ಮಾರ್ಕೆ 13

ಯೇಸು ದೇವಾಲಯದ ನಾಶನದ ಸಂಗತಿಡ್ ಪಾತೆರುನವು

(ಮತ್ತಾಯೆ 24:1,2; ಲೂಕೆ 21:5,6)

1ಯೇಸು ದೇವಾಲಯೊನು ಬುಡ್ದು ಪೋವೊಂದುಪ್ಪುನಗ ಆಯನ ಶಿಷ್ಯೆರೆಡ್ ಒರಿ ಆಯಗ್, “ಗುರೂ ತೂಲ, ಏತ್ ಪೊರ್ಲುದ ಕಲ್ಲುಲು, ಏತ್ ಪೊರ್ಲುದ ಕಟ್ಟೊಣೊಲು,” ಅಂದ್‌ದ್ ಪಂಡೆ.

2ಯೇಸು ಆಯಗ್, “ಈ ಮಲ್ಲ ಕಟ್ಟೊಣೊಲೆನ್ ತೂಪರತ್ತಾ? ನೆತ್ತ ಒಂಜಿ ಕಲ್ಲ್‌ಲಾ, ಒಂಜೆತ್ತ ಮಿತ್ತ್ ಒಂಜಿ ಉಪ್ಪಂದ್, ಮಾತಲಾ ಮಗ್‌ರ್ದ್ ತಿರ್ತ್ ಬೂರ್ದು ಪೋವು,” ಅಂದ್‌ದ್ ಪಂಡೆ.

ಭಂಗೊಲು ಬೊಕ್ಕ ಉಪದ್ರೊಲು

(ಮತ್ತಾಯೆ 24:3-14; ಲೂಕೆ 21:7-19)

3-4ಬೊಕ್ಕ ಆಯೆ ಇಪ್ಪೆಗುಡ್ಡೆದ ಮಿತ್ತ್ ದೇವಾಲಯದ ಎದುರು ಕುಲ್ಲುದಿತ್ತಿನಪಗ ಪೇತ್ರೆ, ಯಾಕೋಬು, ಯೋಹಾನೆ, ಅಂದ್ರೆಯ ಮೊಕುಲು, “ಉಂದು ಏಪ ಆವು, ಅಂಚ ಆವನಗ ವಾ ಗುರ್ತ ತೋಜಿದ್ ಬರ್ಪುಂಡು ಎಂಕ್ಲೆಗ್ ಪನ್ಲ.” ಅಂದ್‌ದ್ ಆಯಡ ಪ್ರತ್ಯೇಕಾದ್ ಕೇಂಡೆರ್.

5ಯೇಸು ಅಕ್ಲೆಗ್ ಪಂಡಿನಿ ದಾನೆ ಪಂಡ, “ಏರಾಂಡಲಾ ನಿಕ್ಲೆನ್ ಮೋಸ ಮಲ್ಪಂದಿಲೆಕ್ಕ ತೂವೊನ್ಲೆ. 6ದಾಯೆ ಪಂಡ ಕೆಲೆವೆರ್ ಬತ್ತ್‌ದ್ ಎನ ಪುದರ್ ದೆತ್ತೊಂದು, ‘ಯಾನೇ ಕ್ರಿಸ್ತೆ,’ ಅಂದ್‌ದ್ ಏತೋ ಜನೊಕುಲೆನ್ ಮೋಸೊಡು ಪಾಡೆರ್. 7ಉಂದತ್ತಂದೆ ಯುದ್ದೊಲು ಆಪಿನೆನ್ಲಾ ಯುದ್ದೊಲು ಆಪಿಲೆಕ್ಕ ಉಂಡು ಪನ್ಪಿ ಸುದ್ಧಿಲೆನ್ಲಾ ನಿಕುಲು ಕೇನ್ನಗ ಗಲಿಬಿಲಿ ಆವೊಡ್ಚಿ. ಇಂಚಿನ ಪರಿಸ್ಥಿತಿ ಆಪಿನವು ಅಗತ್ಯ, ಆಂಡಲಾ ಉಂದು ಅಂತ್ಯಕಾಲ ಅತ್ತ್. 8ಜನಾಂಗದ ವಿರೋಧಾದ್ ಜನಾಂಗೊಲುಲಾ; ರಾಜ್ಯೊಗು ವಿರೋಧಾದ್ ರಾಜ್ಯೊಲುಲಾ ಲಕ್ಕುಂಡು. ಭೂಕಂಪೊಲು ಅಲ್ಪಲ್ಪ ಆಪಿನವುಲಾ ಬರಗಾಲ ಬರ್ಪಿನವುಲಾ ಉಂದು ಮಾತ (ಪೊಸ ಯುಗ ಪುಟ್ಟುನ) ಪೆದ್ದುನಪಗ ಆಪಿ ಸುರುತ್ತ ಬೇನೆಲು.

