JOŊRE 3

Hulum bə hurufi seere wəra

1Dəyaŋ hõy məna kəyaŋ, anə Piyer daana Zaŋ kooroŋ giidə *Kuli kə Pepeŋ bə ɗe a ji toose bə dəəgŋ də cəwa də minti yə le kaaraŋ aker daŋ. 2Də ko bə minti yə ɗeŋ a tuuki ku Kuli kə Pepeŋa maŋ anəkay, ku kuli toŋ bə minti yə məntu minti «Ku Kuli Pisiŋ», kaa kəman haŋ hulum bə hurufi da. Hulum toŋ waŋ hãã wəra də hurufiŋ faɗi. Yə təktu dər hiti da saksaki, yə bi a fəku ku kuliŋa minti wə laarə soloy la kasi kaa gə minti pəəti giidə Kuli kə Pepeŋa. 3Wə asaŋ anə Piyer daana Zaŋ kay bə bi da bə bi a ve giidə Kuliŋaŋ, wə əsəŋ bə waate minti: «Aŋ ayan karman la weseki kəm mo?» 4Kəya anə Piyer daana Zaŋ haraŋ diri cuuru. Piyer wəətunu minti: «Golə are la kəna!» 5Kəya hulum əsəŋ bə guluya anə ɗeketi gud bə minti ɗiki du wəətunu haa minti yə aye haa karman a tó. 6Kəya Piyer haraŋ bə wəətu minti: «Koo siisi paapa kaasəna ba! Səma, karman bə minti kaasənaŋ, ten ayam dəm: də sam Yeesu Kristu bə Nazaretiŋ, faa la apəya, ɗee la!» 7A ko toŋa kəya, wə haŋ kasi hulum kemer, wə fəənu apəya faɗi. Ɗeŋ a gole kəya, kampar hulum bə hurufiŋ coŋoŋ wəra anə doŋros faɗi. 8Wə gədaŋ cəərə kəmpuru anə eŋ gil, kəya wə əsəŋ bə ɗe faɗi. Yə vaŋ aləwa giidə tiilim də Kuli kə Pepeŋa soope keɗe. Wə maŋ bə ɗe wəra caw cəərə kəmpuru, bə gadte, bə tokɗe Pepeŋa! 9Kaa gə minti giidə tiilima keɗe əsnu wəra caw bə ɗe daana bə tokɗe Pepeŋa. 10Kaŋ ɗeŋ a ase kəya minti kəna hulum bə minti a dayday je'i adawra tiinə Ku Kuli Pisiŋa bə laare kara kasi kaŋaŋ. Ɗiki di lenteŋ wəra, yə ŋələŋ ablaw gud kel gə minti koloŋ hulum bə hurufiŋ wəra bə ɗeŋ.

Piyer waate kel a kaŋ

11Kəya hulum bə minti seereŋ wəra paapa bə yaake anə Piyera də Zaŋ pəda. Kaŋ neŋneŋ keɗe gə ŋələ-ŋili ablaw. Kəya yə əsəŋ bə fi tara sar anə Piyer da daana Zaŋ, gud gadlay gə minti yə məntəy minti «Gadlay kə *Salomoŋ». 12Də ko bə minti Piyer asaŋ kel teŋ kəyaŋ, wə əsəŋ bə waate kaŋa minti: «Aŋ kaanə *Israyel, kel gə minti jəŋ hebkənaŋ ŋəlnəŋ səm mo? Aŋ əsəŋ bə gole are anə tew-tew bədoona haa səm mo? Aŋ ɗiki haa minti are haraŋ hulum toŋ wəra bə ɗe caw haa də səɓaki də are mo, kumundu ba də ɗe naare bə gud Pepeŋ mo? 13Paapa! A kəkəy bə ji kel teŋa ha'aŋ, Pep kə *Abraham, kə *Izakiŋ, kə *Zakopiŋ, kə moomo də áŋ gəm, vəɗaŋ boblo kə Yeesu, hulum bə joŋre nuutuŋ, wəra a áŋ. Aŋ faɗi, aŋ əynu a kəkamnaŋ kə kaanə Ziwifiŋ, daana aŋ bəynu wəra tiinə *Pilata də ko bə minti wə a ɗəkəŋ minti tó yəəku. 14Aŋ bəyaŋ Hulum Cetcetiŋ daana Ɗekeriŋ wəra. Aŋ ɗeŋ a loɓe nəətiŋ kasi Pilata minti wə gaŋ hulum bə awə-awe titiŋ da warda ɗaw. 15Bədoona ana, aŋ awaŋ Bərdə Dədərgəŋ wəra. Səma Pepeŋ hərnu wəra dədərgə adordə meŋa; are kəmnə də kəkəy də kel teŋ. 16Are doŋ gud sam Yeesu. Gud teŋa ta, səɓaki də sam toŋ haraŋ bə aye səɓaki a hulum bə minti aŋ laki bə gulu, bə minti wəra də dərəŋ gəm, bə isi wəra gil cəərə kəmpuruŋ. Aŋ də kusrəŋ, aŋ asaŋ wəra minti wə wəra bə seerə-seere gəəzə-gəəzi. Siirunu ha'aŋ, de bə gud Yeesuŋ.

