Luke 17

Sa Gapun Ni Maḵabasuḻan

(Mat. 18:6-7, 21-22; Mrk. 9:42)

1Ḵanan Jesus atta disipuluna, “Gagangaye dumatong sulisug atta namati yaḵon ḵaddagu tagu we gapun da sanae maḵabasuḻan. 2Un-unnoyna nu mitaḵod daḵoḻe binatu we gilingan si bagangna ya miballu'tte baybay nu sa sulisugona ta maḵabasuḻ taḵon ay osa'tta annae ḵamḵamae tagu. 3Pun ummanyu'tta ḵoonyu.

“Nu maḵabasuḻ asintatagum suppaḵam ḵad nu ambabawi'tta basuḻna ya agaynae angwa, pakawanom. 4Nu angampitu we maḵabasuḻ ḵan siḵa si sin-aḻgaw ya angampitu umali anḵodaw aḵ pakawan, ḵasapuḻane pakawanom.”

Sa Mipanggob Atte Pammati

5Pun ḵanan da apostol ḵan siya, “Apu, papigsaom ḵappos da pammatini.”

6Pun ḵanana, “Nu awad aḵit aḵ pammatiyu'ḵ isun ni ḵapeet ni buḵoḻ ni mustasa, maḵwae ḵananyu si annae daḵoḻe ḵayu, ‘Mabagutḵa ya nimuḻaḵa si baybay’ woḵ tuttuwaona.”

Sa Ḵewaaḻ Ni Sammilu

7Ḵanan Jesus, “Nu awat di awad sammilun ni osa ḵan diḵayu'ḵ an-aḻadu baḵon nu antangḵon atta karnero, nu dumatonge maḻpu si anḵewaaḻana, ḵanana ḵad ain ḵan siyae, ‘Awwaynu ta anganḵa’? 8Naid yaḵon ḵanana ḵan siya, ‘Inḵa ansuḵat ta isaganam ḵanoḵ ya illusnum inggana'ḵ maabusaḵe angan, ḵad asiḵaot mipasani.’ 9Anggappiyaaḵ ḵamman ḵan siya nu tinuttuwana da bilinnu? 10Isuna bos ḵan diḵayu, nu ginanggangputyu da losane imbilin Apudyus we ḵoonyu, ḵasapuḻane ḵananyu, ‘Sammilu ḵani ye ḵingwani da ḵewaaḻni.’ ”

Da Simpuḻu We Naleprosy

11Ummoy ḵad da Jesus ad Jerusalem, nangoyda si boddongna'd Samaria ya sa probinsiya'd Galilee. 12Dummatongda ḵad atte osae ili, inabotda da simpuḻu we laḻaḵi ye naleprosy.#17:12 Da naleprosy atte timpun Jesus, adipun maḵwae umadanida'tta tagu te allasu we umalis sanae kalasin di saḵit. Summiḵadda'tte battawa, 13woḵ ḵanandae nampoḵaw, “Apu Jesus ḵadaguwam ḵappos diḵani!”

14Innilan ḵad Jesus dida ḵanana, “Inḵayu ampaila'tta papadi ta ilanda nu naḵaan da saḵityu.” Inggawda ḵad atte daḻan, pummoḻḵasda.

15Innilan ḵad ni osa ḵan didae naḵaan saḵitna, daguse nampauli woḵ indangsoḻnae nandaydayaw ḵan Apudyus. 16Nanalluḵu'tte sinagung Jesus woḵ nanggappiya. ISamaria sanae laḻaḵi.

17Pun ḵanan Jesus, “Daḵampun ḵamman aḵ simpuḻu da naḵaan da saḵitda? Dimman da siyam? 18Ngaipa naippun nampauli'ḵ anggappiya ḵan Apudyus, abus annae Gentil?” 19Pun ḵanana'tte sadi ye laḻaḵi, “Tumaḵdogḵa ta inḵan. Sa pammatim gapun ni lummin-awaam.”