9“ನಿಕುಲು ನಿಕ್ಲೆನ ಸಂಗತಿಡ್ ಎಚ್ಚರಿಕೆ ಆದುಪ್ಪುಲೆ. ಅಕುಲು ನಿಕ್ಲೆನ್ ನ್ಯಾಯಸಭೆಕ್ಕ್ ಒಯ್ತೊಂದು ಪೋವೆರ್; ಬೊಕ್ಕ ಸಭಾಮಂದಿರೊಲೆಡ್ ನಿಕ್ಲೆಗ್ ಹಾಕೆರ್. ಎನಡ್ದಾವರ ನಿಕ್ಲೆನ್ ಅಧಿಪತಿಲೆ ಬೊಕ್ಕ ಅರಸುಲೆ ಎದುರು ಕೊನೊವೆರ್, ಇಂಚ ಅಕ್ಲೆಗ್ ಸಾಕ್ಷಿ ಆವರ್. 10ಆಂಡ ಅವೆಡ್ದ್ ದುಂಬು ಮಾತ ಜನಾಂಗೊಲೆಗ್ ಸುವಾರ್ತೆ ಸಾರಿಯೊಡು. 11ನಿಕ್ಲೆನ್ ನ್ಯಾಯಸಭೆಕ್ಕ್ ಪತ್ತೊಂದು ಪೋದು ಒಚ್ಚಿದ್ ಕೊರ್ನಗ ಎಂಚ ಪಾತೆರೊಡು, ದಾದ ಪನೊಡು ಅಂದ್‌ದ್ ಸುರುಟ್ಟೇ ಚಿಂತೆ ಮಲ್ಪಡೆ; ಪನೊಡಿತ್ತಿ ಪಾತೆರೊಲು ಆ ಗಳಿಗೆಡ್ ನಿಕ್ಲೆಗ್ ಕಾರಣ ಆಪಿ ಪಾತೆರೊನೆ ಪನ್ಲೆ. ದಾಯೆ ಪಂಡ ಅಪಗ ಪಾತೆರುನಾಕುಲು ನಿಕುಲತ್ತ್, ಪರಿಶುದ್ಧಾತ್ಮೆನೇ ನಿಕ್ಲೆಡ್ದ್ ಪಾತೆರುವೆ. 12ಉಂದತ್ತಂದೆ ಪಲಯೆ ಮೆಗ್ಯನ್, ಅಮ್ಮೆ ಮಗನ್ ಮರಣೊಗು ಒಚ್ಚಿದ್ ಕೊರುವೆರ್; ಜೋಕುಲು ಅಪ್ಪೆಅಮ್ಮಾಡ್ಲೆ ಮಿತ್ತ್ ತಿರ್ಗ್ ಬೂರ್ದು ಅಕ್ಲೆನ್ ಕೆರ್ವೆರ್. 13ಬೊಕ್ಕ ಎನ ಪುದರ್‌ಗಾದ್ ಮಾತೆರ್ಲಾ ನಿಕ್ಲೆನ್ ಪಗೆ ಮಲ್ಪುವೆರ್. ಆಂಡ ಕಡೆ ಮುಟ್ಟ ತಾಳೊನುನಾಯಗ್ ರಕ್ಷಣೆ ಆವು.

