ڒخذايم 21
21
أَرَّسُوْل بُوْلُس يتْسَفَر غَار ثنْدِينْت ن لْقُدْس
1وَامِي خَاسن د نُوْيُوْر سّنِّي، ننْيَا ذݣ وغَرَّابُو نْرُوْح نِيشَان غَار ثيْزِيرْث ن كُوْس. ثِيوشَّا نّس نُوْوض غَار ثيْزِيرْث ن رُوْدُس. سّنِّي نُوْيُوْر غَار ثنْدِينْت ن بَاطَارَا. 2نُوْفَا ذِنِّي يجّن ن وغَرَّابُو يتْرَاح غَار جْوَايه ن فِينِيقْيَا، ننْيَا ذَايس نُوْيُوْر. 3ثْمظْهَار-اَنغ-د ثيْزِيرْث ن قُبْرُص خ وࢲڒْمَاض نّغ. نعْذُو-ت، نْرُوْح غَار سُوْرْيَا نظْرَا ذِي ثنْدِينْت ن صُوْر مِينْزِي اَغَرَّابُو يتْخصَّا اَذ يسرْس سّڒْعَث ذِنِّي. 4وَامِي نرْزُو خ يمحْضَارن، نُوْفِي-ثن ذِنِّي نقِّيم اَكِذْسن سبْعِيَّام. عْلَاحْسَاب مِين عڒْمن نِثْنِي زِي أَرُّوْح، قَّارن-اَس إِ بُوْلُس وَار تْݣَعَّاذ شا شك غَار ثنْدِينْت ن لْقُدْس. 5وَامِي ذَانغ ثقْضَا ذِنِّي ڒْوقْث نّغ نكَّر نفّغ بَاش أَ نْسِيْغِي خ ؤُسَفَر نّغ. مَارَّا يمحْضَارن رُوْحن اَكِذْنغ غَار بَارَّا ن ثنْدِينْت س ثمْغَارِين نْسن ذ ثَارْوَا نْسن، نرْكع خ يفَادّن نّغ خ يِجْذِي ن ڒبْحَر نࢲُّوْدْج. 6وَامِي نمْسَافَاض خَاسن ننْيَا ذݣ وغَرَّابُو، نِثْنِي روّْحن غَار ثُوْذْرِين نْسن.
7سّنِّي نْسِيْغِي خ ؤُسَفَر نّغ ذِي ڒبْحَر زِي ثنْدِينْت نِّي ن صُوْر نخْضڒ غَار ثنْدِينْت ن بَطْلَيْمُوْس. نْسدْجم خ اَيثْمَاثْنغ ذِنِّي، نقِّيم اَكِذْسن يجّن ن نْهَار. 8ثِيوشَّا نّس نْرُوْح غَار ثنْدِينْت ن قَيْصَارِيَا نُوْذف نقِّيم ذِي ثدَّارْث ن لْمُبْشِر فِيلِيپَّـاس. نتَّا ذ يجّن زِي سبْعَا ن صَّحَابَا ن اَرُّسُل ن لْقُدْس. 9نتَّا غَارس اَرْبعَا ن ثْحنْجِيرِين ذ ثِعْزْرِيِين سَّاوَاڒنْت س مِين عدْجْمنْت زِي أَربِّـي. 10وَامِي نقِّيم اَكِذْسن شَان وُوْسَّان، يُوْسَا-د غَارْنغ يجّن ن نَّبِي زِي يَهُوْذِيَا قَّارن-اَس غَابُوْس. 11ئِقَارّب-د غَارْنغ ييْسِي اَحزَّام ن بُوْلُس، ئِشدّ يضَارن ذ يفَاسّن إِ يِيخف نّس ينَّا: "ئِقَّار أَرُّوْح يقدّْسن: أَمُّو يسْرَائِيلِيْين ن لْقُدْس اَذ قّْنن بَاب ن ؤُحزَّام-أَ، أَث سلّْمن إِ يِنِّي وَار يدْجِين شَا زِي أَيث-إِسْرَائِيل."
