ಲೂಕೆ 8

ಪೊಂಜೊವುಲು ಯೇಸುನ ಸೇವೆ ಮಲ್ತಿನವು

1ಐಡ್ದ್ ಬೊಕ್ಕ ಯೇಸು ದೇವೆರೆ ರಾಜ್ಯದ ಸುವಾರ್ತೆನ್ ಊರು ಊರುಲೆಗ್ ಹಳ್ಳಿಲೆಗ್ ಪೋದು ಸಾರಿಯೊಂದಿತ್ತೆ. ಆಯಡೊಪ್ಪ ಪದ್ರಾಡ್ ಜನ ಶಿಷ್ಯೆರ್‌ಲುಲಾ ಇತ್ತೆರ್. 2ದುರಾತ್ಮದ ಕಾಟದ ಸೀಕ್‌ಡ್ದ್ ಗುಣ ಆಯಿ ಕೆಲವು ಪೊಂಜೊವುಲುಲಾ ಇತ್ತೆರ್. ಆ ಪೊಂಜೊವುಲು ಏರ್ ಅಂದ್ಂಡ ಏಳ್ ದೆವ್ವೊಲು ಬುಡ್ದು ಪೋಯಿ ಮಗ್ದಲದ ಮರಿಯ. 3ಹೆರೋದನ ಪಾರುಪತ್ಯಗಾರೆ ಆಯಿ ಕೂಸನ ಬೊಡೆದಿ ಯೋಹನ್ನ, ಸುಸನ್ನ, ಕುಡ ಬೇತೆ ದಿಂಜ ಮಂದಿ ಇತ್ತೆರ್. ಮೊಕುಲು ತನ್ಕುಲೆ ಕರ್ಚಿಡೇ ಯೇಸುನಲಾ ಆಯ ಶಿಷ್ಯೆರೆನಲಾ ಚಾಕ್ರಿ ಮಲ್ತೊಂದಿತ್ತೆರ್.

ಬೆನ್ನಿದಾಯನ ಉಪಕತೆ

(ಮತ್ತಾಯೆ 13:1-9; ಮಾರ್ಕೆ 4:1-9)

4ಜನೊಕುಲು ಗುಂಪುಗುಂಪಾದ್ ಬೇತೆ ಬೇತೆ ಊರುಲೆಡ್ದ್ ಆಯನ ಕೈತಲ್‌ ಬರೊಂದಿತ್ತೆರ್. ಆಯೆ ಅಕ್ಲೆಗ್ ಉಪಕತೆತ್ತ ರೂಪೊಡು ಪಂಡಿನಿ ದಾನೆಂದ್ಂಡ 5“ಬಿತ್ತುನಾಯೆ ಬಿತ್ತ್ ಬಿತ್ತಿಯೆರೆ ಪಿದಾಡಿಯೆ. ಆಯೆ ಬಿತ್ತ್‌ನಗ ಕೆಲವು ಬಿತ್ತುಲು ಸಾದಿದ ಬರಿಟ್ಟ್ ಬೂರ್ದು ದೊಂಕುದು ಪೋಂಡು; ಅವೆನ್ ಬಾನೊಡು ರಾಪಿನ ಪಕ್ಕಿಲು ತಿಂದ್‌ದ್ ಬುಡಿಯ. 6ಕೆಲವು ಬಿತ್ತ್ ಪಾದೆದ ಮಿತ್ತ್ ಬೂರ್‌ಂಡ್; ಅವು ಮುಂಗೆ ಬತ್ತ್‌ದ್ ನೀರ್‌ದ ಪಸೆದಾಂತೆ ನುಂಗುದು ಪೋಂಡು. 7ಬೊಕ್ಕ ಕೆಲವು ಬಿತ್ತ್ ಮುಳ್ಳುದ ಪುದೆಕ್ಲೆ ನಡುಟು ಬೂರ್‌ಂಡ್; ಐತ ಒಟ್ಟುಗು ಮುಳ್ಳುಗಿಡೊಕ್ಲು ಬುಲೆದ್ ಅವೆನ್ ದೆಂಗಾಂಡ್. 8ನನ ಕೆಲವು ಬಿತ್ತ್ ಎಡ್ಡೆ ಭೂಮಿದ ಮಿತ್ತ್ ಬೂರ್ದು ಅವು ಕೊಡಿದ್ ನೂದೆದಾತ್ ಫಲ ಕೊರ್ಯ.”

