LIKI 12

Amə kusrəŋ la ku hate kə kaanə Farisiyeŋa

(Mat. 10.19-20, 26-33)

1Dər ko toŋa kəya, kaŋ təpaŋ sar Yeesu guɓ-guɓi aniinə mo bə tayte kumsi kerkə kəmpəri bə anə lam. Kəya Yeesu əsəŋ bə waate kela kəm a *kaa gə guuduŋ minti: «Aŋ amə kusrəŋ la ku siipə kə kaanə *Farisiyeŋa, siipə neeteŋ ha'aŋ kel neete ɓas-ɓasiŋ. 2Kel gə metə-meteŋ guudi ge yaŋ wəra keɗe, kel gə minti yə wəətəy dəgaaya-dəgaayaŋ, kaŋ iskiy yaŋ wəra keɗe gəm. 3Gud bə minti kel gə minti aŋ wəətənəy ne duugŋ leŋ, kaŋ iskiy yaŋ wəra daaway anə pəɗaki, té gə minti aŋ wiskiniy ne nuutu kosnə huluma aləwa ɗaw, yə sewle yaŋ wəra diiri kəkər.»

Hulum bə minti aŋ jəə walka la kəəsuŋ

4«Ten waate ha'aŋ, aŋ gədaarən: aŋ a ji walka kasi kaa gə minti awaŋ kusrəŋ wəra təwa, anaaŋa yə paapa kir ji karman baalaŋ sarəŋa adoro anə weseka pədaŋ ba. 5Ten bə gaŋ dərəŋ yaŋ cəərə hulum bə minti aŋ jəə walka la kəəsuŋ: aŋ jəə walkaŋ la ha'aŋ kasi Pepeŋ, gud bə minti wə bə nakə-neke bə awaŋ wəra, daana wə də abay bə vaŋ wəra dər cəwaŋa ada vaa pa. Bədoona ana ten waataŋ, toŋ haa hulum bə minti aŋ kir ji walka kəəsuŋ!

6Ahir wiiɗiw, kaŋ gusə wəra suŋku ɓasi bə mo? Də teŋ keɗe cəərə Pepeŋ ge kəman wəra guuda anə məna ba. 7Gə deŋ kumsiŋ ha'aŋ, kaaɗe gə cəərəŋ wəra gə aŋkə-aŋke kəəsu məna-məna keɗe. Aŋ a ji walka ba, kel dəŋ dəŋaŋ ahir kampa ablaw!»

Waatə la wəra kəkər minti tam hulum kə Yeesu

8«Ten waataŋ, hulum bə minti waatənan səman ne wəra kəkər minti tó kətan, ten *Kormə Hulúm waate yaŋ wəra kəkər tiinə *kaa kə digi kə Pepeŋa minti wə haa hulum katən gəm. 9Səma hulum bə minti maltaŋ ku ne wəra kəkər tiinə kaŋa minti tó asnan baŋ, ten Kormə Hulúm malte kun yaŋ tiinə kaa kə digi kə Pepeŋa minti ten əsnu bə gəm. 10Hulum bə minti sarte sam Kormə Hulúm, vəəgə bə giidu yaŋ cəərə kel teŋa. Səma, hulum bə minti sarte sam Tiiru Cetcetaŋ, vəəgə bə giidu paapa cəərə kel teŋa ba. 11Bə minti yə humnuŋ ne bə ɗe dəərəŋ ku kəətiŋa giidə *kuli bə toose kə kaanə Ziwifiŋa, ɗalba tiinə kaa kəmtəŋ gə seŋkaŋaŋ, aŋ a yaake ku tarməyaŋ bə ceme wəra minti aŋ fele hel də ɓiti kusrəŋ wəra naanaanə moŋ ba, daana minti aŋ ɗe a waate kəna minti harmə moŋ, bə gəm. 12Gud maa mo aŋ koloŋ ne warna ada naŋ, Tiiru Cetcetaŋ bə hataŋ hel də hərəy haa tá.»

Ku kumti cəərə hulum bə bege bə bay ɗiki kela

13Kəya hulum kəman adəwaldə kaa kə ablawa waataŋ Yeesu minti: «Hulum bə hateŋ, waatə seenən la minti wə ɓarsə bege bə gubliŋ la wəra.» 14Yeesu hərnu kel minti: «Daarən, mindi əsnən bə jəmaŋ kəəti dəŋa daana bə ɓarsaŋ bege nəətiŋa mo?» 15Kəya wə waataŋ kaŋ keɗe minti: «Golə la! Aŋ amə kusrəŋ la pisi ku həryəm bə begeŋa, gud bə minti dədərgə də hulum haŋ sə begeŋa ba, wə jəə la nuutu də bege ablaw ɗaw.»

