यहुन्ना 13

ईसू आपणाँ चेला का पगाँ ने धोया

1फसे का तेवार पेल्याँ जद्याँ ईसू जाणग्यो के, “मारी वाँ घड़ी आ पूगी हे के, मूँ दनियाँ छोड़न बापू का नके जाऊँ।” तो ईसू आपणाँ लोगाऊँ ज्यो दनियाँ में हाँ, जस्यान परेम वो राकतो हो आकरी तईं वस्यानीस परेम राकतो रियो।

2जद्याँ ईसू अन वींका चेला हाजकाँ की टेम में खाणो खारिया हा, वीं टेम समोन का पूत यहूदा इसकरियोती का मन में सेतान ईसू ने धोकाऊँ पकड़वाबा की बाताँ नाक दिदी ही। 3ईसू, यो जाणता हा के, “परमेसर हारोई मारा हाताँ में कर दिदो हे अन मूँ परमेसर का नकेऊँ आयो हूँ अन परमेसर का नके जावूँ हूँ।” 4ईं वाते ईसू खाणो खाता तका उटन आपणो कुरतो उतार दिदो अन हस्ताड़ो आपणी कमर पे लपेट दिदो। 5तद्याँ गड़ा में पाणी भरन चेला का पगाँ ने धोबा लागो अन जणी हस्ताड़ाऊँ वाँकी कमर बन्दी ही वणीऊँ वाँका पगाँ ने पूँछबा लागो।

6जद्याँ वो समोन पतरस का नके आयो तद्याँ पतरस वाँने क्यो, “हो परबू, कई थाँ मारा पगा ने धोवो?”

7ईसू वींने क्यो, “ज्यो मूँ करूँ, थूँ ईंने अबाणू ने जाणे हे, पण पछे हमज जाई।”

8पतरस वींने क्यो, “अस्यो कदी ने वेई के, थाँ मारा पगाँ ने कदी धोवो।”

यो हुणन ईसू वींने क्यो, “यद्याँ मूँ थाँरा पग ने धोऊँ, तो थूँ मारो चेलो ने हे।”

9समोन पतरस वींने क्यो, “हो परबू, मारा पगा नेईस ने, पण हात अन माता ने भी धो दो।”

10ईसू वींने क्यो, “ज्यो हापड़ चुक्यो हे वाँने पगा के अलावा कई धोबा की जरुरत ने हे। पण एक ने छोड़न थाँ हाराई सई हो।” 11ईसू तो आपणाँ पकड़ाबावाळा ने ओळकतो हो ईं वाते वणी क्यो, “एक ने छोड़न थाँ हाराई सई हो।”

12 # लूका 22:27 जद्याँ वो वाँका पगा ने धो चुक्यो अन आपणाँ कोट पेरन पाछो आपणी जगाँ पे बेटग्यो, तो वो वणाऊँ केबा लागो, “कई में ज्यो किदो वींका बारा में थाँ हमज्या? 13थाँ मने ‘गरू’ अन ‘परबू’ केवो हो। थाँ सई केवो हो, काँके मूँ वोईस हूँ। 14यद्याँ मूँ परबू अन गरू वेन थाँका पगाँ ने धोया तो थाँने भी एक दूजाँ का पगा ने धोणा छावे। 15काँके में थाँने नमुनो बता दिदो हे के, जस्यान में थाँका हाते किदो हे, थें भी वस्यानीस करता रेवो। 16#मत्ती 10:24; लूका 6:40; यहु 15:20मूँ थाँने सई-सई केवूँ हूँ, हाळी मालिकऊँ मोटो ने हे, अन नेई खन्दायो तको आपणाँ खन्दाबा वाळाऊँ। 17अबे थाँ यो हाँच जाणग्यो हो अन यद्याँ थाँ अस्यान करो तो परमेसर थाँने आसीस देई।

18 # भज 41:9 “मूँ थाँका हाराई का वाते ने केवूँ हूँ, जाँने में चुण लिदा वाँने मूँ जाणूँ हूँ, पण यो ईं वाते हे के, पुवितर सास्तर को यो लेक पूरो वे, ‘ज्यो मारा रोटा खावे हे, वीं मारा पे लात उठई।’

19“अबाणू वींके वेबा के पेल्याँ थाँने ईं वाते बतारियो हूँ ताँके जद्याँ यो वे जाई तो थाँ विस्वास करो के, मूँ वोईस हूँ। 20#मत्ती 10:40; मर 9:37; लूका 9:48; 10:16मूँ थाँने सई-सई केवूँ हूँ के, ज्यो मने खन्दाबावाळा ने माने हे, वो मने माने हे। अन ज्यो मने गरेण करे हे, वो मने खन्दाबावाळा ने भी गरेण करे हे।”

