Luke 1

Sa Gapunae Nigili

1Madaydayawe Theophilus,

Adu da tagu we nangipapangoge nangigili'tta losane naḵwa ḵan diḵani'ḵ mituttuwaan da imbagan Apudyus. 2Niyiissu da inggilida'tta dingngoḻni ye inug-uggud da nangila'tte inggan ni lapun ni mipanggob ḵan Jesu Kristu we pinilin Apudyus aḵ Anagu ya An-ari ḵan nangiwaḻagawag os atta ḵingwana. 3Saḵon ḵad, ummaḵ pinanoḵnoḵan da sadi'tte nabayage timpu ya simsimmoḵḵu bose ambaḻu on-ontagoḵ igili da losan para ḵan siḵa madaydayawe Theophilus. 4Te pioḵe igammuwonyu we tuttuwa da nituttudu ḵan diḵayu.

Sa Nipadtuwan Ni Miyanaḵan John We Ambobonyag

5Sa nampangatan ḵad Herod#1:5 Sa sadi ye Herod, nginadananda'ḵ “Ḵangatuwan.” atte probinsiya'd Judea, inninggaw padin da Judyu we nangngadan aḵ Zechariah. Siya osa'tta grupun da papadi ye ganaḵ Abijah. Asawana'ḵ Elizabeth we ganaḵ os Aaron we padi'tte awe. 6Naun-unandae an-asawa'tte antotollong Apudyus ya ippun nangkuranganda si nanuttuwaanda'tta losane lintogna ya sa tuttuduna. 7Taḵon ay nu ḵaḵna, adidapun maganaḵ te basig aḵ Elizabeth ya lummaasda.

8Pun sin-aḻgawan ḵad, ummoy aḵ Zechariah ya da grupuna'd Jerusalem ta ituttuwada da biyangda. Ḵad aḵ Zechariah anserbi ye padi si templo we boḻoy Apudyus. 9Sa ugalin da papadi, ambubbunutda nu ngai lumnoḵ ad daḻom si templo. Pun aḵ Zechariah nabunute lumnoḵ atte templo we umoy anogob si incenso. 10Sa nanogobana, inninggaw da amode tagu we nalluwaḻu'ḵ lasin.

11Pun nampaila anghel Apudyus woḵ tummaḵdog si madawinan ni altar we sosoggoban atte incenso. 12Innilana ḵad, naḵogway woḵ naḵimtan. 13Yaḵon ḵanan ni anghel, “Zechariah, adiḵa maḵimut te dingngoḻ Apudyus luwaḻum. Pun aḵ Elizabeth we asawam, umanaḵ aḵ laḻaḵi ḵad ngadanam oḵyan aḵ John. 14Umamdan layadnu ya ḵaḵnat os da tagu si mibuḵnagana 15te ampatog atte antotollong Apudyus. Adipun oḵyan uminum aḵ bayas ya da udume bumartek. Taḵon ay sissiyaana'tte buwang inana, inggaw ḵabooḻan ni Ispiritu Santu ḵan siya. 16Sa maḵwa ḵad, adu da dogayu we ganaḵ Israel we ipaulina ḵan Apu we sa Apudyusda. 17Ḵad siya umuna nu aḵ Apu ya itton ni Ispiritu Santu ḵabooḻanae isuna innatodna ḵan Profeta Elijah we profeta we an-uuggudon Apudyus atte awe. Antimpuyugona somsomoḵ da an-amae nansubog ya ipaulina bos da lawwenge tagu ḵan Apudyus ta maun-unan da somsomoḵda.#1:17Malachi 4:5-6. Ḵoona ḵaḵnat ta misaganada'tte dumaḵngan Apu.”

18Nagangput ḵad imbagan ni anghel, ḵanan Zechariah, “Ngai angigammuwaḵe mituttuwa da imbagam? Te mummaḻmaḻong-agaḵ, ḵad mummammad-an aḵ asawaḵ!”

19Ḵanan ni anghel, “Saḵon aḵ Gabriel we anserbi ḵan Apudyus. Siya nangibuun ḵan saḵon ta ibagaḵ ḵan siḵa annae Ambaḻu we Damag. 20Na! Adimpun patiyon da imbagaḵ! Sa ambanagana, maumoḻḵa oḵyan inggana'tte timpu we mituttuwa da sanae imbagaḵ!”

21Sa nangibag-an ni anghel ḵan Zechariah, nataag da tagu si lasin ni templo we anguuway te nabayag ad daḻom. 22Lummawa ḵad, nansinyal ḵan dida te adipun maḵaginga. Pun inigammudae awad de impailan Apudyus ḵan siyae isun di in-inop woḵ impiddagusna naumoḻ.

