ಲೂಕೆ 6

ವಿಶ್ರಾಂತಿ ದಿನತ ಸಂಗತಿಡ್ ಪ್ರಶ್ನೆ

(ಮತ್ತಾಯೆ 12:1-8; ಮಾರ್ಕೆ 2:23-28)

1ಒಂಜಾನೊಂಜಿ ಸಬ್ಬತ್‌ದಿನತಾನಿ ಯೇಸು ಬುಲೆತ ಕಂಡೊಲೆನ್ ದಾಂಟ್‌ದ್ ಪೋವೊಂದುಪ್ಪುನಗ ಆಯನ ಶಿಷ್ಯೆರ್ ಕೊರಲ್ ರುಂಬುದು ಕೈಟ್ ಪೊಜೆಂಕ್‌ದ್ ತಿನೊಂದಿತ್ತೆರ್. 2ಉಂದೆನ್ ತೂಯಿ ಪರಿಸಾಯೆರೆಡ್ ಕೆಲೆವೆರ್, “ಸಬ್ಬತ್‌ದಿನೊಟು ನ್ಯಾಯಕಟ್ಟ್‌ದ ಪ್ರಕಾರ ಮಲ್ಪಂದಿ ಬೇಲೆನ್ ನಿಕುಲು ದಾಯೆಗ್ ಮಲ್ಪುವರ್?” ಅಂದ್‌ದ್ ಕೇಂಡೆರ್. 3ಯೇಸು ಅಕ್ಲೆಗ್, “ದಾವೀದೆ ತಾನ್‌ಲಾ ತನಡೊಪ್ಪ ಇತ್ತಿನಾಕುಲುಲಾ ಬಡವು ಆಯಿನಪಗ ದಾದ ಮಲ್ತೆರ್ ಪನ್ಪಿನೆನ್ ನಿಕುಲು ಓದುದಿಜರಾ? 4ಆಯೆ ದೇವೆರೆ ಆಲಯದ ಉಲಯಿ ಪೋದು ನ್ಯಾಯಕಟ್ಟ್‌ದ ಪ್ರಕಾರ ಯಾಜಕೆರ್ ಮಾತ್ರ ಅತ್ತಂದೆ ಬೇತೆ ಏರ್ಲಾ ತಿನಂದಿನ ನೈವೇದ್ಯದ ರೊಟ್ಟಿನ್ ದೆತ್ತೊಂದು ತಾನ್ ತಿಂದ್‌ದ್ ತನಡೊಪ್ಪ ಇತ್ತಿನಾಕುಲೆಗ್ಲಾ ಕೊರಿಯೆ ಅತ್ತಾ?” ಅಂದ್‌ದ್ ಉತ್ತರ ಕೊರಿಯೆ. 5ಬೊಕ್ಕ ಅಕ್ಲೆಡ, “ನರಮಾನಿ ಮಗೆ ಸಬ್ಬತ್‌ದಿನತಲಾ ಕರ್ತವೆ ಆದುಲ್ಲೆ,” ಅಂದ್‌ದ್ ಪಂಡೆ.

ವಿಶ್ರಾಂತಿ ದಿನೊಟು ಗುಣ ಮಲ್ಪುನವು

(ಮತ್ತಾಯೆ 12:9-14; ಮಾರ್ಕೆ 3:1-6)

