ಮಾರ್ಕೆ 14

ಯೇಸುನು ಕೆರಿಯೆರೆ ಉಪಾಯ ಮಲ್ಪುನವು

(ಮತ್ತಾಯೆ 26:15; ಲೂಕೆ 22:1,2; ಯೋಹಾನೆ 11:45-53)

1ಪಸ್ಕ ಬೊಕ್ಕ ಪುಳಿದಾಂತಿನ ರೊಟ್ಟಿದ ಪರ್ಬ ಬರಿಯೆರೆಗ್ ನನಲಾ ರಡ್ಡ್ ದಿನ ಉಪ್ಪುನಗ ಪ್ರಧಾನಯಾಜಕೆರ್‌ಲಾ ಶಾಸ್ತ್ರಿಲುಲಾ ಯೇಸುನು ಉಪಾಯೊಡು ಪತ್ತ್‌ದ್ ಕೆರಿಯೆರೆ ಸಾದಿನ್ ನಾಡೊಂದಿತ್ತೆರ್. 2ದಾಯೆಗಂದ್ಂಡ, “ಪರ್ಬದಪಗ ಪತ್ತುನ ಬೊಡ್ಚಿ, ನಮ ಜನೊಕುಲೆಡ್ ಗೌಜಿ ಆವು,” ಅಂದ್‌ದ್ ಪಾತೆರೊಂಡೆರ್.

ಬೇಥಾನ್ಯೊಡು ಯೇಸುಗು ತೈಲಾಭಿಷೇಕ

(ಮತ್ತಾಯೆ 26:6-12; ಯೋಹಾನೆ 12:18)

3ಆಯೆ ಬೇಥಾನ್ಯೊಡು ಕೊಷ್ಟದಾಯೆ ಆದುಪ್ಪು ಸೀಮೋನನ ಇಲ್ಲಡ್ ಇತ್ತ್‌ದ್, ವಣಸ್‌ಗ್ ಕುಲ್ಲುದುಪ್ಪುನಗ, ಒರ್ತಿ ಪೊಂಜೊವು ಮಸ್ತ್ ಬಿಲೆತ ಕಮ್ಮೆನದ ಜಟಮಾಂಸಿದ ಎಣ್ಣೆದ ಕುಪ್ಪಿನ್ ದೆತ್ತೊಂದು ಬತ್ತ್‌ದ್, ಅವೆನ್ ಪುಡತ್‌ದ್, ಎಣ್ಣೆನ್ ಯೇಸುನ ತರೆತ ಮಿತ್ತ್ ಮೈತಲ್. 4ಆಂಡ ಕೆಲೆವೆರ್ ಕೋಪೊಡು, “ಈ ಎಣ್ಣೆನ್ ಹಾಳ್ ದಾಯೆಗ್ ಮಲ್ತ? 5ಈ ಎಣ್ಣೆನ್ ಮುನ್ನೂದು ಕಾಸ್‌ಡ್ದ್ ಹೆಚ್ಚ್ ಬಿಲೆಕ್ ಮಾರ್ದ್, ಬಡವೆರೆಗ್ ಕೊರ್ತೊಲಿ ಅತ್ತಾ?” ಅಂದ್‌ದ್ ಆಲೆಗ್ ಕುಚ್ಚೊಂಡೆರ್.

6ಆಂಡ ಯೇಸು, “ಆಲೆನ್ ಬುಡ್ಲೆ. ಮೊಲೆಗ್ ದಾಯೆಗ್ ತೊಂದರೆ ಕೊರೊಂದುಲ್ಲರ್. ಮೋಲು ಎಂಕ್ ಎಡ್ಡೆಂತಿ ಬೇಲೆ ಮಲ್ತಲ್. 7ಬಡವೆರ್ ಏಪಲಾ ನಿಕ್ಲೆಡೊಪ್ಪ ಉಪ್ಪುವೆರ್. ನಿಕ್ಲೆಗ್ ಮನಸ್ ಬತ್ತಿನಪಗ ಅಕ್ಲೆಗ್ ಉಪಕಾರ ಮಲ್ಪೊಲಿ. ಆಂಡ ಯಾನ್ ಏಪಲಾ ನಿಕ್ಲೆಡೊಪ್ಪ ಉಪ್ಪುಜಿ. 8ಮೋಲು ತನ್ಕ್ ತೀರಿನಾತ್ ಮಲ್ತ್‌ದಲ್. ಸೈತಿ ಬೊಕ್ಕ ಮಲ್ಪು ಕ್ರಿಯೊಲೆನ್ ಇತ್ತೆನೇ ಎನ ಮೆಯಿಕ್ ಈ ಎಣ್ಣೆನ್ ಪೂಜಿಯಲ್. 9ಸುವಾರ್ತೆನ್ ಇಡೀ ಲೋಕೊಡು ಓಲೋಲು ಸಾರಿಯುಂಡಾ, ಅಲ್ಪಲ್ಪ ಮೋಲು ಮಲ್ತಿನೆನ್, ಆಲೆನ ನೆನೆಪುಗಾದ್ ಪನ್ವೆರ್, ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.” ಅಂದ್‌ದ್ ಪಂಡೆ.