23Nagangput ḵad biyang Zechariah si templo, ummoyon. 24Adipun nabayag, nabugi'ḵ Elizabeth we asawana. Pun nalluḵuḵ atte limam buḻan. 25Pun ḵanana si somsomoḵna, “Annae impailan Apudyus ḵadaguna ḵan saḵon te annae nabugiyaḵ. Pun ḵinaanna bainḵu'tta tagu si nabayage adiyaḵpun mabugi.”

Sa Nipadtuwan Ni Miyanaḵan Jesus

26Sa miḵanome buḻan ni bugin Elizabeth, imbuun Apudyus aḵ Gabriel we anghel ad Nazareth we ili si probinsiya'd Galilee, 27te awad de imbagana'tte babaḻasange nangngadan aḵ Mary. Ippun natnattoḵana ya nituḻage asaw-ona'ḵ Joseph we ganaḵ Ari David. 28Pun dummatong ḵad anghel ḵan siya ḵanana, “Annaaḵ! Lumayadḵa te anna'ḵ Apudyus ḵan siḵa ya amod de ḵinabaḻuna ḵan siḵa.”

29Dingngoḻ ḵad Mary imbagan ni anghel, naḵosḵosyawan woḵ ḵuttuḵuttumona nu ngai piona ḵanan. 30Ḵanan ni anghel, “Mary, adiḵa maḵimut te amod de ḵinabaḻun Apudyus ḵan siḵa. 31Sa maḵwa, mabugiḵa ya umanaḵḵa'ḵ laḻaḵi. Ḵad ngadanam oḵyan aḵ Jesus. 32Amod ḵabooḻana ya ngannonda Abeng ni Ḵangatuwane Apudyus. Siya an-ariyon Apudyus we isuna'ḵ Ari David we daḵdaḵoḻna. 33Pun ipangatana da ganaḵ Israel aḵ inggana. Te naippun patinggan ni ampangatana.”

34Ḵanan Mary si anghel, “Ngai inonae maḵwa ḵaḵnat si naippun laḻaḵi'ḵ nandoḵ ḵan saḵon?”

35Ḵanan ni anghel, “Umali Ispiritu Santu ḵan siḵa ḵad mabugiḵa gapu si ḵabooḻan ni Ḵangatuwane Apudyus. Ḵade sadi mibuḵnag ngannonda nasantuwane Abeng Apudyus. 36Ilam ḵad aḵ Elizabeth we agim, taḵon ay nu nginadananda'ḵ basig ya lummaas, nabugi! Nagangpute onom buḻan ni bugina. 37Te aḵ Apudyus lamogna ḵoon da ngaiman!”

38Ḵanan Mary, “On, saḵon ḵad, annaaḵe sammilun Apudyus. Mituttuwa oḵyan da imbagame maḵwa ḵan saḵon.” Pun tinenan ni anghel.

Sa Namisitaan Mary Ḵan Elizabeth

39Sa sadi ye aḻgaw, nallibbat aḵ Mary ye anḵamuḵamu we ummoy si boḻoy da Zechariah. Sa ilida ḵad, awad atte tagudtud si probinsiya'd Judea. 40Dummatong ḵad, bummagbaga woḵ nillumnoḵ si boḻoy Zechariah woḵ pinakumustaana'ḵ Elizabeth. 41Dingngoḻ ḵad Elizabeth gingan Mary, nanggidu abeng atte buwangna. Pun ummoy ḵabooḻan ni Ispiritu Santu ḵan Elizabeth 42woḵ ḵananae nampoḵaw, “Pianḵa'tta losane bubai ya pian os abenge iyanaḵnu! 43Ngai ḵad ain patogḵu we bisitaom, siḵae inan ni Apuḵ? 44Annaya gapunae inigammuḵe siḵa inan ni Apuḵ. Gummingaḵa ḵad ay, nanggidu abeng atte buwangḵu si layadna! 45Pianḵa te pinatime mituttuwa imbagan Apu ḵan siḵa.”

Sa Andayawan Mary Ḵan Apudyus

46Ḵanan Mary,

“Idaydayawku'ḵ Apu,

si pusuḵ ḵan somsomoḵḵu.

47Amoamod layadḵu,

ḵan Apudyus we Anagu ḵan saḵon.

48Te inḵagasmoḵna saḵone

ḵamḵamae sammiluna.

Pun misaḻad sinsana, ibagan

da losane lunap ḵan saḵone pianḵa.

49Gapu'tta banage ḵingwana,

nakaskasdaaw da naḵwa,

Maḵabooḻ aḵ Apu ya

siya abus aḵ gattoḵe nasantuwan.

50Siyae ḵumadagu'tta

angisipog ḵan siya.

Siya pasige ḵumadagu

atta tagu'tte losane timpu.

51Gapu'tte ḵabooḻana,

ampatog da ḵoona.

Da tagu we ḵama'ḵ osa,

ansinasinaona dida.

Losane planuda,

maḵwa dadailona.

52Da nangatu we papangatda,

ipakumbabana dida.