ಭಯಂಕರ ದಿನೊಕುಲು

(ಮತ್ತಾಯೆ 24:15-28; ಲೂಕೆ 21:20-24)

14“ಉಂದತ್ತಂದೆ ಹಾಳ್ ಮಲ್ಪುನ ಪೇಸಿಗೆ ವಸ್ತುಲು ಉಂತಂದಿ ಜಾಗ್‌ಡ್ ಉಂತುದಿನೆನ್ ನಿಕುಲು ತೂವನಗ, (ಉಂದೆನ್ ಓದುನಾಯೆ ತೆರಿಯೊನಡ್). ಯೂದಾಯೊಡು ಉಪ್ಪುನಾಕುಲು ಪರ್ವತೊಲೆಗ್ ಪಾರ್ದ್ ಪೋವಡ್. 15ಮಾಳಿಗೆಡ್ ಉಪ್ಪುನಾಯೆ ತಿರ್ತ್ ಜತ್ತ್‌ದ್ ಇಲ್ಲದುಲಯಿ ಪೋವಂದೆ, ತನ ಇಲ್ಲದುಲಯಿಡ್ದ್ ದಾದಾಂಡಲಾ ದೆತ್ತೊನಂದೆ ಉಪ್ಪಡ್. 16ಕಂಡೊಡು ಉಪ್ಪುನಾಯೆ ತನ ಪೊದೆಪುನು ದೆತ್ತೊನಿಯೆರೆ ಪಿರ ಪೋವಂದೆ ಉಪ್ಪಡ್. 17ಆಂಡ ಆ ದಿನೊಟು ಬಂಜಿನಾಕುಲೆಗ್ಲಾ ಬಾಲೆಗ್ ಮಿರೆ ಕೊರ್ಪಿ ಅಪ್ಯಾಡ್ಲೆಗ್ಲಾ ಬರ್ಪಿ ಕಷ್ಟೊನು ಪನಿಯೆರೆ ತೀರಂದ್. 18-19ಆ ದಿನೊಕುಲು ಸಂಕಟದ ದಿನೊಕುಲು ಆಯಿನೆಡ್ದ್ ಉಂದು ಮಾತ ಚಳಿಕಾಲೊಡು ಆವೆರೆ ಬಲ್ಲಿ ಅಂದ್‌ದ್ ಪ್ರಾರ್ಥನೆ ಮಲ್ಪುಲೆ. ಅಂಚಿನ ಸಂಕಟ ದೇವೆರ್ ಈ ಲೋಕದ ಸೃಷ್ಟಿದ ಆರಂಭದ ದಿನೊಡ್ದು ಇನಿ ಮುಟ್ಟಲಾ ಆತಿಜಿ. ನನ ಮಿತ್ತ್‌ಗ್ಲಾ ಆವಂದ್. 20ಕರ್ತವೆ ಆ ದಿನೊಕುಲೆನ್ ಕಡಿಮೆ ಮಲ್ತ್‌ಜೆಡ, ಒಂಜಿ ನರಪ್ರಾಣಿಲಾ ಬದ್‌ಕಂದ್. ಆಂಡ ತಾನ್ ಅಜತ್ ದೆತ್ತೊಂಡಿನಾಕುಲೆಗಾದ್ ಆ ದಿನೊಕುಲೆನ್ ಕಡಿಮೆ ಮಲ್ತ್‌ದೆ.

