JOŊRE 12

Pepeŋ foke Piyer warda giidə kuli bə daŋgay da

1Də ko toŋ ateŋa ha'aŋ, *Erodi, kumna bə Ziwifiŋ, əsəŋ bə lese sərdə kaa kə doo-de gə gud kaa kə Tapi gə Zeruzalema. 2Wə vaŋ kaa bə ɗe a awe Zaki, seenə Zaŋ, wəra də macəlam. 3Wə asaŋ anəkay minti kel teŋ doŋ dər kaanə Ziwifiŋ tə pə moŋ, wə vaŋ kaa bə ɗe a de Piyer da faɗi pa. Wə jəŋ kel teŋ ateŋa haa dər *kəɗwəy gə mappa bə bay siipəŋa. 4Də ko bə minti yə tuluŋ də Piyer da anəkay, Erodi vəənəy duuru minti yə ɗee la a gaw a daŋgay na. Kəya wə cəmaŋ sootoŋ wəra waaɗe-waaɗe kampa waaɗe gəm, minti yə koltə la bə gole cəərə kuli bə daŋgaya ŋaanaanə mo. A ɗiki du ha'aŋ, wə a bəlaŋ haa minti tó jəmu kəəti du wəra anə pəɗaki gil tiinə kaŋa adordə kəɗwəy gə *Pakiŋa. 5Piyer doloy a daŋgay na ha'aŋ, kəsootoŋ ku laki bə gulu cuuru. Səma kaa kə Tapiŋ bə toose Pepeŋa saksaki də cəwa gud kel du.

6Də ko bə minti Erodi ɗampaŋ wəra bə jeme kəəti də Piyer tiinə kaŋa wəra dibiinim, Piyer a kina duugŋ bəy giidə kuli bə daŋgaya. Kəsooto gə əsə-isi saɓdu kəna gəm, kəna gəm. Yə jəktənəy gaalay kuurə kəəsi də kəsooto gə minti bə gulu cuuruŋ, kəsootoŋ gaalaŋ gə əsə-isi laki bə gole cəərə kuli bə daŋgaya pa. 7Ɗe a goleŋa *hulum bə digi kə Pepeŋ kəna gil ciiri. Giidə kuli bə daŋgay leereŋ wəra cẽẽ-cẽẽ. Kəya hulum bə digi kə Pepeŋ ɗootoŋ Piyer saɓdu minti wə gunə la wəra. Wə wəətunu minti: «Faa la apəya cəlam!» A ko toŋa kəya, gaalay bə minti yə a əntəŋ kasi Piyer duuruŋ foktoŋ nuutu wəra bay cuuru anə fəkat-fəkat faɗi. 8Kəya hulum bə digi kə Pepeŋ wəətunu minti: «Əntə santir nəmtiŋ la, tarə kalmasi kemkem nəmtiŋ la ada.» Kəya Piyer duunu ku nuutu faɗi. Hulum bə digi kə Pepeŋ haraŋ bə wəətu pa minti: «Ɗarə dəməəmə nəmti də ɓasi la sarəma, bəəda guudən da.» 9Kəya Piyer kəlaŋ warda guudu da faɗi. Səma kel gə minti hulum bə digi kə Pepeŋ bə jiya ha'aŋ, kəm paapa bə awe cuuru minti haa kel kə gəəzi ba. Wə bə ɗiki haa minti karman toŋ vəɗaŋ dər tó haa veɗe. 10Bədoona ana, yə vaŋ sar kəsooto gə ajew gə gole ku kuli bə daŋgay da tew, yə ɗeŋ a he ku kaayaŋ gə ɓasiŋ na warna tew pa. Kəya yə tuluŋ warna ku kuli bə jəə-ji də koosoŋ na bə minti duru bə jamə-jeme ɗeker cəərə vil naŋ, ku kuliŋ bəŋəŋ warna bay cuuru faɗi. Yə vaŋ wəra vaa kəyaŋ, yə haŋ kəkəy kəman. Ɗeŋ a deye anə ta'i, hulum bə digi kə Pepeŋ pa pəda, wə yaakaŋ Piyer ne.

