ಮಾರ್ಕೆ 11
11
ಯೆರೂಸಲೇಮುಗು ಯೇಸುನ ಅರಸು ಮರ್ಜಿದ ಪ್ರವೇಶ
(ಮತ್ತಾಯೆ 21:1-11; ಲೂಕೆ 19:28-40; ಯೋಹಾನೆ 12:12-19)
1ಅಕುಲು ಯೆರೂಸಲೇಮುಗು ಕೈತಲಾನಗ ಇಪ್ಪೆಗುಡ್ಡೆದ ಕೈತಲಿತ್ತಿ ಬೇತ್ಫಗೆಗ್ಲಾ ಬೇಥಾನ್ಯಗ್ಲಾ ಬನ್ನಗ ಆಯೆ ತನ ಶಿಷ್ಯೆರೆಡ್ ಇರ್ವೆರೆನ್ ಲೆತ್ತ್ದ್, 2“ನಿಕ್ಲೆ ಎದುರುಡುಪ್ಪು ಹಳ್ಳಿಗ್ ಪೋಲೆ. ಐತ ಉಲಯಿ ಪೊಗ್ಗುನಗನೇ ಅಲ್ಪ ಕಟ್ಟ್ದುಪ್ಪು ಒಂಜಿ ಕತ್ತೆದ ಕಿನ್ನಿನ್ ತೂಪರ್; ಈತ್ನೆಟ್ಟ ಐತ ಮಿತ್ತ್ ಏರ್ಲಾ ಕುಲ್ಲುದಿಜೆರ್; ಅವೆನ್ ಗಿರ್ತ್ದ್ ಪತ್ತೊಂದು ಕನಲೆ. 3ಏರಾಂಡಲಾ ನಿಕ್ಲೆನ್, ದಾಯೆ ಗಿರ್ಪುವರ್ ಅಂದ್ದ್ ಕೇಂಡೆರ್ಡ, ಉಂದು ಕರ್ತವಗ್ ಬೋಡಾತ್ಂಡ್, ಆಯೆ ತಡ ಮಲ್ಪಂದೆ ಬೇಗನೆ ಕಡಪುಡ್ದು ಕೊರುವೆ,” ಪಂಡ್ದ್ ಪನ್ಲೆಂದ್ದ್ ಅಕ್ಲೆನ್ ಕಡಪುಡಿಯೆ.
4ಆ ಶಿಷ್ಯೆರ್ಲು ಊರುದುಲಯಿ ಪೋದು ಒಂಜಿ ಕತ್ತೆದ ಕಿನ್ನಿ ಸಾದಿದ ಬಾಕಿಲ್ದ ಕೈತಲೇ ಕಟ್ಟ್ದುಪ್ಪುನೆನ್ ತೂದು ಅವೆನ್ ಗಿರ್ತೆರ್. 5ಅಲ್ಪ ಉಂತುದಿತ್ತಿನಾಕುಲೆಡ್ ಕೆಲೆವೆರ್, “ಈ ಕಿನ್ನಿನ್ ಗಿರ್ತ್ದ್ ದಾದ ಮಲ್ಪುವರ್?” ಅಂದ್ದ್ ಕೇಂಡಿನೆಕ್ಕ್ 6ಯೇಸು ಅಪ್ಪಣೆ ಕೊರಿಲೆಕ್ಕನೇ ಅಕ್ಲೆಗ್ ಪನ್ನಗ ಆ ಜನೊಕುಲು ದೆತ್ತೊಂದು ಪೋವೆರೆ ಬುಡಿಯೆರ್. 7ಶಿಷ್ಯೆರ್ ಆ ಕತ್ತೆದ ಕಿನ್ನಿನ್ ಯೇಸುನ ಕೈತಲ್ ಕನತ್ದ್ ತನ್ಕುಲೆ ಕುಂಟುಲೆನ್ ಐತ ಮಿತ್ತ್ ಪಾಡಿ ಬೊಕ್ಕ ಯೇಸು ಐತ ಮಿತ್ತ್ ಕುಲ್ಲಿಯೆ. 