21“ಅಪಗ ಏರಾಂಡಲಾ ನಿಕ್ಲೆಗ್, ‘ಇಂದಾ, ಕ್ರಿಸ್ತೆ ಮೂಲು ಉಲ್ಲೆ,’ ಇಂದಾ, ‘ಅಲ್ಪ ಉಲ್ಲೆ,’ ಅಂದ್‌ದ್ ಪಂಡೆರ್ಡ ನಂಬಡೆ. 22ದಾಯೆಗಂದ್ಂಡ, ಸುಳ್ಳು ಕ್ರಿಸ್ತೆರ್ಲಾ ಸುಳ್ಳು ಪ್ರವಾದಿಲುಲಾ ತೋಜಿದ್ ಬರ್ವೆರ್. ಸಾದ್ಯ ಇತ್ತ್ಂಡ, ದೇವೆರ್ ಅಜತ್ ದೆತ್ತೊಂಡಿನಾಕುಲೆನ್ಲಾ ಮೋಸೊಡು ಪಾಡಿಯೆರೆಗಾದ್ ಗುರ್ತೊಲೆನ್ಲಾ ಕಾರ್ನಿಕೊಲೆನ್ಲಾ ಮಲ್ತ್‌ದ್ ತೋಜಪಾವೆರ್. 23ನಿಕುಲು ಜಾಗ್ರತೆಡ್ ಉಪ್ಪುಲೆ, ಉಂದೆನ್ ಮಾತೆನ್ಲಾ ಸುರುಟ್ಟೆ ಪನ್ತೆ.

ನರಮಾನಿ ಮಗೆ ಕುಡ ಬರ್ಪಿನವು

(ಮತ್ತಾಯೆ 24:29-31; ಲೂಕೆ 21:25-28)

24“ಉಂದತ್ತಂದೆ ಆ ದಿನೊಕುಲೆಡ್ ಆ ಸಂಕಟ ತೀರಿ ಬೊಕ್ಕ, ಸೂರ್ಯೆ ಕತ್ತಲೆ ಆದ್ ಪೋವು, ಚಂದ್ರೆ ಬೊಲ್ಪು ಕೊರಂದ್, 25ನಕ್ಷತ್ರೊಲು ಬಾನೊಡ್ದು ತಾಲ್ದ್ ಬೂರು ಬಾನದ ಬಲೊಲು ಪಂದ್‌ದ್ ಪೋವು. 26ಅಪಗ ನರಮಾನಿ ಮಗೆ ಬಾರಿ ಬಲೊಟ್ಲಾ ಮೈಮೆಡ್ಲಾ ಮುಗಲ್‌ಲೆಡ್ ಬರ್ಪಿನೆನ್ ತೂಪರ್. 27ಬೊಕ್ಕ ಆಯೆ ತನ ದೂತೆರೆನ್ ಕಡಪುಡ್ದು, ಭೂಮಿಡ್ದ್ ಬಾನದ ಕೊಡೀಕಡೆ ಮುಟ್ಟ, ದೇವೆರ್ ಅಜತ್ ದೆತ್ತೊಂಡಿನಾಕುಲೆನ್ ನಾಲ್ ದಿಕ್ಕ್‌ಲೆಡ್ದ್ ಒಟ್ಟು ಕೂಡಾವೆರ್.

ಅಂಜೂರ ಮರತ ಪಾಠ

(ಮತ್ತಾಯೆ 24:32-35; ಲೂಕೆ 21:29-33)

28“ಅಂಜೂರದ ಮರತ ಉಪಕತೆಡ್ದ್ ಬುದ್ಧಿ ಕಲ್ತೊನ್ಲೆ. ಐತ ಗೆಲ್ಲ್ ನನಲಾ ಲತ್ತ್ ಇತ್ತ್‌ದ್ ಇರೆ ಬುಡ್ನಗ ಅರೆಗಾಲ ಕೈತಲಾಂಡ್ ಅಂದ್‌ದ್ ತೆರಿಯೊನ್ವರ್.” 29ಅಂಚೆನೇ ನಿಕುಲುಲಾ ಉಂದು ಮಾತ ಆಪಿನೆನ್ ತೂನಗ, ಗಳಿಗೆ ಕೈತಲುಂಡು, ಬಾಕಿಲ್‌ದಲ್ಪನೇ ಉಂಡು ಅಂದ್‌ದ್ ತೆರಿಯೊನ್ಲೆ. 30ಉಂದು ಮಾತ ಆಪಿನೆಟ್ಟ ಈ ಸಂತಾನ ಆಳಿದ್ ಪೋಪಿನೇ ಇಜ್ಜಿ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ. 31ಬಾನಲಾ ಭೂಮಿಲಾ ಆಳಿದ್ ಪೋವು, ಆಂಡ ಎನ ಪಾತೆರೊಲು ಆಳಿದ್ ಪೋಪಿನೆ ಇಜ್ಜಿ.

