Luke 24

Sa Ummuliyan Jesus

(Mat. 28:1-10; Mrk. 16:1-8; Jhn. 20:1-10)

1Mabigat ḵad atte naḻaḵpus umillongane imbelangda'ḵ umunae aḻgaw ni sindumingguwan, nasapa ummoy da bubai atte libon Jesus, nangawitda si bangbanglu we insaganada. 2Indasanda onob ni libone naligad. 3Pun nillumnoḵda yaḵon ippun indasanda si ladag Apu Jesus. 4Sissiyada ḵade sintataag, nasaniḵad da duwae laḻaḵi si daḻnigdae sumilisiling da silupda. 5Pun ummobaob da sanae bubbubai gapu'tte ḵimutda yaḵon ḵanan da duwae laḻaḵi ḵan dida, “Ngaipayu sington matattagu si igaw da natoy? 6Naippun aḵ Jesus sina te tinagun Apudyus ḵasin. Naliwatanyu ḵamman imbagana ḵan diḵayu si inninggawanyu'tte probinsiya'd Galilee 7we ḵanana, ‘Sa Abeng Di Tagu, ḵasapuḻane mipuḻang atta ḵabasbassuḻan ya ipattoḻda'tte kros ḵad matagu ḵasin atte miḵaḵlu we aḻgaw?’ ” 8Pun inḵagasmoḵda imbagan Jesus.

9Nipaulida ḵade naḻpu'tte libon Jesus, imbagada'tta nasawaḻan aḵ ossaane disipuluna ya da buḻunda da losane naḵwa. 10Sa ngadan ḵad da annae bubai, da Mary Magdalene, Joanna ya aḵ Mary ye inan James. Dida ya da udum ose bubai da ummoy nangibaga'tta apostol atta naḵwa. 11Yaḵon da apostol adidapun pinati dida te sa somsomoḵda ḵanandapun nu dinodong-og da imbagada. 12Yaḵon aḵ Peter ḵad, nanoddaḵe ummoy atte libon. Dummatong ḵad, ummobaob ḵad ta ilana innilana abuse ludune namutiputda ḵan siya. Pun ummoyone natataag nu ngai naḵwa.

Sa Nampail-an Jesus Atta Duwae Disipuluna

(Mrk. 16:12-13)

13Sa sadi bose aḻgaw, nanadtaddaḻan da duwae disipulun Jesus we umoy atte ili'd Emmaus, sa bootna'd Jerusalem ya ad Emmaus isuna boot ni lamog ni tagu taddaḻanon si umoye tuḻu we oras.#24:13 Sa boot atte annae verse umoye nasawaḻan aḵ ossaane kilomitro. 14Sa nanadtaddaḻananda, inug-uggudda da losane naḵwa. 15Sissiya ḵade an-ug-uggudda, ummadani'ḵ Jesus woḵ nitun-ud ḵan dida. 16Yaḵon taḵon ay nu innilada'ḵ Jesus, adidapun naḵaimatun te tinupod Apudyus ta adida imatunan. 17Ḵanan Jesus we nan-imus ḵan dida, “Ngai inug-uggudyu si anadtaddaḻananyu?”

Nansadangdae mamaḵ-ilae andadauyda. 18Pun ḵanan ni osa ḵan didae nangngadan aḵ Cleopas, “Ngai inonae siḵa abus aḵ mangili'd Jerusalem we adi nangigammu'tta naḵwa si naḻaḵpuse aḻgaw?”

19Ḵanan Jesus, “Ngai ḵad ain da naḵwa?”

Summongbatda woḵ ḵananda, “Da naḵwa ḵan Jesus we iNazareth. Siya imbelang Apudyus aḵ profetana ya ḵanan da tagu we siya bos maḵabooḻe angituttudu ya angwa'tta nakaskasdaaw. 20Ḵad impuḻang da papangat da papadi ya da angipangat ḵan ditaḵu, indaḻumda ta maḵoddongan aḵ matoy woḵ impaipattoḻda'tte kros. 21Yaḵon siya ninamnamani oḵyane anubut ḵan diḵani ye ganaḵ Israel atta ḵabusuḻ taḵu. Yaḵon sinsadi ye aḻgaw, ḵaḵlun aḻgaw ni naḵwaan da annae banag. 22Sinsadi inggaw naḵwae nataaganni, ummoy ḵad os da bubbubai ye buḻunni nawwiḵis si libon, 23naippun indasanda'ḵ ladagna. Pun nipaulidae ummoy nangibagae nampaila da anghel si isun di in-inope nangibaga ḵanane natagu'ḵ Jesus. 24Pun ummoy ḵad os da udume buḻunni si libon, nataagda te losan atta imbagan da bubai tuttuwa yaḵon ippun os innilada ḵan Jesus.”