6ಕುಡೊಂಜಿ ಸಬ್ಬತ್‌ದಿನೊಟು ಆಯೆ ಸಭಾಮಂದಿರೊಗು ಪೋದು ಬೋಧನೆ ಮಲ್ತೊಂದುಪ್ಪುನಗ ಅಲ್ಪ ಒರಿ ಬಲತ್ತ ಕೈ ನುಂಗುಪೋತಿನಾಯೆ ಇತ್ತೆ. 7ಯೇಸುನು ಎಂಚಾಂಡಲಾ ತಿಕ್ಕಾದ್ ಪಾಡಿಯೆರೆ ಕಾರಣ ನಾಡೊಂದಿತ್ತಿ ಶಾಸ್ತ್ರಿಲುಲಾ ಪರಿಸಾಯೆರ್‌ಲಾ ಸಬ್ಬತ್‌ದಿನೊಟು ಗುಣ ಮಲ್ಪುವೆನಾ ತೂಕ ಅಂದ್‌ದ್ ಆಯನ್ ಕಾತೊಂದಿತ್ತೆರ್. 8ಆಂಡ ಆಯೆ ಅಕುಲು ಎನ್ನುನೆನ್ ತೆರಿದ್ ಕೈ ನುಂಗುಪೋತಿನಾಯಡ, “ಲಕ್ಕ್‌ದ್ ನಡುಟು ಉಂತುಲ,” ಅಂದ್‌ದ್ ಪನ್ನಗ ಆಯೆ ಲಕ್ಕ್‌ದ್ ಉಂತಿಯೆ. 9ಅಪಗ ಯೇಸು ಅಕ್ಲೆಗ್, “ನಿಕ್ಲೆಡ ಒಂಜಿ ಪಾತೆರ ಕೇನ್ವೆ, ಸಬ್ಬತ್‌ದಿನೊಟು ಒವೆನ್ ಮಲ್ಪುನವು ನ್ಯಾಯ? ಎಡ್ಡೆ ಮಲ್ಪುನವಾ? ಹಾಳ್ ಮಲ್ಪುನವಾ? ಪ್ರಾಣೊನು ಒರಿಪಾವುನವಾ? ಹಾಳ್ ಮಲ್ಪುನವಾ?” 10ಸುತ್ತಲಾ ಮಾತೆರೆನ್ಲಾ ತೂದು ಆಯಡ, “ನಿನ ಕೈ ನೀಡ್ಲ!” ಅಂದ್‌ದ್ ಪಂಡೆ.ಆಯೆ ಅಂಚೆನೇ ಮಲ್ತೆ; ಕೈ ಗುಣ ಆಂಡ್. 11ಆಂಡ ಅಕ್ಲೆಡ್ ದುರ್ಬುದ್ಧಿ ದಿಂಜಿದಿತ್ತಿನೆಡ್ದ್ ಈ ಯೇಸುಗು ದಾದ ಮಲ್ಪುಗ ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.

ಯೇಸು ಪದ್ರಾಡ್ ಅಪೊಸ್ತಲೆರೆನ್ ಅಜತೊಂಡಿನವು

(ಮತ್ತಾಯೆ 10:1-4; ಮಾರ್ಕೆ 3:13-19)

12ಆ ದಿನೊಕುಲೆಡ್ ಯೇಸು ಗುಡ್ಡೆಗ್ ಪೋದು ರಾತ್ರೆ ಇಡೀ ದೇವೆರೆಡ ಪ್ರಾರ್ಥನೆ ಮಲ್ತೊಂದಿತ್ತೆ. 13ಬೊಲ್ಪು ಆಯಿ ಬೊಕ್ಕ ಆಯೆ ತನ ಶಿಷ್ಯೆರೆನ್ ಕೈತಲ್‌ ಲೆತ್ತ್‌ದ್ ಅಕ್ಲೆಡ್ದ್ ಪದ್ರಾಡ್ ಮಂದಿನ್ ಅಜತ್‌ದ್ ಅಕ್ಲೆಗ್ ಅಪೊಸ್ತಲೆರ್ ಅಂದ್‌ದ್ ಪುದರ್ ಕೊರಿಯೆ. 14-16ಅಕುಲು ಏರೇರ್ ಅಂದ್ಂಡ, ಪೇತ್ರೆ ಪನ್ಪಿ ಪುದರ್‌ನ್ ಪಡೆಯಿ ಸೀಮೋನೆ, ಆಯನ ಮೆಗ್ಯೆ ಅಂದ್ರೆಯೆ, ಯಾಕೋಬು, ಯೋಹಾನೆ, ಫಿಲಿಪ್ಪು ಬಾರ್ತೊಲೊಮಾಯೆ, ಮತ್ತಾಯೆ, ತೋಮೆ, ಅಲ್ಫಾಯನ ಮಗೆ ಯಾಕೋಬು, ದೇಶಾಭಿಮಾನಿ ಪನ್ಪಿ ಸೀಮೋನು, ಬೊಕ್ಕ ಯಾಕೋಬುನ ಮಗೆ ಯೂದೆ. ಆಯನ್ ಒಚ್ಚಿದ್ ಕೊರಿಯೆರೆ ಉಪ್ಪುನ ದ್ರೋಹಿ ಇಸ್ಕಾರಿಯೋತ ಯೂದೆ, ಮೊಕುಲೇ.

