यहुन्ना 4

ईसू अन सामरी लुगई

1फरीसी मनकाँ हुण्यो हे के, ईसू यहुन्नाऊँ हेला चेला बणारियो हे अन वाँने बतिस्मो देवे हे, 2पण ईसू खुद ओ बतिस्मा को काम ने करता हा, पण वींका चेला ओ काम कररिया हा। 3जद्याँ ईसू ने ओ पतो पड़्यो के, फरीसी यो हुण्यो, तो वीं यहूदियाँ परदेस ने छोड़न पाच्छा गलील परदेस का आड़ी पराग्या। 4अणी टेम वींने सामरिया परदेस वेन जाणो पड़्यो।

5 # उत्प 33:19; यहो 24:32 ईं वाते वीं सामरिया परदेस के सुखार नगर में आया, यो नगर वीं जगाँ का नके हो, जिंने बड़ाबा याकूब आपणाँ बेटा युसुप ने दिदी ही। 6बड़ाबा याकूब को कूड़ो भी वटेईस हो। ईं वाते ईसू गेलाऊँ थाक्या तका वीं कूण्ड़ा पे रईम्बो लिदो, अन या बात दपराँ की टेम वीं।

7अतराक में एक सामरी लुगई पाणी लेबा ने अई, तो ईसू वणीऊँ क्यो, “मने पाणी पई दे।” 8वीं दाण वींका चेला तो नगर में खाणो मोल लेबा ने ग्या तका हा।

9 # नेम्या 4:1,2 वणा दनाँ में यहूदी सामरिया मनकाऊँ कई वेवार ने राकता हा। ईं वाते वणी सामरी लुगई वाँकाऊँ क्यो, “थूँ यहूदी वेन एक सामरी लुगईऊँ पाणी काँ मांगे हे?”

10ईसू वींने जवाब दिदो, “यद्याँ थूँ परमेसर का दान ने जाणती, अन ओ भी जाणती वो कुई हे, ज्यो थाँराऊँ केवे हे, ‘मने पाणी पा’, तो थूँ वणीऊँ मांगती अन वो थने जीवन को जळ देतो।”

11वणी लुगई वाँकाऊँ क्यो, “हो हुकम, थाँके नके पाणी भरबा को तो कई ने हे अन कूड़ो भी ऊण्डो हे, तो वो जीवन को जळ थाँरा नके कटेऊँ आयो? 12कई थूँ माकाँ बड़ाबा याकूबऊँ मोटो हे, जणी माने ओ कूड़ो दिदो अन वणी खुद अन वींकी ओलाद अन वींका ढान्ढा-ढोर के हाते अटेऊँ पाणी पिदो?”

13ईसू वींने जवाब दिदो के, “ज्यो कुई अटूँ पाणी पीई वींने पाच्छी तर लागी, 14पण ज्यो कुई वो पाणी पीई ज्यो मूँ वाँने देऊँ, वाँने पाच्छी कदी तर ने लागे। पण ज्यो पाणी मूँ वाँने देवूँ, वो वींमें अनंत जीवन देबावाळी नंदी बण जाई।”

15वणी लुगई वाँकाऊँ क्यो, “हो मालिक, वो पाणी मने दे, ताँके मूँ पाच्छी तरी ने वूँ अन नेई मने पाणी लेबा ने अतरी छेटी आणो पड़े।”

16ईसू वींने क्यो, “जा, आपणाँ घरधणी ने अटे बला ला।”

17वीं लुगई जवाब दिदो, “मूँ बना धणी की हूँ।”

ईसू वींने क्यो, “थूँ सई केवे हे के, थूँ बना धणी की हे। 18काँके थूँ पाँच धणी कर चुकी हे, अन जिंका नके थूँ अबाणू हे, वो भी थारो धणी ने हे। ईं वाते थें क्यो वो सई हे।”