ಯೇಸುನು ಪತ್ತಿಯೆರೆ ಯೂದೆ ಮಲ್ತೊಂಡಿ ಒಪ್ಪಂದ

(ಮತ್ತಾಯೆ 26:14-16; ಲೂಕೆ 22:36)

10ಐಡ್ದ್ ಬೊಕ್ಕ ಪದ್ರಾಡ್ ಶಿಷ್ಯೆರೆಡ್ ಒರಿ ಇಸ್ಕಾರಿಯೋತ ಯೂದೆ, ಯೇಸುನು ಪ್ರಧಾನಯಾಜಕೆರೆಗ್ ಪತ್ತ್‌ದ್ ಕೊರೊಡು ಪಂಡ್ದ್, ಅಕ್ಲೆನ ಕೈತಲ್‌ ಪೋಯೆ. 11ಅಕುಲು ಕೇಂಡ್ದ್ ಸಂತೋಷೊಡು ನಿಕ್ಕ್ ಕಾಸ್ ಕೊರ್ಪ ಅಂದ್‌ದ್ ಪಾತೆರ ಕೊರಿಯೆರ್. ಅಪಗ ಆಯೆ, ಆಯನ್ ಎಂಚ ಪತ್ತ್‌ದ್ ಕೊರ್ಪಿನಿ ಅಂದ್‌ದ್ ಸಮಯೊನು ತೂವೊಂದಿತ್ತೆ.

ಶಿಷ್ಯೆರೆ ಒಟ್ಟುಡು ಕಡೆತ ವಣಸ್

(ಮತ್ತಾಯೆ 26:17-25; ಲೂಕೆ 22:7-14,21-23; ಯೋಹಾನೆ 13:21-30)

12ಪುಳಿದಾಂತಿ ರೊಟ್ಟಿದ ಪರ್ಬದ ಸುರುತ್ತ ದಿನ ಅಂದ್ಂಡ ಪಸ್ಕದ ಕುರಿನ್ ಬಲಿ ಕೊರ್ಪಿನ ದಿನೊಟು ಆಯನ ಶಿಷ್ಯೆರ್, “ಪಸ್ಕದ ವಣಸ್ ಮಲ್ಪೆರೆಗಾದ್ ಎಂಕುಲು ಓಲು ಪೋದು ತಯಾರ್ ಮಲ್ಪೊಡು ಅಂದ್‌ದ್ ಕೇನ್ನಗ”

13ಆಯೆ ತನ ಶಿಷ್ಯೆರೆಡ್ ಇರ್ವೆರೆನ್ ಲೆತ್ತ್‌ದ್, “ನಿಕುಲು ಪೇಂಟೆದುಲಯಿ ಪೋಲೆ. ಅಲ್ಪ ಒರಿ ನರಮಾನಿ ನೀರ್ ದಿಂಜಿದಿ ಕೊಡಪಾನೊನು ತುಂಬೊಂದು ಪೋಪಿನಾಯೆ ನಿಕ್ಲೆನ ಎದುರು ಬರ್ಪೆ. ನಿಕುಲು ಆಯನ ಬೆರಿಯೆ ಪೋಲೆ. 14ಆಯೆ ವಾ ಇಲ್ಲಗ್ ಪೋಪೆನಾ ಆ ಇಲ್ಲದ ಯಜಮಾನಗ್, ‘ಎಂಕ್ಲೆನ ಬೋಧಕೆ ತನ ಶಿಷ್ಯೆರೆಡೊಪ್ಪ ಪಸ್ಕದ ವಣಸ್‌ನ್ ಮಲ್ಪರೆ ತನ್ಕ್ ಕೋಣೆ ಓಲು ಉಂಡು?’ ಅಂದ್‌ದ್ ಕೇನ್ವೆ ಅಂದ್‌ದ್ ಪನ್ಲೆ. 15ಆಯೆ ತಕ್ಕ ಸಾಮಾನ್‌ಲೆನ್ ತಯಾರ್ ಮಲ್ತ್‌ದ್ ದೀದಿತ್ತಿ ಮೇಲುಪ್ಪರಿಗೆದ ಮಲ್ಲ ಕೋಣೆನ್ ನಿಕ್ಲೆಗ್ ತೋಜಾವೆ. ಅಲ್ಪ ನಂಕ್ ವಣಸ್‌ಗ್ ತಯಾರ್ ಮಲ್ಪುಲೆ,” ಪಂಡ್ದ್ ಅಕ್ಲೆನ್ ಕಡಪುಡ್ದು ಕೊರಿಯೆ.

16ಶಿಷ್ಯೆರ್‌ ಪಿದಾಡ್ದ್ ಪೇಂಟೆಗ್ ಪೋದು ಯೇಸು ಪಂಡಿಲೆಕ್ಕನೇ ಮಾತೆನ್ಲಾ ತೂದು, ಪಸ್ಕದ ವಣಸ್‌ನ್ ತಯಾರ್ ಮಲ್ತೆರ್.