11Piyer ɗe a gole kusru ha'aŋ, wə wəra ɗaɗəram gil dədərgə, wə paapa a kina pəda. Wə minti: «Hm! Ten asaŋ ne hebkəna máŋ ta, kel teŋ haa gəəzi: Barkaŋ gaŋ hulum bə digi nuutuŋ da haa bə bi a don wəra kasi Erodi daana ku lasi də minti kaanə Ziwifiŋ sə a ləsan dəərəŋ.» 12Wə əskəŋ gud kel teŋ wəra əska kəya, wə raawaŋ ger Mari, nər Zaŋ, səmu bə tokɗeŋ minti Markə. Kaŋ ləwaŋ ciiri ada ablaw bə toose. 13Də ko bə minti Piyer tuluŋ kay ger Mari naŋ, wə laŋ ku kəsarkaw faɗi. Kəya tər də joŋre məna, sama minti Rodi, kooroŋ da bə bi a gole minti mindi laŋ ku kuliŋ haa mo? 14Kəya a əskəŋ haa dordə Piyer. Waaleŋ doona anəkay səm moŋ, a haraŋ də tara aləw na kəm bay buŋu ku kuli ceki. A ɗeŋ a waate kaayaŋ minti: «Kəna Piyer! Kəna Piyer! Wə kanda taakaw da gil ku kuliŋ da!» 15Kəya kaŋ harna kel minti: «Te də tiniini mo?» Səma tər nuutu bə waate naataŋa haa minti Piyer kanda gəəzi gəm. Yə haraŋ bə waate máŋ minti: «Jəəne bədoona, haa hulum bə digi nuutuŋ.»

16Kə Piyer ha'aŋ, wə le nuutuŋ haa ku kuliŋ saksaki. Yə ɗeŋ a biŋi ku kuliŋ anəkayŋa, yə ɗeŋ a gole ha'aŋ Piyer gəəzi. Kəya yə bəsaŋ máŋ kuy ha'-ha'i kas ŋili də kel teŋ. 17Kəya Piyer haŋ kəəsu apəya, wə vilwiniy di anəkayya minti yə zenə la kəm mo. Yə zeneŋ sekeki, kəya wə əsəŋ bə tupuy bəlam də kel gə minti Barkaŋ gaŋ tó warda a daŋgay da haa naanaanə ge moŋ. Wə wəətənəy pa minti: «Aŋ ɗee la a waate kel teŋ a Zaki də kəsaanə áŋ kaayaŋ gəm.» Kəya wə kəlaŋ wəra, wə kooroŋ warna a ko baalaŋ na anə hoŋ.

18Də bə minti koŋ ɗeŋ a wele wəra bəbəgiŋ kəyaŋ, kəsooto gə minti a bə gole cəərə Piyeraŋ lenteŋ wəra bənləy. Yə əsəŋ bə le ku kumsi minti: «Piyer jəŋ haa naanaanə mo?» 19Kəya Erodi minti yə guldu la, səma yə paapa bə fele Piyera a ko ba anə ceki. Erodi minti yə harə la bə mante kəsootoŋ da. Wə ləənəy kuy də waŋ, səma yə nəkaŋ bə həru kel cəərə Piyera ba. Kəya wə minti: «Əwəy la wəra!» Adordə kel teŋa, Erodi yaakaŋ seŋka də Zudeŋ wəra, wə kooroŋ giidə vil də Sezareŋ. Wə hətəŋ ada na maki.

Me də Erodi

20*Erodi bə kolə-kole waŋ ablaw cəərə kaanə Tir daana kaanə Sidoŋ. Gud teŋa ta, kaa teŋ təpaŋ kuy minti té vaw kaa la suru. Səma yə bandaŋ ablaw bə de jaa wəra kəm də Bəlastusi kir minti wə kayə té la, gud bə minti wə haa hulum bə ame cəərə kuli kə kumnaŋ faɗi. Adoro kəya, yə ɗeŋ a waate Erodi minti té a ji gəbaŋ aduubə də kumsə té duuru pəda, gud bə minti yə hame haa də kar gə giidə seŋka kə Erodiŋ.

21Hi bə minti Erodi a jəmnuŋ tuluŋ kəyaŋ, wə təraŋ dəməəmə də kumna nuutuŋ, kəya wə ɗeŋ a isi warda anə ɗif je'i a ko bə jeme kəətiŋ da. Kəya wə əsəŋ bə waate kela wəra anə pəɗaki gil tiinə kaa gə minti a taaraŋ warda kiɓili gil tiinu da keɗe'iŋ. 22Kəya kaŋ əsəŋ bə naakte kuya minti: «Waate kel máŋ gila paapa hulum pəda, toŋ máŋ kəya dordə pepe kəman gadi!» 23Də ko toŋ kəya, *hulum bə digi kə Barkaŋ gəənu ɗeme cuuru, gud bə minti wə yaakaŋ kaŋ bə tukɗu damdi wə haa Pepeŋ ana, anaaŋa tokɗeŋ a haa kə Pepeŋ təwa ɗaw. Kəya googo həmnu kusuki du wəra, wə meŋ wəra faɗi.

24Ana də ko toŋ kəya gəm, kel kə Pepeŋ bə duusi na warna pisi duusa ɗaw. 25Kə anə Barnabasiŋ daana Sol ha'aŋ, yə təwaŋ ku mini neeteŋ wəra tawə sar kaa kə doo-de gə Zeruzalemaŋ, yə haraŋ bə koore faɗi. Kəya yə doŋ Zaŋ, bə minti səmu bə tokɗeŋ minti Markəŋ, kəəsi.

Currently Selected:

JOŊRE 12: KERNT05

Highlight

Copy