8ಅಪಗ ಕೆಲೆವೆರ್ ತನ್ಕುಲೆ ಕುಂಟುಲೆನ್ ಸಾದಿಡ್ ಬುಡ್ಪಾಯೆರ್, ಬೇತೆ ಕೆಲೆವೆರ್ ತೋಟೊಡ್ದು ಮರತ ಕೊಡಿಕ್ಕ್ಲೆನ್ ಕೊಯ್ದ್ ಕನತ್ದ್ ಪಾಡಿಯೆರ್. 9ಆಯನ ದುಂಬುಡ್ದುಲಾ ಪಿರವುಡ್ದುಲಾ ಪೋವೊಂದಿತ್ತಿನಾಕುಲು ಬೊಬ್ಬೆ ಪಾಡೊಂದು, “ಹೊಸನ್ನಾ! ಕರ್ತವ ಪುದರ್ಡ್ ಬರ್ಪಿನಾಯಗ್ ಆಶೀರ್ವಾದ ಆವಡ್. 10ನಮ ಅಮ್ಮೆ ಆಯಿ ದಾವೀದನ ರಾಜ್ಯ ಬರ್ಪುಂಡು ಐಕ್ ಆಶೀರ್ವಾದ ಆವಡ್. ಮಿತ್ತ್ದ ಲೋಕೊಡು ಹೊಸನ್ನಾ!” ಅಂದ್ದ್ ಬೊಬ್ಬೆ ಪಾಡಿಯೆರ್.
11ಐಡ್ದ್ ಬೊಕ್ಕ ಯೇಸು ಯೆರೂಸಲೇಮುಗು ಸೇರ್ದ್ ದೇವಾಲಯದುಲಯಿ ಪೋದು ಸುತ್ತಲಾ ತೂಯೆ. ಆತ್ನೆಟ್ಟ ಪೊರ್ತು ಕಂತಿನೆಡ್ದ್ ಪದ್ರಾಡ್ ಶಿಷ್ಯೆರೆನ್ ಲೆತ್ತೊಂದು ಬೇಥಾನ್ಯೊಗು ಪಿದಾಡ್ದ್ ಪೋಯೆ.
ಯೇಸು ಅಂಜೂರದ ಮರೊಕು ಶಾಪ ಕೊರ್ಪಿನವು
(ಮತ್ತಾಯೆ 21:18,19)
12ಮನದಾನಿ ಅಕುಲು ಬೇಥಾನ್ಯೊನು ಬುಡ್ದು ಬರೊಂದುಪ್ಪುನಗ ಯೇಸುಗು ಬಡವು ಆಂಡ್. 13ಬೊಕ್ಕ ಇರೆ ಬುಡ್ತಿನ ಒಂಜಿ ಅಂಜೂರದ ಮರೊನು ದೂರೊಡ್ದು ತೂದು, ತನ್ಕ್ ದಾದಾಂಡಲಾ ಪರ್ಂದ್ ತಿಕ್ಕು ಅಂದ್ದ್ ಅಡೆಗ್ ಪೋಯೆ. ಐತ ಕೈತಲ್ ಬನ್ನಗ ಐಟ್ಟ್ ಬಜೀ ಇರೆ ಅತ್ತಂದೆ ಬೇತೆ ದಾಲಾ ತೋಜಿಜಿ. ಅಪಗ ಅಂಜೂರ ಆಪಿನ ಕಾಲ ಆದಿತ್ತಿಜಿ. 14ಅಪಗ ಯೇಸು ಆ ಮರಕ್ಕ್, “ನನ ಮಿತ್ತ್ ಒರಿಲಾ ನಿನಡ ಪರ್ಂದ್ನ್ ಏಪೊಗ್ಲಾ ತಿನಂದಿಲೆಕ್ಕ ಆವಡ್,” ಅಂದ್ದ್ ಪಂಡೆ. ಆಯನ ಶಿಷ್ಯೆರ್ ಅವೆನ್ ಕೇಂಡೆರ್.
