Mark 16

Sa Ummuliyan Jesus

(Mat. 28:1-8; Luk. 24:1-12; Jhn. 20:1-10)

1Naḻaḵpus ḵad umillongan, ummoy da Mary Magdalene, Salome ya aḵ Mary ye inan James ngummina'ḵ bangbanglu ta umoyda iyappus si ladag Jesus. 2Dummingit ḵad init atte bigbigat si umunae aḻgaw ni sindumingguwan, ummoyda'tte nilibonana. 3Sa inggawanda si daḻan, ḵanandae nan-asiimus, “Ngai alligad si batu we onob ni liyang?” 4Dummatongda ḵad, inniladae naligad batu we daḵodaḵoḻ. 5Nillumnoḵda ḵad atte liyange libon, nataagdae nangila si babaḻu we tutuḵdu si madawinane nansilup aḵ itaḵ.

6Ḵanana ḵan dida, “Adi ḵayu maḵimut. Igammuḵe singsingtonyu'ḵ Jesus we iNazareth we sa nipattoḻ atte kros. Naippun sina te tinagun Apudyus ḵasin. Ilanyu ḵad, annaya inninggawana. 7Inḵayu ibaga ḵan Peter ya da udume disipulunae ummuna'ḵ Jesus ummoy atte probinsiya'd Galilee nu diḵayu. Ilanyu sidi te siya imbagana.”

8Pun daguse lummawa da bubai si liyang woḵ ummawiddae simpipilpil te naḵimtanda ya ippun igammuda'ḵ ḵoonda. Pun naippun paat tagu'ḵ nangug-uggudanda te naḵimtanda.

Sa Nampail-an Jesus Ḵan Mary

(Mat. 28:9-10; Luk. 24:22-24; Jhn. 20:11-18)

9Sa sadi ye wiḵwiḵis atte umunae aḻgaw ni sindumingguwan, ummuli'ḵ Jesus woḵ ummuna nampaila ḵan Mary Magdalene, sa bubai ye namaḻyawana'tta pitu we aḻan. 10Pun ummoy aḵ Mary atta disipulun Jesus we andomdom ya sin-iibil woḵ imbagana ḵan didae innilana'ḵ Jesus. 11Yaḵon dingngoḻda ḵade innilanae natagu ḵasin aḵ Jesus, adidapun pinati.

Sa Nampail-an Jesus Atta Duwae Disipuluna

(Luk. 24:13-35)

12Naabus ḵad, nampaila'ḵ Jesus atta duwae disipuluna si nanadtaddaḻanandae umoy si ili, naobos ḵatollongana. 13Pun nampaulida ta umoyda ibaga'tta buḻunda yaḵon adidapun os pinati dida.

Sa Nampail-an Jesus Atta Disipuluna

(Mat. 28:16-20; Luk. 24:36-49; Jhn. 20:19-23; Act. 1:6-8)

14Unipun, nampaila'ḵ Jesus atta nasawaḻan aḵ ossaane disipuluna si anḵaḵaḵananda woḵ sinang-ana dida gapu'tte ippun pammatida ḵan tummungitong somsomoḵda te adidapun pinati imbagan da nangila ḵan siya si ummuliyana. 15Pun ḵanana ḵan dida, “Inḵayu'tte losane lubung ta iwaḻagawagyu Ambaḻu we Damag atta losane tagu. 16Ngaimane amati ḵan saḵon ya mabonyagan, matagu. Yaḵon sa adipun amati, maḵoddongan aḵ madusa. 17Annaya da nakaskasdaawe sinyale ipailan da amati. Paḻyawonda da aḻan si angusaranda'tte ngadanḵu ya an-uguda'tta udume ugude adidapun igammu. 18Ḵad nu onnanda da uḻog baḵon nu uminumda'tta maḵodotan, adidapun madiwdiwat. Nu ipatayda da imada'tta nasaḵit, maḵaan da saḵitda.”

Sa Nipangatuwan Jesus Ad Langit

(Luk. 24:50-53; Act. 1:9-11)

19Nagangput ḵad da imbagan Apu Jesus ḵan dida, nipangatu'd langit woḵ tummuḵdu'tte madawinan Apudyus. 20Pun ummoy da disipuluna iwwaḻagawag Ambaḻu we Damag atta losane ili woḵ binadangan Apu dida. Pune sadi, pinanoḵnoḵana ḵinatuttuwaan ni tuttududa'tta nakaskasdaawe sinyale impaḵwana ḵan dida.

Currently Selected:

Mark 16: kml

Highlight

Copy