ಮಾರ್ಕೆ 12

ದ್ರಾಕ್ಷೆತೋಟದ ಒಕ್ಕೆಲ್‌ದಾಕುಲೆನ ಉಪಕತೆ

(ಮತ್ತಾಯೆ 21:33-36; ಲೂಕೆ 20:9-19)

1ಅಪಗ ಯೇಸು ಅಕ್ಲೆಡ ಉಪಕತೆಟ್ ಪಾತೆರಿಯೆರೆ ಸುರು ಮಲ್ತೆ, “ಒರಿ ನರಮಾನಿ ಒಂಜಿ ದ್ರಾಕ್ಷೆತೋಟೊನು ಮಲ್ತ್‌ದ್ ಐತ ಸುತ್ತಲಾ ಬೇಲಿ ಪಾಡ್ದ್ ನಡುಟು ಗಾಣ ತೋಡ್ದು ಕಾಪುನ ಗೋಪುರ ಕಟ್ಟ್‌ದ್ ಅವೆನ್ ಒಕ್ಕೆಲ್‌ದಾಕುಲೆಗ್ ಬಾಡಿಗೆಗ್ ಕೊರ್ದು ಬೊಕ್ಕೊಂಜಿ ದೇಶೊಗು ಪೋಯೆ. 2ಫಲತ್ತ ಕಾಲ ಬನ್ನಗ ದ್ರಾಕ್ಷೆತೋಟದ ಬುಲೆತ ಪಾಲ್‌ನ್ ಅಕ್ಲೆಡ್ದ್ ದೆತ್ತೊನೆರೆಗಾದ್ ಒರಿ ಬೇಲೆದಾಯನ್ ಕಡಪುಡಿಯೆ. 3ಆಂಡ ಅಕುಲು ಆ ಬೇಲೆದಾಯನ್ ಪತ್ತ್‌ದ್ ಹಾಕ್‌ದ್ ಕಾಲಿ ಕೈಟ್ ಕಡಪುಡ್ದು ಬುಡಿಯೆರ್. 4ಆ ಧನಿ, ನನೊರಿ ಬೇಲೆದಾಯನ್ ಅಕ್ಲೆನ ಕೈತಲ್‌ ಕಡಪುಡಿಯೆ, ಅಕುಲು ಆಯನ ತರೆಕ್ ಪೆಟ್ಟ್ ಪಾಡ್ದ್ ಅವಮಾನ ಮಲ್ತೆರ್. 5ಐಡ್ದ್ ಬೊಕ್ಕ ನನೊರಿ ಬೇಲೆದಾಯನ್ ಕಡಪುಡ್ನಗ, ಅಕುಲು ಆಯನ್ ಕೆರ್ದ್ ಪಾಡಿಯೆರ್. ನನಲಾ ಮಸ್ತ್ ಜನೊಕುಲೆನ್ ಕಡಪುಡಿಯೆ. ಅಕ್ಲೆಡ್ ಕೆಲೆವೆರೆಗ್ ಪೆಟ್ಟ್ ಪಾಡ್ದ್, ಕೆಲೆವೆರೆನ್ ಕೆರ್ದ್ ಪಾಡಿಯೆರ್. 6ಆಯಗ್ ಕಡಪುಡಿಯೆರೆ ನನ ಒರಿ ಇತ್ತೆ, ಏರ್ ಪಂಡ ಆಯನ ಪ್ರೀತಿದ ಮಗೆನೇ. ‘ಎನ ಮಗಕ್ಕಾಂಡಲಾ ಮರ್ಯಾದಿ ತೋಜಾವೆರೆ ಯಾವು,’ ಅಂದ್‌ದ್ ಧನಿನ ಕಡೆಡ್ದ್ ಆಯನ್ ಅಕ್ಲೆ ಕೈತಲ್‌ ಕಡಪುಡಿಯೆ. 7ಆಂಡ ಆ ಒಕ್ಕೆಲ್‌ದಾಕುಲು, ‘ತೋಟೊಗು ಇಂಬೆನೇ ಹಕ್ಕ್‌ದಾಯೆ, ಬಲೆ ಇಂಬ್ಯನ್ ಕೆರ್ದ್ ಪಾಡ್‌ಗ, ಅಪಗ ಸೊತ್ತು ನಮ್ಮವು ಆಪುಂಡು,’ ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್. 8ಬೊಕ್ಕ ಅಕುಲು ಆಯನ್ ಪತ್ತ್‌ದ್ ಕೆರ್ದ್ ಪಾಡ್ದ್, ದ್ರಾಕ್ಷೆತೋಟೊಡ್ದು ಪಿದಯಿ ದಕ್ಕ್‌ದ್ ಬುಡಿಯೆರ್.