12نشِّين ذ يِوْذَان وَامِي نسْڒَا مَانَايَا نْحشّم بُوْلُس بَاش وَار يتْرِيح شَا غَار ثنْدِينْت ن لْقُدْس. 13ينَّا-ٱنغ: "مِين كنِّيو يُوْغِين؟ مَايمِّي إِي ذَايِي ثحْفَرم ذݣ وُوْڒ س يمطَّاون نْوم؟ نش اَقَايِي مُوْجُوْد مَاشِي اَذَايِي قّْنن وَاهَا. نش اَقَايِي مُوْجُوْد اَذ مّْثغ ذِي لْقُدْس عْلَاحْسَاب يسم ن سِيذِيثْنغ عِيْسَى!" 14وَامِي نُوْفَا نشِّين وَار ث نْسقْنِيع شَا، نسْقَار ننَّا: مِين يخس سِيذِي أَربِّـي اَث يݣّ ذ ونِّي نتَّا!
15منْبَعْد ڒخْدّنِّي، نْسوْجذ يخف نّغ أَ نْݣَعّذ غَار ثنْدِينْت ن لْقُدْس. 16ؤُوِين-اَنغ شَان ن يمحْضَارن زِي ثنْدِينْت ن قَيْصَارِيَا بَاش أَ نْنوْجو غَار يِجّن ن بْنَاذم قَّارن-اَس مْنَاسُوْن نتَّا زِي ثنْدِينْت ن قُبْرُص. نتَّا زݣ يمحْضَارن يمزْوُوْرَا.
أَرَّسُوْل بُوْلُس يتمْسڒْقَا اَك اَرَّسُوْل يَعْقُوْب
17وَامِي نُوْوض غَار لْقُدْس، رحّْبن زَّايْنغ اَيثْمَاثْنغ س ڒفْرَاحث. 18ثِيوشَّا نّس يُوْذف اَكِذْنغ بُوْلُس غَار اَرَّسُوْل يَعْقُوْب، حْضَارن ذِنِّي مَارَّا يمقّْرَانن ن جْمَاعث ن ڒْمُوْمِنِين. 19ئِسدْجم خَاسن بُوُلُس، ئِعَاوْذ-اَسن ثَا س ثَا ينَّا-ٱسن مِين يݣَّا أَربِّـي خ وفُوْس نّس جَار يِنِّي وَار يدْجِين شَا زِي أَيث-إِسْرَائِيل.
20وَامِي سْڒِين إِ مَانَاينِّي، حمْذن أَربِّـي نَّان-اَس إِ بُوْلُس: "شُوْف آي ؤُمَاثْنغ مشْحَاڒ ن ؤُڒُوْفَاث ن يسْرَائِيلِيْين إِي يُوْمْنن! مَارَّا إِذْسن رزُّوْن اَذ ݣّن لْوَاجِب عْلَاحْسَاب شَّريعا نّغ. 21ئِتْوَانَّا-يَاسن زَعْمَا شك ثْسڒْمَاذذ مَارَّا يسْرَائِيلِيْين إِي زدّْغن ذِي لْخَرِيج اَذ سمْحن ذِي مُوْسَى، ثقَّارذ-اَسن وَار طهَّارث شَا إِ ثَارْوَا نْوم، وَار ذفَّارث شَا لْعَادَاث نّغ. 22بْڒَا شّكّ اَذ سْڒن قَا شك إِلَّا ثُوْسِيذ-د. إِيوَا، مَامّش غَا نݣّ؟ 