ڒخذايم 20
20
أَرَّسُوْل بُوْلُس اَقَاث ذِي لْيُوْنَان ذ لْإِقْلِيم ن مَاسِدُوْنْيَا
1ثْكمّڒ ڒْفَوْضَا نِّي، منْبَعْد بُوْلُس يڒَاغَا-د خ يمحْضَارن يشجّع-يثن. سّنِّي يمْسَافَاض خَاسن، ئِرُوْح يسَفَر غَار لْإِقْلِيم ن مَاسِدُوْنْيَا. 2ئِتْشجَّاع يمحْضَارن ذِنِّي س وَاطَّاس ن وَاوَاڒن. وَامِي يعْذُو ذِي جْوَايه نِّي، يُوْوض غَار لْيُوْنَان 3يكَّا ذِنِّي ثڒْت-شْهُوْر. وَامِي عْڒَاين اَذ ئِني بُوْلُس ذݣ وغَرَّابُو اَذ يرَاح غَار سُوْرْيَا، شِيطّْنن يسْرَائِيلِيْين بَاش اَث نْغن. خ مَانَايَا نتَّا يݣَّا اَذ يعْقب خ وبْرِيذ ن مَاسِدُوْنْيَا. 4ئِسَفَر اَكِذس سُوْپَـاتْرُوْس مِّيس ن پِـيْرُو زِي ثنْدِينْت ن بِيْرْيَا، ذ أَرِيسْتَارْخُوْس ذ سَاكُوْنْدُوْس نِثْنِي زِي ثنْدِينْت ن سَالُوْنِيك، ذ غَايُوْس زِي ثنْدِينْت ن دِرْبَا، ذ تِيْمُوْتَاوُس ذ تُوْشِيق ذ تْرِيْفُوْمُو نِثْنِي زِي لْإِقْلِيم ن آسْيَا. 5يِيْنَا يزْوَارن-اَنغ تْرَجَان-اَنغ ذِي ثنْدِينْت ن تْرَاوْس. 6وَامِي يعْذُو ڒْعِيذ ن ثفْضِيرْث، ننْيَا ذݣ ؤُغَرَّابُو نفّغ زِي ثنْدِينْت ن فِيلِيپِّـي. منْبَعْد إِ خمْسِيَّام نذْفَار-يثن غَار ثنْدِينْت ن تْرَاوْس، نقِّيم ذِنِّي سبْعِيَّام.
أَرَّسُوْل بُوْلُس يسكَّر-د يجّن ن وحنْجِير زِي ڒْموْث
7ذݣ وَاسّ اَمزْوَارُو ن سِيمَانَا#20.7 عْلَاحْسَاب تَقَالِيد ن يسْرَائِيلِيْين، مَانَايَا يوْقع نْهَار ن سّبْث س دْجِيڒث. عْلَاحْسَاب تَقَالِيد ن ييُوْنَانِيْين، ئِوْقع نْهَار ن ڒْحَد س دْجِيڒث. نْمُوْن نشِّين أَ نشّ اَغْرُوْم، ئِسِّيوڒ بُوْلُس اَك يِوْذَان. ئِقِّيم يسَّاوَاڒ اَڒ ؤُزْين ن دْجِيڒث مِينْزِي ثِيوشَّا نّس ينْوَا ٱذ يسَفَر. 8ذِنِّي اَطَّاس ن ڒقْنَاذڒ ذِي ثْغُوْرْفَات نِّي مَانِي نْمُوْن. 9ذِنِّي يجّن ن وحنْجِير قَّارن-اَس يُوْتِكُوْس يقِّيم نتَّا خ ثنْهَارْث ن ثْبُوْرْجَات.#20.9 ثَنْهَارْث ن ثْبُوْرْجَات قَّارن-اَس عَاوذ بَاذُو ن ڒْكَازِي نِغ اَݣدِّيم ن سَارْجم. يڒْهَا بُوْلُس يتمْهَارْوَاض، أَحنْجِير نِّي يطّف-يث يِضص يغلّب خَاس يِيضص نِّي أُوْشَا يوْضَا زِي ثْڒَاثَا ن طّْبَقَاث اَڒ ثْمُوْرْث ؤُفِين-ث يمُّوْث. 10ئِهْوَا-د بُوْلُس يُوْذَاڒ غَارس ييْسِي-يث-يذ س يفَاسّن. ينَّا-ٱسن: وَار تݣّْوْذم شَا، أَقَا يعْقب-اَس-د بُوْحْبڒ نّس. 11ئِرُوْح بُوْلُس يݣَعّذ سنّج، يرْزَا اَغْرُوْم يشَّا. ئِسِّيوڒ اَطَّاس اَڒ وَامِي ذ ڒفْجَر يكَّر يُوْيُوْر. 12ئِوْذَان نِّي تْوَاشجّْعن اَطَّاس وَامِي اَحنْجِير نِّي سْروّْحن-ث يدَّر.