ಯೇಸು ಬೋಧನೆ ಬೊಕ್ಕ ಗುಣ ಮಲ್ಪುನವು

(ಮತ್ತಾಯೆ 4:23-25)

17ಆಯೆ ಅಕ್ಲೆಡೊಪ್ಪ ಗುಡ್ಡೆಡ್ದ್ ಜತ್ತ್‌ದ್ ಒಂಜಿ ಸಮ ತಟ್ಟ್ ಜಾಗ್‌ಡ್ ಉಂತಿಯೆ. ಆಯನ ಶಿಷ್ಯೆರೆ ಗುಂಪುಲಾ ಮಾತ ಯೂದಾಯೊಡ್ದುಲಾ ಯೆರೂಸಲೇಮುಡ್ದುಲಾ ತೂರ್ ಬೊಕ್ಕ ಸೀದೋನ್ ಪಟ್ಟಣದ ಕಡಲ ಬರಿಡ್ದ್‌ಲಾ ಜನೊಕುಲೆ ಮಲ್ಲ ಗುಂಪುಲಾ ಆಯಡೊಪ್ಪ ಇತ್ತೆರ್. ಆ ಜನೊಕುಲು ಆಯನ ಬೋಧನೆನ್ ಕೇನಿಯೆರೆಗ್ಲಾ ತನ್ಕುಲೆ ಸೀಕ್‌ಲೆನ್ ಗುಣ ಮಲ್ತೊನ್ರೆಗಾದ್‌ಲಾ ಬತ್ತಿತ್ತೆರ್. 18ಅಕ್ಲೆಡ್ ಅಶುದ್ಧ ದೆವ್ವದ ಉಪದ್ರ ಇತ್ತಿನಾಕುಲು ಗುಣ ಆಯೆರ್. 19ಆ ಗಳಿಗೆಡ್ ಆಯಡ್ದ್ ಬಲ ಪಿದಾಡ್ದ್ ಮಾತೆರೆನ್ ಗುಣ ಮಲ್ತೊಂದಿನೆಡ್ದ್ ಆ ಗುಂಪುದ ಜನೊಕುಲು ಮಾತೆರ್ಲಾ ಆಯನ್ ಮುಟ್ಟಿಯೆರೆ ತೂಯೆರ್.

ಸಂತೋಷ ಬೊಕ್ಕ ದುಃಖ

(ಮತ್ತಾಯೆ 5:1-12)