17ಬೈಯದಗ ಆಯೆ ಪದ್ರಾಡ್ ಶಿಷ್ಯೆರೆಡೊಪ್ಪ ಬತ್ತೆ. 18ಅಕುಲು ಕುಲ್ಲೊಂದು ವಣಸ್ ಮಲ್ತೊಂದುಪ್ಪುನಗ, ಯೇಸು, “ಎನಡೊಪ್ಪ ವಣಸ್ ಮಲ್ಪುನಾಯೆ, ನಿಕ್ಲೆಡ್ ಒರಿ ಎನನ್ ಪತ್ತ್‌ದ್ ಕೊರುವೆ ಅಂದ್‌ದ್ ಯಾನ್ ನಿಕ್ಲೆಗ್ ನಿಜಾದ್ ಪನ್ಪೆ.”

19ಅಪಗ ಅಕುಲು ಬೇಜಾರ್ ಮಲ್ತ್‌ದ್, “ಯಾನತ್ತತ್ತಾ ಯಾನತ್ತತ್ತಾ,” ಅಂದ್‌ದ್ ಒರಿ ಒರಿ ಆಯಡ ಕೇನಿಯೆರೆ ಸುರು ಮಲ್ತೆರ್.

20ಐಕ್ ಯೇಸು ಅಕ್ಲೆಡ, “ಎನ ಪದ್ರಾಡ್ ಶಿಷ್ಯೆರೆಡ್ ಒರಿ. ಬಟ್ಟಲ್ಡ್ ಎನಡೊಪ್ಪ ಕೈ ಪಾಡುನಾಯೆನೇ. 21ನರಮಾನಿ ಮಗೆ ಪಿದಾಡ್ದ್ ಪೋಪೆ ಸರಿ. ಅಂಚ ಆಯನ ಸಂಗತಿಡ್ ಬರೆತ್ಂಡತ್ತಾ. ಆಂಡ ಏರ್ ನರಮಾನಿ ಮಗನ್ ಪತ್ತ್‌ದ್ ಕೊರ್ಪೆನಾ ಆಯನ ಗತಿನ್ ದಾನೆಂದ್ ಪನೊಲಿ. ಆ ನರಮಾನಿ ಪುಟ್ಟಂದೆ ಇತ್ತ್‌ದ್ಂಡ ಆಯಗ್ ಎಡ್ಡೆ ಇತ್ತ್ಂಡ್,” ಅಂದ್‌ದ್ ಪಂಡೆ.

ಕರ್ತವ ಭೋಜನ

(ಮತ್ತಾಯೆ 26:26-30; ಲೂಕೆ 22:14-20; 1 ಕೊರಿಂಥ್ಯೆರೆಗ್ 11:23-25)

22ಅಕುಲು ವಣಸ್ ಮಲ್ತೊಂದುಪ್ಪುನಗ ಆಯೆ ರೊಟ್ಟಿನ್ ದೆತ್ತೊಂದು, ದೇವೆರೆನ್ ಸುಗಿತ್‌ದ್, ಪೊಲ್ತುದು ಅಕ್ಲೆಗ್ ಕೊರ್ದು, “ದೆತ್ತೊನ್ಲೆ, ಉಂದು ಎನ ಶರೀರ,” ಅಂದ್‌ದ್ ಪಂಡೆ.

23ಐಡ್ದ್ ಬೊಕ್ಕ ಪಾತ್ರೆನ್ ದೆತ್ತೊಂದು, ಸುಗಿತ್‌ದ್ ಅಕ್ಲೆಗ್ ಕೊರ್ದು, ಅಕುಲು ಮಾತೆರ್ ಐಟ್ಟ್ ಪರಿಯೆರ್. 24ಬೊಕ್ಕ ಯೇಸು ಅಕ್ಲೆಡ, “ಉಂದು ಎನ ನೆತ್ತೆರ್, ಮಸ್ತ್ ಜನೊಕುಲೆಗಾದ್ ಗುತ್ತುದಿನ ಒಡಂಬಡಿಕೆದ ನೆತ್ತೆರ್. 25ನಿಕ್ಲೆಗ್ ನಿಜಾದ್ ಪನ್ಪೆ, ಯಾನ್ ದೇವೆರೆ ರಾಜ್ಯೊಡು ಪೊಸತ್ತಾದ್ ಪರ್ಪಿನ ದಿನ ಮುಟ್ಟ ದ್ರಾಕ್ಷಾರಸೊನು ನನ ಪರ್ಪಿನೇ ಇಜ್ಜಿ,” ಅಂದ್‌ದ್ ಪಂಡೆ.

26ಬೊಕ್ಕ ಅಕುಲು ಕೀರ್ತನೆ ರಾಗ ಮಲ್ತ್‌ದ್, ಇಪ್ಪೆಗುಡ್ಡೆಗ್ ಪಿದಾಡ್ದ್ ಪೋಯೆರ್.