ಈ ಪಾತೆರೊಲೆನ್ ಪಂಡ್ದ್ ಆಯೆ, “ಕೇನಿಯೆರೆ ಕೆಬಿ ಇತ್ತಿನಾಯೆ ಕೇನಡ್,” ಜೋರ್‌ಡ್ ಪಂಡೆ.

ಬೆನ್ನಿದಾಯನ ಉಪಕತೆತ್ತ ಅರ್ಥ ಪನ್ಪಿನವು

(ಮತ್ತಾಯೆ 13:10-17; ಮಾರ್ಕೆ 4:10-12)

9ಆಯನ ಶಿಷ್ಯೆರ್ ಈ ಉಪಕತೆತ್ತ ಅರ್ಥ ದಾದವು? ಅಂದ್‌ದ್ ಕೇನ್ನಗ 10“ಆಯೆ ದೇವೆರೆ ರಾಜ್ಯದ ಗುಟ್ಟುಲೆನ್ ತೆರಿಯುನ ವರ ನಿಕ್ಲೆಗ್ ಕೊರ್ತುಂಡು. ಒರಿದಿನಾಕುಲೆಗ್ ಕಣ್ಣ್ ಇತ್ತ್ಂಡಲಾ ತೋಜಂದಿಲೆಕ್ಕ, ಕೆಬಿ ಇತ್ತ್ಂಡಲಾ ಕೇನಂದಿಲೆಕ್ಕ, ಉಪಕತೆತ್ತ ರೂಪೊಡು ಕೊರ್ತುಂಡು.

ಉಪಕತೆತ್ತ ಅರ್ಥ ತೆರಿಪಾವುನವು

11“ಈ ಉಪಕತೆತ್ತ ಅರ್ಥ ದಾನೆಂದ್ಂಡ, ಆ ಬಿತ್ತ್ ಪಂಡ್ಂಡ ದೇವೆರೆ ಪಾತೆರ. 12ಕೆಲೆವೆರ್ ಪಾತೆರೊನು ಕೇಂಡಿ ಕೂಡ್ಲೆ ಅಕುಲು ನಂಬುದು ರಕ್ಷಣೆ ಹೊಂದಿಯೆರೆ ಬಲ್ಲಿ ಅಂದ್‌ದ್ ಸೈತಾನೆ ಬತ್ತ್‌ದ್ ಪಾತೆರೊನು ಅಕ್ಲೆನ ಉಡಲ್‌ಡ್ದ್ ದೆತ್ತ್‌ದ್ ಬುಡ್ಪೆ. ಮೊಕುಲೇ ಸಾದಿದ ಬರಿಟ್ಟ್ ಬೂರ್ದಿತ್ತಿ ಬಿತ್ತುಲು ಆದುಪ್ಪುವೆರ್. 13ಕೆಲೆವೆರ್ ಪಾತೆರೊನು ಕೇಂಡಿನಪಗನೇ ಸಂತೋಷೊಡು ಅವೆನ್ ಸ್ವೀಕಾರ ಮಲ್ಪುವೆರ್; ಮೊಕ್ಲೆಗ್ ಬೇರ್ ಇಜ್ಜಂದಿನೆಡ್ದ್ ಒಂತೆ ಕಾಲ ಮಾತ್ರ ನಂಬೊಂದಿತ್ತ್‌ದ್ ಶೋಧನೆದ ಕಾಲೊಡು ಬೂರ್ದು ಪೋಪೆರ್; ಮೊಕುಲೇ ಪಾದೆ ಜಾಗ್‌ಡ್ ಬೂರಿನಾಕುಲು. 14ಬೇತೆ ಕೆಲೆವೆರ್ ಪಾತೆರೊನು ಕೇಂಡಿ ಬೊಕ್ಕ ಈ ಜೀವಮಾನೊಡು ಬರ್ಪಿ ಚಿಂತೆ ಐಶ್ವರ್ಯದ ಸುಖ, ಬೋಗೊಡ್ದು ಮುರ್ಕುದು ಫಲೊನು ಬುಲೆಪಾವುಜೆರ್; ಮೊಕುಲೇ ಮುಳ್ಳು ಗಿಡೊಕ್ಲೆಡ್ ಬಿತ್ತ್ ಬೂರಿ ನೆಲ ಆದುಪ್ಪುವೆರ್. 15ಬೊಕ್ಕ ಕೆಲೆವೆರ್ ಪಾತೆರೊನು ಕೇಂಡ್ದ್ ಸಜ್ಜಿಡ್ ತನ್ಕುಲೆ ಉಡಲ್‌ಡ್ ದೀವೊಂದು ತಾಳ್ಮೆಡ್ ಫಲೊನು ಕೊರ್ಪೆರ್; ಮೊಕುಲೇ ಬಿತ್ತ್ ಬೂರ್ದಿನ ಎಡ್ಡೆ ನೆಲ ಆದುಲ್ಲೆರ್.”

