ZAŊ 20

Yeesu kele warda giidə teɗker da

(Mat. 28.1-10; Mar. 16.1-8; Liki 24.1-12)

1Dər Dəmasiŋa, bə minti siswiɗiŋ bə tewe wəraŋ, Mari də Magdalaŋ kooroŋ cəərə teɗker. A ɗeŋ a fele pərki bə ku teɗker wəra bə laktə-lakte agəjaŋa. 2Kəya a haraŋ də tara sar anə Simoŋ Piyer də *hulum bə gud Yeesu naayaw tó bə minti wə bəluŋ, a wəətənəy minti: «Yə pəŋ titi də Barkaŋ ne wəra giidə teɗkera. Ko bə minti yə gaana adaŋ, paapa də dər are pəda.»

3Piyer də hulum bə gud Yeesu naayaw toŋ vaŋ warda, yə kooroŋ cəərə teɗker faɗi. 4Yə vaŋ tara ɓasi keɗe, səma hulum naayaw dəŋaŋ Piyer, wə tuluŋ warna cəərə teɗker na ajew. 5Wə goɓoŋ bə gole giidə teɗkera. Wə asaŋ ladəraŋ laki ada, səma wə kəlaŋ giidə teɗkera ba. 6Simoŋ Piyer bə minti adoro daŋ tuluŋ kəyaŋ, wə raawaŋ soki giidə faɗi. Wə asaŋ ladəraŋ laki 7də nayta də minti yə a həyɗunu cuuru dəərəŋ gəm. Ladəra taŋ a jəŋ paapa də vaa-ve cəərə kumsə də naytaŋ ba. A wəra də hayɗə-hayɗe agəjaŋa laki. 8Kəya hulum nayto bə minti a tuukuŋ ajew kəlaŋ na gəm, wə asaŋ kel teŋ də duru gəm. Kəya wə doŋ faɗi#20.8 Kaŋ ɗiki haa minti wə doŋ minti Yeesu haraŋ wəra dədərgə adordə meŋa,. 9Anaaŋa, kaa gə gud Yeesuŋ a doloy kəm bay əski gud kel gə jeerə-jeere gə giidə Kefter kə Pepeŋa gə minti waate minti Yeesu kir hare wəra dədərgə adordə meŋa. 10Kəya kaa gə gud Yeesu té ɓasiŋ haraŋ akera faɗi.

Yeesu veɗe kusru wəra dər Mari də Magdalaŋa

(Mar. 16.9-11)

11Mari a yaakaŋ maŋ sar teɗkera bə hage. A kəkəy bə hageŋaŋ, a goɓoŋ bə gole giidə teɗkera. 12A asaŋ *kaa kə digi kə Pepeŋ ɓasi də dəməəmə bərwa siri, gə əsə-isi a ko bə minti yə a gaŋ titi də Yeesu adaŋ derra. Məna əsəŋ a ko bə cuuru da anəkay, bə ɓasiŋ əsəŋ a ko bə kəmpuru da anəkay gəm. 13Kaa kə digiŋ waatəna minti: «Həlgəŋ, te hage kel maa mo?» A minti: «Yə pəŋ titi də Barkaŋ nin wəra, ko bə minti yə gaana adaŋ, paapa də dərən ba.» 14Kəya a haraŋ dərə anəkay, a asaŋ Yeesu gil, səma a asaŋ minti kəna tó ba. 15Yeesu waatəna minti: «Həlgəŋ, te hage kel maa mo? Te golde haa mindi mo?» A ɗəkəŋ naataŋ haa minti kəna hulum bə ji gud kəbaŋ, kəya a əsəŋ bə wəətu minti: «Hulum, jəəne minti bəŋ titi wəra haa tam, waatan la cəərə ko bə minti tam gaana adaŋ, ten hare a haara.» 16Yeesu minti: «Mari!» Kəya a perteŋ dərə cuuru faɗi, a wəətunu də ku Hebere minti: «Raboni!», haa minti: «Hulum bə hateŋ». 17Wə minti: «A don kay ba, gud maa mo, ten kəm bay ɗe sar Barən. Ɗee la sar kəsaanan, wəətəy la minti ten kooroŋ ne sar Barən bə minti Bəraŋ gəm, wə haa Pep nin, wə haa Pep nəətiŋ gəm.»

