ڒخذايم 14
14
بُوْلُس ذ بَرْنَابَا تْبشَّارن ذِي ثنْدِينْت ن إِكُوْنْيَا
1ذِي ثنْدِينْت ن إِكُوْنْيَا ؤُذْفن بُوْلُس ذ بَرْنَابَا س ثْنَاين إِذْسن غَار ثمْزِيذَا ن أَيث-إِسْرَائِيل، ؤُمْنن اَطَّاس ن يسْرَائِيلِيْين ذ ييُوْنَانِيْين س تّبْشِير نْسن. 2وَلَكِن يسْرَائِيلِيْين إِي يُوْݣِين اَذ اَمْنن سَامَرن يِنِّي وَار يدْجِين شَا زِي أَيث-إِسْرَائِيل خ اَيثْمَاثْنغ، عمَّرن-اَسن اَزدْجِيف. 3بُوْلُس ذ بَرْنَابَا قِّيمن ذِنِّي اَطَّاس ن ڒْوقْث تْبشَّارن س سِيذِيثْنغ س يِجّن ن زْعَامث. يݣَّا سِيذِيثْنغ لْمُعْجِيزَاث ذ لْبُرْهَانَاث خ يفَاسّن ن بُوْلُس ذ بَرْنَابَا بَاش اَذ يسْبيّن اَوَاڒن نِّي إِي تْبشَّارن خ اَرْضَا ن سِيذِيثْنغ ذ صَّح. 4مسْفْرَاقن اَيثْبَاب ن ثنْدِينْت-أَ ن إِكُوْنْيَا خ ثْنَاين. ڒبْعَاض إِذْسن اَقَاثن اَك يسْرَائِيلِيْين، ڒبْعَاض إِذْسن اَقَاثن اَك اَرُّسُل. 5كَّرن يسْرَائِيلِيْين ذ يِنِّي وَار يدْجِين شَا زِي أَيث-إِسْرَائِيل تَافْقن اَك اَرُّوْيَاس نْسن بَاش اَذ عدّن خ اَرُّسُل اَثن رجْمن س وزْرُو. 6-7اَرِّين-د ڒخْبَار اَرُّسُل، اَروْڒن غَار ثنْدِينْت ن لِيسْتْرَا ذ ثنْدِينْت ن دِرْبَا ذ مَارَّا جْوَايه إِي ذَاسنْت د يُوْذْسن تْبشَّارن ذِنِّي ذِي لْوِلَايَا ن لِيكَاوْنِيَا.
رجّْمن اَرَّسُوْل بُوْلُس س وزْرُو ذِي ثنْدِينْت ن لِيسْتْرَا
8ذِي ثنْدِينْت ن لِيسْتْرَا ذِنِّي يجّن ن ورْيَاز ذ اَنشْرُوْف مُّوْثن-اَس يضَارن، زݣ وَامِي د يخْڒق عمَّارْص مَا يُوْيُوْر. 9ئِتسْڒَا إِ وَاوَاڒ ن بُوْلُس. ئِخْزَر ذَايس مْلِيح بُوْلُس، يُوْفَا ذَايس لْإِيمَان إِي زِي غَا يݣنْفَا. 10يڒَاغَا-د س يِجّن ن ثْمِيجَّا ثجْهذ ينَّا-ٱس: "كَّر، بدّ نِيشَان خ يضَارن نّش!" ڒخْدّنِّي ينخْضف يبْذَا يݣُّوْر.
11وَامِي ࢲْرِين ڒْغَاشِي نِّي مِين يݣَّا بُوْلُس، عيّْضن س لُّغَا ن لِيقُوْنْيَا نَّان قَا أَربِّـيثن ذوْڒن ذ يوْذَان هْوَان-د غَارْنغ! 12سمَّان-اَس إِ بَرْنَابَا <زَافَس>، سمَّان-اَس إِ بُوْلُس <هِرْمِس>#14.12 ئِسمَاون-أَ <زَافَس> ذ <هِرْمِس> نِثْنِي ذ لْأَصْنَام ن ييُوْنَانِيْين. لِأَنَّا ذ بُوْلُس إِݣ يتْبشَّارن اَطَّاس. 13يُوْسَا-د ڒمْقدّم ن لْأَصْنَام زَافَس ونِّي إِݣ يتِيڒِين ذِي زَّاوْيِث زَّاث إِ ثنْدِينْت، يُوْوِي-د يينْدُوْزن يُوْوِي-د ثِقبِّيضِين ن نْوَار غَار ثوُّوْرَا ن ثنْدِينْت، ئِخس نتَّا ذ شَّعْب اَذَاسن قدّْمن دْبِيحث إِ بَرْنَابَا ذ بُوْلُس.
