ಲೂಕೆ 18

ವಿಧವೆ ಬೊಕ್ಕ ನ್ಯಾಯತೀರ್ಪು

1ಐಡ್ದ್ ಬೊಕ್ಕ ಯೇಸು ತನ ಶಿಷ್ಯೆರೆಗ್, ಬೇಜಾರ್ ಮಲ್ತೊನಂದೆ ಏಪಲಾ ಪ್ರಾರ್ಥನೆ ಮಲ್ತೊಂದುಪ್ಪುಲೆ ಅಂದ್‌ದ್ ಒಂಜಿ ಉಪಕತೆನ್ ಪಂಡೆ. 2“ಒಂಜಾನೊಂಜಿ ಊರುಡು ಒರಿ ನ್ಯಾಯಾಧಿಪತಿ ಇತ್ತೆ. ಆಯೆ ದೇವೆರೆಗ್ ಪೋಡಿಯಂದೆ ನರಮಾನಿಲೆನ್ಲಾ ಲಕ್ಷ್ಯ ಮಲ್ಪಂದೆ ಇತ್ತೆ. 3ಅವ್ವೇ ಊರುಡು ಒರ್ತಿ ವಿಧವೆ ಇತ್ತಲ್. ಆಲ್ ಆಯನ ಕೈತಲ್‌ ಬತ್ತ್‌ದ್, ‘ಎನ ಪಗೆಮಾನಿಲೆಡ್ದ್ ಎನನ್ ನ್ಯಾಯ ತೀರ್ತ್‌ದ್ ಬುಡ್ಪಾಲ ಅಂದ್‌ದ್ ನಟ್ಟೊಂದಿತ್ತಲ್!’ 4ಆಯೆ ಕೆಲವು ದಿನ ಮನಸ್ ಕೊರ್ಜೆ. ‘ಯಾನ್ ದೇವೆರೆಗ್ ಪೋಡಿಯುನಾಯೆ ಅತ್ತ್; ನರಮಾನಿಲೆನ್ ಗಣ್ಯ ಮಲ್ಪುನಾಯೆಲಾ ಅತ್ತ್. 5ಆಂಡಲಾ ಈ ವಿಧವೆ ಗಡಿಗಡಿ ಬತ್ತ್‌ದ್ ಕಾಟ ಕೊರ್ಪಿನೆಡ್ದ್ ಆಲೆನ್ ನ್ಯಾಯ ತೀರ್ತ್‌ದ್ ಬುಡ್ಪಾವೆ; ಇಜ್ಜಾಂಡ ಮೋಲು ಬತ್ತ್‌ದ್ ಕಡೆಕ್ಕ್ ಎನ ಜೀವೊನು ಅರ್ಧ ಮಲ್ಪಲ್,’” ಅಂದ್‌ದ್ ಎನ್ನೊಂಡೆ. 6ಕರ್ತವೆ ಈ ಉಪಕತೆನ್ ಪಂಡಿ ಬೊಕ್ಕ, “ಇಂದಾ, ಅನ್ಯಾಯಗಾರೆ ಆಯಿ ಈ ನ್ಯಾಯಾಧಿಪತಿ ಎನ್ನೊಂಡಿನೆನ್ ಆಲೋಚನೆ ಮಲ್ಪುಲೆ. 7ದೇವೆರೆನ್ ಅಜತೊಂಡಿನಾಕುಲು ರಾತ್ರೆ ಪಗೆಲ್ ಮುರೆಡ್ನಗ ಆಯೆ ಅಕ್ಲೆ ಸಂಗತಿಡ್ ತಡ ಮಲ್ತ್ಂಡಲಾ ಅಕ್ಲೆ ನ್ಯಾಯೊನು ತೀರ್ಪಂದೆ ಉಪ್ಪೆನಾ? 8ಅಕ್ಲೆಗ್ ಬೇಗ ನ್ಯಾಯ ತೀರ್ಸಾವೆ ಅಂದ್‌ದ್ ನಿಕ್ಲೆಗ್ ಪನ್ಪೆ. ಇಂಚ ಇತ್ತ್ಂಡಲಾ ನರಮಾನಿ ಮಗೆ ಬನ್ನಗ ಭೂಮಿದ ಮಿತ್ತ್ ನಂಬಿಕೆನ್ ತೂವೆನಾ?” ಪಂಡೆ.