ಬಾಜನದ ಉಲಯಿ ತುಡರ್

(ಮಾರ್ಕೆ 4:21-25)

16“ಉಂದತ್ತಂದೆ ಏರ್ಲಾ ತುಡರ್‌ನ್ ಪೊತ್ತಾದ್ ಬಾಜನೊಡು ಮುಚ್ಚುಜೆರ್, ಇಜ್ಜಿಂಡ ಮಂಚವುದ ಅಡಿಟ್ಟ್‌ಲಾ ದೀಪುಜೆರ್; ಅವೆನ್ ಇಲ್ಲದುಲಯಿ ಬರ್ಪಿನಾಕುಲೆಗ್ ಬೊಲ್ಪು ತೋಜುಲೆಕ್ಕ ದೀಪಕಂಬದ ಮಿತ್ತ್ ದೀಪೆರತ್ತಾ. 17ಬೊಲ್ಪುಗು ಬರಂದಿನ ವಾ ಗುಟ್ಟುಲಾ ಇಜ್ಜಿ. ಬೊಕ್ಕ ಗೊತ್ತಾವಂದೆ ಬೈಲ್‌ಗ್ ಬರಂದಿನ ಒಂಜಿ ಗುಟ್ಟುಲಾ ಇಜ್ಜಿ.

18“ಅವೆಡ್ದಾವರ ನಿಕುಲು ಎಂಚ ಕೆಬಿ ಕೊರೊಡು ಅಂದ್‌ದ್ ತೆರಿಯೊನ್ಲೆ; ದಾಯೆ ಪಂಡ ಇತ್ತಿನಾಯಗ್ ದೇವೆರ್ ಹೆಚ್ಚಾದ್ ಕೊರುವೆ, ಇಜ್ಜಂದಿನಾಯಡ ಆಯೆ ತನ್ನವು ಅಂದ್‌ದ್ ಎನ್ನಿನೆನ್ಲಾ ದೆತ್ತ್‌ದ್ ಬುಡ್ಪುಂಡು,” ಅಂದ್‌ದ್ ಪಂಡೆ.

ಯೇಸುನ ಅಪ್ಪೆಲಾ ಮೆಗ್ಯಾಡ್ಲುಲಾ

(ಮತ್ತಾಯೆ 12:46-50; ಮಾರ್ಕೆ 3:31-35)

19ಯೇಸುನ ಅಪ್ಪೆಲಾ ಮೆಗ್ಯಾಡ್ಲುಲಾ ಆಯೆ ಇತ್ತಿನಡೆಗ್ ಬತ್ತೆರ್; ಆಂಡ ಜನೊಕುಲೆ ಗುಂಪುಡ್ದು ಆಯನಡೆ ಪೋಯೆರೆ ಆಯಿಜಿ. 20ಒರಿ ಆಯಗ್, “ನಿನ ಅಪ್ಪೆಲಾ ನಿನ ಮೆಗ್ಯಾಡ್ಲುಲಾ ನಿನನ್ ತೂವೆರೆ ಬೈದೆರ್,” ಅಂದ್‌ದ್ ಪನ್ನಗ 21ಆಯೆ ಅಕ್ಲೆಗ್, “ಏರ್ ದೇವೆರೆ ಪಾತೆರೊನು ಕೇಂಡ್ದ್ ಐತ ಲೆಕ್ಕನೆ ನಡಪುವೆರಾ, ಅಕುಲೇ ಎನ ಅಪ್ಪೆಲಾ ಎನ ಮೆಗ್ಯಾಡ್ಲುಲಾ,” ಅಂದ್‌ದ್ ಉತ್ತರ ಕೊರಿಯೆ.