16Kəya wə wəətənəy *ku kumti minti: «Hulum kəman bə bege yaŋ, aka nuutuŋ jəŋ kaasaw ablaw. 17Wə əsəŋ bə ɗiki ku tərmuyu minti: ‹Ten jəə la kəna naanə mo? Ko bə minti ten vaa kaasaw nin la ada keɗeŋ paapa.› 18Wə haraŋ bə waate kusru tó toki pa minti: ‹Golə la kel gə minti ten bə jəy ha'aŋ: ten ce gədargəɗaw nin wəra, ten hare bə hərsi gaalaŋ kəmtəŋa dəŋaŋ kaayaŋ. Ten ve kaasaw nin ada keɗe də kar nin kaayaŋ keɗe gəm. 19Ten bə waate kusrən yaŋ pa minti: ten də kar gə ɗokə-ɗoke kir laate ablaw. Ten maahə la, hamə la, saa la, daana waalə la!› 20Səma Pepeŋ wəətunu minti: ‹Bə bay ɗiki kel toŋ! Tam me yaŋ wəra duugŋ kəna. Kar nəmti gə minti tam tukni ciiri gilaŋ a mindi tə mo?›» 21Yeesu wəətənəy pa minti: «Kel ji bədoona ana sar hulum bə minti kote cəərə begeŋ a kusru təwaŋ, səma wə paapa hulum bə bege dər Pepeŋa ba.»

Pepeŋ ji gud kərmuyuŋ

(Mat. 6.25-33)

22Kəya Yeesu waataŋ *kaa gə guuduŋ pa minti: «Gud teŋa ten waataŋ minti: aŋ a yaake ɗiki dəŋ wəra bə lente gud kar kə hame gə ji zugiŋa ba, gud kel kə dəməəmə də tereŋa bə gəm, 23gud bə minti dədərgə də hulum dəŋaŋ kar kə hameŋ daana kusru dəŋaŋ dəməəməŋ. 24Aŋ golə la sə gəgawleŋ, wə jo'e ba, wə ceme kaasaw ba, ko bə feke kar nuutu paapa gəm, anaaŋa Pepeŋ əyu hameŋ haa tó! Aŋ dəŋaŋ kaskoŋ kampa aniinə mo? 25Mindi aduubə dəŋa neke bə ze hi du ajewa weseka gud laawe bə kusruŋa mo? 26Jəəne doloy minti aŋ paapa gə nakə-neke bə ji karman tó wesekiŋ kəya baŋ, aŋ lente ɗiki dəŋ gud sərdə kar kaayaŋaŋ səm pə mo? 27Aŋ golə la kəm sə huufi bə giidə akaŋ mo! Wə ji joŋre ba, wə ke dəməəmə a kusru bə gəm. Ten waataŋ haa teŋa: kumna *Salomoŋ də kusru, də məyan nuutuŋ anə keɗe ɗaw, wə vaŋ dəməəmə pasa suru bə kə huufiŋ ana ba. 28Jəəne minti Pepeŋ gene kaɗəkaw gə minti aŋ fələy dayna giidə akaŋa anaaŋa dibiini yə vay warna dər cəwaŋ naŋ, bə ji naanaanə minti wə gənaŋ dəŋaŋ teŋ bə mo, aŋ gə minti de dəŋ bə kerpə-kerpeŋ? 29Aŋ a hoye kusrəŋ gud kar gə minti aŋ bə həməy daana gə minti aŋ bə say ba. Aŋ a laawe gud teŋa ba. 30Hõye bə golde kar teŋa saksaki ha'aŋ kaa gə cəərə seŋka gə minti Pepeŋ paapa də diri baŋ. Səma nəətiŋ ha'aŋ, Bəraŋ bə asə-ase minti aŋ də tay də kar teŋ. 31Nəətiŋ, aŋ goldə *Kumna kə Pepeŋ la, wə bə ayaŋ kar kaayaŋ teŋ yaŋ ada ɗaw. 32Aŋ a ji walka ba, aŋ gə korofi dəŋ wesekiŋ, gud bə minti kel teŋ doŋ dər Bəraŋ Pepeŋ bə ayaŋ Kumnaŋ.»