14أَرُّسُل نِّي يعْنِي بَرْنَابَا ذ بُوْلُس وَامِي سْڒِين اَوَاڒ نِّيي كَّرن شرّْݣن اَرُّوْض نْسن. ؤُذْفن ذِي ڒْوسْط ن يِوْذَان عيّْضن نَّان-اَسن: 15"آي يرْيَازن، مَايمِّي تݣّم مَانَايَا؟ قَا نشِّين ذ يوْذَان وَاهَا اَم كنِّيو اَم نشِّين كِيف-كِيف. نُوْوِي-اَوم-د يجّن ن وَاوَاڒ ذ اَصبْحَان بَاش اَذ تْبعّْذم إِ ثْمسْڒَايِين-أَ وَار ينفّْعن شَا، أَذ تْذوْڒم غَار أَربِّـي يدَّرن إِي د يخڒْقن اَجنَّا ذ ثْمُوْرْث ذ ڒبْحَر ذ مَارَّا مِين ذَايْسن. 16ذِي زْمَانَاث يعْذُوْن، أَربِّـي يجَّا مَارَّا ڒݣْنُوْس اَذ ذْفَارن يبْرِيذن إِي خْسن. 17وَلَكِن أَربِّـي يسْبيَّان-اَوم-د يخف نّس س مِين يخدّم، يعْنِي يتݣّ ڒْخِير يتِيشّ-اَوم اَنْࢲَار زݣ وجنَّا ذ ثْفدْجَاحْث ذِي ڒْوقْث نّس. ئِتشَّار-اَوم ؤُڒَاون نْوم س ڒفْرَاحث." 18س وَاوَاڒ-أَ بُوْلُس ذ بَرْنَابَا سْبدّن-ثن، وَلَكِن ڒْغَاشِي نِّي قسْحن س وَاطَّاس عْڒَاين قدّْمن-اَسن دْبِيحث.
19منْبَعْد ؤُسِين-د شَان يسْرَائِيلِيْين زِي وَانْطَاكْيَا ذ إِكُوْنْيَا تْسَامَرن ڒْغَاشِي نِّي، اَرجْمن بُوْلُس س وزْرُو جَرّن-ث بَارَّا إِ ثنْدِينْت تْغِيڒ-اَسن يمُّوْث. 20وَلَكِن وَامِي خَاس مُوْنن يمحْضَارن، ئِكَّر-د يدَّر وَا سّنِّي يُوْذف غَار ثنْدِينْت. ثِيوشَّا نّس يفّغ اَك بَرْنَابَا يرُوْح غَار ثنْدِينْت ن دِرْبَا.
تعْقَابن-د غَار ثنْدِينْت ن وَانْطَاكْيَا ذِي سُوْرْيَا
21بشَّارن ذِي ثنْدِينْت نِّي ن دِرْبَا، أَرِّين اَطَّاس ن يِوْذَان ذ يمحْضَارن. سّنِّي ذوْڒن غَار ثنْدِينْت ن لِيسْتْرَا ذ إِكُوْنْيَا ذ وَانْطَاكْيَا. 22ݣِّين ؤُڒ ذݣ يمحْضَارن نِّي، شجّْعن-ثن بَاش اَذ اَرْنِين ذِي لْإِيمَان نْسن. قَّارن-اَسن: أُو لَابُد اَخَانغ ثكّ اَطَّاس ن تَمَارَا بَاش نشِّين ڒْمُوْمِنِين أَ نَاذف ذِي ڒْمُلْك ن أَربِّـي. 23بُوْلُس ذ بَرْنَابَا يخْضَرن يمقّْرَانن ذِي مْكُڒ جْمَاعث ن ڒْمُوْمِنِين ڒخْدّنِّي ࢲُّوْدْجن، ࢲُوْمّن، جِّين-ثن ذݣ وفُوْس ن سِيذِي أَربِّـي إِي زِي ؤُمْنن.
24سّنِّي عْذُوْن خ جْوَايه ن پِــيْسِيْدْيَا، ؤُوْضن غَار جْوَايه ن پَـامْفِيلْيَا. 25وَامِي تْبشَّرن س وَاوَاڒ ن أَربِّـي ذِي ثنْدِينْت ن بَارْجَا، عْذُوْن غَار ثنْدِينْت ن وَاطَالْيَا. 26وَامِي كمّْڒن ڒْخذْمث نِّي ذِنِّي، عقْبن سّنِّي ذݣ وغَرَّابُو غَار ثنْدِينْت ن وَانْطَاكْيَا مَانِيس د ؤُسِين قْبڒ، زِي مَانِيس تْوَاكلّْفن س ڒْخذْمث نِّي س اَرْضَا ن أَربِّـي. 27وَامِي ؤُوْضن ذِنِّي، سْمُوْنن جْمَاعث ن ڒْمُوْمِنِين عَاوْذن-اَسن مَارَّا مِين يݣَّا أَربِّـي خ وفُوْس نْسن ذ مَامّش يرْزم-اَسن ثَوَّارْث ن لْإِيمَان إِ يِنِّي وَار يدْجِين شَا زِي أَيث-إِسْرَائِيل. 28سعْذُوْن اَطَّاس ن ڒْوقْث ذِنِّي اَك يمحْضَارن.
Currently Selected:
ڒخذايم 14: ريف
Highlight
Share
Copy
Want to have your highlights saved across all your devices? Sign up or sign in