ಯೇಸು ಬಿರುಗಾಳಿನ್ ಉಂತಾಯಿನವು

(ಮತ್ತಾಯೆ 8:23-27; ಮಾರ್ಕೆ 4:35-41)

22ಒಂಜಾನೊಂಜಿ ದಿನೊಟು ಯೇಸು ತನ ಶಿಷ್ಯೆರೆ ಒಟ್ಟುಗು ಒಂಜಿ ಓಡೊಗು ಮಿತ್ತಾರ್ದ್ ತುದೆತ ಆಪೆದ ಬರಿಕ್ಕ್ ಪೋಯಿ ಅಂದ್‌ದ್ ಪನ್ನಗ, “ಅಕುಲು ಓಡೊನು ನೀರ್‌ದುಲಯಿ ನೂಕುದು ಪಿದಾಡಿಯೆರ್.” 23ಅಕುಲು ಪೋವೊಂದುಪ್ಪುನಗ ಆಯಗ್ ನಿದ್ರೆ ಬತ್ತ್ಂಡ್; ಅಪಗ ಬಿರುಗಾಳಿ ಲಕ್ಕ್‌ದ್ ಓಡದುಲಯಿ ನೀರ್ ದಿಂಜಿದ್ ಅಕುಲು ಅಪತ್ತ್‌ಡ್ ತಿಕ್ಕ್‌ದ್ ಬೂರಿಯೆರ್. 24ಇಂಚ ಉಪ್ಪುನಗ ಅಕುಲು ಯೇಸುನು ಮೆನ್ತ್‌ದ್, “ಗುರೂ, ಗುರೂ, ಸೈಯೊಂದುಲ್ಲ,” ಅಂದ್‌ದ್ ಲಕ್ಕಾಯೆರ್. ಅಪಗ ಆಯೆ ಲಕ್ಕ್‌ದ್ ಗಾಳಿನ್ಲಾ ಉರ್ಕು ನೀರ್‌ನ್ಲಾ ದಟ್ಟಿಯೆ. ದಟ್ಟಿನಗನೆ ಅಬ್ಬರ ಉಂತುದು ಶಾಂತ ಆಂಡ್. 25ಬೊಕ್ಕ ಆಯೆ ಅಕ್ಲೆಡ, “ನಿಕ್ಲೆ ನಂಬಿಕೆ ಓಲುಂಡು?” ಅಂದ್‌ದ್ ಕೇಂಡೆ. ಅಕುಲು ಪೋಡಿದ್, “ಉಂಬೆ ಏರಾದುಪ್ಪೆ? ಗಾಳಿಲಾ ನೀರ್‌ಲಾ ಅಪ್ಪಣೆ ಕೊರ್ನಗ ಅವು ಆಯೆ ಪಂಡಿ ಪಾತೆರೊನು ಕೇನುಂಡತ್ತಾ,” ಅಂದ್‌ದ್ ಒರಿ ಒರಿಯಗ್ ಪಾತೆರೊಂದು ಅಚ್ಚಿರ ಆಯೆರ್.

ದೆವ್ವ ಪತ್ತ್‌ದಿನಾಯನ್ ಗುಣ ಮಲ್ಪುನವು

(ಮತ್ತಾಯೆ 8:28-34; ಮಾರ್ಕೆ 5:1-20)