9“ಅಂಚಾಂಡ, ಆ ದ್ರಾಕ್ಷೆತೋಟದ ಧನಿ ಎಂಚಿನ ಮಲ್ಪೆ? ಆಯೆ ಬತ್ತ್‌ದ್ ಆ ಒಕ್ಕೆಲ್‌ದಾಕುಲೆನ್ ನಾಶ ಮಲ್ತ್‌ದ್, ತನ ತೋಟೊನು ಬೇತೆಕ್ಲೆಗ್ ಕೊರುವೆ. 10ಪವಿತ್ರ ಶಾಸ್ತ್ರೊಡು ಬರೆದುಪ್ಪುನೆನ್ ನಿಕುಲು ಒದುದಿಜರಾ? ‘ಇಲ್ಲ್ ಕಟ್ಟುನಾಕುಲು ಬೊಡ್ಚಿಂದ್‌ದ್ ಬುಡ್ತಿ ಕಲ್ಲೇ ಮೂಲೆದ ತರೆಕಲ್ಲಾಂಡ್. 11ಉಂದು ಕರ್ತವಡ್ದೇ ಆಂಡ್. ನಂಕ್ ಅಚ್ಚಿರ ಆದ್ ತೋಜುಂಡು,’” ಅಂದ್‌ದ್ ಯೇಸು ಪಂಡೆ.

12ಅಪಗ ಯೆಹೂದ್ಯೆರೆ ಮುಖ್ಯಸ್ಥೆರ್ ಈ ಉಪಕತೆನ್ ಯೇಸು ತನ್ಕ್‌ಲೆಗಾದೇ ಪಂಡೆ ಅಂದ್‌ದ್ ತೆರಿಯೊಂದು, ಆಯನ್ ಪತ್ತಿಯೆರೆ ಸಮಯ ತೂವೊಂದಿತ್ತೆರ್. ಆಂಡ ಜನೊಕುಲೆಗ್ ಪೋಡಿದ್, ಆಯನ್ ಬುಡ್ದು ಪೋಯೆರ್.

ತೆರಿಗೆ ಕೊರ್ಪಿನ ಸಂಗತಿಡ್ ಚರ್ಚೆ

(ಮತ್ತಾಯೆ 22:15-22; ಲೂಕೆ 20:20-26)

