مرقس 12
12
ڒْمَعْنَا ن يخمَّاسن إِي ذِي يدْجَا شَّرّْ
1ئِبْذَا عِيْسَى يسَّاوَاڒ اَكِذْسن س ڒمْعَانِي ينَّا-ٱسن: "ئِجّن ن سِّيّد يࢲُّو اَضِيڒ ذݣ يِجّن ن ومَرْجع نّس. ئِنّض-اَس-د ڒْحِيض، يݣَّا ذَايس ثَسِيرْث وضِيڒ. ئِبْنَا ذَايس يجّن ن ثْسُوْمْعث إِ ڒْعَسّث. يجَّا ذَايس يخمَّاسن صَافِي يرُوْح يسَفر. 2وَامِي د يُوْوض ڒْوقْث ن وڒْقض ن وضِيڒ، ئِكَّر يسّكّ يجّن ن وخدَّام غَار يخمَّاسن نِّي بَاش اَذَاس د ؤُشن ڒْحَقّ نّس ن ومَرْجع ن وضِيڒ. 3وَلَكِن مِين ݣِّين يخمَّاسن نِّي؟ طّْفن-ث ؤُوْثِين-ث، سّكّن-ث-يد يخْوَا. 4ئِسّكّ-اَسن عَاوذ يجّن ن وخدَّام نّغْنِي، مرْزن-اَس عدّن خَاس. 5ئِسّكّ-اَسن يجّن نّغْنِي، نْغِين-ث. ئِسّكّ-اَسن ينّغْنِي اَطَّاس، ئِجّن ؤُوْثِين-ث يجّن نْغِين-ث. 6ئِقِّيم-اَس ممِّيس يعِيزّن وَاحْذس. غَار ونݣَّارُو يسّكّ-يث غَارْسن ينَّا: أَقَا اَذ ݣّْوْذن ممِّي. 7ئِخمَّاسن نِّي مِين ݣِّين؟ كَّرن نَّان إِ وَايَاوْيَا: أَقَا ونِّي إِي غَا يوَرْثن! أَث نْنغ بَاش اَذَاس نَاوِي اَمَرْجع-أَ ن وضِير! 8طّْفن-ث نْغِين-ث، نْضَرن-ث-يذ غَار بَارَّا إِ ومَرْجع وضِيڒ. 9إِيوَا، مِين ذَاسن غَا يݣّ بَاب ن ومَرْجع نِّي وضِيڒ؟ أَذ د يَاس نتَّا س يِيخف نّس اَذ ينغ يخمَّاسن نِّي مَارَّا اَذ يجّ اَمَرْجع نِّي وضِيڒ إِ ينّغْنِي. 10مَا عمَّارْص وَار ثغْرِيم مين يُوْرِين ذي لْكِتَاب؟
<أَزْرُو إِي عِيفّن يبنَّاين،
يوْقع ذݣ ومْشَان اَصبْحَان ذِي ثْغمَّارْث ن دْسَاس.
11ذ سِيذِي أَربِّـي إِݣ يݣِّين مَانَايَا،
ذ يجّن ن ڒْحَاجث ذ ثَمقّْرَانْت!>"
12لْحُكَّام ن أَيث-إِسْرَائِيل رزُّوْن اَذ طّْفن عِيْسَى، وَلَكِن ݣّْوْذن زِي شَّعْب. فهْمن بلِّي يسَّاوَاڒ خَاسن عِيْسَى س ڒْمَعْنَا-يَا. جِّين-ث ؤُيُوْرن سّنِّي.
ضَّرِيبَا ن قَيْصَر
13كَّرن لْحُكَّام نِّي سّكّن غَار عِيْسَى شَان يفَرِّسِيْين ذ شَان يِوْذَان زِي ڒْحِزب ن وزدْجِيذ هِيرُوْدُس، رْزُون اَث طّْفن خ شَا ن وَاوَاڒ نّس. 14وَامِي د ؤُسِين غَار عِيْسَى نَّان-اَس: "آ لْمُعَلِّم قَا نسّن بلِّي شك نِيشَان إِي ثدْجِيذ. وَار تݣّْوْذذ شَا زݣ يِوْذَان ڒَاحقَّاش وَار تݣّذ بُو س وُوْذمَاون. ثْسڒْمَاذذ س ڒْحَقّ مَامّش يخس أَربِّـي أَ نْعِيش. إِنِي-يَانغ: مَا ثْسمّح شَّرِيعَا نّغ أَ نْخدْجس ضَّرِيبَا إِ وزدْجِيذ قَيْصَر نِغ لَّا؟ مَا ذَاس ت نْخدْجس نِغ لَّا؟"
15ئِسّن عِيْسَى يخَرْوِيضن نِّي إِي ذَايْسن ينَّا-ٱسن: "مَايمِّي ذَايِي ثْسوْجَاذم ثَخْشبْث؟ أَوِيم-اَيِي-د دِينَار نِّي ن ضَّرِيبَا حمَا اَث ࢲرغ." 16ؤُشِين-اَس-ث-يذ. ينَّا-ٱسن: "وِي يِڒَان تصْوِيرْث-أَ ذ يِيسم-أَ إِي ذَايس؟"
نَّان-اَس: "ن قَيْصَر."