धोकाऊँ पकड़बा का बारा में आगेवाणी

21या बाताँ क्या केड़े ईसू मन में घणो दकी व्यो अन क्यो, “मूँ थाँने सई-सई केवूँ हूँ के, थाँकामूँ एक जणो मने धोकाऊँ पकड़ा देई।”

22तद्याँ चेला होच में पड़ग्या अन एक दूजाँ का मुण्डा ने देकबा लागा के, ईं किंका बारा में केरिया हे। 23ईसू चेला मेंऊँ एक चेलो लाड़लो केवातो हो, वो ईसू का नके बेटो हो। 24तद्याँ समोन पतरस वींका आड़ी हानी किदी के, वो ईसुऊँ पूछे के, “वो किंका बारा में केरिया हे?”

25तद्याँ वो ईसू का कान्दड़ा का नके मुण्डा लेजान क्यो, “हो परबू, वो कूण हे?”

26ईसू वाँने क्यो, “जिंने मूँ यो रोटी को कवो थाळी में डुबान देवूँ वोईस हे।” अन वणा कवो डुबान समोन इसकरियोती का पूत यहूदा ने दिदो। 27कवो लेताई सेतान वींमें धसग्यो।

तद्याँ ईसू वींने क्यो, “ज्यो थूँ करबा ने जारियो हे, वो जट कर।” 28पण जीमणा में बेठबावाला मेंऊँ कुई भी ने हमज्यो के, ईसू वणीऊँ या बात काँ किदी। 29यहूदा का नके रिप्या की नोळी रेती ही। ईं वाते वाँकाणी यो हमज्या के, ईसू वणीऊँ केरियो हे के, ज्यो कई आपाँने तेवार के वाते छावे वो मोल लिले कन पछे गरीबा ने कई दिदे।

30तद्याँ यहूदो रोटी को कवो लेन तरत बारणे परोग्यो अन या रात की टेम ही।

एक नुवी आग्या

31जद्याँ यहूदो बारणे परोग्यो तो ईसू क्यो, “अबे टेम आग्यो हे मूँ, मनक का पूत मेमावान व्यो हूँ अन माराऊँ परमेसर की मेमा वेई। 32यद्याँ माराऊँ परमेसर की मेमा वेवे हे तो तरत परमेसर खुद मूँ मनक का पूत ने मेमा देई।”

33 # यहु 7:34 “हो मारा प्यारा बाळकाँ, मूँ थाँका लारे थोड़ीक देर तईं हूँ, थें मने होदो अन जस्यान में यहूदी अदिकारियाऊँ क्यो हे, वस्यानीस मूँ थाँकाऊँ भी केवूँ हूँ, ‘जटे मूँ जारियो हूँ वटे थाँ ने जा सको।’ 34#यहु 15:12,17; 1 यहु 3:23; 2 यहु 1:5मूँ थाँने एक नुवी आग्या देरियो हूँ के, एक-दूजाऊँ परेम राको। जस्यान में थाँकाऊँ परेम किदो वस्यानीस थाँ भी एक-दूजाऊँ परेम राको। 35यद्याँ थाँ एक-दूजाऊँ परेम राको, तो अणीऊँ हाराई जाण जाई के, थाँ मारा चेला हो।”

पतरस ईसू ने ओळकबाऊँ नट जाई

36समोन पतरस ईसुऊँ क्यो, “हो परबू, थाँ कटे जावो हो?”

ईसू वींने क्यो, “जटे मूँ जावूँ हूँ वटे थूँ अबे मारा पाच्छे ने आ सके, पण ईंका केड़े थूँ मारा नके आई।”

37पतरस वाँने क्यो, “हो परबू, अबाणू मूँ थाँके पाच्छे काँ ने आ सकूँ हूँ? मूँ तो थाँका वाते मारो जीव देबा ने त्यार हूँ।”

38ईसू वींने क्यो, “कई थूँ हाँची में मारा वाते आपणो जीव देई? मूँ थाँराऊँ सई-सई केवूँ हूँ के, कूकड़ो जद्याँ तईं ने बोली वतरे थूँ तीन दाण मने ओळकबाऊँ नट जाई।”

Currently Selected:

यहुन्ना 13: एम टी आर

Highlight

Copy