13ಐಡ್ದ್ ಬೊಕ್ಕ, ಅಕುಲು ಯೇಸುನು ಪಾತೆರೊಡು ಪತ್ತೊಡು ಪಂಡ್ದ್, ಪರಿಸಾಯೆರೆಡ್ದ್‌ಲಾ ಹೆರೋದ್ಯೆರೆಡ್ದ್‌ಲಾ ಕೆಲೆವೆರೆನ್ ಆಯನ ಕೈತಲ್‌ ಕಡಪುಡಿಯೆರ್. 14ಮೊಕುಲು ಬತ್ತ್‌ದ್, “ಗುರೂ, ಈ ಸತ್ಯವಂತೆ, ಏರೆಗ್ಲಾ ಪೋಡಿಯಂದೆ, ಜನೊಕುಲೆ ಮೋನೆ ತೂದು ಪಾತೆರುನಾಯೆ ಅತ್ತ್, ದೇವೆರೆ ಮಾರ್ಗೊನು ಸತ್ಯ ಆದ್ ಬೋಧನೆ ಮಲ್ಪುನಾಯೆ ಆದುಲ್ಲ ಅಂದ್‌ದ್ ತೆರಿದ. ಇತ್ತೆ ಪನ್ಲ, ಕೈಸರಗ್ ತೆರಿಗೆ ಕೊರ್ಪಿನವು ಸರಿಯಾ? ತಪ್ಪಾ? ಕೊರೊಡಾ ಬೊಡ್ಚಾ,” ಅಂದ್‌ದ್ ಆಯಡ ಕೇಂಡೆರ್.

15ಆಂಡ ಯೇಸು ಅಕ್ಲೆನ ಕಪಟೊನು ತೆರಿದ್, “ನಿಕುಲು ಎನನ್ ದಾಯೆಗ್ ತಿಕ್ಕಾಯೆರೆ ತೂಪರ್? ಎಂಕ್ ಒಂಜಿ ಪಾವೊಲಿನ್ ಕನತ್‌ದ್ ತೋಜಾಲೆ,” ಪನ್ನಗ 16ಅಕುಲು ಕನತ್‌ದ್ ಆಯೆ ಆ ಪಾವೊಲಿನ್ ದೆತ್ತೊಂದು ಅಕ್ಲೆಡ, “ಐಟಿತ್ತಿ ತರೆಲಾ ಮುದ್ರೆಲಾ ಏರೆನವು?” ಅಂದ್‌ದ್ ಕೇಂಡಿನೆಕ್ಕ್ ಅಕುಲು, “ಕೈಸರನವು,” ಅಂದ್‌ದ್ ಪಂಡೆರ್.

17ಯೇಸು ಐಕ್, “ಕೈಸರನೆನ್ ಕೈಸರಗ್ ಕೊರ್ಲೆ ಬೊಕ್ಕ ದೇವೆರ್‌ನೆನ್ ದೇವೆರೆಗ್ ಕೊರ್ಲೆ,” ಅಂದ್‌ದ್ ಪಂಡೆ. ಅವೆನ್ ಕೇಂಡ್ದ್ ಅಕುಲು ಆಯನ ಸಂಗತಿಡ್ ಅಚ್ಚಿರ ಆಯೆರ್.

ಸೈತಿನ ಏಳ್ ಕಂಡನಿಯಾಡ್ಲು

(ಮತ್ತಾಯೆ 22:23-33; ಲೂಕೆ 20:27-40)