17ئِنْدق-د عِيْسَى ينَّا-ٱسن: "مِين يدْجَان ن قَيْصَر ؤُشم-اَس-ث إِ قَيْصَر. مِين يدْجَان ن أَربِّـي ؤُشم-اَس-ث إِ أَربِّـي." أُوْشَا قِّيمن تْعجّْبن ذَايس.
سِيذِيثْنغ عِيْسَى يتْبشَّار خ ثُوْذَارْث ن ڒبْدَا
18قَارّْبن-د غَار عِيْسَى شَان يِوْذَان زِي ڒْحِزب ن يصَدُّوْقِيْين (قَّارن نِثْنِي بلِّي يوْذَان وَار د تْنكَّرن شَا زِي ڒْموْث). كَّرن نَّان-اَس: 19"آ لْمُعَلِّم، قَا يُوْرَا-ٱنغ مُوْسَى اَرْيَاز مڒَا يمُّوْث يجَّا ثَمْغَارْث نّس وَار كِذس د يجِّي بُو ثَارْوَا، ثَاجَّاڒْث نِّي لَابُد اَت يَاوِي وڒْوس نّس بَاش اَكِذس د يجّْ ثَارْوَا إِ وُوْمَاس نِّي يمُّوْثن. 20نشِّين تُوْغَا اَكِذْنغ سبْعَا ن وَاوْمَاثن، ئِمْڒش ومزْوَارُو يمُّوْث وَار د يجِّي بُو ثَارْوَا. 21ثَمْغَارْث نِّي يُوْوِي-ت وِيس ثْنَاين يمُّوْث وَار د يجِّي بُو ثَارْوَا. أَمنِّي عَاوذ وِيس ثْڒَاثَا. 22أَمنِّي عَاوذ اَڒ وِيس سبْعَا، مُّوْثن مَارَّا وَار كِس د جِّين بُو دُّوْرِّيث. أَڒ ونݣَّارُو ؤُڒَا ذ ثَمْغَارْث نِّي ثمُّوْث. 23يُوْم لْقِيَامَا، خْمِي د غَا كَّرن يِنِّي يمُّوْثن، ؤُمِي غَا ثِيڒِي ثمْغَارْث نِّي؟ أَقَا ؤُوِين-ت س سبْعَا إِذْسن."
24ئِنْدق-د عِيْسَى ينَّا-ٱسن: "كنِّيو ثخْضَام ڒَاحقَّاش وَار ثسِّينم شَا لْكِتَاب وَار ثسِّينم شَا ؤُڒَا ذ جّْهذ ن أَربِّـي. 25خْمِي د غَا كَّرن يِنِّي يمُّوْثن يرْيَازن ذ ثمْغَارِين وَار مدْجْشن شَا وَار تْوَاسْمدْجِيشن شَا. لَّا، أَذ يڒِين اَمشْنَاو لْمَلَائِكَاث إِݣ يدْجَان ذݣ وجنَّا. 26وَلَكِن شُوْف، يِنِّي يمُّوْثن اَذ د كَّرن زِي ڒْموْث. مَا عمَّارْص وَار ثغْرِيم مِين يُوْرِين ذِي لْكِتَاب ن مُوْسَى؟ ذِي ڒْقِصَّا ن ؤُخْشَاب،#12.26 مَاشِي مَعْرُوْف مِين يعْنَا وخْشَاب-أَ، وَلَكِن يمْكن ذ شَان اَرْبِيع اَم ثَابْغَا نِغ اَم شَان ثْشجَّارْث ثَمزْيَانْت ذَايس يسنَّانن. وَامِي يسِّيوڒ أَربِّـي اَك مُوْسَى ينَّا-ٱس قَا نش ذ أَربِّـي ن بْرَاهِيم، ذ أَربِّـي ن إِسْحَاق، ذ أَربِّـي ن يَعْقُوْب."