مرقس 13
13
لْعَلَامَاث ن ڒْفَنَا ن دُّنشْت
1وَامِي د يفّغ عِيْسَى زِي ثمْزِيذَا ثَمقّْرَانْت يقَارّب-د غَارس يجّن ن زݣ يمحْضَارن نّس ينَّا-ٱس: "آ لْمُعَلِّم، خْزَر يزْرَا-يَا ذ ڒبْنِي-يَا مشْحَاڒ ذ يصبْحَانن!"
2ئِنْدق-د عِيْسَى ينَّا-ٱس: "تْوَاڒِيذ ڒبْنِي-يَا مشْحَاڒ د يتَاس ذ اَصبْحَان، يَاش؟ وَلَكِن وَار ذَا يتْغِيمِي ؤُڒَا ذ يجّن ن وزْرُو خ ونّغْنِي، مَارَّا مَانَايَا اَذ ينهْذم."
3وَامِي يقِّيم عِيْسَى ذݣ وذْرَار ن زِّيتُون زَّاث إِ ثمْزِيذَا ثَمقّْرَانْت، سّقْسَان-ث بُطْرُس ذ يَعْقُوب ذ يُوْحَنَّا ذ أَنْدْرُوْس وَاحْذس نَّان-اَس: 4"إِينِي-يَانغ شك، مڒْمِي غَا يوْقع مَانَايَا؟ مِين ثعْنَا لْعَلَامَا نِّي خْمِي عْڒَاين غَا وقْعنْت مَارَّا ثِمسْڒَايِين-أَ؟"
5ئِجَاوب-يثن عِيْسَى ينَّا-ٱسن: "حْضَام يخف نْوم حمَا وَار كنِّيو يخدّع حَدّ. 6أَطَّاس إِي د غَا يَاسن س يِيسم ينُو زَعْمَا اَذ ينِين قَا نش ذ لْمَسِيح! أَذ خذْعن اَطَّاس ن يِوْذَان. 7خْمِي غَا ثسْڒَام خ لْحُرُوْب ذ ڒخْبَار ن لْحُرُوْب وَار تݣّْوْذث شَا، لَابُد زِي مَانَايَا. وَلَكِن دُّنشْت-أَ عَاذ وَار ثْفنِّي شَا. 8دُّوْلَا اَذ تهْجم خ دُّوْلَا، لْممْلَكَا اَذ تهْجم خ لْممْلَكَا. أَذ يِيڒِي جُّوْع اَذ يوْقع زِّنْزَال ذݣ وَاطَّاس ن يمُوْشَان. مَانَايَا اَذ يِيڒِي اَمشْنَاوڒحْرِيق اَمزْوَارُو ن ثمْغَارْث إِي يتَارْون.
9حْضَام يخف نْوم! أَكنِّيو سلّْمن إِ لْمَحْكَمَاث، أَكنِّيو ؤُوْثن ذِي ثمْزِيذَاوِين نْسن. أَذ تْبدّم زَّاث إِ لْحُكَّام ذ يزدْجِيذن عْلَاحْسَاب يسم ينُو حمَا اَخَافِي ثْشهْذم. 10أَقَا ذ اَمزْوَارُو يتْخصَّا اَذ يتْوَابشَّر لْإِنْجِيل إِ مَارَّا ڒݣْنُوْس. 11خْمِي كنِّيو غَا اَوِين حمَا اَكنِّيو سلّْمن غَار شّْرَع، بْڒَا مَا ٱذ تيْسِيم اَمْنُوْس ذ اَمزْوَارُو ذِي ڒَعْقُوْڒَاث نْوم مين غَا ثِينِيم؛ لَّا، أَوَاڒن نِّي إِي غَا ثِينِيم ذ أَربِّـي إِي ذَاوم ثن غَا يُوْشن ذِي ثْسَعَّات نِّي. وَار يدْجِي بُو ذ كنِّيو إي غَا يسِّيوْڒن؛ لَّا، أَذ يسِّيوڒ أَرُّوْح يقدّْسن. 12ؤُمَاس اَذ يسلّم ؤُمَاس إِ ڒْموْث. بَابَاس اَذ يسلّم مِّيس. ثَارْوَا اَذ رَاحن ضد إ لْوَلِدِين نْسن، أَثن سلّْمن إِ يِنِّي إِي ثن غَا نْغن. 13أَكنِّيو عِيفّن مَارَّا يوْذَان عْلَاحْسَاب يسم ينُو، وَلَكِن ونِّي غَا يصْبَرن غَار ونݣَّارُو اَتَاف اَذ ينْجم.