18ಐಡ್ದ್ ಬೊಕ್ಕ ಸದ್ದುಕಾಯೆರ್ ಆಯೆ ಇತ್ತಿನಡೆ ಬತ್ತೆರ್. ಮೊಕುಲು ಸೈತಿನಾಕುಲು ಕುಡೊರ ಲಕ್ಕುನವು ಇಜ್ಜಿ ಪಂಡ್ದ್ ಪನ್ಪಿನಾಕುಲು. ಮೊಕುಲು ಆಯಡ ಒಂಜಿ ಪ್ರಶ್ನೆ ಮಲ್ತಿನಿ ದಾನೆಂದ್ಂಡ, 19“ಗುರೂ, ‘ಪಲಯೆ ಆದಿತ್ತಿನಾಯೆ ಬೊಡೆದಿ ಜೋಕುಲುದಾಂತೆ ಸೈತೆಡ, ಆಲೆನ್ ಆಯನ ಮೆಗ್ಯೆ ಮದ್ಮೆ ಮಲ್ತೊಂದು, ತನ ಪಲಯಗ್ ಸಂತಾನೊನು ಪಡೆಯೊಡು,’ ಅಂದ್‌ದ್ ಮೋಶೆ ಎಂಕ್ಲೆಗ್ ಬರೆದ್ ದೀತೆ ಅತ್ತಾ. 20ಏಳ್‌ ಜನ ಮೆಗ್ಯೆಪಲಯಾಡ್ಲು ಇತ್ತೆರ್. ಸುರುತ್ತಾಯೆ ಬೊಡೆದಿ ಮಲ್ತೊಂದು ಸಂತಾನದಾಂತೆ ಸೈತೆ. 21ರಡ್ಡನೆದಾಯೆಲಾ ಸುರುತ್ತಾಯನ ಬೊಡೆದಿನ್ ಮದ್ಮೆ ಮಲ್ತೊಂದು ಸಂತಾನದಾಂತೆ ಸೈತೆ. ಅಂಚೆನೇ ಮೂಜನೆದಾಯೆಲಾ. 22ಉಂದೇ ರೀತಿ ಏಳ್‌ ಜನಲಾ ಮದ್ಮೆ ಮಲ್ತೊಂದು ಸಂತಾನದಾಂತೆ ಸೈತೆರ್. ಕಡೆಕ್ಕ್ ಆ ಪೊಂಜೊವುಲಾ ಸೈತಲ್. 23ಅಂಚಾಂಡ ಪುನರುತ್ಥಾನೊಡು ಆಲ್ ಏರೆನ ಬೊಡೆದಿ ಆದುಪ್ಪುವಲ್? ಆಲೆನ್ ಏಳ್ ಜನಲಾ ಮದ್ಮೆ ಆದಿತ್ತೆರ್ ಅತ್ತಾ?” ಪಂಡೆರ್.

24ಐಕ್ ಯೇಸು, “ಶಾಸ್ತ್ರ ಆವಡ್, ದೇವೆರೆ ಬಲ ಆವಡ್ ನಿಕ್ಲೆಗ್ ತೆರಿಯಂದಿನೆಡ್ದ್ ತಪ್ಪು ಮಲ್ಪುವರ್. 25ಎಂಚಂದ್ಂಡ ಅಕುಲು ಸೈತಿನಾಕುಲೆಡ್ದ್ ಜೀವಾದ್ ಲಕ್ಕಿ ಬೊಕ್ಕ ಮದ್ಮೆ ಮಲ್ತೊನುಜೆರ್, ಬೊಕ್ಕ ಮದ್ಮೆ ಮಲ್ತ್‌ದ್‌ಲಾ ಕೊರ್ಪುಜೆರ್, ಪರಲೋಕೊಡಿತ್ತಿನ ದೂತೆರೆ ಲೆಕ್ಕ ಉಪ್ಪುವೆರ್. 26ಆಂಡ ಸೈತಿನಾಕುಲು ಜೀವಾದ್ ಲಕ್ಕುವೆರ್ ಪನ್ಪಿ ಸಂಗತಿಡ್ ಯಾನ್ ಪನ್ಪಿನಾಂಡ, ‘ಯಾನ್ ಅಬ್ರಹಾಮುನ ದೇವೆರ್, ಇಸಾಕನ ದೇವೆರ್ ಬೊಕ್ಕ ಯಾಕೋಬುನ ದೇವೆರ್ ಆದುಲ್ಲೆ.’ ದೇವೆರ್ ಮೋಶೆಗ್ ಮುಳ್ಳುದ ಪುದೆಲ್‌ಡ್ದ್ ಪಾತೆರ್‌ದಿನೆನ್, ನಿಕುಲು ಮೋಶೆನ ಗ್ರಂಥೊಡು ಓದುದಿಜರಾ? 27ಆಯೆ ಬದುಕುನಾಕುಲೆಗ್ ದೇವೆರಾದುಲ್ಲೆ, ಸೈತಿದಿನಾಕುಲೆಗ್ ದೇವೆರ್ ಅತ್ತ್. ಅಂಚಾದ್ ನಿಕುಲು ಏತೋ ತತ್ತ್‌ದ್ ಪೋತರ್,” ಅಂದ್‌ದ್ ಪಂಡೆ.