Sa Ampangatan Apudyus

(Mat. 24:23-28, 37-41)

20Sin-aḻgawan ḵad, inninggaw da udum atta Pharisee ye ummoy ḵan Jesus nangimus nu ḵamaan ni misaḻdan ni ampangatan Apudyus atta tagu. Ḵanan Jesus, “Naippun sinyal aḵ angipailae isaḻad Apudyus we ampangat. 21Naippun os angibaga ḵanane, ‘Ilanyu, anna sina!’ baḵon nu ‘Ilanyu, andiya!’ Te sa ḵatuttuwaan, sinsadi awad ḵan diḵayu ampangatan Apudyus.”

22Pun ḵanana'tta disipuluna, “Dumatong timpu we pionyu ilan Abeng Di Tagu taḵon ay sin-aḵitan yaḵon adiyupun maila saḵon. 23Awad da angibaga ḵanane, ‘Ilanyu, awad sidi,’ baḵon nu, ‘Ilanyu, anna sina!’ Yaḵon adiyu paat patiyon, adi ḵayu mibuḻun ḵan dida ta singtonyu saḵon. 24Te sa mipauliyaḵe Abeng Di Tagu, ilan da losane tagu we isuna anguliyatyatan ni ḵilat ad langit atte losane suli. 25Yaḵon ḵasapuḻane umunae ampaḵaḻamaḵ ya idiyan da tagu saḵon sinsana.”

26“Sa ugalin da tagu si timpun ni mipauliyaḵe Abeng Di Tagu, isun ni ugalin da tagu si timpun Noah si awe. 27Te sa sadi ye timpu angaanganda, an-iinumda ya an-as-asawada inggana si aḻgawe nillumnoḵan da Noah si bapur. Pune sadi nalitap lubung woḵ naaminda naanud.#17:27 Genesis da chapter 6-9. 28Isun os ni timpun Lot si awe ad Sodom. Da tagu angaanganda, an-iinumda, allaḵuda, angngingnginada, ammuḻada ya amoḻoyda, 29inggana si aḻgawe tinenan da Lot sadi ye ili. Nagangput ḵad, naottag apuy ya da bumaḻabaḻae batu we ngannonda sulfur we naḻpu'd langit woḵ naamin nadadail.#17:28-29 Genesis da chapter 19. 30Sanat iissun ni maḵwa si aḻgawe ampail-an ni Abeng Di Tagu.”

31“Sa sadi ye aḻgaw, sa tagu we awad si otop ni boḻoyna, umawid oḵyane dagus ta mataguwana ya adi mataḵtaḵe lumogsade umoy angaḻa'tta ḵuḵuwana. Isun os ni tagu we awad si pappayaw, ḵasapuḻane adi oḵyan mataḵtaḵe mipauli si boboḻoye umoy angaḻa'tta ngaiman. 32Iḵagasmoḵyu naḵwa si asawan Lot.#17:32 Genesis 19:26 nantawili ḵad asawan Lot, nambalin aḵ asin. 33Ngaimane tagu we angipatog atte long-agna, matoy pos pagay. Yaḵon sa angiḵatoy atte pammatina ḵan saḵon, itton Apudyus ḵan siya biyag aḵ inggana. 34Annaya ibagaḵ ḵan diḵayu, nu labi umaliyaḵ awad da duwae masusuyop atte ossaane ḵama, maaḻa osa ya matenan osa. 35Isun os da duwae bubai ye anggiligiling atte binayu, maaḻa osa ya matenan osa. 36Ḵad awad os da duwae laḻaḵi ye anḵewaaḻ atte pappayaw, maaḻa osa ya matenan os osa.”

37Pun ḵanan da disipulunae nangimus ḵan siya, “Apu, dinu maḵwaan da sana?”

Summongbat aḵ Jesus we nangipani woḵ ḵanana, “Dinumane igaw da ladag, sadi bos andaḵdaḵngan da gayang.”

Currently Selected:

Luke 17: kml

Highlight

Copy