Aŋ goldə laŋa bege bə apəyaŋ

(Mat. 6.19-21)

33«Aŋ gusə kar nəətiŋ la wəra, aŋ ayə soloy diŋ la a kaa kə caacaŋ. Aŋ zoorə mandəhaŋ bə bay ɓalkeŋ la. Aŋ humə bege bə apəyaŋ la, toŋ haa bege bə minti tewe wəra bə hasiŋ. A ko toŋa kaa kə dəgaayaŋ fəlu ba, googo huduru wəra bə gəm. 34Gəəzi, ko bə minti bege nəətiŋ adaŋ, ku tarməyaŋ ji haa ada na gəm.»

Kaa kə joŋre gə gunə-guniŋ

(Mat. 24.43-51)

35«Aŋ ganə la wəra maŋ bə ji joŋreŋ, lampa nəətiŋ jəə la də do'tə-do'te gəm. 36Aŋ jəə la akas kaa kə joŋre gə minti bə mi bərdə kuli neeteŋaŋ ana. Bə minti wə bə hame avəray daŋ, wə haraŋ də ne minti wə láŋ ku kuliŋ neŋ, yə buŋu du wəra a nuunu faɗiŋ. 37Waaleŋ ji yaŋ cəərə kaa kə joŋre gə minti bərdə kuliŋ bi a fələy wəra gə kuntə-kuntiŋ! Gəəzi ten waataŋ, wə dere dəməəmə nuutu də joŋre yaŋ, kəya wə əsti kaa kə joŋre nuutuŋ yaŋ wəra a ko bə hameŋa cin-cin, adoro wə əyəy hameŋ. 38Waale ji yaŋ cəərə kaa kə joŋre gə minti birdiŋ haraŋ də ne nuutu duugŋ leŋ mo, ɗalba siswiɗi mo, wə fəlnəy ne wəra gə gunə-guniŋ. 39Səma, aŋ asə la pisi minti: a jəə la minti bərdə kuliŋ ase cəwa də minti hulum bə dəgaayaŋ bi dərəŋ wəraŋ, wə sə a yaake hulum bə dəgaayaŋ bə co'e kuli nuutuŋa ba. 40Aŋ gəm, aŋ əsə la wəra gə ɗampə-ɗampe, gud maa mo aŋ ase cəwa də minti ten *Kormə Hulúm hare da dərəŋ ba.»

Hulum bə joŋreŋ kir iski ku burduŋ

41Kəya Piyer hərnu kel minti: «Barkaŋ, tam waate *ku kumti teŋ haa a are təwa mo, a kaŋ keɗe mo?» 42Barkaŋ hərnu kel minti: «Hulum bə joŋre ɓetiŋ bə hel, haa mindi mo? Haa hulum bə minti bərdə kuliŋ yəəku ame bə giidə kuliŋ kəəsuŋ, minti wə ɓarsə hameŋ la a kaa kə joŋre kaayaŋ wəra a kuɗuŋa. 43Waaleŋ ji yaŋ cəərə hulum bə joŋre bə minti burduŋ haraŋ də ne a fəlu bə ji joŋre toŋa bədoonaŋ! 44Gəəzi ten waataŋ, burduŋ aye ame bə kar nuutuŋ yaŋ keɗe a hulum bə joŋre toŋ. 45Səma, hulum bə joŋre əsəŋ ne bə waate kusru minti: ‹Bərdən doŋ cuuru warda bay bi›, kəya wə isi bə lete kaa kə joŋre kaŋkara də kəram keɗeŋ, wə hame, wə se, daana wə markete wəra gəm. 46Kəya burduŋ hare da máŋ hõy ha'aŋ dər hi bə minti wə a paapa bə məwa pədaŋ, cəwa də minti wə bi dəərəŋ paapa də duru pəda gəm. Kəya wə bə jəw daŋgay du wəra, wə bə jəw haa damdi kaayaŋ té hãy-hãyiŋ ana.