ಯೇಸು ದೇವಾಲಯೊಗು ಪೋಪಿನವು
(ಮತ್ತಾಯೆ 21:12-17; ಲೂಕೆ 19:45-48; ಯೋಹಾನೆ 2:13-22)
15ಅಕುಲು ಯೆರೂಸಲೇಮುಗು ಬನ್ನಗ, ಯೇಸು ದೇವಾಲಯೊಗು ಪೋದು, ಅಲ್ಪ ಮಾರುನಾಕುಲೆನ್ಲಾ ದೆತ್ತೊನುನಾಕುಲೆನ್ಲಾ ಗಿಡ್ಪೆರೆ ಸುರು ಮಲ್ತೆ, ಕಾಸ್ ಬದಲಿ ಮಲ್ಪುನಾಕುಲೆನ ಮೇಜಿಲೆನ್ಲಾ ಪುದ ಮಾರುನಾಕುಲೆನ ಮಣೆಕ್ಲೆನ್ಲಾ ಮರತ್ ಪಾಡಿಯೆ. 16ಬೊಕ್ಕ ಒರಿಯನ್ಲಾ ಸಾಮಾನ್ ತುಂಬೊಂದು ದೇವಾಲಯದ ಉಲಯಿ ಪೋವೆರೆ ಬುಡ್ಜೆ. 17ಬೊಕ್ಕ ಆಯೆ ಬೋಧನೆ ಮಲ್ತ್ದ್, “‘ಎನ ಇಲ್ಲ್ ಮಾತ ಜನಾಂಗೊಲೆಗ್ ಪ್ರಾರ್ಥನೆದ ಇಲ್ಲ್ ಆದುಂಡು,’ ಅಂದ್ದ್ ಬರೆತ್ಂಡತ್ತಾ? ಆಂಡ ನಿಕುಲು ಅವೆನ್ ಕಲ್ವೆರೆ ಮಾಟೆ ಮಲ್ತ್ದರ್,” ಅಂದ್ದ್ ಪಂಡೆ.
18ಅವೆನ್ ಪ್ರಧಾನಯಾಜಕೆರ್ಲಾ ಶಾಸ್ತ್ರಿಲುಲಾ ಕೇಂಡ್ದ್ ಆಯನ್ ವಾ ಉಪಾಯೊಡು ಕೆರ್ಕ ಅಂದ್ದ್ ಗಳಿಗೆ ತೂವೊಂದಿತ್ತೆರ್. ಆಂಡ ಮಾತ ಜನೊಕುಲು ಆಯನ ಬೋಧನೆನ್ ಕೇಂಡ್ದ್ ಅಚ್ಚಿರ ಆಯಿನೆಡ್ದ್ ಅಕುಲು ಆಯಗ್ ಪೋಡಿಯೊಂದಿತ್ತೆರ್.
19ಬೈಯ ಆನಗ ಯೇಸು ಆಯನ ಶಿಷ್ಯೆರ್ಲಾ ಪಟ್ಟಣನ್ ಬುಡ್ದು ಪೋಯೆರ್.
ಅಂಜೂರದ ಮರೊಡ್ದು ಪಾಠ
(ಮತ್ತಾಯೆ 21:20-22)
20ಮನದಾನಿ ಅಕುಲು ಬರೊಂದುಪ್ಪುನಗ, ಆ ಅಂಜೂರದ ಮರ ಬೇರ್ಡ್ದೇ ನುಂಗುದು ಪೋದಿತ್ತಿನೆನ್ ತೂಯೆರ್. 21ಯೇಸು ಪಂತಿನ ಪಾತೆರ ಪೇತ್ರಗ್ ನೆನಪಾಂಡ್ ಐಕ್ ಆಯೆ ಯೇಸುಡ, “ತೂಲೆ ಗುರು, ಈ ಶಾಪ ಕೊರಿನ ಅಂಜೂರದ ಮರ ನುಂಗುದು ಪೋಂಡು,” ಪಂಡೆ.