26ಬೊಕ್ಕ ಅಕುಲು ಗಲಿಲಾಯೊಗು ಎದುರುಡುಪ್ಪು ಗೆರಸೇನೆರೆ ಸೀಮೆಗ್ ಮುಟ್ಟಿಯೆರ್. 27ಆಯೆ ಕರೆಕ್ ಜಪ್ಪುನಗನೇ ಆ ಊರುದ ಒರಿ ನರಮಾನಿ ಯೇಸುನ ಎದುರು ಬತ್ತೆ. ಆಯಗ್ ಮಸ್ತ್ ಸಮಯೊಡ್ದಿಂಚಿ ದೆವ್ವ ಪತ್ತ್‌ದಿತ್ತ್‌ಂಡ್. ಆಯೆ ಕುಂಟುನು ಪಾಡೊನಂದೆ ವಾ ಇಲ್ಲ್‌ಡ್ಲಾ ಉಪ್ಪಂದೆ ಸ್ಮಶಾನದ ಮಾಟೆಡೇ ಇತ್ತೆ. 28ಆಯೆ ಯೇಸುನು ತೂಯಿ ಕೂಡ್ಲೆ ಅರಬಾಯಿ ದೀದ್ ಆಯನ ಎದುರು ಅಡ್ಡಬೂರ್ದು ಮಲ್ಲ ಸ್ವರೊಟ್ಟು, “ಯೇಸೋ, ಪರಾತ್ಪರೆ ಆದುಪ್ಪು ದೇವೆರೆ ಮಗಾ, ಎನ ಸುದ್ಧಿ ನಿಕ್ಕ್ ದಾಯೆಗ್? ಎಂಕ್ ಭಂಗ ಕೊರೊಡ್ಚಿ,” ಅಂದ್‌ದ್ ನಿನಡ ನಟ್ಟೊನ್ವೆ ಪಂಡೆ. 29ದಾಯೆಗಂದ್ಂಡ ಈ ನರಮಾನಿನ್ ಬುಡ್ದು ಪೋಲ ಅಂದ್‌ದ್ ಆಯೆ ಆ ದೆವ್ವೊಲೆಗ್ ಅಪ್ಪಣೆ ಕೊರ್ದಿತ್ತೆ. ಅವು ಮಸ್ತ್ ಸಮಯೊಡ್ದಿಂಚಿ ಆಯನ್ ಪತ್ತ್‌ದಿತ್ತ್‌ಂಡ್. ಉಂದತ್ತಂದೆ ಆಯನ ಕೈಕಾರ್‌ಗ್ ಸರಪೊಳಿಡ್ ಕಟ್ಟ್‌ದ್ ದೀದ್ ಕಾತ್ಂಡಲಾ ಅವೆನ್ ಕಡ್ತ್ ಪಾಡೊಂದಿತ್ತೆ. ಬೊಕ್ಕ ಆ ಭೂತೊಲು ಆಯನ್ ಕಾಡ್‌ಗ್ ಗಿಡ್ತೊಂದಿತ್ತ್‌ಂಡ್. 30ಯೇಸು ಆಯಡ, “ನಿನ ಪುದರ್ ಎಂಚಿನ?” ಪಂಡ್ದ್ ಕೇಂಡಿನೆಕ್ಕ್ ಆಯೆ, “ಎನ ಪುದರ್ ದಂಡ್,” ಪಂಡೆ. ದಾಯೆಗಂದ್ಂಡ, ಮಸ್ತ್ ದೆವ್ವೊಲು ಆಯನ ಉಲಯಿ ಪೊಗ್ಗುದಿತ್ತ್‌ಂಡ್. 31ಪಾತಾಳೊಗು ಪೋಯೆರೆ ಎಂಕ್ಲೆಗ್ ಅಪ್ಪಣೆ ಕೊರಡ ಅಂದ್‌ದ್ ಆಯಡ ನಟ್ಟೊಂಡ. 32ಅಲ್ಪ ಗುಡ್ಡೆಡ್ ಮಲ್ಲ ಪಂಜಿದ ಒಂಜಿ ಪುಂಡು ಮೇಯೊಂದಿತ್ತ್‌ಂಡ್. ಆ ದೆವ್ವೊಲು ಆ ಪಂಜಿಲೆ ಉಲಯಿ ಸೇರೊನಿಯೆರೆ ಎಂಕ್ಲೆಗ್ ಅಪ್ಪಣೆ ಕೊರು ಅಂದ್‌ದ್ ಆಯಡ ನಟ್ಟೊಂಡ; ಅಪಗ ಯೇಸು ಐಕ್ಲೆಗ್ ಅಪ್ಪಣೆ ಕೊರಿಯೆ. 