20ಆಯೆ ತನ ಶಿಷ್ಯೆರೆ ಕಡೆಕ್ಕ್ ದೃಷ್ಟಿ ದೀದ್ ಪಂಡಿನಿ ದಾನೆ ಪಂಡ, “ಆತ್ಮೊಡು ಬಡವೆರ್ ಆದಿತ್ತಿನಾಕುಲು ಭಾಗ್ಯವಂತೆರ್, ದೇವೆರೆ ರಾಜ್ಯ ನಿಕ್ಲೆನವೇ. 21ಇತ್ತೆ ಬಡವು ಆದುಪ್ಪುನಾಕುಲು ಭಾಗ್ಯವಂತೆರ್, ನಿಕ್ಲೆಗ್ ತೃಪ್ತಿ ಆಪುಂಡು. ಇತ್ತೆ ಬುಲಿಪುನಾಕುಲು, ನಿಕುಲು ತೆಲಿಪುವರ್. 22ನರಮಾನಿ ಮಗಡ್ದಾವರ ಜನೊಕುಲು ನಿಕ್ಲೆನ್ ಪಗೆ ಮಲ್ತ್‌ದ್, ನಿಕ್ಲೆನ್ ಬೊಡ್ಚಿ ಅಂದ್‌ದ್ ದೂರ ಮಲ್ತ್‌ದ್, ನಿಕ್ಲೆನ ಪುದರ್ ನಿಂದೆ ಮಲ್ತ್‌ದ್, ನಿಕುಲು ಪಡಿಕೆಂತಿನಾಕುಲು ಪಂಡ್ಂಡ ನಿಕುಲು ಭಾಗ್ಯವಂತೆರ್. 23ಆ ದಿನೊಟು ಸಂತೋಷೊಡುಪ್ಪುಲೆ, ನಲ್ತೊಂದುಪ್ಪುಲೆ; ಪರಲೋಕೊಡು ನಿಕ್ಲೆಗ್ ದಿಂಜ ಫಲ ಉಂಡು ಅಂದ್‌ದ್ ತೆರಿಯೊನ್ಲೆ. ಈ ಜನೊಕುಲು ನಿಕ್ಲೆಗ್ ಮಲ್ತಿ ಲೆಕ್ಕನೇ, ಅಕ್ಲೆ ಪಿತೃಲು ಪ್ರವಾದಿಲೆಗ್ಲಾ ಅಂಚೆನೆ ಮಲ್ತ್‌ದೆರ್. 24ಆಂಡ ಐಶ್ವರ್ಯವಂತೆರೇ ನಿಕ್ಲೆನ ಗತಿನ್ ದಾನೆಂದ್ ಪನೊಲಿ. ನಿಕ್ಲೆನ ಸಂತೈಸಿಕೆ ನಿಕ್ಲೆಗ್ ತಿಕ್ಕ್‌ದಾತ್ಂಡ್. 25ಇತ್ತೆ ಬಂಜಿ ದಿಂಜಿದಿನಾಕುಲೇ ನಿಕ್ಲೆನ ಗತಿನ್ ದಾನೆಂದ್ ಪನೊಲಿ? ನಿಕುಲು ಬಡವುಡು ಒದ್ದಾಡುವರ್. ಇತ್ತೆ ತೆಲಿಪುನಾಕುಲೇ ನಿಕ್ಲೆನ ಗತಿನ್ ದಾನೆಂದ್ ಪನೊಲಿ? ನಿಕುಲು ದುಃಖೊಡು ಬುಲಿಪುವರ್. 26ಜನೊಕುಲು ನಿಕ್ಲೆನ್ ಇತ್ತೆ ಪುಗರ್‌ಂಡ ದುಂಬಗ್ ನಿಕ್ಲೆನ ಗತಿ ಭಯಂಕರ ಆವು; ಅಕ್ಲೆನ ಪೂರ್ವಜೆರ್ ಸುಳ್ಳು ಪ್ರವಾದಿಲೆನ್ ಅಂಚೆನೇ ಪುಗರಿಯೆರ್.

27“ಕೇನುನಾಕುಲೆಗ್ ಯಾನ್ ಪನ್ಪಿನಿ ದಾನೆಂದ್ಂಡ, ನಿಕ್ಲೆನ ಪಗೆನಾಕುಲೆನ್ ಪ್ರೀತಿ ಮಲ್ಪುಲೆ. ನಿಕ್ಲೆಡ ಪಗೆ ಕಟ್ಟುನಾಕುಲೆಗ್ ಎಡ್ಡೆ ಮಲ್ಪುಲೆ. 28ನಿಕ್ಲೆಗ್ ಶಾಪ್ಯುನಾಕುಲೆಗ್ ಆಶೀರ್ವಾದ ಮಲ್ಪುಲೆ. ನಿಕ್ಲೆಗ್ ದೂರುನಾಕುಲೆಗ್ ಪ್ರಾರ್ಥನೆ ಮಲ್ಪುಲೆ. 29ನಿನ ಕೆಪ್ಪೆಗ್ ಹಾಕುನಾಯಗ್ ಬೊಕ್ಕೊಂಜಿ ಕೆಪ್ಪೆನ್ಲಾ ತೋಜಾಲ. ನಿನ ಮೇಲಂಗಿನ್ ಒಯ್ತೊನುನಾಯಗ್ ಉಲಯಿದ ಅಂಗಿನ್ ದೆತ್ತೊನೆರೆಲಾ ಅಡ್ಡಿ ಮಲ್ಪೊಡ್ಚಿ. 30ನಿನಡ ನಟ್ಟೊಂಡಿನಾಕುಲೆಗ್ ಮಾತೆರೆಗ್ಲಾ ಇತ್ತಿನೆನ್ ಕೊರ್ಲ, ನಿನಡುಪ್ಪುನೆನ್ ಕೊರಿಯಡ ಅವೆನ್ ಪಿರ ಕೇನಡ. 31ಜನೊಕುಲು ನಿಕ್ಲೆಗ್ ಎಂಚೆಂಚಿನ ಮಲ್ಪೊಡು ಅಂದ್‌ದ್ ಆಸೆ ಮಲ್ಪುವೆರಾ ಅಂಚಿನೆನೇ ನಿಕುಲು ಅಕ್ಲೆಗ್ ಮಲ್ಪುಲೆ.