14خْمِي غَا ثࢲرم <مِين يدْجَان ذ اَعفَّان اَطَّاس يهدّْمن>، نتَّا يبدّ مَانِي يخصَّا وَار يتْبدِّي شَا، ڒخْدّنِّي يِنِّي يدْجَان ذِي ثْمُورْث ن يَهُوْذِيَا يتْخصَّا اَذ اَروْڒن غَار يذُوْرَار. (أَ فْهم آ ونِّي يغْرِين مَانَايَا!) 15ونِّي غَا يِڒِين خ ثْزقَّا#13.15 ثَزقَّا نتَّاث ذ سّْظَاح. نّس يتْخصَّا-ٱس وَار يهوِّي شَا غَار ثدَّارْث وَار ذَايس يتِّيذف شَا حمَا اَذ ييْسِي شَان ڒْحَاجث. 16ونِّي غَا يِڒِين ذݣ ومَرْجع يتْخصَّا-ٱس وَار يتعْقِيب شَا غَار ثدَّارْث اَذ ييْسِي تْشَامِّير نّس. 17يَا تَمَارَا إِي غَا يِيڒِين خ ثمْغَارِين نِّي س يعدِّيسن ذݣ وُوْسَّان نِّي ذ ثِنِّي يسُّوْطُوْضن! 18تَّارث إِ أَربِّـي بَاش مَانَايَا وَار يتِّيڒِي شَا ذِي ڒْمشْتَا. 19ذِي ڒْوقْث نِّي اَتَاف اَذ توْقع يجّن ن تَمَارَا ذ ثَمقّْرَانْت إِي وَار يوْقِيعن عمَّارْص زݣ وَامِي ثدْجَا دُّنشْت-أَ إِي د يخْڒق أَربِّـي اَڒ ڒخُّو، أُو عمَّارْص اَذ توْقع عَاوذ. 20مَعْلِيك سِيذِي أَربِّـي وَار يسنْقِيس شَا ذِي ڒِيَّام نِّي ن تَمَارَا-يَا إِي د غَا يَاسن، أَتَاف وَار ينجّم ؤُڒَا ذ يجّن. خ سَّبَاب ن يِنِّي يخْضَر أَربِّـي، أَتَاف اَذ يسنْقس ڒِيَّام نِّي إِي د غَا يَاسن.
21سّنِّي مڒَا ينَّا-ٱوم شَان يِجّن: خْزَرم! أَقَاث ذَانِيتَا لْمَسِيح! نِغ، أَقَاث ذِيهَا! وَار ث تَامْنم شَا. 22أَقَا اَطَّاس إِي د غَا يمظْهَارن س يخَرِّيقن اَذ ينِين اَقَا نش ذ لْمَسِيح نِغ نش زِي لْأَنْبِيَا. أَذ ݣّن لْمُعْجِزَاث ذ ثِمقّْرَانِين ذ ڒَعْجَايب زَعْمَا حمَا اَذ خذْعن يوْذَان. مَعْلِيك زمَّرن إِڒِي خذْعن ؤُڒَا ذ يِنِّي يخْضَر أَربِّـي. 23إِڒِيم عْلَابَال كنِّيو! أَقَا نش عڒْمغ-اَوم خ مَارَّا مَانَايَا قْبڒ مَا ٱذ يوْقع.
