John 2

Sa Kasar Ad Cana

1Naḻaḵpus ḵad duwan aḻgaw, inggaw kasar ad Cana si probinsiya'd Galilee. Inninggaw inan Jesus sidi, 2ya inninggaw os aḵ Jesus ya da disipuluna te naayaganda. 3Naamin ḵad bayas, ḵanan ni inan Jesus ḵan siya, “Naaminanda'ḵ bayas.”

4Ḵanan Jesus, “Ina, adipun ḵasapuḻane ibagam ḵooḵ. Daampun dumatong orase anuttuwaaḵ atte planun Apudyus.”

5Pune sadi, ḵanan ni inan Jesus atta antataug atte bayas, “Ḵoonyu da ngaimane ibagana ḵan diḵayu.”

6Awad de ugalin da Judyu atte pumoḻḵasan. Pun inggaw sidi onome ammutu we batug di opat baḵon nu onom lataan si danum. 7Ḵanan Jesus atta antataug atte bayas, “Punuwonyu da annae ammutu si danum.” Pun pinnuda losan dida. 8Pune sadi ḵanana, “Gumaud ḵayu ta iyoyyu'tte angidaḻan si amung.” Pun nangiyoyda ḵan siya. 9Sinimsimana ḵad danume nambalin aḵ bayas, ippun igammuna si naḻpuwana te abus da nanaug aḵ nangigammu. Inabusna ḵad sinimsiman, inayagana laḻaḵi ye ankasar, 10woḵ ḵanana ḵan siya, “Sa ugali taḵu, pasige umuna mitaug ampiyae bayas ḵad nu mabebbelengan da tagu, asiyot mitaug bogsaḻ. Yaḵon siḵa ḵad, indudulinnu ampiyae bayas woḵ asim intoḵwaḻ si anungusna.”

11Sa annae ḵingwan Jesus ad Cana we ili'tte probinsiya'd Galilee, sana ummunae nakaskasdaawe sinyale nangipail-ana'tte ḵinaapudyusna. Pune sadi, namati da disipuluna ḵan siya.

12Nagangput ḵad kasar, ḵesan da Jesus ya aḵ inana, da susunudna ya da disipuluna'd Capernaum woḵ inninggawda sidi'ḵ sin-aḵitane aḻgaw.

Sa Namaḻyawan Jesus Atta Allaḵlaḵu Atte Templo

(Mat. 21:12-13; Mrk. 11:15-17; Luk. 19:45-46)

13Madam-an ḵad de Gayagayan da Judyu we ngannonda Nallausan,#2:13 Sa annae Gayagayan ni Nallausane gangganason da Judyu, iḵagasmoḵda nangiligsiyan Apudyus atta danaḵḵoḻdae nammusassu'd Egypt atte timpun Moses. Nanggaḵay ḵad anghel we nangongat atta losane panguḻu we abenge laḻaḵi'd Egypt, nilausana da boḻoy da Judyu we naḵuan da lewanganda si daḻan ni ubbu we karnero Exodus12. Tinawone gangganasonda ḵad waḻun aḻgawe gangganasonda. Pun da Judyu, adu we ili maḻpuwanda ya nandadatongda'd Jerusalem we umoy maḵagayagaya si annae ngannonda Nallausan. ummoy da Jesus ad Jerusalem. 14Nillumnoḵ atte paway ni templo we boḻoy Apudyus woḵ indasana da allaḵu'tta baḵa, karnero, kalapati ya da ansusuḵat aḵ pilaḵe atuḵtuḵdu'tta lamisaan. 15Pun nangwa'ḵ aplitna'tte tali woḵ pinaḻyawna dida'tte lasin ni templo, nidoga da baḵa ḵan da karnero. Iwwaliwalisna pilaḵ da ansusuḵat aḵ pilaḵ woḵ binalittuwaḵna da lamisaanda. 16Ḵanana bos atta allaḵu'ḵ kalapati, “Ḵaanonyu da sanat si anna! Adiyu ambalinon aḵ lalaḵḵuwan boḻoy Amaḵ!” 17Pune sadi, inḵagasmoḵ da disipuluna nigili ye Ugud Apudyus we ḵanana, “Sa angipatogaḵ si boḻoynu we adidapun patgan, siya matoyaḵ.”#2:17 Psalm 69:9.

18Innilan ḵad da papangat da Judyu ḵingwana ḵananda, “Ngai sinyale ipailam ḵan diḵani ta panoḵnoḵame anna ḵaḻabbongame angwa'tta ḵaḵna?”

19Ḵanan Jesus, “Nu dadailonyu annae templo, taḵadoḵ si tuḻun aḻgaw.”

20Ḵanan da Judyu, “Opatpuḻu ya onome tawon nanaḵadanda'tte annae templo. Lamognu ḵamman taḵadon si abuse tuḻun aḻgaw?” 21Yaḵon sa pion Jesus ugudone templo, sa long-agna. 22Pun ummuli ḵad aḵ Jesus, inḵagasmoḵ da disipuluna sanae imbagana. Pun namatida si nigili ye Ugud Apudyus mipanggob ḵan siya ya tuttuwa da imbagan Jesus.

23Adu da namati ḵan siya si inggawana'd Jerusalem atte timpun ni Gayagayan da Judyu we ngannonda Nallausan te innilada da nakaskasdaawe sinyale ḵingwana. 24Yaḵon adimpun Jesus intaḻgod long-agna ḵan dida. Te iniiggammuna somsomoḵ da losane tagu. 25Ḵad adinapun ḵasapuḻane awad anaḵdoḻ mipanggob ḵan dida te inigammuna da awad atta somsomoḵda.

Currently Selected:

John 2: kml

Highlight

Copy