Panagnaan 15

Janjiꞌ Tuhan ni si Ibram

1Na paddus meꞌ looy, yaꞌ gi hallom, lay na baw si Ibram tinammuhan meꞌ Tuhan. Njawom pandapat na, yuk Tuhan niiya, “Ū Ibram, daa ko tawu ni oy maka oy na. Luu na pin situ ku ngagpangan kau. Maka buwanan ta du sina ko ladjikiꞌ mehe.”

2-3Pag tampung si Ibram, “Papuꞌ ku, oy lay la paluntungan takoleꞌ ku ni ladjikiꞌ ma dean nu bong ga meꞌ tuu yaꞌ san luu anak ku? Bong itu amu-amu meꞌ tuu karuha ku ngabut sampay ku matoy, ilooy du mintu kapusakahan mimon altaꞌ ku yana tindog ku si Eliyesel. Boꞌ bangsa sarī lagi ya, jama man Damaskus.”

4Pag tampung Tuhan, “Saꞌ du bilay iya kapusakahan altaꞌ nu bbos-bbos, batan anakan na du sina mintu ko lalla. Boꞌ iya na du sina mintu koleꞌ pusaka nu.”

5Pus meꞌ looy, lay na baw si Ibram binoo meꞌ Tuhan pa poan maka yuk na, “Pahangad ko pilay pa taꞌ langit. Ndaun teꞌ bong taitung nu ga potean naa. Meꞌ naa du sina eka panubuꞌ nu bbos-bbos.”

6Na si Ibram siꞌ tu, lay na jaꞌ pitsayaꞌ ni palman Tuhan. Pag ndaꞌ Tuhan meꞌ looy, lay si Ibram initung meꞌ na intong.

7Maka yuk Tuhan niiya, “Aku na situ Papuꞌ, yana ilooy ma bay nohoꞌ kau pitu lakka man Ul ni lahat bangsa Kaldiya supaya tadean ku kau lahat tuu.”

8Sugaꞌ yuk si Ibram, “Papuꞌ ku, kau ma magbayaꞌ, bong siꞌ kadarihan ningkau, pakitahan doꞌ ku sipat mari tatantu ku lahat tuu kapaaku bbos-bbos.”

9Pag tampung Tuhan niiya, “Bong ko doman ngita sipat, kaddoan nu ku disu sapiꞌ danda ka disu kambing danda sampay disu bili-bili lalla, saliꞌ-saliꞌ umu tallun taun. Maka kaddoan nu du ku disu takukkul ka disu anak atsang.”

10Na luu jaꞌ siꞌ mimon ma bay sinohoꞌ meꞌ Tuhan, lay na sinumbaliꞌ mimon meꞌ si Ibram. Pag-anu, lay na baw sinebak duwa meꞌ na ga hayop looy siꞌ boꞌ binanja pinagsiatag sebakan da. Sugaꞌ kuwan ga manuk-manuk looy, yaꞌ baw bay sebak na pus da bay sinumbaliꞌ. 11Pag-anu siꞌ, luu na baw takka siga manuk-manuk mehe ma magpamangan sumpatoy nampi taꞌ ga sumbalian looy. Sugaꞌ lay hinuka meꞌ si Ibram.

12Tapit jaꞌ siꞌ sumaddop llaw, lay kapatuli si Ibram paladdok. Na njawom na siꞌ tuli, lay ya ngupi. Njawom pandapat na lay ya kalindoman sampay sinawan na ga ya.

13-15Pag-anu siꞌ, magpalman na baw Tuhan niiya, yuk na, “Ibram, daa ko ba tawu. Patahaꞌ ku du sina umu nu ngabut sampay nu toa laslas. Pag patoy nu ina mintu, njawom sannang atay jaꞌ ko. Sugaꞌ baan ta ko banahan, bbos-bbos lumangga jaꞌ sina siga panubuꞌ nu ni kasusahan mehe sasang da sampi ni lahat disu. Pinahata sina mintu sila ndooy, boꞌ bininsanaꞌ lagi meꞌ jama lahat looy njawom mpat hatus taun. Sugaꞌ pidjalaꞌ ku du sina mintu jama lahat looy ma bay mahata sila. Maka pag taabut jaꞌ ilay mintu palakka siga panubuꞌ nu mandooy, kaboo du sila pangaltaꞌ mehe. 16Na ga panubuꞌ nu ina mintu, sakayi da pabeleng pitu pa Kanan, noy paddus na mpat hatus taun looy siꞌ halloman da bay pinahata ni lahat looy siꞌ. Taabut masa looy ilay mintu, siga panubuꞌ nu pagantiꞌ na ni bangsa Amol ma maglahat ntuu ni Kanan. Ni masa looy ilay mintu, biddaꞌ na kalaatan bangsa Amol. Sangkon pidjalaꞌ ku na sina mintu sila. Sohoꞌ ku na sila pinalakka ni siga panubuꞌ nu. Sugaꞌ batnaa, layam-layam ku na doꞌ batan yaꞌ gi taabut timpu looy mintu man ku yaꞌ na katatas ngandaꞌ kalaatan da.”

17Pag sangom jaꞌ siꞌ sampay lindom banahan na lahat, luu na tulun poga-poga isihan bā api ngahumbu na ka luu du paliyatut noleyab na. Ilooy siꞌ sikaduwa lay pingkaꞌ man sallangan ga sebakan hayop looy siꞌ. 18Maka ni waktu looy du siꞌ, lay na baw Tuhan bay nganjanjiꞌ ni si Ibram, yuk na, “Dean ku na sina mintu siga panubuꞌ nu mimon lahat tuu, labba man sōng ni bihing panggaan Ejip ngabut sampay pa Sōng Yupretes. 19Ni batnaa, tanaꞌ tuu tu pinaglahatan gi meꞌ ga bangsa Kēn, bangsa Kenis, bangsa Kadmon, 20bangsa Hīt, bangsa Peris, bangsa Repa, 21bangsa Amol, bangsa Kanan, bangsa Gilgas maka bangsa Jebus.”

Currently Selected:

Panagnaan 15: sjm

Highlight

Copy