24منْبَعْد إِ تَمَارَا ن ڒِيَّام نِّي، ڒخْدّنِّي ثْفُوْشْت اَذ تذْوڒ ذ ثَادْجسْت، ثَزِيرِي وَار تِيشّ بُو ثْفَاوْث. 25ئِثْرَان اَذ د وْضَان زݣ وجنَّا، يِنِّي يجهْذن ذݣ وجنَّا اَثن يسنْهزّ أَربِّـي. 26ڒخْدّنِّي إِي غَا ࢲرن مِّيس ن بْنَاذم يهوَّا-د ذݣ وسيْنُو س لْعَظَمَا ذ جّْهذ نّس يمْغَارن. 27أَذ د يسّكّ لْمَلَائِكَاث نّس غَار اَرْبعَا ن يمُوْشَان ن ثْمُورْث مَانِيس د يتكّ اَرِّيح: زِي شَّرْق ذ لْغَرْب ذ لْجَنُوب ذ شَّمَال. أَذ د يسْمُوْن يِنِّي يخْضَر زِي ڒَاحدّ ن دُّنشْت-أَ اَڒ ڒَاحدّ ن وجنَّا.
28ڒمْذم يجّن ن ڒْمَعْنَا زِي ثْشجَّارْث ن ثَازَارْث. غِير ڒفْرُوْع نّس اَذ حبّْبن اَذ ݣّن ثِيفْرَاي، أَتَاف اَذ تسّْنم يَالَّاه اَنبْذُو يقَارّب-د. 29أَمنِّي ؤُڒَا ذ كنِّيو. خْمِي غَا ثࢲرم ثِمسْڒَايِين-أَ يتوْقِيعن اَتَاف اَذ تسّْنم إِلَّا مَانَايَا يُوْذس-د، أَقَاث زَّاث إِ ثوَّارْث. 30أَقَا تسْڒَام ڒْحَقّ: يوْذَان ن ڒْوقْث-أَ وَار تْمتِّين شَا اَڒ غَا يوْقع مَارَّا مَانَايَا. 31أَذ يفْنَا وجنَّا ذ ثْمُوْرْث، وَلَكِن اَوَاڒن ينُو وَار فنِّين شَا عمَّارْص.
32شُوْف، نْهَار نِّي نِغ ثْسَعَّات نِّي وَار ت يسِّين ؤُڒَا ذ يجّن، لَّا لْمَلَائِكَاث ذݣ وجنَّا ؤُڒَا ذ مِّيس. ئِسّن-يت غِير بَابَا وَاحْذس. 33حْضَام يخْف نْوم، إِڒِيم عْلَابَال ڒَاحقَّاش وَار ثسِّينم شَا مڒْمِي د غَا ثَاس ڒْوقْث نِّي.
34نْهَار نِّي اَذ يِيڒِي اَم يِجّن ن سِّيّد يرزُّو اَذ يسَفر. ئِفّغ زِي ثدَّارْث نّس، ئِخدَّامن نّس يكلّف-يثن خ وَاݣْڒَا نّس كُڒ يجّن خ ڒْخذْمث نّس. ئِوصَّا اَعسَّاس ن ثوَّارْث اَذ يقِّيم يفَاق. 35خ مَانَايَا فَاقم بَعْدَا، قَا وَار ثسِّينم مڒْمِي د غَا يذْوڒ بَاب ن ثدَّارْث. وَار ثسِّينم مَا اَݣ وعشِّي نِغ غَار ڒْوسْط ن دْجِيڒث نِغ خْمِي غَا يدّن ويَازِيض نِغ غَار ڒفْجَر. 36غَارْوم اَذ د يَاس عْلَاغَفْلَا اَكنِّيو يَاف ثطّْصم! 37مِين ذَاوم قَّارغ، قَّارغ-ث إِ مَارَّا: ئِڒِيم عْلَابَال!"
Currently Selected:
مرقس 13: ريف
Highlight
Share
Copy
Want to have your highlights saved across all your devices? Sign up or sign in