25Pun ḵanan Jesus ḵan dida, “Anḵadong-og ḵayu! Ngaipa anḵamnut amatiyanyu'tta losane imbagan da profetan Apudyus? 26Maawatanyu oḵyane ḵasapuḻane sa Kristu umunae ampaḵaḻam ya asiyot midayaw.” 27Pun impaḵaawat Jesus ḵan dida da losane nigili'tte Ugud Apudyus mipanggob si long-agna, nisaḻad atte umunae iblun Moses inggana'tta losane inggilin da profetan Apudyus.

28Anna ḵade madam-anda miduum atte ayandae ili, isun di anaḵdaḵpus aḵ Jesus, 29yaḵon ḵanandae nanawid, “Umiyan taḵu sina te annan lumabi.” Pun nibuḻun ḵan dida.

30Tummuḵduda ḵade angan, innaḻan Jesus tinapay, nanggappiya ḵan Apudyus woḵ binisbisaḵna woḵ innatodna ḵan dida. 31Pun ḵama'ḵ pummadda ilanda woḵ immatunanda'ḵ Jesus yaḵon baag-en ippun ogon ilanda ḵan siya. 32Ḵananda, “Siya lummayadanta si inggawan taḵu'tte daḻan si nangipaḵaawatana'tta nigili ye Ugud Apudyus.”

33Pun daguse nipaulida'd Jerusalem. Indasanda da nasawaḻan aḵ ossaane disipuluna ya da udume nandatdatong sidi, 34woḵ ḵananda, “Tuttuwae natagu'ḵ Apu woḵ nampaila ḵan Simon!” 35Pun inug-uggudda da naḵwa'tte daḻan ya sa nangimatunanda ḵan Jesus si namisbisaḵana'tte tinapay.

Sa Nampail-an Jesus Atta Disipuluna

(Mat. 28:16-20; Mrk. 16:14-18; Jhn. 20:19-23; Act. 1:6-8)

36Sissiya ḵade ug-uggudonda da sanae naḵwa, natanaḵdog aḵ Jesus we mismu'tte inggawanda woḵ ḵanana, “Lin-awa oḵyan awad ḵan diḵayu.”

37Yaḵon naḵogwayda ya naḵimtanda te ḵanandapun nu lagayan. 38Pun ḵanana ḵan dida, “Ngaipa ḵayu maḵimut ya anduwaduwa ḵan saḵon? 39Ilanyu da imaḵ ya da suḵiḵ ta amati ḵayu we tuttuwae saḵon anna. Appadanaḵ ta mat-op ḵayu. Te sa lagayan ḵad, naippun long-agna ḵan tung-aḻna ḵad ilanyu we wadawadda ḵan saḵon.”

40Nagangput ḵade imbagana da sana, impailana ḵan dida da imana ya da suḵina. 41Sissiyae adidapun amati gapu si amode layadda ḵan nantataagda, pun ḵanan Jesus ḵan dida, “Awad ḵamman maḵan sina?” 42Pun innattanda si nautu we ugadiw, 43woḵ ḵinanna si sinagungda.

44Pun ḵanana ḵan dida, “Da annae naḵwa, ustuustu'tta imbagaḵ si sissiyaaḵ ḵan diḵayu: Losan atta nigili ye lintog Moses ya da profetan Apudyus ya da losane nigili'tte Psalm atte mipanggob ḵan saḵon ḵasapuḻane mituttuwada.”

45Pun sinilawana da somsomoḵda ta maawatanda nigili ye Ugud Apudyus. 46Ḵanana ḵan dida, “Annaya nigili: Ḵasapuḻane ampaḵaḻam ya matoy Kristu ḵad matagu'tte miḵaḵlu we aḻgaw. 47Sa ambabawiyan da tagu'tta basuḻda ya agaydae angwa ya sa amakawanan Apudyus ḵan dida mipagapu ḵan saḵon, ḵasapuḻane miwaḻagawag atta losane ili si lubung misaḻad sina'd Jerusalem. 48Diḵayu we mismu anaḵdoḻe ḵatuttuwaan da innilayu. 49Ḵad saḵone mismu angibuun si inkarin Amaḵ ḵan diḵayu. Yaḵon ḵasapuḻane uwayonyu sina'd Jerusalem inggana'ḵ awatonyu ḵabooḻane maḻpu'd langit.”

Sa Nipangatuwan Jesus Ad Langit

(Mrk. 16:19-20; Act. 1:9-11)

50Pun impuyutna dida'd Bethany woḵ itayagna imanae namindisyun ḵan dida. 51Sissiya ḵade ambindisyun, tinenana dida woḵ nipangatu'd langit. 52Pun nandaydayawda ḵan siya woḵ nipaulida'd Jerusalem we amod de layadda. 53Pun inaḻgawe umoyda'tte paway ni templo andaydayaw ḵan Apudyus.

Currently Selected:

Luke 24: kml

Highlight

Copy