19वीं लुगई क्यो, “हो मारा मालिक मने पतो पड़रियो हे के, थूँ परमेसर का आड़ीऊँ बोलबावाळो हे। 20माकाँ बड़ाबा ईं मंगरा का ऊपरे आरादना करता हा अन थाँ यहूदी केवो हो के, यरूसलेमईस आरादना करबा की जगाँ हे।”

21ईसू वींने क्यो, “हे लुगई, मारी बात पे विस्वास कर के, वाँ टेम आरी हे के, थाँ मनक ने तो ईं मंगरा पे बापू परमेसर की आरादना करो अन नेई यरूसलेम में। 22थाँ सामरी मनक यो ने जाणो हो के, थाँ किंकी आरादना करो हो, पण माँ यहूदी मनक जाणा हा के, माँ किंकी आरादना कराँ हा, काँके यहूदियाँ मेंऊँस उदार आवे हे। 23पण वाँ टेम आरी हे, अन अबाणू भी हे जद्याँ पुवितर आत्मा की तागतऊँ मनक परमेसर की हाँची आरादना करी, जस्यी परमेसर छावे हे। 24परमेसर आत्मा हे, अन ओ जरूरी हे के, वींकी आरादना आत्मा अन हाँचऊँ करणी छावे।”

25वणी सामरी लुगई क्यो, “मूँ जाणूँ हूँ के, मसी जिंको मतलब चुण्यो तको हे, वो आबावाळो हे, जद्याँ वो आई, तो आपाँने हारी बाताँ बता देई।”

26ईसू वींने क्यो, “मूँ ज्यो थाँराऊँ बाताँ कररियो हूँ, मूँ वोईस हूँ।”

27अतराक में वींका चेला भी आग्या अन अचम्बो करबा लागा के, वो लुगईऊँ बाताँ कररियो हे। तद्याँ भी कणी भी वणी लुगईऊँ ने पूँछ्यो के, “थूँ कई छावे हे?” अन नेई ईसुऊँ के, “थूँ कणी वाते वणीऊँ बात कररिया हो।”

28तद्याँ वाँ लुगई आपणी पाणी भरबा की वेली वटेई छोड़न नगर में परीगी अन लोगाऊँ केबा लागी, 29“आवो, एक मनक ने देको, जणी हारोई बता दिदो, ज्यो कई में किदो। कई ओईस मसी तो ने हे?” 30ईं वाते मनक नगरऊँ निकळन ईसू का नके आबा लागा।

31वीं दाण चेला ईसुऊँ अरज करबा लागा, “हो गरुजी, कई खई लो।”

32पण ईसू वाँकाऊँ क्यो, “मारा नके खाबा के वाते अस्यो खाणो हे जिंने थाँ ने जाणो हो।”

33तद्याँ चेला एक-दूजाऊँ क्यो, “कुई ईंका वाते खाणो तो ने लायो?”

34ईसू वाँने क्यो, “मारो खाणो ओ हे के, मूँ मने खन्दाबावाळा की मरजी पे चालूँ अन वींको काम पूरो करूँ, ज्यो वणी मने हुप्यो हे। 35कई थाँ ने केवो के, ‘हाक काटबा में अबाणू भी च्यार मिना पड़्या तका हे’? देको, मूँ थाँकाऊँ केवे हूँ, आपणी आक्याँऊँ खेता ने देको, वीं हाक काटबा के वाते त्यार वेग्या हे। 36अन हाक काटबावाळा दानक्याँ दानकी पावे अन अनंत जीवन का वाते हाक ने भेळी करे हे, ताँके बोवावाळा अन काटबावाळा दुई मलन आणन्द मनावे। 37काँके ईंपे आ कावत ठीक बेटे हे के, ‘वावे कुई ओर अन काटे कुई ओर हे।’ 38में थाँने वो खेत काटबा के वाते खन्दाया, जिंमें थें काम ने किदो। वींमें दूजाँ मेनत किदी अन अबे थाँ वाँकी मेनत का काम का फळ में भी भागी बणग्या हो।”

