Luke 18

Sa Baḻu Ya Sa Ḵuwis

1Pun imbagan Jesus atta disipuluna annae pani ta tuttuduwana didae patilayunda alluwaḻu ya adida mappog. 2Ḵanana, “Inninggaw ḵuwis atte osae ili ye adipun angisipog ḵan Apudyus ya potogona bos da asintataguna. 3Inninggaw os baḻu'tte sadi ye ili ye ampappauli ye ḵanana, ‘Ittom ḵappos ustu we ḵalintogaḵ ta adiyaḵ maabaḵ atta ḵabusuḻḵu.’ 4Nabayage adimpun ni ḵuwis pinatgan yaḵon anungusna ḵad ḵanana'tte long-agna, ‘Adiḵpun isipog aḵ Apudyus ya potogoḵ da asintataguḵ, 5yaḵon gapu ta nappogaḵ, ittoḵ ḵalintogan ni baḻu ta adi ampappauli.’ ”

6Pun ḵanan Jesus, “Dongngonyu imbagan ni ḵuwis atte baḻu. 7Adimpun ḵamman Apudyus itton ḵalintogan da pinilinae tagu we anḵodaw aḵ ḵadagu ḵan siya si inaḻgaw ya nilabi? Itaḻyanna ḵamman badangna? 8Annaya ibagaḵ ḵan diḵayu, ittonae dagus ḵan dida ḵalintoganda. Yaḵon mipauliyaḵ ḵade Abeng Di Tagu, awad ḵamman odasaḵ aḵ amati ḵan saḵon sina'd luta?”

Sa Pharisee Ya Sa Andadagup Atta Bugis

9Inug-uggud os Jesus ḵan dida annae pani'tta sanae antaḻgoddae naun-unanda ḵan potogonda da asintataguda. 10Ḵanana, “Inninggaw da duwae tagu we ummoy atte paway ni templo nalluwaḻu. Pharisee osa ya sa andadagup atta bugis. 11Nillumnoḵda ḵad, summiḵad Pharisee ye bummattawa'tta udum woḵ ḵananae nalluwaḻu, ‘Anggappiyaaḵ Apudyus te adiḵpun isu da udume an-igab, adidapun naun-unan, maḵadagdagasda taḵon ay annate andadagup atta bugis. 12Te ḵan saḵon, amigwaaḵ allaun si sindumingguwan ta alluwaḻuwaḵ ya ittoḵ os ḵasimpuḻun ni losane tangdanḵu.’

13“Sa andadagup ḵad atta bugis, summiḵad atte battawa woḵ adipun nantangad ad langit te mabain atta basuḻna yaḵon ḵinabḵabna baḻuḵungna te nambabawi'tta basuḻna woḵ ḵanana, ‘Apudyus, ḵadaguwanaḵ ḵappose ḵabasbassuḻan.’ ”

14Pun ḵanan Jesus we nangiyanungus, “Annaya ibagaḵ ḵan diḵayu, ummoyonda ḵad, sa andadagup atta bugis imbelang Apudyus aḵ ippun basuḻna te pinakawanna. Yaḵon sa Pharisee, adimpun Apudyus pinakawan. Te ngaimane angipangatu si long-agna, mipababa. Ḵad ngaimane angipakumbaba si long-agna, mipangatu.”

Sa Namindisyunan Jesus Atta Abeng

(Mat. 19:13-15; Mrk. 10:13-16)

15Sin-aḻgawan ḵad, inninggaw da nangiyoy atta abengda ya da utting ḵan Jesus ta ipatayna imana ya bindisyunana dida. Innilan ḵad da disipuluna, sinuppaḵanda dida. 16Yaḵon inayagan Jesus da abeng woḵ ḵanana'tta disipuluna, “Iyunudyu we umali da abeng ḵan saḵon. Adiyu paadiyon dida te da tagu we isuda midogada'tte ampangatan Apudyus. 17Ibagaḵ ḵan diḵayu ḵatuttuwaan, ngaimane adina awaton ampangatan Apudyus we isun ni abeng, adipun paat midoga.”

Sa Baḵnang

(Mat. 19:16-30; Mrk. 10:17-31)

18Inninggaw pangat da Judyu we ḵananae nangimus ḵan Jesus, “Ambaḻu we Mistulu, ngai ambaḻu we ḵooḵ ta ittanaḵ ḵan Apudyus atte biyag aḵ inggana?”

19Ḵanan Jesus ḵan siya, “Ngaipam awagan saḵon aḵ ambaḻu? Naippun udum aḵ ambaḻu abus aḵ Apudyus. 20Igammum da bilin Apudyus we ḵanana, ‘Adiḵa maḵadagdagas, adiḵa pumatoy, adiḵa an-aḵaw, adim taḵdoḻan tinutuli ya dayawom da amam ḵan inam.’ ”#18:20 Exodus 20:12-16; Deuteronomy 5:16-20.