47Hulum bə joŋre tó bə minti asaŋ kel gə minti giidə burduŋ bələy, də teŋ keɗe wə ɗampaŋ kusru wəra maŋ bə jəy baŋ, yə lətu yaŋ ablaw. 48Səma, hulum bə joŋre bə minti kel gə minti giidə burduŋ bələy paapa də duru baŋ, wə jəŋ karman ne kir leteŋ, yə lətu ablaw ba. Hulum bə minti yə ayaŋ karman ne ablaw a nuunuŋ, yə mante yaŋ ablaw kəəsu gəm. Yə ayaŋ karman bə ame ne ablaw kasi hulumaŋ, yə mante yaŋ kəəsu pisi manta gəm.»

Yeesu bəŋ a ceme dər kaŋ wəra

(Mat. 10.34-36)

49«Ten bəŋ a ge cəwa cəərə seŋkaŋa. Ten a də caadə minti a jəə la wəra də do'ə-do'e hebkəna! 50Ten kele yaŋ dər lasiŋa damdi hulum ji batem ana. Tarman celen hebkəna hãã wəra a ko bə minti kel teŋ doo kuy la wəraŋ. 51Aŋ gə ɗəkə-ɗiki minti ten bəŋ haa də kəkaɓiŋ cəərə seŋkaŋa mo? Ten waataŋ minti paapa, səma də ceme bə dər. 52Dər hebkənaŋa, kaŋ giidə kuli neeteŋa wiiɗiw ceme diri yaŋ wəra ɓasi, kaayaŋ soope'iŋ ji yaŋ acukur də kaayaŋ ɓasiŋ, kaayaŋ ɓasiŋ ji yaŋ acukur də kaayaŋ soope'iŋ. 53Yə ɓarse yaŋ wəra: bar pur jeme acukur yaŋ wəra də kurmuyuŋ, kurmuyuŋ də buru gəm; nər tər jeme acukur yaŋ wəra də tərnəŋ, tər də nərə gəm; mar kormə həlgəŋ jeme acukur yaŋ wəra də adi dəŋ, adi dəŋ də mar korməyaŋ gəm.»

Yeesu ge dər kaŋ cəərə kar gə minti bə jiŋ

(Mat. 16.2-3)

54Yeesu waataŋ kaa kə ablaw pa minti: «Bə minti aŋ asaŋ kamraŋ ne gə malə-mele a tiinə koŋ daŋ, aŋ isi bə waate faɗi minti: ‹koŋ hage yaŋ›; koŋ hage gəəzi#12.54 Ger kaanə Ziwifiŋaŋ anə kamraŋ də kaŋkaw ɗe hal-hal. Ger kaanə Keeraŋaŋ, kamraŋ bəŋ də ne goloŋ weete da daana a gud koŋ daŋ yə minti koŋ hage yaŋ, koŋ hage gəəzi. Kaŋkaw bəŋ də ne agal kə tamkaŋ daŋ, yə minti koŋ arse, wə arse gəəzi gəm.. 55Bə minti aŋ asaŋ kaŋkaw gə gal kə tamkaŋ ne bə jiŋ, aŋ minti: ‹Koŋ hiɓi yaŋ ablaw›; koŋ hiɓi gəəzi. 56Aŋ kaa gə minti waate kel kəna də kuŋ təwaŋ! Aŋ asaŋ ɓarse dər kar gə apəyaŋ də gə adawraŋ. Səma, aŋ ɗempa a ɓarse dər kar gə hebkənaŋ ba naanaanə səm mo?»

Ɗampe bə aduubə dəŋ də hulum bə acukur

(Mat. 5.25-26)

57«Aŋ də kusrəŋ, aŋ ɗempa a ceme kəəti də kusrəŋ akəsa cəərə kel gə minti ɗeker bə səm mo? 58Bədoona ana, damdi hulum bə acukur nəmtiŋ ɗəlaŋ ne bə koore dəərəm ku kəətiŋ, aŋ tapə ku kumsəŋ la wəra kəm a kəkəya minti wə a ɗe dəərəm tiinə hulum bə ceme kəətiŋa ba. Aŋ jəŋ ana baŋ, minti wə ɗeŋ ne dəərəm tiinə hulum bə ceme kəətiŋaŋ, hulum bə ceme kəətiŋ ayam kasi sootoŋa, sootoŋ ɗe a gam yaŋ a daŋgaya. 59Gəəzi, ten waatam, a ko toŋa, tam fele ko bə kele wəra a daŋgaya pəda, hãã bə minti tam werke soloy bə kəətiŋ wəra kəm keɗe.» – 12 13

Currently Selected:

LIKI 12: KERNT05

Highlight

Copy