22ಐಕ್ ಯೇಸು ಉತ್ತರ ಕೊರ್ದು ಪಂಡಿನಿ, “ದೇವೆರೆಡ ನಂಬಿಕೆ ಉಪ್ಪಡ್. 23ಯಾನ್ ನಿಕ್ಲೆಗ್ ನಿಜಾದ್ ಪನ್ಪೆ, ಏರಾಂಡಲಾ ಈ ಗುಡ್ಡೆಗ್, ಈ ಲಕ್ಕ್ದ್ ಪೋದು ಕಡಲ್ಡ್ ಬೂರು ಪಂಡ್ದ್ ತನ ಉಡಲ್ಡ್ ಸಂಶಯ ಮಲ್ಪಂದೆ ನಂಬುಂಡ, ಆಯೆ ಪಂಡಿಲೆಕ್ಕ ಆಪುಂಡು. 24ಅವೆಡ್ದಾವರ, ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ, ನಿಕುಲು ಪ್ರಾರ್ಥನೆ ಮಲ್ಪುನಗ ಎಂಚೆಂಚಿನೆನ್ ನಟ್ಟೊನುವರಾ, ಅವು ಮಾತಲಾ ತಿಕ್ಕುಂಡು ಪಂಡ್ದ್ ನಂಬುಲೆ, ಅವು ನಿಕ್ಲೆಗ್ ತಿಕ್ಕುಂಡು. 25ಉಂದತ್ತಂದೆ, ನಿಕುಲು ಉಂತೊಂದು ಪ್ರಾರ್ಥನೆ ಮಲ್ಪುನಗ, ಏರೆಡಾಂಡಲಾ ದಾದಾಂಡಲಾ ತಪ್ಪು ಇತ್ತ್ಂಡ, ಆಯಗ್ ಮಾಪು ಮಲ್ಪುಲೆ. ಮಾಪು ಮಲ್ತ್ಂಡ, ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆ ನಿಕ್ಲೆನ ತಪ್ಪುಲೆನ್ ಮಾಪು ಮಲ್ಪುವೆ,” ಪಂಡೆ. 26#11:26 ಕೆಲವು ಪರ ಗ್ರಂಥೊಲೆಡ್ 26 ವಚನೊನು ಸೇರಾವೆರ್. “ಮಾಪು ಮಲ್ತ್ಜೆಡ, ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆ ನಿಕ್ಲೆನ ತಪ್ಪುಲೆನ್ ಮಾಪು ಮಲ್ಪುಜೆ” ಅಂಚೆನೇ ನಿಕುಲುಲಾ, “ಮಾಪು ಮಲ್ತ್ಜರ್ಡ, ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆ ನಿಕ್ಲೆನ ತಪ್ಪುಲೆನ್ಲಾ ಮಾಪು ಮಲ್ಪುಜೆ”
ಯೇಸುನ ಅಧಿಕಾರೊನು ಪ್ರಶ್ನೆ ಮಲ್ಪುನವು
(ಮತ್ತಾಯೆ 21:23-27; ಲೂಕೆ 20:18)
27ಅಕುಲು ಕುಡ ಯೆರೂಸಲೇಮುಗು ಬತ್ತೆರ್. ಬೊಕ್ಕ ಯೇಸು ದೇವಾಲಯದ ಜಾಲ್ಡ್ ನಡತೊಂದುಪ್ಪುನಗ ಪ್ರಧಾನಯಾಜಕೆರ್ಲಾ ಶಾಸ್ತ್ರಿಲುಲಾ ಹಿರಿಯೆರ್ಲಾ ಆಯ ಕೈತಲ್ ಬತ್ತ್ದ್ 28ಆಯಡ, “ಈ ವಾ ಅಧಿಕಾರೊಡು ಉಂದೆನ್ ಮಾತ ಮಲ್ತೊಂದುಲ್ಲ? ಈ ಅಧಿಕಾರೊನು ನಿಕ್ಕ್ ಏರ್ ಕೊರಿಯೆರ್?” ಅಂದ್ದ್ ಕೇಂಡೆರ್.