ಮುಖ್ಯವಾಯಿನ ಅಪ್ಪಣೆ

(ಮತ್ತಾಯೆ 22:34-40; ಲೂಕೆ 10:25-28)

28ಶಾಸ್ತ್ರಿಲೆಡ್ ಒರಿ ಆಯನ ತರ್ಕೊನು ಕೇಂಡ್ದ್, ಯೇಸು ಅಕ್ಲೆಗ್ ಸಜ್ಜಿಡ್ ಉತ್ತರ ಕೊರಿಯೆ ಅಂದ್‌ದ್ ತೆರಿದ್ ಕೈತಲ್‌ ಬತ್ತ್‌ದ್, “ಮಾತ ಅಪ್ಪಣೆಲೆಡ್ ಸುರುತ್ತ ಅಪ್ಪಣೆ ಒವು?” ಅಂದ್‌ದ್ ಆಯಡ ಕೇಂಡಿನೆಕ್ಕ್

29-30ಯೇಸು ಅಕ್ಲೆಗ್ ಉತ್ತರ ಕೊರ್ದು, “ಇಸ್ರಾಯೇಲ್ ಜನೊಕುಲೆ ಕೇನ್ಲೆ. ‘ನಮ ದೇವೆರಾಯಿ ಕರ್ತವೆ ಒರಿಯೇ ದೇವೆರ್. ನಿನ ದೇವೆರಾದುಪ್ಪು ಕರ್ತವನ್ ನಿನ ಇಡೀ ಉಡಲ್‌ಡ್ದ್‌ಲಾ ನಿನ ಇಡೀ ಪ್ರಾಣೊಡ್ದುಲಾ ನಿನ ಇಡೀ ಶಕ್ತಿಡ್ದ್‌ಲಾ ನಿನ ಇಡೀ ಬುದ್ಧಿಡ್ದ್‌ಲಾ ಪ್ರೀತಿ ಮಲ್ಪೊಡು,’ ಪನ್ಪಿನವೇ ಸುರುತ್ತ ಅಪ್ಪಣೆ. 31ರಡ್ಡನೆ ಮುಖ್ಯ ಅಪ್ಪಣೆ, ‘ನಿನ ನಿರೆತಾಯನ್ ನಿನಲೆಕ್ಕನೇ ಪ್ರೀತಿ ಮಲ್ಪೊಡು,’ ಉಂದೆಡ್ದ್ ಹೆಚ್ಚಿದ ಅಪ್ಪಣೆ ಬೊಕ್ಕೊಂಜಿ ಇಜ್ಜಿ,” ಅಂದ್‌ದ್ ಉತ್ತರ ಕೊರಿಯೆ.

32ಅಪಗ ಆ ಶಾಸ್ತ್ರಿ, “ಗುರೂ, ಈ ಸರಿಯಾದ್ ಪಂಡ. ದೇವೆರ್ ಒರಿಯೇ, ಆಯೆ ಅತ್ತಂದೆ ಬೊಕ್ಕೊರಿ ದೇವೆರಿಜ್ಜೆ ಅಂದ್‌ದ್ ಈ ಪಂಡಿನವು ಸತ್ಯ. 33ಆಯನ್ ನಿನ ದೇವೆರಾದುಪ್ಪು ಕರ್ತವನ್ ನಿನ ಇಡೀ ಉಡಲ್‌ಡ್ದ್‌ಲಾ ನಿನ ಇಡೀ ಬುದ್ಧಿಡ್ದ್‌ಲಾ ನಿನ ಇಡೀ ಪ್ರಾಣೊಡ್ದುಲಾ ನಿನ ಇಡೀ ಶಕ್ತಿಡ್ದ್‌ಲಾ ಬೊಕ್ಕ ತನನ್ ತಾನ್ ಪ್ರೀತಿ ಮಲ್ಪುಲೆಕ್ಕ ತನ ನಿರೆತಾಯನ್ ಪ್ರೀತಿ ಮಲ್ಪುಲ. ಉಂದು ರಡ್ಡ್‌ಲಾ ಮಾತ ಹೋಮ, ಬಲಿಡ್ದ್‌ಲಾ ಮುಖ್ಯವಾಯಿನವು,” ಅಂದ್‌ದ್ ಪಂಡೆ.