23إِذن، مِين ذَاش غَا نِيْنِي اݣّ-يث. شُوْف، غَارْنغ اَرْبعَا ن يرْيَازن ݣِّين ڒْعَهذ اَك سِيذِي أَربِّـي. 24أَوِي يِيْنَا خدْجس خَاسن اَخْمِي غَا ثݣّم مَارَّا كنِّيو ڒُوْضُو نِّي اَصبْحَان#21.24 ڒُوْضُو-يَا اَصبْحَان ذ يجّن ن نُّوْع ن ڒُوْضُو مَاشِي عَادِي، تݣّن-ث بَاش اَذ سِّيصْفَان يخف نْسن مْلِيح. ئِتكّ سِيمَانَا، تْخَادْجَاسن خَاس اَطَّاس ن تْمنْيَاث. بَاش نِثْنِي اَذ حفّن اَذ ذوْڒن ذ يقشُّوْرَا. أَمُّو اَذ سّْنن مَارَّا مِين خَاك يتْوَانَّان وَار يدْجِي بُو ذ صَّح. شك س يِيخف نّش ثْذفَّارذ شَّرِيعَا نّغ. 25وَلَكِن عْلَاحْسَاب ڒْمُوْمِنْين نِّي وَار يدْجِين شَا زِي أَيث-إِسْرَائِيل، نُوْرَا-يَاسن ثَبْرَات نُوْمَر-يثن اَذ بعّْذن خ لْمَكْلَا يتْوَاقدّْمن إِ لْأَصْنَام، ذ يذَامّن، ذ مِين يتْوَاجيّْفن، ذ لْفَسَاد."
26ثِيوشَّا نّس يُوْوِي بُوْلُس يرْيَازن نِّي اَكِذس، يݣَّا ڒُوْضُو نِّي اَصبْحَان اَكِذْسن. يُوْذف غَار ثمْزِيذَا ثَمقّْرَانْت اَذ يعْڒم ڒْفُقَهَا خ ڒْوقْث إِي ذِي غَا كمّْڒن نْهُوْرَاث نِّي يقِّيمن خ وصفِّي نْسن، يعْنِي ڒْوقْث إِي غَا قدّْمن ڒْفُقَهَا دْبِيحَاث إِ اَرْبعَا-يَا.
تطّْفن اَرَّسُوْل بُوْلُس ذِي ثمْزِيذَا ثَمقّْرَانْت
27وَامِي عْڒَاين اَذ كمّْڒن سبْعَا نِّي ن نْهُوْرَاث ن ڒُوْضُو، شَان يسْرَائِيلِيْين زِي لْإِقْلِيم ن آسْيَا ࢲْرِين بُوْلُس ذِي ثمْزِيذَا ثَمقّْرَانْت سَامَرن خَاس مَارَّا ڒْغَاشِي نِّي تمْزَاحَامن خَاس. 28سْنكَّرن ثْغُوْيّث قَّارن: "آي يرْيَازن ن أَيث-إِسْرَائِيل! قَا اَرْيَاز-أَ ونِّي يسڒْمَاذن يوْذَان مَارَّا ذِي مْكُڒ اَمْشَان يرزُّو اَذ عَارّْضن شَّعْب نّغ ذ شَّرِيعَا نّغ ذ ومْشَان-أَ نّغ! عَاوذ يسِيذف-د ييُوْنَانِيْين غَار ثمْزِيذَا ثَمقّْرَانْت، ئِسخْنَاز اَمْشَان-أَ مُقدّس." 29نَّان مَانَاينِّي مِنْزِي تُوْغَا ࢲْرِين اَكِذس ذِي ثنْدِينْت يجّن ن بْنَاذم قَّارن-اَس تْرِيْفُوْمُو زِي أَيث-ؤُفَسُوْس، ئِتْغِيڒ-اَسن بُوْلُس يسِيذف-يث غَار ثمْزِيذَا ثَمقّْرَانْت.