ಆ ದಿನ, ಗಳಿಗೆಲು ಏರೆಗ್ಲಾ ತೆರಿಯಂದ್

(ಮತ್ತಾಯೆ 24:36-44)

32“ಉಂದತ್ತಂದೆ ಆ ದಿನತ ಬಗೆಟಾವಡ್ ಆ ಗಳಿಗೆದ ಬಗೆಟಾವಡ್ ಎನ ಅಮ್ಮೆರೆಗ್ ತೆರಿಯು ಅತ್ತಂದೆ ಬೊಕ್ಕ ಏರೆಗ್ಲಾ ತೆರಿಯಂದ್. ಪರಲೋಕೊಡುಪ್ಪು ದೂತೆರೆಗ್ಲಾ ತೆರಿಯಂದ್, ಮಗಕ್ಲಾ ತೆರಿಯಂದ್. 33ಆ ಕಾಲ ಏಪ ಬರ್ಪುಂಡು ಅಂದ್‌ದ್ ನಿಕ್ಲೆಗ್ ಗೊತ್ತಿಜ್ಜಾಂದಿನೆಡ್ದ್ ಎಚ್ಚರಿಕೆ ಆದಿತ್ತ್‌ದ್ ಪ್ರಾರ್ಥನೆ ಮಲ್ಪುಲೆ. 34ಒರಿ ನರಮಾನಿ ತನ ಇಲ್ಲನ್ ಬುಡ್ದು ಬೇತೆ ಒಂಜಿ ದೇಶೊಗು ಪೋನಗ, ತನ ಬೇಲೆದಾಕುಲೆಗ್ ಇಲ್ಲದ ಅಧಿಕಾರೊನು ಒಪ್ಪಿಯಾದ್ ಕೊರ್ದು, ಪ್ರತಿ ಒರಿಯಗ್ ಆಯಾಯನ ಬೇಲೆನ್ ನೇಮಕ ಮಲ್ತ್‌ದ್, ಬಾಕಿಲ್ ಕಾಪುನಾಯನ್ ಲೆತ್ತ್‌ದ್, ಈ ಎಚ್ಚರಿಕೆ ಆದುಪ್ಪೊಡು ಅಂದ್‌ದ್ ಅಪ್ಪಣೆ ಕೊರಿ ಲೆಕ್ಕ ಆದುಂಡು. 35ಇಲ್ಲದ ಯಜಮಾನೆ ಬೈಯಡಾವಡ್, ಮದ್ಯ ರಾತ್ರೆಡಾವಡ್, ಕೋರಿ ಕಿಲೆಪುನಗಾವಡ್, ಪುಲ್ಯ ಕಾಂಡೆಡಾವಡ್ ಏಪ ಬರ್ಪೆನಾ ನಿಕ್ಲೆಗ್ ಗೊತ್ತುದಾಂತೆ ಉಪ್ಪುನೆಡ್ದ್ ಎಚ್ಚರಿಕೆ ಆದುಪ್ಪುಲೆ. 36ಆಯೆ ಪಕ್ಕನೆ ಬತ್ತೆಡ, ನಿಕುಲು ನಿದ್ರೆಡ್ ಉಪ್ಪುನೆನ್ ಆಯೆ ತೂವೆರೆ ಬಲ್ಲಿ. 37ಯಾನ್ ನಿಕ್ಲೆಗ್ ಪಂತಿನೆನೇ ಮಾತೆರೆಗ್ಲಾ ಪನ್ಪೆ, ಎಚ್ಚರಿಕೆ ಆದುಪ್ಪುಲೆ,” ಅಂದ್‌ದ್ ಪಂಡೆ.

Currently Selected:

ಮಾರ್ಕೆ 13: ತುಳು

Highlight

Copy