أَرَّسُوْل بُوْلُس يتْسَفَر زِي تْرَاوْس غَار مِيلِيتُوْس
13ئِتَافق بُوْلُس اَكِذْنغ بَاش نشِّين أَ نْسَفَر غَار ثنْدِينْت ن وَاسُّوْس ذݣ وغَرَّابُو نتَّا اَذ د يَاس خ يضَارن، منْبَعْد أَ نمْسڒْقَا ذِنِّي اَث نسْني اَكِذْنغ ذݣ وغَرَّابُو. 14وَامِي خَانغ د يحْرث ذِي ثنْدِينْت ن وَاسُّوْس، نسْني-يث-يذ اَكِذْنغ ذݣ وغَرَّابُو نْرُوْح غَار ثنْدِينْت ن مِيتِيلِينِي. 15سّنِّي نْسَفَر ذݣ وغَرَّابُو، ثِيوشَّا نس نُوْوض غَار ثيْزِيرْث ن كِيُوْس. وِيس ثڒْتِيَّام نُوْوض زَّاث إِ ثيْزِيرْث ن سَامُوْس. وِيس اَرْبعِيَّام نُوْوض غَار ثنْدِينْت ن مِيلِيتُوْس.
أَرَّسُوْل بُوْلُس يتمْصَافَاض خ يمقّْرَانن ن ڒْمُوْمِنِين
16-17زِي ثنْدِينْت نِّي ن مِيلِيتُوْس يسّكّ بُوْلُس غَار ثنْدِينْت ن ؤُفَسُوْس يڒَاغَا-د خ يمقّْرَانن ن جْمَاعث ن ڒْمُوْمِنِين بَاش اَغَارس د اَسن. تُوْغَا يݣَّا بُوْلُس اَذ يكّ خ ڒبْحَر خ وغزْذِيس ن ثنْدِينْت ن ؤُفَسُوْس إِݣ يدْجَان ذِي لْإِقْلِيم ن آسْيَا بَاش وَار يتْعطَّڒ شَا ذِنِّي. ئِتْقدْجِيق بَاش اَذ يَاوض ذغْيَا غَار ثنْدِينْت ن لْقُدْس يمْكن قْبڒ إِ ڒْعِيذ ن نْهَار وِيس خمْسِين.#20.16-17 ڒْعِيذ ن نْهَار وِيس خمْسِين ذ يجّن ن ڒْعِيذ ن أَيث-إِسْرَائِيل يتَاس-د خمْسِين يُوْم منْبَعْد إِ ڒْعِيذ اَمقّْرَان نْسن. 18وَامِي غَارس د ؤُسِين يمقّْرَانن نِّي ينَّا-ٱسن: "كنِّيو قَا ثسّْنم مَامّش تْعِيْشغ مَارَّا ڒْوقْث نِّي إِي تُوْغَا ٱكِذْوم قِّيمغ، زِي نْهَار نِّي اَمزْوَارُو إِي د ؤُذْفغ غَار آسْيَا. 19خدّْمغ إِ سِيذِي أَربِّـي بْڒَا تَّكبُّر، س يمطَّاون ينُو كِّينْت خَافِي ڒمْحَاين وَامِي خَايِي شِيْطّْنن يسْرَائِيلِيْين. 20وَار زَّايْوم سْنُوْفَّرغ وَالُو، نش تْخبَّرغ-كنِّيو س مَارَّا مِين كنِّيو غَا ينفْعن. سڒْمَاذغ-اَوم-ث زَّاث إِ يِوْذَان أُو عَاوذ زِي ثدَّارْث غَار ثدَّارْث. 21عدْجْمغ إِ يسْرَائِيلِيْين ذ ييُوْنَانِيْين بَاش اَذ تُوْبن غَار أَربِّـي اَذ اَمْنن س سِيذِيثْنغ عِيْسَى. 22نش نْهَارَا ݣُّوْرغ غَار ثنْدِينْت ن لْقُدْس ذ أَرُّوْح إِي ذَايِي يتَاوِيِن ذِنِّي، وَار سِّينغ مِين ذَايِي غَا يوقْعن. 23إِنَّمَا، ذِي مْكُڒ ثنْدِينْت يعدْجم-اَيي-د أَرُّوْح يقدّْسن قَا يتْرَاجَا-ٱيِي ڒحْبس ذ تَمَارَا. 24وَلَكِن وَار تِيشّغ بُو لْهِمَّا إِ ثُوْذَارْث ينُو. نش اَذ كمّْڒغ مِينْخف د ؤُسِيغ ذ ڒْخذْمث إِي زِّي ذَايِي يكلّف سِيذِيثْنغ عِيْسَى، يعْنِي اَذ شهْذغ خ لْإِنْجِيل ن اَرْضَا ن أَربِّـي.