33ಅಪಗ ಆ ದೆವ್ವೊಲು ನರಮಾನಿನ ಉಲಯಿಡ್ದ್ ಪಿದಯಿ ಬತ್ತ್‌ದ್ ಪಂಜಿಲೆ ಉಲಯಿ ಪೊಗ್ಗಿಯ; ಪಂಜಿಲು ಪಾರ್ದ್ ಸಂದ್ ಜಾಗ್‌ಲೆಡ್ದ್ ಪೋದು ಕೆರೆತ ಉಲಯಿ ಬೂರ್ದು ದಮ್ಮು ಕಟ್ಟ್‌ದ್ ಸೈತ. 34ಮೇಪಾವುನಾಕುಲು ನಡತಿನೆನ್ ತೂದು ಪಾರ್‌ಪೋದು ಊರುಡ್ಲಾ ಹಳ್ಳಿಲೆಡ್ಲಾ ತೆರಿಪಾಯೆರ್. 35ಜನೊಕುಲು ನಡತಿ ಸಂಗತಿಲೆನ್ ತೂವೆರೆ ಪಿದಾಡ್ದ್ ಯೇಸು ಇತ್ತಿನಡೆಗ್ ಬತ್ತಿನಪಗ ದೆವ್ವೊಲು ಬುಡ್ದು ಪೋತಿ ಆ ನರಮಾನಿ ಕುಂಟು ಪಾಡ್ದ್ ಸ್ವಸ್ಥ ಬುದ್ಧಿಡ್ ಯೇಸುನ ಕಾರ ಮುದೆಲ್‌ಡ್ ಕುಲ್ಲುದುಪ್ಪುನೆನ್ ತೂದು ಪೋಡಿಯೆರ್. 36ನಡತಿ ಸಂಗತಿಲೆನ್ ತೂಯಿನಾಕುಲು ಆ ದೆವ್ವ ಪತ್ತ್‌ದಿನಾಯಗ್ ಎಂಚ ಗುಣ ಆಂಡ್ ಪಂಡ್ದ್ ಅವೆನ್ ಅಕ್ಲೆಗ್ ತೆರಿಪಾನಗ 37ಗೆರಸೇನೆರೆ ಸುತ್ತ ಉಪ್ಪು ಸೀಮೆದಾಕುಲೆಗ್ ಮಾತೆರೆಗ್ ಪೋಡಿಗೆ ಉಂಡಾಯಿನೆಡ್ದ್ ಅಕುಲು ಯೇಸುಡ ಈ ಎಂಕ್ಲೆನ್ ಬುಡ್ದು ಪೋವೊಡು, ಅಂದ್‌ದ್ ನಟ್ಟೊಂಡೆರ್. ಆಯೆ ಓಡೊನು ಮಿತ್ತಾದ್ ಪಿರ ಬತ್ತೆ. 38ಪಿದಾಡ್ನಗ ದೆವ್ವೊಡ್ದು ಬುಡುಗಡೆ ಆಯಿ ಆ ನರಮಾನಿ, “ಯಾನ್ಲಾ ನಿನ ಒಟ್ಟುಗು ಬರ್ಪೆ,” ಪಂಡ್ದ್ ನಟ್ಟೊನುನಗ 39ಆಯೆ, “ಈ ನಿನ ಇಲ್ಲಗ್ ಪಿರ ಪೋದು ದೇವೆರ್ ನಿಕ್ಕ್ ಎಂಚೆಂಚಿನ ಉಪಕಾರೊನು ಮಲ್ತ್‌ದೆ, ಅವೆನ್ ಮಾತೆನ್ ಬುಡ್ಪಾದ್ ಪನ್ಲ,” ಅಂದ್‌ದ್ ಆಯನ್ ಕಡಪುಡಿಯೆ. ಆಯೆ ಊರುಗು ಪೋದು ಯೇಸು ತನ್ಕ್ ಮಲ್ತಿನ ಉಪಕಾರೊನು ಊರಿಡೀ ಸಾರಿಯೆ.