सामरी मनकाँ को ईसू पे विस्वास करणो

39वणी सामरी लुगई की गवई की वजेऊँ घणा सामरी मनकाँ ईसू पे विस्वास किदो। काँके वणी लुगई गवई में क्यो हो के, “में ज्यो कई किदो हो, वो हाराई वणा बता दिदो।” 40जद्याँ वीं सामरी लोग-बाग वाँका नके आया अन अरज करबा लागा के, “माकाँ अटे रेवो।” ईं वाते ईसू वटे दो दन तईं रियो।

41ईसू का बचनाँ ने हुणन दूजाँ ओरी नरई सामरी मनकाँ भी वाँका पे विस्वास किदो। 42वणा मनकाँ वीं लुगईऊँ क्यो, “अबे थाँरे केबाऊँईस विस्वास ने करा हा, पण माँ खुद ईंने हुणन जाणग्या हाँ के, योईस हाँची में ईं दनियाँ ने बंचाबावाळो हे।”

ईसू अदिकारी का छोरा ने हव करणो

43पछे ईसू वटे दो दन रिया अन पछे वटूँ गलील परदेस में पराग्या। 44#मत्ती 13:57; मर 6:4; लूका 4:24काँके ईसू खुदई क्यो हो के, कुई परमेसर का आड़ीऊँ बोलबावाळा आपणाँ खुद का देस में आदर-मान ने पावे हे। 45#यहु 2:23जद्याँ वो गलील में आयो, तो गलील का लोग-बाग वींकी आवभगत किदी। काँके वणा वींका कामाँ ने देक्याँ हा, जद्याँ वणा यरूसलेम में फसे के तेवार पे किदा हा। काँके वीं दाण ईं मनक भी वटे तेवार में ग्या तका हा।

46 # यहु 2:1–11 ईंका केड़े पाछो वो गलील का काना नगर में ग्यो जटे वणी पाणी को अंगूरा को रस बणायो हो। अन वटे एक कफरनूम नगर का राजा को अदिकारी हो, जिंको छोरो मांदो हो। 47जद्याँ वणी अदिकारी यो हुण्यो के, ईसू यहूदियाँ परदेसऊँ गलील परदेस में आग्या हे, तो वो वाँके नके ग्यो अन वाँकाऊँ अरज करबा लागो के, “चालो, अन मारा छोरा ने हव कर दो, काँके वो मरबा में हे।” 48ईसू वीं अदिकारी ने क्यो, “जद्याँ तईं थाँ हेन्याण अन अचम्बा का कामाँ ने ने देको तद्याँ तईं थाँ विस्वास ने करो।”

49अदिकारी ईसुऊँ क्यो, “हे मालिक, मारा छोरा की मोत वेबाऊँ पेल्या परा चालो।”

50ईसू वींने क्यो, “जा, थाँरा छोरा को बाल ईं वाँको ने वेई।”

वणी ईसू की बात पे विस्वास किदो अन परोग्यो। 51अन जद्याँ वो अदिकारी गेला मेंईस हो के, वींका नोकर वींके नके आग्या अन केबा लागो के, “थारो छोरो हव वेग्यो हे।”

52वणी वाँकाऊँ पूँछ्यो, “छोरो कणीक दाण हव व्यो?” वाँकाणी क्यो, “काले दपराँ की टेम का लगे-भगे वींको ताव उतरग्यो हो।” 53तद्याँ वीं छोरा को बाप जाणग्यो के, ओ वीं टेम व्यो जणी टेम ईसू वणीऊँ क्यो के, “जा थाँ छोरा को बाल ईं वाँको ने वेई।” ईं वाते वणी अन वींका हाराई परवारवाळा ईसू पे विस्वास किदो।

54यो दूज्यो परच्यो हो ज्यो ईसू यहूदियाँ परदेसऊँ गलील परदेस में आन दिदो।

Currently Selected:

यहुन्ना 4: एम टी आर

Highlight

Copy