30ثكَّر ڒْفَوْضَا ذِي ثنْدِينْت مَارَّا. كَّرن يِوْذَان نِّي ؤُزّْرن غَار بُوْلُس طّْفن-ث، جَرّن-ث زِي ثمْزِيذَا ثَمقّْرَانْت غَار بَارَّا ڒخْدّنِّي بلّْعن ثِوُّوْرَا. 31وَامِي رزُّوْن اَث نْغن، يُوْوض ڒخْبَار غَار اَرَّايس ن ڒْعَسْكَار ن اَرُّوْمَانُوْس ثكَّر يجّن ن ڒْفَوْضَا ذِي لْقُدْس مَارَّا. 32ئِرُوْح نتَّا ذغْيَا يُوْوِي اَكِذس ڒْعَسْكَار ذ يمقّْرَانن نْسن يُوْزّڒ غَارْسن. ئِسْرَائِيلِيْين وَامِي ࢲْرِين اَرَّايس ذ ڒْعَسْكَار نّس، بدّن وَار قِّيمن شَا عَاذ شَّاثن بُوْلُس.
33ئِقَارّب اَرَّايس نِّي غَار بُوْلُس يطّف-يث، يُوْمَر اَث قّْنن س ثْنَاين ن سْنَاسڒ. ئِسّقْسَا خَاس ينَّا-ٱسن: وَانِيتَا مِين يعْنَا ذ مِين يݣَّا؟ 34ڒْغَاشِي نِّي سْنكَّرن ثْغُوْيّث كُڒ يجّن مِين يقَّار. وَامِي اَرَّايس نِّي وَار يفْهِيم شَا نِيشَان مَان سَّبَاب ن سّْدَع نِّي، يُوْمَر اَث سِيڒِين غَار لْقشْلَا. 35وَامِي يُوْوض بُوْلُس غَار دّْرُوْج، اَرْبُوْن-ث ڒْعَسْكَار سِيڒِين-ث عْلَاحْسَاب اَمنْغِي نِّي ن يِوْذَان. 36مِنْزِي ذفَّارن-ث سْنكَّرن ثْغُوْيّث قَّارن يْسِيم خَانغ وَانِيتَا!
أَرَّسُوْل بُوْلُس يتْذَافَاع خ يِيخف نّس
37وَامِي عْڒَاين اَذ سِيذْفن بُوْلُس غَار لْقشْلَا نِّي، ينَّا-ٱس إِ اَرَّايس ن ڒْعَسْكَار: "سْمح-اَيِي اَش ينِيغ يجّن ن وَاوَاڒ."
ينَّا-ٱس اَرَّايس نِّي إِ بُوْلُس: "مَامّش تݣّذ شك ثسَّاوَاڒذ ثَيُوْنَانِيث؟ 38مَا وَار ثدْجِيذ شَا شك ذ اَمِصْرِي نِّي إِي يݣِّين لْفِتْنَا ذِي ڒِيَّام نِّي وَامِي ثْسُوْيُوْرذ اَربْعَا اَڒَاف ن لْإِرْهَابِيْين غَار ڒخْڒَا؟"
39ينَّا-ٱس بُوْلُس: "لَّا، نش ذ اَئِسْرَائِيلِي، لْجِنْسِيَا ينُو زِي ثنْدِينْت مَعْرُوْفَا ن طَرْسُوْس ذِي لْإِقْلِيم ن كِيلِيكْيَا. تتَّارغ زَّايش اَذَايِي ثْسمْحذ اَذ سِّيوْڒغ اَك يِوْذَان-أَ." 40وَامِي إِي ث يجَّا اَرَّايس ن ڒْعَسْكَا اَذ يسِّيوڒ، ئِبدّ بُوْلُس خ دّْرُوْج يشيَّر-اَسن س يفَاسّن نّس. نِثْنِي سْقَارن، ئِسِّيوڒ اَكِذْسن س لُّغَا لْعِبْرِيَا ينَّا-ٱسن:
Currently Selected:
ڒخذايم 21: ريف
Highlight
Share
Copy
Want to have your highlights saved across all your devices? Sign up or sign in