#12.26 سِيذْنَا مُوْسَى تُوْغَا يرَسّ ڒبْهَايم ن وذݣّْوَاڒ نّس نتَّا قَّارن-اَس يَثْرُون، نتَّا ذ ڒفْقِي ن مِدْيَان. ئِجّن ن نْهَار ينْده ڒبْهَايم غَار صَّحْرَا حتَّا اَڒ مَانِي يُوْوض غَار وذْرَار ن أَربِّـي ؤُمِي قَّارن حُوْرِيب. ذِنِّي إِي ذَاس د يمظْهَار لْمَلَائِكَا ن سِيذِي أَربِّـي ذݣ وشعَّاڒ ن ثْمسِّي زِي ڒْوسْط ن يجّن ن ؤُخْشَاب. يُوْفَا مُوْسَى اَخْشَاب نِّي يرقّ بْڒَا مَا ٱث ثشّ ثْمسِّي. ينَّا ذِي نّفْس نّس: "أَذ رَاحغ حمَا اَذ خْزَرغ ثَمسْڒَايْث-أَ إِݣ يسذْهَاشن. مَايمِّي اَخْشَاب-أَ وَار يحرّق شَا؟" وَامِي يرُوْح ذِنِّي بَاش اَذ يخْزَر، ئِࢲْرِي-ث سِيذِي أَربِّـي ئِبَرّح-اَس-د زِي ڒْوسْط ن ؤُخْشَاب نِّي ينَّا-ٱس: "آ مُوْسَى آ مُوْسَى." ينَّا-ٱس: "هَاقَايِي". ينَّا-ٱس أَربِّـي: "وَار تْقَارّب شَا ذَانِيتَا. كّس ثِسِيڒَا زݣ يضَارن نّش ڒَاحقَّاش اَمْشَان-أَ إِي خف ثْبدّذ نتَّا ذ يجّن ن ثْمُوْرْث مُقدَّاسَا." أُوشَا ينَّا-ٱس: "نش ذ أَربِّـي ن ڒجْذُوْذ نّش ذ أَربِّـي ن بْرَاهِيم ذ إِسْحَاق ذ يَعْقُوْب." ڒخْدّنِّي يسَاذَار مُوْسَى اَغمْبُوْب نّس يݣّْوذ اَذ يࢲر أَربِّـي. 27ينَّا-ٱسن عِيْسَى: "نتَّا ذ أَربِّـي ن يِنِّي يدَّرن مَاشِي ن يِنِّي يمُّوْثن. أَقَا كنِّيو ثخْضَام اَطَّاس!"
ڒُوْصِيّث ثَمقّْرانْت
28يُوْسَا-د يجّن زݣ يمْسڒْمَاذن ن شَّرِيعَا يسْڒَا-يَاسن تمْنَاقَاشن، يُوْفَا بلِّي عِيْسَى يجَاوب-يثن مْلِيح. ئِكَّر نتَّا ينَّا-ٱس إِ عِيْسَى: "مِين ثعْنَا ڒُوْصِيّث إِي يدْجَان ذ ثَمقّْرَانْت قَاع ذِي شَّرِيعَا؟"
29ينَّا-ٱس عِيْسَى: "ڒُوْصِيّث ثَمقّْرَانْت ذ ثَانِيتَا: صنّْطث آي أَيْث-إِسْرَائِيل، سِيذِي أَربِّـي ذ لْإِلَه نّغ، سِيذِي أَربِّـي ذ يجّن. 30أَذ تخْسذ سِيذِي أَربِّـي نّش، س مَارَّا ؤُڒ نّش، س مَارَّا اَرُّوْح نّش، س مَارَّا ڒَعْقڒ نّش، س مَارَّا جّْهذ نّش. 31ڒُوْصِيّث وِيس ثْنَاين ذ ثَانِيتَا: أَذ تخْسذ اَجَّار نّش اَمشْنَاو يخْف نّش. وَار ذِنِّي بُو شَان ڒُوْصِيّث كْتَار زِي ثِيْنَا."
32ينَّا-ٱس ومْسڒْمَاذ نِّي ن شَّرِيعَا: "آ لْمُعَلِّم مْلِيح، مِين ثنِّيذ ذ ڒْحَقّ. سِيذِي أَربِّـي ذ يجّن، وَار ذِنِّي ؤُڒَا ذ يجّن إِلَّا نتَّا. 33أُو عَاوذ مڒَا بْنَاذم يتخْس سِيذِي أَربِّـي س مَارَّا وُڒ نّس ذ ڒَعْقڒ نّس ذ جّْهذ نّس اَذ يخس ؤُڒَا ذ اَجَّار نّس اَمشْنَاو يخْف نّس، مَانَايَا حْسن زِي بْنَاذم مڒَا يغَرص دْبِيحث يسّشْمَاض-يت قَاع ذِي ثْمسِّي نِغ اَذ يقدّم مَانَا كْتَار إِ أَربِّـي."