ಪೇತ್ರೆ ಅರೆಂಜುನ ಸಂಗತಿನ್ ತೆರಿಪಾಯಿನವು

(ಮತ್ತಾಯೆ 26:31-35; ಲೂಕೆ 22:31-34; ಯೋಹಾನೆ 13:36-38)

27ಅಪಗ ಯೇಸು ಅಕ್ಲೆಡ, “ನಿಕುಲು ಮಾತೆರ್ಲಾ ಪೋಡಿದ್ ಪಿರ ಜಾರುವರ್. ದಾಯೆಗಂದ್ಂಡ, ‘ಯಾನ್, ಕುರುಬಗ್ ಹಾಕುವೆ, ಕುರಿಕುಲು ಚಲ್ಲಾಪಿಲ್ಲಿ ಆವು,’ ಅಂದ್‌ದ್ ಬರೆತ್ಂಡತ್ತಾ. 28ಆಂಡ ಯಾನ್ ಜೀವಾದ್ ಲಕ್ಕಿ ಬೊಕ್ಕ ನಿಕ್ಲೆ ದುಂಬು ಗಲಿಲಾಯೊಗು ಪೋವೆ,” ಅಂದ್‌ದ್ ಪಂಡೆ.

29ಪೇತ್ರೆ ಆಯಗ್, “ಮಾತೆರ್ಲಾ ಪೋಡಿದ್ ಪಿರಜಾರಿಯೆರ್ಡಲಾ ಯಾನ್ ಪಿರಜಾರಯೆ,” ಅಂದ್‌ದ್ ಪನ್ನಗ,

30ಯೇಸು, “ನಿಕ್ಕ್ ನಿಜಾದ್ ಪನ್ಪೆ ಇನಿತ ರಾತ್ರೆಡೇ ಕೋರಿ ರಡ್ಡ್ ಸರ್ತಿ ಕಿಲೆಪುನೆಡ್ದ್ ದುಂಬೇ ಈ ಎನನ್ ತೆರಿಯಯೆ ಅಂದ್‌ದ್ ಮೂಜಿ ಸರ್ತಿ ಪನ್ಪ,” ಪಂಡೆ.

31ಆಂಡ ಆಯೆ, “ಯಾನ್ ನಿನ ಒಟ್ಟುಗು ಸೈಯೊಡಂಡಲಾ ನಿನನ್ ತೆರಿಯಯೆ ಅಂದ್‌ದ್ ಪನಯೆ ಪಂಡ್ದ್ ಕಂಡಿತಾದ್ ಪಂಡೆ,” ಅಂಚೆನೇ ಮಾತೆರ್ಲಾ ಪಂಡೆರ್.

ಗೆಥ್ಸೇಮನೆಟ್ ಯೇಸು ಮಲ್ತಿ ಪ್ರಾರ್ಥನೆ

(ಮತ್ತಾಯೆ 26:36-46; ಲೂಕೆ 22:39-46)

32ಅಕುಲು ಗೆಥ್ಸೇಮನೆ ಪನ್ಪಿ ತೋಟೊಗು ಬತ್ತ್‌ದ್ ಆಯೆ ತನ ಶಿಷ್ಯೆರೆಗ್, “ಯಾನ್ ಪೋದು ಪ್ರಾರ್ಥನೆ ಮಲ್ಪುವೆ, ನಿಕುಲು ಮುಲ್ಪನೆ ಕುಲ್ಲುಲೆ,” ಅಂದ್‌ದ್ ಪಂಡೆ. 33ಪೇತ್ರೆ, ಯಾಕೋಬು ಬೊಕ್ಕ ಯೋಹಾನೆರೆನ್ ಯೇಸು ತನಡೊಪ್ಪ ಲೆತ್ತೊಂದು ಪೋಯೆ. ಅವುಲು ಆಯೆ ದುಃಖ ಮಲ್ಪೆರೆಲಾ ವ್ಯಥೆ ಬುಡಿಯೆರೆಲಾ ಸುರು ಮಲ್ತೆ. 34ಬೊಕ್ಕ ಯೇಸು ಅಕ್ಲೆಡ, “ಎನ ಪ್ರಾಣ ಸೈತ್ ಪೋಪಿನಾತ್ ದುಃಖೊಡು ದಿಂಜಿದ್‌ಂಡ್; ನಿಕುಲು ಮೂಲೇ ಇತ್ತ್‌ದ್ ಎಚ್ಚರಿಕೆ ಆದುಪ್ಪುಲೆ,” ಅಂದ್‌ದ್ ಪಂಡ್ದ್ ಒಂತೆ ದೂರ ಪೋದು

35ನೆಲತ್ತ ಮಿತ್ತ್ ಅಡ್ಡಬೂರ್ದು, ಸಾದ್ಯ ಆಂಡ ಆ ಗಳಿಗೆ ತನಡ್ದ್ ದೂರ ಆಪಿಲೆಕ್ಕ ದೇವೆರೆಡ ಪ್ರಾರ್ಥನೆ ಮಲ್ತೆ. 36“ಅಮ್ಮೆರೇ, ಎನ ಅಮ್ಮೆರೇ, ನಿಕ್ಕ್ ಮಾತಲಾ ಸಾದ್ಯ ಉಂಡು, ಈ ಕಷ್ಟ ಅನುಭವಿಪುನ ದುನ್ನೊನು ಎನಡ್ದ್ ದೆಪ್ಪುಲ. ಆಂಡಲಾ ಎನ ಚಿತ್ತದ ಲೆಕ್ಕ ಅತ್ತ್ ನಿನ ಚಿತ್ತದಲೆಕ್ಕನೇ ಆವಡ್,” ಅಂದ್‌ದ್ ಪ್ರಾರ್ಥನೆ ಮಲ್ತೆ.