32“ನಿಕ್ಲೆಗ್ ಪ್ರೀತಿ ತೋಜಾವುನಾಕುಲೆನೇ ನಿಕುಲು ಪ್ರೀತಿ ಮಲ್ತರ್ಡ ನಿಕ್ಲೆಗ್ ವಾ ಪುಗರಿಕೆ ಬರು. ಪಾಪಿಲುಲಾ ತನ್ಕುಲೆಗ್ ಪ್ರೀತಿ ತೋಜಾವುನಾಕುಲೆನ್ ಪ್ರೀತಿ ಮಲ್ಪುವೆರತ್ತಾ? 33ನಿಕ್ಲೆಗ್ ಎಡ್ಡೆ ಮಲ್ಪುನಾಕುಲೆಗೇ ಎಡ್ಡೆ ಮಲ್ತರ್ಡ ನಿಕ್ಲೆಗ್ ದಾಲಾ ಪುಗರಿಕೆ ಇಜ್ಜಿ. ಪಾಪಿಲುಲಾ ಅಂಚೆನೇ ಮಲ್ಪುವೆರತ್ತಾ? 34ಅಕುಲು ಸಾಲ ಕೊರುವೆರ್ ಅಂದ್‌ದ್ ನಿಕುಲು ಏರೆಗಾಂಡಲಾ ಸಾಲ ಕೊರಿಯರ್ಡ, ಐಟ್ಟ್ ನಿಕ್ಲೆಗ್ ದಾಲಾ ಪುಗರಿಕೆ ಇಜ್ಜಿ. ಪಾಪಿಲುಲಾ ಎಂಕುಲು ಕೊರಿನಾತ್ ತನ್ಕುಲೆಗ್ ಪಿರ ತಿಕ್ಕು ಅಂದ್‌ದ್ ನಿರೀಕ್ಷೆ ಮಲ್ತ್‌ದ್ ಪಾಪಿಲೆಗ್ ಸಾಲ ಕೊರ್ಪೆರತ್ತಾ? 35ನಿಕುಲು ನಿಕ್ಲೆನ ಪಗೆನಾಕುಲೆಗ್ ಪ್ರೀತಿ ಮಲ್ತ್‌ದ್ ಅಕ್ಲೆಗ್ ಎಡ್ಡೆ ಮಲ್ಪುಲೆ. ಧೈರ್ಯೊಡು ಸಾಲ ಕೊರ್ಲೆ, ಪಿರ ತಿಕ್ಕುಂಡು ಪನ್ಪಿ ಆಸೆಡ್ ಸಾಲ ಕೊರಡೆ; ಇಂಚ ಮಲ್ತ್ಂಡ ನಿಕ್ಲೆಗ್ ಮಸ್ತ್ ಫಲ ತಿಕ್ಕುಂಡು. ಬೊಕ್ಕ ನಿಕುಲು ಸರ್ವಶಕ್ತೆ ದೇವೆರೆನ ಜೋಕುಲಾಪರ್. ದೇವೆರ್ ಉಪಕಾರ ಎನ್ನಂದಿನಾಕುಲೆಗ್ಲಾ ಪಡಿಕೆಂತಿನಾಕುಲೆಗ್ಲಾ ಉಪಕಾರದಾಯೆ ಆದುಲ್ಲೆ. 36ನಿಕ್ಲೆನ ಅಮ್ಮೆ ಕನಿಕರದಾಯೆ ಆದುಪ್ಪುಲೆಕ್ಕ ನಿಕುಲುಲಾ ಕನಿಕರದಾಕುಲು ಆದುಪ್ಪುಲೆ.