18Kəya Mari də Magdalaŋ kooroŋ sar *kaa gə guuduŋ faɗi gəm. A wəətənəy minti: «Ten asaŋ Barkaŋ da.» Kəya a əsəŋ bə tupuy bəlam də kel gə minti wə a waatəna dəŋ.

Yeesu veɗe kusru wəra dər kaa gə guuduŋa

(Mat. 28.16-20; Mar. 16.14-18; Liki 24.36-49)

19Duugŋ də Dəmasi taŋ tokiŋ, *kaa gə guuduŋ a gə tapə-tepe giidə kuli kəmana. Yə a gistiŋ ku kuliŋ wəra ciiri də lakəle, gud maa mo walka də kaa kəmtəŋ kə kaanə Ziwifiŋ a bə jiya. Kəya Yeesu pəŋ duru wəra aduubə di gil, wə minti: «Kəkaɓiŋ jəə la cəərəŋa!» 20Kəya wə gəənəy diri cəərə tarwa də kəəsu daana də surpuyu. Yə asaŋ Barkaŋ bədoona kəyaŋ, yə jəŋ wəra də waale anə fənay-fənay faɗi. 21Kəya wə wəətənəy pa minti: «Kəkaɓiŋ jəə la cəərəŋa! Damdi Barən a gaanan da anaŋ, hebkəna ten vaŋ gəm.» 22Kəya wə fuuliniy kaŋkaw ciiri na, wə minti: «Aŋ doo Tiiru Cetcetaŋ la. 23Kaa gə minti aŋ vəəgəŋ giidiŋ ne wəra cəərə baymele neeteŋaŋ, Pepeŋ vəəgi giidu yaŋ wəra ciiri gəm. Kaayaŋ gə minti aŋ vəəgəŋ giidiŋ cəərə baymele neeteŋa baŋ, wə vəəgi giidu ciiri bə gəm.»

Yeesu veɗe kusru wəra a Tomasi

24Də ko toŋ ha'aŋ, Tomasi bə minti yə məntu Kəmkun, bə aduubə də kaa hor ciiri ɓasi gə gud Yeesuŋaŋ, a jəŋ paapa ada ba bə minti Yeesu bəŋ siriŋ. 25Kaayaŋ gə gud Yeesuŋ əsəŋ bə wəətu minti: «Are asaŋ Barkaŋ!» Kəya Tomasi minti: «Ten asaŋ tarwa də aɗokiŋ kəəsu baŋ, ten məlaŋ kaasən a koɗ aɗokiŋa baŋ, ten məlaŋ kaasən surpuyu bə gəm, ten de gud kel teŋa ba.»

26Adordə hi toŋa aluma məna, kaa gə guuduŋ a gə tapə-tepe ciiri giidə kuli toŋa pa, Tomasi máŋ aduubə di. Yə a gistiŋ ku kuliŋ wəra ciiri də lakəle. Kəya Yeesu pəŋ duru aduubə di gil, wə minti: «Kəkaɓiŋ jəə la cəərəŋa!» 27Kəya wə waataŋ Tomasi minti: «Malə kaasam la kəna, golon kaasən la. Meɗə kaasam da, mələy la sərpəyana. Yaakə awəy la wəra, kolə la hulum bə de.» 28Tomasi hərnu kel minti: «Tam haa Barkaŋ nin, tam haa Pep nin!» 29Wə minti: «Tam doŋ gud bə minti tam asnan də dərəm. Waaleŋ kə kaa gə minti doŋ bay asan də diriŋ.»

Kel gə minti kefter toŋ bele hətəy

30Yeesu jəətəŋ miɗi ablaw də dər *kaa gə guuduŋ. Bəlam də daŋge duŋ paapa wəra bə topə-tope giidə kefter toŋa kəya ba. 31Miɗi bə minti kel də toŋ a wəra gə jeerə-jeereŋ, ten jiirunu haa minti aŋ kolə la bə de gud Yeesu minti wə haa Kristu, *Hulum bə minti Pepeŋ ŋəmnuŋ, wə haa Kormə Pepeŋ, daana minti aŋ doŋ ne guuduŋ, aŋ falə dədərgəŋ la də səmuŋ.

Currently Selected:

ZAŊ 20: KERNT05

Highlight

Copy