37ಐಡ್ದ್ ಬೊಕ್ಕ ಆಯೆ ಬತ್ತ್‌ದ್ ಅಕುಲು ನಿದ್ರೆ ಮಲ್ಪುನೆನ್ ತೂದು ಪೇತ್ರಗ್, “ಸೀಮೋನಾ, ನಿದ್ರೆ ಮಲ್ತೊಂದುಲ್ಲನಾ? ಒಂಜಿ ಗಳಿಗೆ ಆಂಡಲಾ ಎಚ್ಚರಿಕೆ ಆದುಪ್ಪೆರೆ ತೀರುಜಾ?” 38“ನಿಕುಲು ಶೋಧನೆಗ್ ಬೂರಂದಿಲೆಕ್ಕ ಎಚ್ಚರಿಕೆ ಆದಿತ್ತ್‌ದ್ ಪ್ರಾರ್ಥನೆ ಮಲ್ಪುಲೆ; ಆತ್ಮ ತಯಾರುಂಡು ಸರಿ, ಆಂಡ ಶರೀರ ಬಲದಾಂತಿನವು,” ಅಂದ್‌ದ್ ಪಂಡೆ.

39ಕುಡ ಪೋದು ಅವ್ವೇ ಪಾತೆರೊನು ಪನೊಂದು ಪ್ರಾರ್ಥನೆ ಮಲ್ತೆ. 40ಯೇಸು ಕುಡ ಬತ್ತಿನಪಗ ಅಕುಲು ನಿದ್ರೆ ಮಲ್ಪುನೆನ್ ತೂಯೆ, ಅಕ್ಲೆನ ಕಣ್ಣ್‌ಲು ದುನ್ನ ಆದಿತ್ತ್ಂಡ್. ಕುಡೊರ ಕೇಂಡಿನೆಕ್ಕ್ ದಾದ ಉತ್ತರ ಕೊರೊಡು ಅಂದ್‌ದ್ ಅಕ್ಲೆಗ್ ತೆರಿಜಿ.

41ಆಯೆ ಮೂಜನೆ ಸರ್ತಿ ಬತ್ತ್‌ದ್ ಅಕ್ಲೆಗ್, “ನಿಕುಲು ನನಲಾ ನಿದ್ರೆ ಮಲ್ತೊಂದು ಬಚ್ಚೆಲ್ ದೆತ್ತೊಂದುಲ್ಲರಾ? ಯಾವು, ಗಳಿಗೆ ಕೈತಲ್‌ ಬತ್ತ್ಂಡ್. ತೂಲೆ, ನರಮಾನಿ ಮಗನ್ ಪಾಪಿಷ್ಟೆರೆ ಕೈಕ್ ಒಚ್ಚಿದ್ ಕೊರುವೆರ್. 42ಲಕ್ಕ್‌ಲೆ, ನಮ ಪೋಯಿ. ಎನನ್ ಪತ್ತ್‌ದ್ ಕೊರ್ಪಿನಾಯೆ ಕೈತಲ್ ಬೈದೆ ತೂಲೆ,” ಅಂದ್‌ದ್ ಪಂಡೆ.

ಯೇಸುನು ಕೈದ್ ಮಲ್ಪುನವು

(ಮತ್ತಾಯೆ 26:47-56; ಲೂಕೆ 22:47-53; ಯೋಹಾನೆ 18:3-12)

43ಆಯೆ ನನಲಾ ಪಾತೆರೊಂದುಪ್ಪುನಗನೇ ಪದ್ರಾಡ್ ಶಿಷ್ಯೆರೆಡ್ ಒರಿ ಯೂದೆ ಪನ್ಪಿನಾಯೆ ಬತ್ತೆ. ಆಯಡೊಪ್ಪ ಪ್ರಧಾನಯಾಜಕೆರೆ, ಶಾಸ್ತ್ರಿಲೆ, ಹಿರಿಯೆರೆ ಮೊಕ್ಲೆ ಕಡೆಡ್ದ್ ಒಂಜಿ ಗುಂಪು, ಕತ್ತಿ ಸೋಂಟೆಲೆನ್ ಪತ್ತೊಂದು ಬತ್ತೆರ್. 44ಉಂದತ್ತಂದೆ ಆಯನ್ ಪತ್ತ್ ಕೊರ್ಪಿನಾಯೆ ಅಕ್ಲೆಡ, “ಯಾನ್ ಏರೆಗ್ ಮುತ್ತು ಕೊರ್ಪೆನಾ ಆಯೆನೇ ಆಯೆ. ಆಯನ್ ಪತ್ತ್‌ದ್ ಜಾಗ್ರತೆಡ್ ಪತ್ತೊಂದು ಪೋಲೆ,” ಅಂದ್‌ದ್ ಗುರ್ತ ಪಂಡ್ದ್ ಕೊರ್ದಿತ್ತೆ.

