu jaꞌ siꞌ, lay ya pinakuhan meꞌ mmaꞌ na supaat pa Tuhan, boꞌ lay gi ya tinugunan meꞌ mmaꞌ na, yuk na, “Toꞌ, amay-amay daa ko handa ntuu ni bangsa Kanan. 2Gam na ko pilay pa Paddan-Aram, pa paglahat Boꞌ nu Betuwel, boꞌ nu handa ni disu anak Paꞌ nu Laban. 3Kamura-murahan sinupaatan du ko meꞌ Tuhan Sangat Kawasa supaya meka panubuꞌ nu. Maka kamura-murahan siga panubuꞌ nu dari poonan jinisan kabangsa-bangsahan. 4Kamura-murahan labuꞌ pa kau na sampay ga panubuꞌ nu bay supaat njataꞌ Boꞌ nu Ibrahim mari kapakaam na paglahat tuu man tabi sampi. Ndang-ndang lay du situ njanjiꞌ leꞌ Tuhan tanaꞌ tuu ndean Boꞌ nu Ibrahim.”

5Pus meꞌ looy, lai na si Yaꞌkub sohoꞌ si Isahak pilay pa Paddan-Aram, pa lumaꞌ Paꞌ na Laban, yana danganakan nneꞌ na si Ribeka. Sila ilay siꞌ sikaduwa anak si Betuwel, jama Aram.

Si Esaw handa pabalik

6-7Na si Esaw siꞌ tu, lay na baw taaka na si Yaꞌkub bay sinupaatan meꞌ mmaꞌ da sampay lay gi inamay-amayan yaꞌ nohoꞌ handa ni bangsa Kanan. Maka lay gi taaka na lay na du si Yaꞌkub ngasip ni bay sohoꞌ induꞌ mmaꞌ da handa pilay pa Paddan-Aram. 8Dari tabista si Esaw na yaꞌ suka mmaꞌ na ni karandahan bangsa Kanan. 9Sangkon lay ya pilay miha nda pa jawom paglūng Paꞌ na Ismail, yana anak si Ibrahim ka si Hajal. Dari lay na ya handa ni disu anak Paꞌ na Ismail yana si Mahalat, siyali si Nebayot. Dari tallu na nda si Esaw.

Si Yaꞌkub ngupi ni Betel

10Kuwan si Yaꞌkub siꞌ tu, pag lakka na man paglahat induꞌ-mmaꞌ na ndooy ni Beel-Siba, lay na ya patiluꞌ pa Haran. 11Lān na pilay, lay ya kasangoman ni lahat lau-lau yaꞌ maglumaꞌ. Dari lay ya ngaddoꞌ batu man na tangū sampay lay jaꞌ ya tuli taꞌ tanaꞌ. 12Sasang na tuli, lay ya ngupi. Njawom pandapat na, ngita ya haron nakka pa sulgaꞌ kōk na. Kuwan battis na nappak taꞌ gumi. Maka ngita ya siga malaikat Tuhan magduwai-dutai taꞌ haron looy. 13Maka takita na na Papuꞌ nangge ni jataꞌ ni bihing kōk haron looy magpalman, yuk na, “Aku na situ Papuꞌ, yana Tuhan Boꞌ nu Ibrahim ka Tuhan mmaꞌ nu si Isahak. Tanaꞌ tuu man nu pabāk pamuwan ku na situ kau sampay na ga panubuꞌ nu bbos-bbos. 14Ga panubuꞌ nu ina mintu, mas mura gi initung momok tanaꞌ man sila tandaꞌ ni kaeka da. Maka ngalelet na pin sina mintu sila pa sikaliput pidju alam. Bbos-bbos ina mimon kabangsa-bangsahan sinupaatan na man sabapan nu ka panubuꞌ nu. 15Paninggai-paninggai ko, basta unungan ta jaꞌ sina ko maka aku sa ngagpangan kau ni oy-oy piligru. Maka boo ta sa ko bbeleng pa lahat tuu. Yaꞌ du ko pabiya ku. Mimon ma bay janjiꞌ ku ningkau, mastiꞌ tuman ku jaꞌ sina.”

16Pag batiꞌ si Yaꞌkub, honaꞌ-honaꞌ na, “Uy la, luu bitu hati Papuꞌ ni lahat tuu, yaꞌ san bay taingat ku.” 17Dari siꞌ ngassing na ga bū na sambayan na halling, “Tud katawu-tawu la lahat tuu, subay ga bitu lumaꞌ Tuhan. Uy la, ituu na bitu behe lawang pa sulgaꞌ!”

18Pag deꞌ sayu, bangun na si Yaꞌkub boꞌ lay patangge na batu looy siꞌ man na bay tangū binuwat pangindanan limpaꞌ man na bay tinammuhan meꞌ Tuhan. Pag-anu, boꞌ na tinumpahan insallan. 19Pag lupus, lay na baw awnan na lahat looy Betel, hatiyan na “Lumaꞌ Tuhan.” Sibuwa ilay siꞌ awon na Luz.

20-21Pag-anu, jawom atay si Yaꞌkub, “Bong mintu Tuhan ngunungan aku sampay ngayaran aku ni palanan ku, boꞌ buwanan na lagi ku balanjaꞌ ka pakayan halloman ku yaꞌ gi takka balik pa lumaꞌ mmaꞌ ku, sapahan ku na, isu-isu iya sumba ku.” 22Pag-anu siꞌ, yuk si Yaꞌkub pa Tuhan, “Papuꞌ, batu tuu siꞌ ma bay patangge ku, ituu na pangindanan ni lugar man jama numba kau. Maka ni mimon ma dean nu aku mintu, basta songan ku du ningkau sabahagiꞌ sapū.”

Currently Selected:

Panagnaan 28: sjm

Highlight

Copy