MATIYE 3

Kel kə waate kə Zaŋ, hulum bə jəəti batem a kaŋ

(Mar. 1.1-8; Liki 3.1-18; Zaŋ 1.19-28)

1Dər ko tó bə minti Yeesu kəm Nazareti daŋ, Zaŋ Batisi pəŋ duru giidə ful də Zudeŋa bə waate kela a kaŋ minti: 2«Aŋ kolə kerkeŋ la a baymele nəətiŋ, gud maa mo *Kumna kə Pepeŋ wəra maŋ.» 3Zaŋ haa hulum bə minti Ezay *hulum bə jogte ku mini kə Pepeŋ a wəətunu səmu wəra minti: «Kaŋ bə əski dordə hulum kəmana bə naakte ku də səɓaki giidə fula minti: ‹Aŋ ɗampə kəkəy kə Barkaŋ la wəra, aŋ kaw du la warna ɗeker-ɗeker.›»

4Zaŋ ha'aŋ, dəməəmə də suruŋ də jəə-ji də kaaɗe gə joŋjoŋ, a də əntə-ənti təwru də golgo bə ceerə-ceere. Wə hame haa kəsaaboŋ də son bə tum. 5Kəya kaanə Zeruzalem, kaa gə giidə seŋka də Zudeŋ ablaw, daana kaa kaayaŋ gə minti gə əstə-əsti kəsnə vor bə Zurdeŋa pəətəŋ wəra suru ada ablaw gəm. 6Kəya wə jiiniy batem wəra dər kan gə vor bə Zurdeŋa, té bə ke kuya wəra faɗ-faɗi cəərə baymele neeteŋa gəm.

7Zaŋ asaŋ minti kaanə *Farisiyeŋ də kaanə *Saduseyeŋ bə pəəti da suru da ablaw minti wə jəə batem la a teŋ, wə əsəŋ bə wəətiya minti: «Aŋ karmə akay! Hatnaŋ hel də minti aŋ daŋə la wəra ku waŋ kə Pep də minti bə bi daŋ haa mindi mo? 8Aŋ jəə la haa kar pəsaŋ bə ge dər kaŋ wəra minti aŋ koloŋ kerkeŋ ne wəra a baymele nəətiŋ gəəzi. 9Aŋ a ɗiki ku tarməyaŋa minti moomo dəŋ kəna *Abrahamaŋa kel pa pədaŋ, paapa ana ba! Gud maa mo ten waataŋ minti Pepeŋ bə nakə-neke bə ji kaasaw də Abraham də karmə pərkiŋ laka. 10Kumuɗiŋ wəra maŋ bə ŋete kəbaŋ wəra a kəsar diŋa. Bədoona ana, kəbaŋ gə minti we diŋ paapa pəsaŋ baŋ keɗe, yə ŋitiy yaŋ wəra, yə vay yaŋ warna dər cəwaŋ na#3.10 Kel teŋ waate haa minti hi bə jeme kəəti nəkaŋ ne. Kaa gə minti koloŋ kirki a baymele neeteŋ baŋ, yə bə vay warna dər cəwaŋ na.. 11Ten ha'aŋ, ten jəŋ batem də kan bə ge dər minti aŋ koloŋ kerkeŋ wəra a baymele nəətiŋ. Səma hulum bə minti bə bi ador dən daŋ, abay nuutuŋ dəŋaŋ nin, ten paapa bə nakə-neke bə pəw kalmasi nuutuŋ wəra ba. Wə ha'aŋ, wə jəŋ batem yaŋ də Tiiru Cetcetaŋ daana də cəwaŋ. 12Wə haa damdi hulum bə witi kaasaw ana. Kəəyəw gə witi kaasaw kəəsu. Wə ve kaasaw nuutuŋ giidə dorgoɗiŋa, səma wə ki koɗosiŋ wəra dər cəwa də minti noke bə hasiŋ.»

Zaŋ ji batem a Yeesu

(Mar. 1.9-11; Liki 3.21-22; Zaŋ 1.29-34)

13Kəya Yeesu bəŋ Galile da, wə tuluŋ ku vor bə Zurdeŋa sar Zaŋa minti wə jəə batem la a tó gəm. 14Zaŋ doŋ haa ba, wə əsəŋ bə waate Yeesu minti: «Həə! Sə a jən batem haa tam ɗawŋa, tam bəŋ sarəna minti ten jəm batem laŋ, haa naanaanə mo?» 15Səma Yeesu hərnu kel minti: «Doo haa la minti kel teŋ ji bədoona ana kaadəəməy, gud maa mo áŋ de ku kel gə minti giidə Pepeŋ bələy wəra haa də teŋ kəya.» Kəya Zaŋ doŋ haa nuutu faɗi. 16Bə minti Yeesu fəlaŋ batem wəraŋ, wə luŋ warda dər kan da. Kəya tarmə pepeŋ bəŋəŋ wəra, wə asaŋ Tiirə Pepeŋ damdi abaaku ana bə sorke da cuuru da. 17Kaŋ əskəŋ dordə Pepeŋ bə waate də apəy da minti: «Haa kormon, giidən bəlu ablaw. Waaleŋ don wəra anəkay haa guudu.»

Currently Selected:

MATIYE 3: KERNT05

Highlight

Copy