17Hebkəna kəsaananti, ten wəra bə asə-ase pisi minti aŋ, də kəkamnaŋ nəətiŋ, aŋ jəŋ Yeesu ha'aŋ kas bay aseŋ. 18Səma Pepeŋ haraŋ bə ji wəra ha'aŋ, kel gə minti wə a kulnuy ku *kaa kə jogte ku mini nuutuŋa keɗe bə waate wəra minti: *Hulum bə minti Pepeŋ ŋəmnu bə se gəəli yaŋ me'i. 19Gud teŋa ta, aŋ kolə kerkeŋ la a baymele nəətiŋ. Aŋ harə dərəŋ la máŋ cəərə Pepeŋa kir minti wə pəŋ baymele bə cəərəŋ la wəra. 20Aŋ jəə la bədoona kir minti Barkaŋ Pepeŋ ayaŋ maahe la ku tarməyaŋa, daana kir minti wə gaŋ Hulum bə minti wə a ŋəmnu wəra hãã acekjewa a nəənəŋ da: hulum toŋ haa Yeesu. 21Bə hebkəna ha'aŋ, Yeesu Kristu isi kəm apəy da tarmə pepeŋ da hãã də ko bə minti Pepeŋ hare bə ji kara wəra kəmarwaŋ keɗe a kuɗiŋaŋ. Kel teŋ ji yaŋ damdi kel nuutu gə minti áŋ a iskiniy wəra dayday ku kaa cetcetiŋ gə jogte ku mini nuutuŋa ana. 22Bədoona ana, Moyisi waataŋ wəra dayday minti: ‹Barkaŋ Pep nəətiŋ bə gaŋ hulum bə jogte ku mini da yaŋ damdi wə a gaanan da a nəənəŋ ha'aŋ ana gəm. Hulum toŋ bə pi duru ha'aŋ, gud kaasaw dəŋa toki pa. Aŋ jiɓru ku yaŋ cəərə kel gə minti wə bə waataŋ dəŋ yaŋ neŋneŋ keɗe. 23Hulum muntu mo əskəŋ ku hulum bə jogte ku mini toŋ baŋ, yə a əŋku adəwaldə kaa kə Pepeŋa pəda, yə əwu la wəra awe#3.23 Deut. 18.15; Lév. 23.29.› 24Bədoona pa, kaa kə jogte ku mini kə Pepeŋ gə dər Samiyel da hãã, kaayaŋ gə ajew də kaayaŋ gə minti bəŋ adoro daŋ neŋneŋ keɗe, waataŋ sam kar gə minti aŋ bə əsəya dər hiti toŋa hebkəna ha'aŋ gəm. 25Kaa kə jogte ku mini kə Pepeŋ waataŋ kel gə minti Pepeŋ a wəətənəy wəra minti tó jəy yaŋ. Kel teŋ nəəti faɗi. *Jaa də minti Pepeŋ a doona də kəmoomo də áŋ dayday, a haa jaa nəəti gəm. Pepeŋ doŋ jaa taŋ də ko bə minti wə waataŋ moomo dəŋ Abraham minti: ‹Ten ge pisi yaŋ cəərə kaa gə cəərə seŋkaŋa wəra keɗe gud kaasaw dəma.› 26Pepeŋ ŋəmaŋ Hulum bə joŋre nuutuŋ daana wə gəənu da ha'aŋ kəm a nəənəŋ kir minti wə gaa pisi la cəərəŋa a kəkəy bə minti wə koloŋ kerkeŋ a baymele bə minti aŋ bə juutuŋ.»

Currently Selected:

JOŊRE 3: KERNT05

Highlight

Copy