ಯಾಯಿರೆನ ಮಗಲ್ ಬೊಕ್ಕ ಸೀಕ್‌ದ ಪೊಂಜೊವು

(ಮತ್ತಾಯೆ 9:18-26; ಮಾರ್ಕೆ 5:21-43)

40ಯೇಸು ಪಿರ ಬನ್ನಗ ಕಾತೊಂದಿತ್ತಿ ಜನೊಕುಲು ಮಾತೆರ್ ಆಯನ್ ಸಂತೊಸೊಡು ಎದುಕೊಂಡೆರ್. 41-42ಅಪಗ ಸಭಾಮಂದಿರದ ಅಧಿಕಾರಿ ಆದಿತ್ತಿ ಯಾಯಿರೆ ಪನ್ಪಿ ಒರಿ ನರಮಾನಿ ಬತ್ತ್‌ದ್ ಯೇಸುನ ಕಾರ್‌ಗ್ ಅಡ್ಡಬೂರ್ಯೆ. ಹೆಚ್ಚಿ ಕಮ್ಮಿ ಪದ್ರಾಡ್ ವರ್ಸದ ಆಯನ ಒರ್ತಿಯೆ ಮಗಲ್ ಸೈಪಿನ ಪರಿಸ್ಥಿತಿಡ್ ಇತ್ತಲ್. ಯೇಸುನು ತನ ಇಲ್ಲಗ್ ಬರೊಡು ಅಂದ್‌ದ್ ನಟ್ಟೊಂಡೆ. ಆಯೆ ಪೋವೊಂದುಪ್ಪುನಗ ಜನೊಕುಲು ಗುಂಪುಗುಂಪಾದ್ ಆಯನ್ ನೂಕೊಂದಿತ್ತೆರ್. 43ಅಪಗ ಪದ್ರಾಡ್ ವರ್ಸೊಡ್ದಿಂಚಿ ನೆತ್ತೆರ್ ತಮೆಲು ಸೀಕ್‌ಡಿತ್ತಿ ಒಂಜಿ ಪೊಂಜೊವು ಬತ್ತಲ್. ಆಲ್ ವೈದ್ಯೆರೆ ಕೈತಲ್ ಪೋದು ತನ ಮಾತ ಬದ್‌ಕ್‌ನ್ ಕರ್ಚಿ ಮಲ್ತ್‌ದ್ ವಾ ಮರ್ದ್‌ಡ್ಲಾ ಗುಣ ಆವಂದೆ ಇತ್ತಲ್. 44ಆಲ್ ಪಿರವುಡು ಬತ್ತ್‌ದ್ ಆಯನ ಕುಂಟುದ ಗೊಂಡೆನ್ ಮುಟ್ಟಿಯಲ್, ಅಪಗನೆ ಆಲೆನ ನೆತ್ತೆರ್ ಪೋಪಿನವು ಉಂತುಂಡು. 45ಆಂಡ ಯೇಸು, “ಎನನ್ ಮುಟ್ಟಿನಾಯೆ ಏರ್?” ಅಂದ್‌ದ್ ಕೇನ್ನಗ ಮಾತೆರ್ಲಾ ಯಾನತ್ತ್ ಯಾನತ್ತ್ ಪನ್ನಗ ಪೇತ್ರೆ, “ಗುರೂ, ಏತೋ ಜನೊಕುಲು ನಿನನ್ ನೂಕೊಂದು ಮೆಯಿತ ಮಿತ್ತ್ ಬೂರೊಂದುಲ್ಲೆರತ್ತಾ?” ಪಂಡೆ. 46ಆಂಡ ಯೇಸು, “ಏರಾ ಒರಿ ಎನನ್ ಮುಟ್ಟ್‌ದೆರ್; ಎನಡ್ದ್ ಬಲ ಪಿದಾಡುನ ಎಂಕ್ ಗೊತ್ತಾಂಡ್,” ಪನ್ನಗ 47ಆ ಪೊಂಜೊವು ತಾನ್ ಮದೆ ಆತಿನಾಲ್ ಅತ್ತ್ ಅಂದ್‌ದ್ ತೆರಿದ್ ನಡುಗೊಂದು ಎದುರು ಬತ್ತ್‌ದ್ ಆಯಗ್ ಅಡ್ಡಬೂರ್ದು ತಾನ್ ಆಯನ್ ಮುಟ್ಟಿನ ಕಾರಣೊನ್ಲಾ ಮುಟ್ಟಿನಪಗನೇ ಗುಣ ಆಯಿನ ಸೀಕ್‌ನ್ಲಾ ಮಾತ ಜನೊಕುಲೆ ಎದುರು ತೆರಿಪಾಯಲ್. 48ಯೇಸು ಆಲೆಗ್, “ಮಗಲೇ, ನಿನ ನಂಬಿಕೆನೇ ನಿನನ್ ಗುಣ ಮಲ್ತ್ಂಡ್. ಸಮಾಧಾನೊಡು ಪೋಲ,” ಅಂದ್‌ದ್ ಪಂಡೆ.