25ڒخُّو كنِّيو ؤُمِي بشَّرغ س ڒْمُلْك ن أَربِّـي سّْنغ نش بلِّي ؤُڒَا ذ يجّن زَّايْوم مَا ٱذ يࢲر اَغمْبُوْب ينُو سَّا ٱڒ ثْسَاونْت. 26خ مَانَايَا قَّارغ-اَوم نش زِي نْهَارَا تْبرِّيغ يخف ينُو زݣ يذَامّن نْوم مَارَّا. 27لِأَنَّا نش وَار زَّايْوم سْنُوْفَّرغ وَالُو زِي مَارَّا مِين ينوَّا أَربِّـي اَث يݣّ. 28حْضَاث يخف نْوم. حْضَاث ثْحِيمرْث نْوم، ثنِّي إِي زِي كنِّيو يكلّف أَرُّوْح يقدّْسن. اَروْسث جْمَاعث ن ڒْمُوْمِنِين ن أَربِّـي قَا نتَّا يسغ-يت س يذَامّن نّس.
29شُوْف، سّْنغ خْمِي غَا ؤُيُوْرغ نش اَذ د اَذْفن جَارَاوم شَان ن وُوْشَّانن يوْعَارن وَار رحّْمن شَا ثْحِيمرْث. 30عَاوذ زَّايْوم اَذ د مظْهَارن شَان يثَرَّاسن اَذ سْعوّْجن لْحَقِيقَا حمَا ٱذ جَرّن غَارْسن يمحْضَارن. 31إِيوَا إِڒِيث عْلَابَال! وَار تتُّوْم شَا نش ثڒْت-سْنِين إِي كِذْوم كِّيغ، قِّيمغ تْوصِّيغ مْكُڒ يجّن زَّايْوم دْجِيڒث ذ وَاسّ س يمطَّاون ينُو.
32آي اَيثْمَا، ڒخُّو اَخَاوم ودِّيغ، إِڒِيث اَݣ أَربِّـي ذ وَاوَاڒن ن أَرْضَا نّس. أَوَاڒن-أَ ذَايْسن ثِزمَّار اَذَاوم ؤُشن جّْهذ اَذَاوم ؤُشن ڒْوَاڒث اَك مَارَّا ڒْمُوْمِنِين صَّالِحِين. 33نش عمَّارص وَار ضْمِيْعغ إِ يِيخف ينُو شَان ن دّْهب نِغ ذ نُّقَارْث نِغ ذ اَرُّوْض ن شَان حَدّ. 34كنِّيو ثسّْنم نش تُوْغَا خذْمغ س يفَاسّن ينُو بَاش اَغَارِي يِيڒِي مِين حْذَاجغ نش ذ مِين حْذَاجن يِنِّي اَكِذِي. 35س مَارَّا مَانَايَا سْمظْهَارغ-اَوم-د مَامّش يتْخصَّا-يَانغ أَ نخْذم مْلِيح بَاش أَ نْعَاون يِنِّي يحْذَاجن. أَ نْفكَّر ذݣ وَاوَاڒ ن سِيذِيثْنغ عِيْسَى إِي ينَّا: سَّعْذ ن ونِّي يتِيشّن كْتَار زݣ ونِّي يقبّْڒن."
36وَامِي ينَّا بُوْلُس ثِمسْڒَايِين-أَ، يرْكع خ يفَادّن ذ يِنِّي مَارَّا نتَّا يࢲُّوْدْج. 37ذرّْعن-اَس إِ بُوْلُس بْذَان تْسدْجَامن خَاس، تْرُوْن مَارَّا إِذْسن. 38خيّْقن اَطَّاس س وَارَاڒ نِّي إِي ذَاسن ينَّا وَار ثْࢲرّم شَا اَغمْبُوْب ينُو سَّا ٱڒ ثْسَاونْت. سّنِّي ؤُوِين-ث غَار وغَرَّابُو.
Currently Selected:
ڒخذايم 20: ريف
Highlight
Share
Copy
Want to have your highlights saved across all your devices? Sign up or sign in