45ಅಂಚೆನೇ ಯೂದೆ ಅಡೆಗ್ ಬತ್ತಿ ಕೂಡ್ಲೆ, ಆಯೆ ಯೇಸುನ ಕೈತಲ್‌ ಬತ್ತ್‌ದ್, “ಗುರೂ,” ಪಂಡ್ದ್ ಆಯಗ್ ಮುತ್ತು ಕೊರಿಯೆ.

46ಅಕುಲು ಆಯನ ಮಿತ್ತ್ ಕೈ ಪಾಡ್ದ್ ಆಯನ್ ಪತ್ತಿಯೆರ್.

47ಯೇಸುನ ಕೈತಲ್‌ಡ್ ಉಂತುದಿನಾಕುಲೆಡ್ದ್ ಒರಿ ತನ ಕತ್ತಿ ಬೇರ್ದ್ ಪ್ರಧಾನಯಾಜಕನ ಬೇಲೆದಾಯಗ್ ಹಾಕ್‌ದ್ ಆಯನ ಕೆಬಿನ್ ಕಡ್ತ್‌ದ್ ಬುಡಿಯೆ. 48ಅಪಗ ಯೇಸು ಅಕ್ಲೆಗ್, “ಒರಿ ಕಲ್ವನ್ ಪತ್ತಿಯೆರೆ ಬತ್ತಿಲೆಕ್ಕ ಕತ್ತಿನ್ಲಾ, ಸೋಂಟೆನ್ಲಾ ಪತ್ತೊಂದು ಎನನ್ ಪತ್ತಿಯೆರೆ ಬತ್ತರಾ? 49ಯಾನ್ ದಿನಾಲ ದೇವಾಲಯೊಡು ಬೋಧನೆ ಮಲ್ತೊಂದುಪ್ಪುನಗ ನಿಕುಲು ಎನನ್ ಪತ್ತ್‌ಜರ್; ಆಂಡ ಶಾಸ್ತ್ರೊಡು ಬರೆತಿನವು ಪೂರ್ತಿ ಆಪಿಲೆಕ್ಕ ನಡತ್ಂಡ್,” ಅಂದ್‌ದ್ ಉತ್ತರ ಕೊರಿಯೆ.

50ಅಪಗ ಶಿಷ್ಯೆರ್ ಮಾತೆರ್ಲಾ ಆಯನ್ ಬುಡ್ದು ಪಾರ್‌ಪೋಯೆರ್.

51ಒರಿ ಜವನೆ ಬಜೀ ಮೆಯಿಕ್ ನಾರ್‌ಮಡಿತ ಕುಂಟುನು ಪೊದೆತೊಂದು ಯೇಸುನ ಬೆರಿಯೆ ಬರೊಂದಿತ್ತೆ. ಸಿಪಾಯಿಲು ಆಯನ್ ಪತ್ತ್‌ನಗ, 52ಆಯೆ ಆ ನಾರ್‌ಮಡಿತ ಕುಂಟುನು ಬುಡ್ದು ಬಜೀ ಮೆಯಿಟ್ ಬಲ್ತ್ ಪೋಯೆ.

ಹಿರಿಸಭೆತ ಎದುರುಡು ಯೇಸು

(ಮತ್ತಾಯೆ 26:57-68; ಲೂಕೆ 22:54,55,63-71; ಯೋಹಾನೆ 18:13,14,19-24)

53ಬೊಕ್ಕ ಅಕುಲು ಯೇಸುನು ಪ್ರಧಾನಯಾಜಕನ ಕೈತಲ್‌ ಲೆತ್ತೊಂದು ಪೋಯೆರ್. ಅವುಲು ಪ್ರಧಾನಯಾಜಕೆರ್‌ಲು, ಹಿರಿಯಾಕುಲು, ಶಾಸ್ತ್ರಿಲು ಮಾತೆರ್ಲಾ ಸೇರ್ದ್ ಬತ್ತೆರ್. 54ಬೊಕ್ಕ ಪೇತ್ರೆ ದೂರೊಡ್ದು ಯೇಸುನ ಬೆರಿಯೆ ಪೋವೊಂದು ಪ್ರಧಾನಯಾಜಕನ ಮಠತ ಜಾಲ್‌ದ ಉಲಯಿ ಬತ್ತ್‌ದ್ ಪಾರದಾಕುಲೆಡೊಪ್ಪ ತೂತ ಎದುರುಡು ಕುಲ್ಲೊಂದು ಚಳಿ ಕಾಯ್ತೊಂದಿತ್ತೆ.