34يُوْفَا عِيْسَى اَرْيَاز نِّي يجَاوب-يث س ڒفْهَامث، ينَّا-ٱس: "وَار ثݣّْوِيجذ شَا اَطَّاس خ ڒْمُلْك ن أَربِّـي." سّنِّي وَار يزْعِيم حَدّ اَث يسّقْسَا عَاذ كْتَار.
لْمَسِيح ذ سِيذس ن سِيذْنَا دَاود
35عِيْسَى اَقَاث ذِي ثمْزِيذَا ثَمقّْرَانْت يسڒْمَاذ ذِنِّي. ئِنْدق-د ينَّا-ٱسن: "مَايمِّي قَّارن يمْسڒْمَاذن ن شَّرِيعَا قَا لْمَسِيح ذ مِّيس ن دَاود؟"#12.35 <مِّيس ن دَاود> وَار يدْجِي بُو ذ يجّن ن مِّيس ذ صَّح ن سِيذْنَا دَاود؛ لَّا، نتَّا زِي دُّورِّيث ن سِيذْنَا دَاود. 36ينَّا-ٱسن: "قَا دَاود ينَّا نتَّا س يِيخف نّس س أَرُّوْح يقدّْسن:
<سِيذِي أَربِّـي ينَّا-ٱس إِ سِيذِي: قِّيم-د خ وفُوْسِي ينُو،
أَڒ د غَا ݣّغ ڒْعَذْيَان نّش سْوَادَّاي إِ يضَارن نّش.>
37مَامّش غَا يِيڒِي لْمَسِيح ذ مِّيس ن دَاود؟ نتَّا دَاود يقَّار-اَس إِ لْمَسِيح آ سِيذِي."
أَطَّاس ن ڒْغَاشِي تسْڒَان-اَس، فَرْحن.
لْمُنَافِقِين
38ئِسڒْمَاذ-يثن عِيْسَى ينَّا-ٱسن: "حْضَام يخف نْوم زݣ يمْسڒْمَاذن ن شَّرِيعَا. نِثْنِي تخْسن اَذ ؤُيُوْرن س يسڒْهَامن نِّي نْسن، تخْسن اَخَاسن سدْجْمن ذِي ڒسْوَاق، 39تخْسن اَذ قِّيمن ذݣ يمُوْشَان يمزْوُوْرَا ذِي ثمْزِيذَاوِين ذ ڒفْرُوْح. 40تتّن ثَاجَّاڒِين، سْمظْهَارن-د يخف نْسن تْࢲَادْجَان اَطَّاس حمَا اَذ بيّْنن إِ يِوْذَان بلِّي نِثْنِي صبْحن اَطَّاس زَعْمَا. يِيْنَا، لْحِسَاب نْسن اَذ يِيڒِي يقْسح اَطَّاس!"
ثَاجَّاڒْث ثْصدّق صَّذَقَا كْتَار زِي تْوَاجَر
41ئِقِّيم عِيْسَى ذِي ثمْزِيذَا ثَمقّْرَانْت زَّاث إِ صّنْدُوْق نّس. ئِࢲْرَا مَامّش ڒْغَاشِي سْرُوْسَان صَّذَقَا نْسن ذي صّنْدُوْق نِّي. أَطَّاس ن تْوَاجَر تݣّن ذِنِّي اَطَّاس ن تْمنْيَاث. 42ثُوْسَا-د يجّن ن ثَاجَّاڒْث ذ ڒْمسْكِينَا وَاهَا ثݣَّا ذِنِّي ثْنَاين يصُوْلْدَان، يعْنِي يجّن ن فْرَنْك. 43ئِڒَاغَا-د عِيْسَى خ يمحْضَارن نّس ينَّا-ٱسن: "أَقَا تسْڒَام ڒْحَقّ: ثَاجَّاڒْث-أَ ذ ڒْمسْكِينَا وَاهَا ثݣَّا ذِي صّنْدُوْق كْتَار زِي مِين ݣِّين مَارَّا ينّغْنِي. 44مِينْزِي مَارَّا ينّغْنِي ؤُشِين زِي مِين خَاسن يزَايْذن ذ اَݣْڒَا. نتَّاث لَّا، وَاخَّا ذ ڒْمسْكِينَا وَاهَا ثْصدّق مَارَّا مِين ثعْڒم."
Currently Selected:
مرقس 12: ريف
Highlight
Share
Copy
Want to have your highlights saved across all your devices? Sign up or sign in