34ಆಯೆ ಬುದ್ಧಿಡ್ ಉತ್ತರ ಕೊರಿನೆನ್ ತೂದು ಯೇಸು ಆಯಗ್, “ಈ ದೇವೆರೆ ರಾಜ್ಯೊಗು ದೂರ ಇಜ್ಜಾ,” ಅಂದ್‌ದ್ ಪಂಡೆ.

ಆನಿಡ್ದಿಂಚಿ ಆಯನ್ ಪ್ರಶ್ನೆ ಮಲ್ಪೆರೆ ಏರೆಗ್ಲಾ ಧೈರ್ಯ ಬತ್ತಿಜಿ.

ಕ್ರಿಸ್ತನ ಸಂಗತಿಡ್ ಪ್ರಶ್ನೆ

(ಮತ್ತಾಯೆ 22:41-46; ಲೂಕೆ 20:41-44)

35ಯೇಸು ದೇವಾಲಯೊಡು ಬೋಧನೆ ಮಲ್ತೊಂದುಪ್ಪುನಗ, ಪ್ರಶ್ನೆ ಮಲ್ತ್‌ದ್, “ಶಾಸ್ತ್ರಿಲು, ಬರೊಡಾಯಿ ಕ್ರಿಸ್ತನ್ ದಾವೀದನ ಮಗೆ ಅಂದ್‌ದ್ ಪನ್ಪೆರತ್ತಾ, ಅವು ಎಂಚ? 36‘ಯಾನ್ ನಿನ ವೈರಿಲೆನ್ ನಿನ ಪಾದಪೀಠ ಮಲ್ತ್‌ದ್ ಪಾಡುನೆಟ್ಟ, ಎನ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂದುಪ್ಪುಲ, ಅಂದ್‌ದ್ ಕರ್ತವೆ ಎನ ಕರ್ತವಡ ಪಂಡೆ.’ ದಾವೀದೆ ಪರಿಶುದ್ಧಾತ್ಮನ ಪ್ರೇರಣೆಡ್ದ್ ಪಂಡೆ, 37ಅಂಚಾನಗ ದಾವೀದೆನೇ ಆಯನ್ ‘ಕರ್ತವ,’ ಅಂದ್‌ದ್ ಲೆಪ್ಪುನಗ, ಆಯೆ ಆಯಗ್ ಮಗೆ ಆಪಿನವು ಎಂಚ?” ಅಂದ್‌ದ್ ಯೇಸು ಅಕ್ಲೆಡ ಕೇಂಡೆ. ಅವುಲು ಇತ್ತಿನ ಮಲ್ಲ ಜನೊಕುಲೆನ ಗುಂಪು ಆಯನ ಪಾತೆರೊನು ಸಂತೋಷೊಡು ಕೇನೊಂದಿತ್ತೆರ್.