ಪ್ರಧಾನಯಾಜಕೆ ಯೇಸುಡ ಪ್ರಶ್ನೆ ಮಲ್ಪುನವು

55ಅಪಗ ಪ್ರಧಾನಯಾಜಕೆರ್‌ಲಾ, ಹಿರಿಸಭೆತಾಕುಲುಲಾ ಯೇಸುನು ಕೆರ್ಪಾವೊಡು ಅಂದ್‌ದ್ ಆಯ ಮಿತ್ತ್ ಸುಳ್ಳು ಸಾಕ್ಷಿನ್ ನಾಡಿಯೆರ್. ಆಂಡ ದಾಲಾ ತಿಕ್ಕ್‌ಜಿ. 56ಮಸ್ತ್ ಜನ ಬತ್ತ್‌ದ್ ಆಯನ ಮಿತ್ತ್ ಸುಳ್ಳು ಸಾಕ್ಷಿ ಪಂಡೆರ್ಡಲಾ ಅಕ್ಲೆನ ಸಾಕ್ಷಿ ಒಂಜೇಲೆಕ್ಕ ಇತ್ತ್‌ಜಿ.

57-58ಕೆಲೆವೆರ್ ಲಕ್ಕ್‌ದ್ ಉಂತುದು, “ನರಮಾನಿನ ಕೈಡ್ದ್ ಕಟ್ಟ್‌ದಿನ ಈ ದೇವಾಲಯೊನು, ‘ಯಾನ್ ಮಗ್ತ್ ಪಾಡ್ದ್, ನರಮಾನಿನ ಕೈಡ್ದ್ ಕಟ್ಟಂದಿನ ಬೊಕ್ಕೊಂಜಿ ದೇವಾಲಯೊನು ಮೂಜಿ ದಿನತ ಉಲಯಿ ಕಟ್ಟುವೆ,’ ಪಂಡ್ದ್ ಪನ್ತಿನೆನ್ ಎಂಕುಲು ಕೇಂಡ್ದ.” ಅಂದ್‌ದ್ ಆಯನ ಮಿತ್ತ್ ಸುಳ್ಳು ಸಾಕ್ಷಿ ಪಂಡೆರ್. 59ಎಂಚಿನ ಪಂಡ್‌ಂಡಲಾ ಅಕ್ಲೆನ ಸಾಕ್ಷಿ ಒಂಜೇಲೆಕ್ಕ ಇತ್ತ್‌ಜಿ.

60ಅಪಗ ಪ್ರಧಾನಯಾಜಕೆ ಲಕ್ಕ್‌ದ್ ನಡುಟು ಉಂತುದು, “ಈ ದಾಲಾ ಉತ್ತರ ಕೊರ್ಪುಜನಾ? ಮೊಕುಲು ನಿನ ಮಿತ್ತ್ ಪನ್ಪಿನ ಈ ಸಾಕ್ಷಿ ಎಂಚಿನವು?” ಅಂದ್‌ದ್ ಯೇಸುಡ ಪ್ರಶ್ನೆ ಮಲ್ತೆ.

61ಆಂಡ ಯೇಸು ಮನಿಪಂದೆ ಇತ್ತ್‌ದ್, ದಾಲಾ ಉತ್ತರ ಕೊರ್ಜೆ. ಕುಡ ಪ್ರಧಾನಯಾಜಕೆ ಆಯಡ, “ಈ ಕ್ರಿಸ್ತೆನಾ, ಪುಗರ್ತೆಗ್ ತಕ್ಕಾದುಪ್ಪು ದೇವೆರೆ ಮಗೆನಾ?” ಅಂದ್‌ದ್ ಕೇನ್ನಗ,

62ಯೇಸು, “ಯಾನ್ ಆಯೆನೇ, ಉಂದತ್ತಂದೆ ನರಮಾನಿ ಮಗೆ ಸರ್ವಶಕ್ತನ ಬಲತ್ತ ಮರ್ಗಿಲ್‌ಡ್ ಕುಲ್ಲುದುಪ್ಪುನೆನ್ಲಾ ಬಾನದ ಮುಗಲ್‌ದೊಟ್ಟಿಗೆ ಬರ್ಪುನೆನ್ಲಾ ತೂವರ್,” ಪಂಡೆ.

63ಉಂದೆನ್ ಕೇಂಡ್ದ್ ಪ್ರಧಾನಯಾಜಕೆ ತನ ಅಂಗಿನ್ ಪರ್ತೊಂದು, “ನಂಕ್ ಸಾಕ್ಷಿಲು ನನ ದಾಯೆಗ್ ಬೋಡು? 64ಆಯೆ ಮಲ್ತಿನ ದೂಷಣೆನೆನ್ ಕೇಂಡರತ್ತಾ? ನಿಕ್ಲೆಗ್ ಎಂಚ ತೋಜುಂಡು,” ಪಂಡಿನಪಗ, ಅಕುಲು ಮಾತೆರ್ಲಾ, “ಉಂಬೆ ಮರಣ ದಂಡನೆಗ್ ತಕ್ಕದಾಯೆ,” ಅಂದ್‌ದ್ ತೀರ್ಪು ಮಲ್ತೆರ್.