29ಐಕ್ ಯೇಸು ಅಕ್ಲೆಗ್, “ಯಾನ್ ನಿಕ್ಲೆಗ್ಲಾ ಒಂಜಿ ಪಾತೆರ ಕೇನ್ವೆ, ಎಂಕ್ ಉತ್ತರ ಪಂಡರ್ಡ ಯಾನ್ಲಾ ವಾ ಅಧಿಕಾರೊಡು ಉಂದೆನ್ ಮಲ್ಪುವೆ ಪನ್ಪಿನೆನ್ ನಿಕ್ಲೆಗ್ ಪನ್ಪೆ. 30ದೀಕ್ಷಾಸ್ನಾನ ಮಲ್ಪಾವುನ ಅಧಿಕಾರ ಯೋಹಾನಗ್ ಪರಲೋಕೊಡ್ದು ಬತ್ತ್ಂಡಾ? ನರಮಾನಿಲೆಡ್ದಾ? ಎಂಕ್ ಉತ್ತರ ಕೊರ್ಲೆ.”
31-32ಉಂದೆನ್ ಕೇಂಡ್ದ್ ತನ್ಕುಲೆ ಉಲಯಿ ಚರ್ಚೆ ಮಲ್ತೆರ್, “‘ಪರಲೋಕೊಡ್ದು ಬೈದ್ಂಡ್,’ ಅಂದ್ದ್ ನಮ ಪಂಡ್ಂಡ, ‘ನಿಕುಲು ಆಯನ್ ದಾಯೆಗ್ ನಂಬುಜರ್,’ ಅಂದ್ದ್ ಪನುವೆ. ‘ನರಮಾನಿಲೆಡ್ದ್ ಬೈದ್ಂಡ್,’ ಅಂದ್ದ್ ಪಂಡ್ಂಡ ದಾನೆ ಆವು?” ಅಂದ್ದ್ ತನ್ಕುಲೆ ಉಲಯಿ ಪಾತೆರೊಂಡೆರ್. ಯೋಹಾನನ್ ಪ್ರವಾದಿ ಅಂದ್ದ್ ಮಾತ ಜನೊಕುಲು ಅನುಮಾನದಾಂತೆ ತೆರಿದಿತ್ತಿನೆಡ್ದ್, ಮೊಕ್ಲೆಗ್ ಜನೊಕುಲೆ ಪೋಡಿಗೆ ಇತ್ತ್ಂಡ್. 33ಇಂಚ ಉಪ್ಪುನಗ ಅಕುಲು, “ಎಂಕ್ಲೆಗ್ ಗೊತ್ತಿಜ್ಜಿ,” ಅಂದ್ದ್ ಯೇಸುಗು ಉತ್ತರ ಕೊರಿಯೆರ್.
ಅಪಗ ಯೇಸು ಅಕ್ಲೆಗ್, “ವಾ ಅಧಿಕಾರೊಡು ಉಂದೆನ್ ಮಾತ ಮಲ್ಪುವೆನಾ ಅವೆನ್ ಯಾನ್ಲಾ ನಿಕ್ಲೆಗ್ ಪನ್ಪುಜಿ,” ಪಂಡೆ
Currently Selected:
ಮಾರ್ಕೆ 11: ತುಳು
Highlight
Share
Copy
Want to have your highlights saved across all your devices? Sign up or sign in
New Life Literature