21Ḵanana ḵan siya, “Inggan ay ni ḵaban-ogḵu, tinuttuwaḵ losan da sadi ye lintog.”

22Dingngoḻ ḵad Jesus, ḵanana ḵan siya, “Os-ossaan adimpun ḵingwa. Inḵa ingina da losane ḵuḵuwam ya iwaḻasnu bayadda'tta ḵaḵapus woḵ awad de binaḵnangnu we inggappot Apudyus ad langit. Umaliḵa, tun-udonaḵ.” 23Dingngoḻna ḵad imbagan Jesus, amod de dadauyna te amod de binaḵnangna.

24Innilan ḵad Jesus we andadauy ḵanana, “Anḵamnut midog-an da babaḵnang atte ampangatan Apudyus. 25Naḻaslasu lumnoḵan ni camel atte abut ni tanud nu sa midog-an ni baḵnange tagu si ampangatan Apudyus.”

26Da nandongoḻ ḵananda, “Pun ngai da maḵwae matagu?”

27Ḵanan Jesus we summongbat, “Da adimpun da tagu lamog ḵoon, lamog Apudyus ḵoon.”

28Ḵanan Peter, “Ilam, tinenanni da boḻoyni ta ambalin ḵani'ḵ disipulum.”

29Ḵanan Jesus ḵan dida, “Ibagaḵ ḵan diḵayu ḵatuttuwaan, ngaimane tenana boḻoyna, asawana, susunudna, amana ḵan inana ya da abengna gapu si ampangatan Apudyus, 30ad-adu'ḵ adayu itton Apudyus ḵan siya si annae biyag nu sa tinenana. Sa umali bose timpu, maittan os atte biyag aḵ inggana.”

Sa Piḵlun Jesus We Nangibaga Si Matoyana Ḵan Umuliyana

(Mat. 20:17-19; Mrk. 10:32-34)

31Pun imbattawana da nasawaḻan aḵ duwae disipuluna woḵ ḵanana ḵan dida, “Dongngonyu! Sinsadi anagada taḵu'd Jerusalem, ḵad da losane inggilin da profeta si mipanggob ḵan saḵone Abeng Di Tagu, mituttuwada. 32Te mipuḻangaḵ atta Gentil ḵad ang-angyagonaḵ, ibabbainaḵ ḵan tuptuppaanaḵ. 33Ap-aplitonaḵ ya asidaot saḵon gongaton. Yaḵon sa miḵaḵlu we aḻgaw, umuliyaḵ.”

34Yaḵon adimpun da disipuluna naawatan imbagana te ḵan dida, nitaḻu piona ḵanan.

Sa Naḵuḻape Antapatapaya

(Mat. 20:29-34; Mrk. 10:46-52)

35Madam-an ḵad da Jesus ad Jericho, inninggaw naḵuḻape tutuḵdu'tte igid ni ḵaḻsae antapatapaya. 36Dingngoḻna ḵade lumaus da adu we tagu, inimusna nu ngai maḵmaḵwa. 37Ḵanandae summongbat, “Annae lumaus aḵ Jesus we iNazareth.”

38Pun ḵananae napapḵaaw, “Jesus we ganaḵ Ari David,#18:38 Ganaḵ Ari David - awag ni uuwayondae Messiah, dam-on da naḵuḻap usarone angayag ḵan Jesus. Bigbigondae siya Messiah baḵon nu Kristu we pinilin Apudyus aḵ Anagu ya An-ari. ḵadaguwanaḵ ḵappos!”

39Da ummuna si buḻog, inggimauda ta guminoḵ yaḵon amo indangsoḻnae nampoḵaw, “Ganaḵ Ari David, Ḵadaguwanaḵ ḵappos!”

40Pune sadi, gumminoḵ aḵ Jesus woḵ impaayagna sadi ye naḵuḻap. Ummadani ḵad ḵanan Jesus ḵan siya, 41“Ngai piome ḵooḵ ḵan siḵa?”

Ḵanana, “Apu, pioḵe maḵaila.”

42Ḵanan Jesus, “Gapu'tte pammatim ḵan saḵon, maḵailaḵa.” 43Pun daguse naḵaila woḵ nitun-ud ḵan siyae dinaydayawna'ḵ Apudyus. Innilan ḵad da losane tagu da sanae naḵwa, dinaydayawda bos aḵ Apudyus.

Currently Selected:

Luke 18: kml

Highlight

Copy