49ಆಯೆ ನನಲಾ ಪಾತೆರೊಂದುಪ್ಪುನಗ ಸಭಾಮಂದಿರದ ಅಧಿಕಾರಿನ ಕಡೆತಾಯೆ ಒರಿ ಬತ್ತ್‌ದ್, “ನಿನ ಮಗಲ್ ಸೈತಲ್, ಗುರುಕು ತೊಂದರೆ ಕೊರೊಡ್ಚಿ,” ಪಂಡೆ. 50ಆಂಡ ಯೇಸು ಅವೆನ್ ಕೇಂಡ್ದ್ ಆಯಡ, “ಪೋಡ್ಯಡ, ನಂಬಿಕೆ ಮಾತ್ರ ಉಪ್ಪಡ್, ಆಲ್ ಬದುಕುವಲ್,” ಅಂದ್‌ದ್ ಉತ್ತರ ಕೊರಿಯೆ. 51ಐಡ್ದ್ ಬೊಕ್ಕ ಆ ಇಲ್ಲಗ್ ಪೋದು ಪೇತ್ರೆ, ಯೋಹಾನೆ, ಯಾಕೋಬು, ಆ ಪೊಣ್ಣನ ಅಪ್ಪೆಅಮ್ಮನ್ ಈತ್ ಮಂದಿಲೆನ್ ಬುಡ್ದು ಬೇತೆ ಏರೆನ್ಲಾ ತನ ಒಟ್ಟುಗು ಉಲಯಿ ಬರಿಯೆರೆ ಬುಡ್ಜೆ. 52ಮಾತೆರ್ಲಾ ಬುಲ್ತೊಂದು ಆಲೆಗಾದ್ ತಿಗಲೆ ಬೊಟ್ಟೊಂದು ಇತ್ತೆರ್. ಅಪಗ ಯೇಸು ಅಕ್ಲೆಡ, “ಬುಲ್ಪಡೆ ಆಲ್ ಸೈದಿಜಲ್, ನಿದ್ರೆ ಮಲ್ತೊಂದು ಉಲ್ಲಲ್,” ಅಂದ್‌ದ್ ಪಂಡೆ. 53ಆಲ್ ಸೈದಿತ್ತಲ್ ಅಂದ್‌ದ್ ತೆರಿದಿನಾಕುಲು ಆಯಗ್ ಗೇಲಿ ಮಲ್ತೆರ್. 54ಆಂಡ ಆಯೆ ಆಲೆ ಕೈ ಪತ್ತ್‌ದ್, “ಅಮ್ಮಣೀ, ಲಕ್ಕ್‌ಲ,” ಅಂದ್‌ದ್ ಲೆತ್ತೆ. 55ಆಲೆನ ಪ್ರಾಣ ಪಿರ ಬತ್ತ್‌ದ್ ಅಪಗನೆ ಆಲ್ ಲಕ್ಕಿಯಲ್. ಬೊಕ್ಕ ಯೇಸು ಆಲೆಗ್ ವಣಸ್ ಮಲ್ಪಾಲೆ ಅಂದ್‌ದ್ ಅಪ್ಪಣೆ ಕೊರಿಯೆ. 56ಆಲೆನ ಅಪ್ಪೆಅಮ್ಮೆ ಅಚ್ಚಿರ ಆಯೆರ್. ಆಯೆ ಈ ಸಂಗತಿನ್ ಏರೆಗ್ಲಾ ತೆರಿಪಾವಡೆ ಅಂದ್‌ದ್ ಅಪ್ಪಣೆ ಕೊರಿಯೆ.

Currently Selected:

ಲೂಕೆ 8: ತುಳು

Highlight

Copy