ನನೊರಿಯನ್ ತೀರ್ಪು ಮಲ್ಪೊಡ್ಚಿ

(ಮತ್ತಾಯೆ 7:1-5)

37“ಉಂದತ್ತಂದೆ ತೀರ್ಪು ಮಲ್ಪಡೆ, ಅಪಗ ನಿಕ್ಲೆಗ್ಲಾ ತೀರ್ಪು ಆಪುಜಿ. ಅಪರಾಧಿ ಅಂದ್‌ದ್ ನಿರ್ಧಾರ ಮಲ್ಪಡೆ; ಅಪಗ ದೇವೆರ್ ನಿಕ್ಲೆನ್ಲಾ ಅಪರಾಧಿಲು ಅಂದ್‌ದ್ ನಿರ್ಧಾರ ಮಲ್ಪಯೆರ್. ಬುಡ್ಲೆ ಅಪಗ ನಿಕ್ಲೆನ್ಲಾ ಬುಡ್ವೆರ್. 38ಕೊರ್ಲೆ ಅಪಗ ನಿಕ್ಲೆಗ್ಲಾ ಜಡಿದ್ ಕುರ್ಕಾದ್ ತಮೆಲುನಾತ್ ಎಡ್ಡೆ ಲತ್ತ್‌ದ್ ನಿಕ್ಲೆನ ಸೆರಂಗ್‌ಗ್ ಪಾಡ್ವೆರ್. ನಿಕುಲು ಲಪ್ಪುನ ಆಳತೆಡ್ದೇ ನಿಕ್ಲೆಗ್ಲಾ ಲಪ್ಪುವೆರ್,” ಅಂದ್‌ದ್ ಪಂಡೆ.

39ಉಂದತ್ತಂದೆ ಯೇಸು ಅಕ್ಲೆಗ್ ಒಂಜಿ ಉಪಕತೆನ್ ಪಂಡೆ ದಾನೆಂದ್ಂಡ, “ಕುರುಡೆ ಕುರುಡಗ್ ಸಾದಿ ತೊಜಾವೊಲಿಯಾ? ಅಕುಲು ಇರ್ವೆರ್‌ಲಾ ತೋಡುಡು ಬೂರ್ವೆರತ್ತಾ? 40ಗುರುಡ್ದು ಶಿಷ್ಯೆ ಮಲ್ಲಾಯೆ ಅತ್ತ್. ಆಂಡ ಮಸ್ತ್ ಕಲ್ತಿ ಬೊಕ್ಕ ಪ್ರತಿ ಒರಿಲಾ ತನ ಗುರುಲೆಕ್ಕ ಆಪೆ.

41“ಈ ನಿನ ಕಣ್ಣ್‌ಡುಪ್ಪು ಕಜವುನ್ ತೂವಂದೆ ನಿನ ಸಹೋದ್ರನ ಕಣ್ಣ್‌ಡುಪ್ಪು ಧೂಳುನು ದಾಯೆಗ್ ತೂಪ? 42ಇಜ್ಜಾಂಡ ನಿನ ಕಣ್ಣ್‌ಡ್ ಕಜವುನ್ ದೀವೊಂದು ಸಹೋದ್ರಡ, ‘ಅಣ್ಣಾ ನಿನ ಕಣ್ಣ್‌ದುಲಯಿಡ್ದ್ ಧೂಳುನು ದೆಪ್ಪುವೆ ಬಲ,’ ಅಂದ್‌ದ್ ಎಂಚ ಪನೊಲಿ? ಕಪಟಿಯೇ, ದುಂಬತ್ತ ನಿನ ಕಣ್ಣ್‌ದುಲಯಿದ ಕಜವುನ್ ದೆತ್ತ್ ಪಾಡ್ಲ. ಐಡ್ದ್ ಬೊಕ್ಕ ನಿನ ಸಹೋದ್ರನ ಕಣ್ಣ್‌ದುಲಯಿದ ಧೂಳುನು ದೆಪ್ಪೆರೆ ಸರಿಟ್ಟ್ ತೋಜುಂಡು.