65ಐಡ್ದ್ ಬೊಕ್ಕ ಕೆಲೆವೆರ್ ಆಯನ ಮಿತ್ತ್ ಉಬ್ಬಿದ್, ಮೋನೆಗ್ ಮುಸ್ಕು ಪಾಡ್ದ್ ಗುದ್ದುದು, “ನಿಕ್ಕ್ ಗುದ್ದಿನಾಕುಲು ಏರಂದ್‌ದ್ ಪ್ರವಾದನೆ ಪನ್ಲ.” ಬೊಕ್ಕ ಪಾರದಾಕುಲು ಆಯನ್ ಲೆತ್ತೊಂದು ಪೋದು ಆಯನ ಕೆಪ್ಪೆಗ್ ಪೆಟ್ಟ್ ಹಾಕ್‌ದ್ ತನ್ಕ್‌ಲೆ ವಶೊಕು ದೆತ್ತೊಂಡೆರ್.

ಪೇತ್ರೆ ಯೇಸುನು ಅರೆಂಜುನವು

(ಮತ್ತಾಯೆ 26:69-75; ಲೂಕೆ 22:56-62; ಯೋಹಾನೆ 18:15-18,25-27)

66ಇಂಚಿಡ್ದ್ ಪೇತ್ರೆ ತಿರ್ತ್ ಜಾಲ್‌ಡ್ ಇತ್ತಿನಪಗ ಪ್ರಧಾನಯಾಜಕನ ಚಾಕ್ರಿದಾಲ್ ಒರ್ತಿ ಬತ್ತ್‌ದ್ 67ಪೇತ್ರೆ ಚಳಿ ಕೈತೊಂದಿತ್ತಿನೆನ್ ತೂದು, “ಈಲಾ ನಜರೇತ್‌ದ ಯೇಸುಡೊಪ್ಪ ಇತ್ತಿನಾಯೆ ಅತ್ತಾ?” ಅಂದ್‌ದ್ ಪಂಡಲ್.

68ಆಂಡ ಆಯೆ, “ಇಜ್ಜಿ, ಈ ದಾದ ಪನೊಂದುಲ್ಲನ ಎಂಕ್ ತೆರಿಯಂದ್, ಅರ್ಥಲಾ ಆವೊಂದಿಜ್ಜಿ” ಅಂದ್‌ದ್ ಪಿದಯಿದ ಜಾಲ್‌ಗ್ ಪೋಯೆ. (ಅಪಗ ಕೋರಿ ಕಿಲೆತ್ತ್ಂಡ್).

69ಅಲ್ಪ ಚಾಕ್ರಿದಾಲ್ ಆಯನ್ ತೂದು, ಕೈತಲ್‌ಡ್ ಉಂತುದಿನಾಕುಲೆಗ್, “ಉಂಬೆಲಾ ಅಕ್ಲೆಡ್ ಒರಿ ಅಂದ್‌ದ್ ಪನಿಯೆರೆ ಸುರು ಮಲ್ತೊಲು,” 70ಆಯೆ ಕುಡ ಆರೆಂಜಿಯೆ. ಒಂತೆ ಪೊರ್ತುಡ್ದು ಬೊಕ್ಕ ಅಲ್ಪ ಉಂತುದಿನಾಕುಲು ಪೇತ್ರಗ್, “ಕಂಡಿತಾದ್ ಈಲಾ ಅಕ್ಲೆಡ್ ಒರಿ, ಈ ಗಲಿಲಾಯದಾಯೆನೇ.” ಅಂದ್‌ದ್ ಪಂಡೆರ್.

71ಆಂಡ ಆಯೆ, “ನಿಕುಲು ಪನ್ಪಿನ, ಆ ನರಮಾನಿನ್ ಯಾನ್ ತೆರಿಯಯೆ,” ಅಂದ್‌ದ್ ಶಾಪಿಯೊನಿಯೆರೆಗ್ಲಾ, ಆಜ ಪಾಡೊನಿಯೆರೆಗ್ಲಾ ಸುರು ಮಲ್ತೆ.

72ಅಪಗನೆ ಕೋರಿ ರಡ್ಡನೆ ಸರಿ ಕಿಲೆತ್ತ್ಂಡ್. ಅಪಗ ಪೇತ್ರೆ, “ಕೋರಿ ಕಿಲೆಪೊಡ್ದು ದುಂಬು ಮೂಜಿ ಸರ್ತಿ ಎನ ಬಗೆಟ್, ಆಯನ್ ತೆರಿಯಯೆ ಅಂದ್‌ದ್ ಅರೆಂಜುವ,” ಪಂಡ್ದ್ ಯೇಸು ತನ್ಕ್ ಪನ್ತಿನ ಪಾತೆರೊನು ನೆನೆಪು ಮಲ್ತ್‌ದ್ ಆ ಬಗೆಟ್ ಎನ್ನ್‌ದ್ ಬುಲ್ತೆ.

Currently Selected:

ಮಾರ್ಕೆ 14: ತುಳು

Highlight

Copy