ZAŊ 17

Yeesu toose cəərə kaa gə guuduŋa

1Adordə kel teŋa kəyaŋ, Yeesu haŋ duru apəya bə toose, wə minti: «Aba, cəwa nəkaŋ ne, gaa gud boblo kə ten Kormoyom la wəra a kaŋ kir minti ten gam gud boblo nəmti la wəra a niini gəm. 2Tam aynan abay cəərə kaŋa keɗe kir minti ten ayə dədərgə də bay teweŋ la a kaa gə minti tam aynan dən kaasəna keɗeŋ. 3Fele bə dədərgə də bay teweŋ, haa ase bə tam Pep bə gəəzə-gəəzi ɗaaməna'i daana ase bə ten Yeesu Kristu bə minti tam gaanan daŋ gəm. 4Ten vəɗaŋ boblo nəmti ne wəra a kaa gə cəərə seŋkaŋ; joŋre bə minti tam a aynan dən, ten duunu ku wəra. 5Hebkəna Abaŋ, a ko bə minti tam hebkəna da adaŋ, harə la bə ayan boblo bə minti a jəŋ kaasəna də bə minti ten a kəm səram da ajew də mele bə gud koŋ.

6Ten vaɗnam wəra a kaa gə minti tam humnuy warda aduubə də kaa kə seŋka daŋ bə bi a ayan dən. Yə a haa kaa nəmti, tam aynan dən kaasəna, kəya yə humuŋ kosoŋ cəərə kel nəmtiŋa. 7Hebkəna ha'aŋ, wəra də diri minti kar gə minti tam aynan dən keɗe, yə bəŋ səram da, 8gud maa mo kel gə minti tam a waatənan dən daŋ, ten jugnuy di a kuɗiŋa, yə duuniy gəm. Yə asaŋ wəra kaŋkaŋ minti ten bəŋ haa səram da, yə doŋ minti gaanan da haa tam gəm.

9Ten bə toosoma ciiri. Ten toosom paapa cəərə kaa gə minti teŋ kə seŋkaŋ ba; ten toosom haa cəərə kaa gə minti tam aynan dən kaasənaŋ gud bə minti yə haa nəmti. 10Kaa katən keɗe, yə haa nəmti gəm, kaa nəmtiŋ keɗe, yə haa katən gəm. Gud boblo katən wəra bə vaɗə-veɗe siri. 11Isi sawəwa kənaŋ, ten koore səram na, ten bə ji cəərə seŋkaŋa kəna pəda, yaake cəərə haa kaa katən. Aba Cetcetiŋ, səɓaki də minti gud saməmaŋ, də minti tam a aynan dən, əməy ciiri la dəərə kir minti yə jəə la gə tapə-tepe məna damdi áŋ gə tapə-tepe məna ha'aŋ ana gəm. 12Bə minti ten a kəm siriŋ, səɓaki də minti gud saməmaŋ də minti tam a aynan dən, ten a bə əməya haa dəərə. Ten gulnuy ciiri, hulum lenteŋ wəra guudi anə məna ba; lenteŋ wəra anə ŋel məna, haa tó bə minti a kir lente wəra bə de ku kel gə jeerə-jeere gə giidə Kefter kə Pepeŋ. 13Hebkəna ha'aŋ, ten koore səram na, kel gə minti ten bə wəətiyaŋ, ten wəətəy də bə minti ten kəm kəna adawraŋ, kir minti sar waale bə minti wəra bə doo-de ku tarmanaŋ jəə la wəra ku tərməyi bədoona dege'-dege'i gəm. 14Ten jugnuy kel nəmtiŋ ne wəra, gud teŋa ta kaa gə cəərə seŋkaŋ məlnəy diri wəra gud bə minti yə paapa kaa neete pəda, damdi ten paapa neete baŋ ana gəm. 15Ten toosom haa paapa minti tam humuy la wəra cəərə seŋkaŋa moŋ ba. Ten toosom haa minti tam əsə la wəra tiini ku Nər Sərkəŋa#17.15 Nər Sərkəŋ haa Nərtitiŋ.. 16Yə paapa kə kaa gə cəərə seŋkaŋ pəda, damdi ten paapa kə kaa gə cəərə seŋkaŋ baŋ ana gəm. 17Jəə joŋre la də kel nəmtiŋ bə zey wəra dəra'i a nəənəm, kel nəmtiŋ haa gəəziŋ. 18Ten vay aduubə də kaa gə cəərə seŋkaŋ na damdi tam a gaanan aduubə di daŋ ana gəm. 19Ten gaŋ kusrən wəra dəra'i a nəənəm haa guudi, kir minti té də kusri, yə jəə la wəra gə vaa-ve dəra'i a nəənəm də gəəziŋ.

20Ten toosom paapa ciiri təwa ba, ten toosom haa cəərə kaa gə minti bə de yaŋ guudəna gud kel gə minti yə bə wəətəy di yaŋ cəərəna gəm. 21Abaŋ, ten toosom haa minti yə jəə la keɗe gə tapə-tepe məna. Yə jəə la gə tapə-tepe də áŋ damdi tam bə tapə-tepe dəərən daana ten bə tapə-tepe dəərəm ana gəm, kir minti kaa gə cəərə seŋkaŋ doo la gud kela minti gaanan da haa tam. 22Boblo bə minti tam aynan dən, ten əynəy di minti yə jəə la gə tapə-tepe məna damdi áŋ gə tapə-tepe məna'iŋ ana gəm. 23Kel teŋ haa minti ten bə tapə-tepe diiri, tam bə tapə-tepe dəərən gəm. Bədoona ana tepe neeteŋ ji yaŋ wəra bə doo-de ku kir minti kaa gə cəərə seŋkaŋ asə la minti tam gaanan da daana tam bə bələya damdi tam bə bəlanaŋ ana gəm.

24Abaŋ, kaa gə minti tam aynan dən kaasənaŋ, ten bele minti yə jəə la sarəna a ko bə minti ten bə ji yaŋ adaŋ, kir minti yə asə boblo nin la, boblo tó bə minti tam a aynan dən gud bə minti tam balnan da anə hãã ajew də mele bə gud koŋ. 25Aba ɗekeriŋ, kaa gə cəərə seŋkaŋ asnam hõy ba, səma ten toŋ ha'aŋ, tam də dərən, wəra də dər kaa gə guudən gəm minti tam gaanan da. 26Ten gəənəy diri cəərəma, ten raawe yaŋ bədoona pa, kir minti bele bə minti tam bə bəlana duuruŋ jəə la giidiya, daana minti ten jəə la giidiya gəm.»

Currently Selected:

ZAŊ 17: KERNT05

Highlight

Copy