ಮರ ಬೊಕ್ಕ ಐತ ಫಲ

(ಮತ್ತಾಯೆ 7:16-20; 12:33-35)

43“ಎಡ್ಡೆಂತಿನ ಮರ ಹಾಳ್ ಫಲ ಕೊರ್ಪುಜಿ; ಅಂಚೆನೇ ಹಾಳ್ ಮರ ಎಡ್ಡೆ ಫಲ ಕೊರ್ಪುಜಿ. 44ಪ್ರತಿಯೊಂಜಿ ಮರತ ಗುಣ ಐತ ಫಲೊಡ್ದೇ ಗೊತ್ತಾಪುಂಡು. ಮುಳ್ಳುದ ಗಿಡೊಕ್ಲೆಡ್ದ್ ಅಂಜೂರದ ಪರ್ಂದ್‌ಲೆನ್ ಕೊಯ್ಪುಜೆರ್. ಗಜಿಗೆದ ಪುದೆಲೆಡ್ದ್ ದ್ರಾಕ್ಷೆನ್ ಕೊಯ್ಪುಜೆರ್. 45ಎಡ್ಡೆಂತಿನಾಯೆ ತನ ಉಡಲ್ ಇನ್ಪಿ ಎಡ್ಡೆಂತಿ ಕಜನೆದುಲಯಿಡ್ದ್ ಎಡ್ಡೆಂತಿನೆನ್ ಕನಪೆ. ಪಡಿಕೆಂತಿನಾಯೆ ಪಡಿಕೆಂತಿ ಕಜನೆದುಲಯಿಡ್ದ್ ಪಡಿಕೆಂತಿನೆನೇ ಕನಪೆ. ಉಡಲ್‌ಡ್ ದಿಂಜಿದಿತ್ತಿನವೇ ಬಾಯಿಡ್ದ್ ಪಿದಾಡುಂಡು.

ಬಿರ್ಸೆ ಬೊಕ್ಕ ಹೆಡ್ಡೆ ಇಲ್ಲ್ ಕಟ್ಟುನವು

(ಮತ್ತಾಯೆ 7:24-27)

46“ನಿಕುಲು ಎನನ್ ಕರ್ತವಾ, ಕರ್ತವಾ, ಅಂದ್‌ದ್ ಲೆತ್ತ್‌ದ್ ಯಾನ್ ಪನ್ಪಿನೆನ್ ನಿಕುಲು ದಾಯೆಗ್ ಮಲ್ಪುಜರ್? 47ಎನ ಕೈತಲ್‌ ಬತ್ತ್‌ದ್ ಎನ ಪಾತೆರೊಲೆನ್ ಕೇಂಡ್ದ್ ಐತ ಲೆಕ್ಕನೆ ನಡಪುನಾಯೆ ಏರೆಗ್ ಸಮ ಆದುಲ್ಲೆ ಪನ್ಪಿನೆನ್ ನಿಕ್ಲೆಗ್ ತೋಜಾವೆ. 48ಆಯೆ ಮಲ್ಲ ಗುಂಡಿ ಗರ್ತ್‌ದ್ ಪಾದೆದ ಮಿತ್ತ್ ಪಂಚಾಂಗ ಪಾಡ್ದ್ ಇಲ್ಲ್ ಕಟ್ಟಿದಿನಾಯಗ್ ಸಮ ಆದುಲ್ಲೆ. ನೀರ್ ಏರ್ದ್ ಆ ಇಲ್ಲಗ್ ಬೊಲ್ಲ ಹಾಕ್‌ಂಡಲಾ ಅವು ಗಟ್ಟಿ ಕಟ್ಟಿನೆಡ್ದ್ ಆ ಮಲ್ಲ ಬೊಲ್ಲೊಗ್ಲಾ ಅವೆನ್ ಪಂದಾವೆರೆ ಆಯಿಜಿ. 49ಆಂಡ ಎನ ಪಾತೆರೊಲೆನ್ ಕೇಂಡ್ದ್‌ಲಾ ಐತ ಲೆಕ್ಕನೆ ನಡಪಂದಿನ ಪ್ರತಿಯೊರಿಲಾ ಪಂಚಾಂಗದಾಂತೆ ನೆಲತ ಮಿತ್ತ್ ಇಲ್ಲ್‌ನ್ ಕಟ್ಟಿದಿನಾಯಗ್ ಸಮ ಆದುಲ್ಲೆ. ಬೊಲ್ಲ ಏರ್ದ್ ಐಕ್ ಹಾಕಿ ಕೂಡ್ಲೇ ಆ ಇಲ್ಲ್ ಜರಿದ್ ಬೂರ್ದು ಪೂರ ನಾಶಾದ್ ಪೋಂಡು.”

Currently Selected:

ಲೂಕೆ 6: ತುಳು

Highlight

Copy