ಶಾಸ್ತ್ರಿಲೆ ಬಗೆಟ್ ಎಚ್ಚರಿಕೆ

(ಮತ್ತಾಯೆ 23:1-36; ಲೂಕೆ 20:45-47)

38ಯೇಸು ಬೋಧನೆ ಮಲ್ತೊಂದುಪ್ಪುನಗ, “ಶಾಸ್ತ್ರಿಲೆ ಬಗೆಟ್ ಎಚ್ಚರಿಕೆ ಆದುಪ್ಪುಲೆ. ನೇಲ್ಯ ಅಂಗಿನ್ ಪಾಡೊಂದು ನಡಪುನವು, ಅಂಗಡಿ ಸಾದಿಲೆಡ್ ವಂದನೆಲು, 39ಸಭಾಮಂದಿರೊಡು ಮಲ್ಲಸ್ಥಾನೊಲು, ಲೇಸ್‌ಲೆಡ್ ಸುರುತ್ತ ಪಂತೆ, ಉಂದೆನ್ ಮಾತ ಇಷ್ಟ ಮಲ್ಪುನಾಕುಲು ಆದುಲ್ಲೆರ್. 40ಮೊಕುಲು ಕಂಡನಿದಾಂತಿನಾಕುಲೆನ ಇಲ್ಲ್‌ಲೆನ್ ಸ್ವಾದೀನ ಮಲ್ಪುವೆರ್. ತೋರಿಕೆಗಾದ್ ಉದ್ಧದ ಪ್ರಾರ್ಥನೆನ್ ಮಲ್ಪುವೆರ್, ಇಂಚಿತ್ತಿನಾಕುಲು ಹೆಚ್ಚಿನ ದಂಡನೆಗ್ ಒಳಗಾಪೆರ್,” ಅಂದ್‌ದ್ ಪಂಡೆ.

ಕಂಡನಿದಾಂತಿ ಪೊಂಜೊವುನ ಕಾಣಿಕೆ

(ಲೂಕೆ 21:14)

41ಯೇಸು ದೇವಾಲಯದ ಕಾಣಿಕೆ ಪೆಟ್ಟಿಗೆದ ಎದುರುಡು ಕುಲ್ಲೊಂದು, ಜನೊಕುಲು ಕಾಣಿಕೆ ಪೆಟ್ಟಿಗೆಡ್ ಕಾಸ್ ಪಾಡುನೆನ್ ತೂವೊಂದಿತ್ತೆ. ಐಶ್ವರ್ಯವಂತೆರ್ ಮಸ್ತ್ ಕಾಸ್ ಪಾಡೊಂದಿತ್ತೆರ್. 42ಒಂಜಿ ಬಡವೆದಿ ಕಂಡನಿ ಸೈದಿನಾಲ್ ಬತ್ತ್‌ದ್, ರಡ್ಡ್ ಕಾಸ್ ಅಂದ್ಂಡ ಒಂಜಿ ದುಗ್ಗಾಣಿ ಪಾಡಿಯಲ್. 43ಅಪಗ ಯೇಸು ತನ ಶಿಷ್ಯೆರೆನ್ ಕೈತಲ್‌ ಲೆತ್ತ್‌ದ್ ಅಕ್ಲೆಗ್, “ಕಾಣಿಕೆ ಪೆಟ್ಟಿಗೆಡ್ ಪಾಡಿನಾಕುಲೆಡ್ ಈ ಬಡ ವಿಧವೆ ಮಾತೆರೆಡ್ದ್ ಹೆಚ್ಚ್ ಪಾಡ್ದಲ್ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ. 44ಎಂಚಂದ್ಂಡ ಮಾತೆರ್ ತನ್ಕುಲೆಗ್ ಒರಿದಿನೆಟ್ಟ್ ಪಾಡ್ದೆರ್. ಮೋಲಾಂಡಲಾ ತನ ಬಡತನೊಡ್ಲಾ ತನಡಿತ್ತಿನೆನ್ ಮಾತ ಪಾಡಿಯಲ್. ತನ ಬದ್‌ಕ್‌ನೇ ಕೊರ್ದು ಬುಡಿಯಲ್,” ಅಂದ್‌ದ್ ಪಂಡೆ.

Currently Selected:

ಮಾರ್ಕೆ 12: ತುಳು

Highlight

Copy