Da tagu we ḵamḵama,

itaḻayagna dida.

53Da ampaḵaḻame tagu,

innatodna ambaḻu.

Ta awad mapnoḵanda

atte mataguwanda.

Da tagu ḵade baḵnang,

naippun ḵatḵat-opanda.

Pinaoyonna dida,

nawwakwakkayda lawa.

54Da ganaḵ Israel we sammiluna,

dida binadangana.

Nituttuwa inkarina

si ummamdane daguna.

55On, ḵummadagu tuwa

atta danaḵḵoḻe ummunae

aḵ Abraham we ama,

ya da ganaḵna'ḵ inggana.”

56Pune sadi, inninggaw aḵ Mary si boḻoy da Elizabeth aḵ tuḻun buḻan, pun nipauli.

Sa Niyanaḵan John We Ambobonyag

57Sin-aḻgawan ḵad, dummatong umanaḵan Elizabeth, pun iyyanaḵna laḻaḵi. 58Dingngoḻ ḵad da ḵailiyanda ya da susunudda da nakaskasdaawe ḵadagun Apudyus ḵan siya, naḵalaylayadda.

59Ḵawaḻun aḻgawna ḵad, nandatdatongda bos ta sogyatanda ta anuttuwaanda si lintog. Pionda oḵyan ingadan ḵan siya Zechariah we ngadan amana. 60Yaḵon ḵanan ni inana, “Naid! Sa ngadanna ḵad John!”

61Ḵananda ḵan siya, “Adim oḵyan ingadan de John te naippun agiyu'ḵ nangngadan si ḵaḵnat!” 62Pun sininyasanda'ḵ Zechariah ta igammuwonda nu ngai piona ingadan atte utting. 63Ḵingwana ḵad, nampaidatong aḵ angigiliyana pun sa inggilina, “John ngadanna.” Pun nataag da losane tagu. 64Baag-en naḵaan umoḻ Zechariah woḵ insaḻadnae gumminga pun indaydayawna'ḵ Apudyus. 65Naḵimtan da ḵailiyanda woḵ nandinongoḻ ugud atte mipanggob si naḵwa'tta losane ili'tta probinsiya'd Judea. 66Pun ḵinuttuḵuttumda da losane dingngoḻda woḵ ḵanandae nan-asiimus, “Ngai nin ay ambanagan ni andi ye abeng?” Te immatunandae iinggaw ḵabooḻan Apudyus ḵan siya.

Da Impaigammun Zechariah

67Pune sadi, aḵ Zechariah we aman John, ummoy ḵabooḻan ni Ispiritu Santu ḵan siya woḵ impaigammuna sanae Ugud Apudyus. Ḵanana,

68“Idaydayaw taḵu'ḵ Apu we Apudyus da ganaḵ Israel,

te ummali ta subutona ditaḵu we taguna.

69Imbuunna ḵan ditaḵu Anagu we awad de ḵabooḻana,

osa'tta ganaḵ Ari David we nanserbi ḵan Apudyus.

70Siya impaibagan Apudyus atta profetanae

nanserbi ḵan siya si awe

71ye taguwona ditaḵu'tta ḵabusuḻ taḵu

ya da losane anasanga ḵan ditaḵu.

72Pune sadi, mituttuwa inkarin Apudyus

atta danaḵḵoḻ taḵu we mipanggob si ḵadaguna,

ya aaddi ye ituttuwana

ḵabaḻuwane intuḻagna ḵan dida,

73te sanat os gattoḵe inkarina

ḵan Abraham we daḵdaḵoḻ taḵu

74ta iligsina ditaḵu'tta ḵabusuḻ taḵu,

ta anserbi taḵu ḵan siyae ippun ḵimut.

75Ta ambaḻu ugali taḵu

ya unudon taḵu

maun-unane antatagu

we piniona inggana'ḵ matoy taḵu.”

76Pinagatupan Zechariah woḵ ḵanana,

“Siḵa ḵad John we abengḵu,

ngannonda siḵa profetan ni Ḵangatuwane Apudyus,

te umunaḵa nu aḵ Apu

ta isaganam daḻanna.

77Sa ḵoom, ibagam atta tagunae mataguda,

mipagapu'tte mapakawanan da basuḻda.

78Te aḵ Apudyus ḵumadagu ya naanus,

pun ibuunna Anagu

we naḻpu'd langite

isuna inite dumingit.

79Dumatong ḵad, langḻangana da tagu

we iinggaw si giḵbote maḵimute matoy,

ya ipuyutna ditaḵu ta

lumin-awa somsomoḵ taḵu.”

80Aḵ John ḵade abengna, dummaḵoḻ woḵ lummaing ya pummigsa pammatina. Inninggaw atte bumbummaaw inggana'ḵ dummatong tumoḵwaḻana ta antuttudu'tta ganaḵ Israel.

Currently Selected:

Luke 1: kml

Highlight

Copy