ಪರಿಸಾಯೆ ಬೊಕ್ಕ ಸುಂಕದಾಯನ ಉಪಕತೆ

9ಉಂದತ್ತಂದೆ ತನ್ಕುಲೇ ನೀತಿವಂತೆರ್ ಅಂದ್‌ದ್ ನಂಬೊಂದು ಬಾಕಿದಾಕುಲೆನ್ ಉದಾಸೀನದಾಕುಲು ಎನ್ನುನಾಕುಲೆಗ್ ಯೇಸು ಒಂಜಿ ಉಪಕತೆನ್ ಪಂಡೆ. 10ಅವು ದಾದ ಪಂಡ, “ಪ್ರಾರ್ಥನೆ ಮಲ್ಪೆರೆಗಾದ್ ರಡ್ಡ್ ಜನೊಕುಲು ದೇವಾಲಯೊಗು ಪೋಯೆರ್. ಒರಿ ಪರಿಸಾಯೆ, ಒರಿ ಸುಂಕದಾಯೆ. 11ಪರಿಸಾಯೆ ಉಂತೊಂದು ಪ್ರಾರ್ಥನೆ ಮಲ್ಪುನಗ ದೇವೆರೇ, ‘ಯಾನ್ ಲೂಟಿ ಮಲ್ಪುನಾಯೆ ಅತ್ತ್, ಅನ್ಯಾಯಗಾರೆ ಅತ್ತ್, ವ್ಯಭಿಚಾರ ಮಲ್ಪುನಾಯೆ ಅತ್ತ್, ಬಾಕಿದ ಜನೊಕುಲೆ ಲೆಕ್ಕ ಯಾನತ್ತ್, ಈ ಸುಂಕದಾಯನ ಲೆಕ್ಕಲಾ ಅತ್ತ್. ಅಂಚಾಯಿನೆಡ್ದ್ ನಿಕ್ಕ್ ಉಪಕಾರ ಸಂದಾವೆ. 12ವಾರೊಗು ರಡ್ಡ್ ಸರ್ತಿ ಉಪವಾಸ ಮಲ್ಪುವೆ, ಯಾನ್ ಸಂಪಾದನೆ ಮಲ್ತಿನೆತ್ತ ಪತ್ತೆಟ್ಟ್ ಒಂಜಿ ಪಾಲ್‌ನ್ ಕೊರ್ಪೆ,’ ಅಂದ್‌ದ್ ಪಂಡೊಂಡೆ. 13ಆಂಡ ಆ ಸುಂಕದಾಯೆ ದೂರೊಡು ಉಂತುದು ಬಾನದ ಕಡೆಕ್ಕ್ ಕಣ್ಣ್ ಜತ್ತ್‌ದ್ ತೂವೆರೆಲಾ ಮನಸಿಜ್ಜಂದೆ ತಿಗಲೆಗ್ ಹಾಕೊಂದು, ‘ದೇವೆರೇ ಪಾಪಿ ಆಯಿ ಎಂಕ್ ಕನಿಕರ ತೋಜಾಲ!’ ಅಂದ್‌ದ್ ನಟ್ಟಿಯೆ. 14ಉಂಬೆ ನೀತಿವಂತೆ ಆದ್ ತನ ಇಲ್ಲಗ್ ಪೋಯೆ. ಆ ಪರಿಸಾಯೆ ಸುಂಕದಾಯ ಲೆಕ್ಕ ನೀತಿವಂತೆ ಆದ್ ಪೋಯಿಜೆ ಅಂದ್‌ದ್ ನಿಕ್ಲೆಗ್ ಪನ್ಪೆ. ಏರ್ ತನನ್ ಹೆಚ್ಚಾವೊನ್ವೆನಾ ದೇವೆರ್ ಆಯನ್ ತಗ್ಗಾವೆ. ಏರ್ ತನನ್ ತಾನ್ ತಗ್ಗಾವೊನ್ವೆನಾ ದೇವೆರ್ ಆಯನ್ ಮಲ್ಲ ಸ್ಥಾನೊಗು ಏರಾವೆ.”

ಎಲ್ಯ ಜೋಕುಲೆನ್ ಆಶೀರ್ವಾದ ಮಲ್ತಿನವು

(ಮತ್ತಾಯೆ 19:13-15; ಮಾರ್ಕೆ 10:13-16)

15ಕೆಲೆವೆರ್ ಜೋಕುಲೆನ್ ಯೇಸು ಮುಟ್ಟೊಡು ಅಂದ್‌ದ್ ಆಯನ ಕೈತಲ್‌ ಕನತಿನಪಗ ಶಿಷ್ಯೆರ್ ತೂದು ಅಕ್ಲೆನ್ ದಟ್ಟಿಯೆರ್. 16ಆಂಡ ಯೇಸು ಆ ಜೋಕುಲೆನ್ ತನ ಕೈತಲ್‌ ಲೆಪುಡಾದ್, “ಜೋಕುಲೆನ್ ಎನ ಕೈತಲ್‌ ಬರಿಯೆರೆ ಬುಡ್ಲೆ; ಅಕ್ಲೆಗ್ ಅಡ್ಡಿ ಮಲ್ಪಡೆ; ದೇವೆರೆ ರಾಜ್ಯ ಇಂಚಿತ್ತಿನಾಕುಲೆನವೇ. 17ನಿಕ್ಲೆಗ್ ನಿಜಾದ್ ಪನ್ಪೆ, ಬಾಲೆದಲೆಕ್ಕ ಒರಿ ದೇವೆರೆ ರಾಜ್ಯೊನು ದೆತ್ತೊನುಜೆಡ, ಆಯೆ ಐತ ಉಲಯಿ ಪೋವಯೆ,” ಅಂದ್‌ದ್ ಪಂಡೆ.

ಐಶ್ವರ್ಯವಂತೆ ನರಮಾನಿ

(ಮತ್ತಾಯೆ 19:16-30; ಮಾರ್ಕೆ 10:17-31)

18ಒರಿ ಅಧಿಕಾರಿ ಬತ್ತ್‌ದ್ ಯೇಸುಡ, “ಎಡ್ಡೆ ಬೋಧಕಾ, ಯಾನ್ ನಿತ್ಯಜೀವೊಗು ಭಾದ್ಯಸ್ಥೆ ಆವೆರೆ ದಾದ ಮಲ್ಪೊಡು?” ಅಂದ್‌ದ್ ಕೇಂಡೆ. 19ಯೇಸು ಆಯಡ, “ಎನನ್ ಎಡ್ಡೆಂತಿನಾಯೆ ಅಂದ್‌ದ್ ದಾಯೆಗ್ ಪನ್ಪ? ದೇವೆರ್ ಒರಿಯೇ ಅತ್ತಂದೆ ಬೇತೆ ಏರ್ಲಾ ಎಡ್ಡೆಂತಿನಾಯೆ ಇಜ್ಜೆ. 20‘ವ್ಯಭಿಚಾರ ಮಲ್ಪೆರೆ ಬಲ್ಲಿ, ಮಾನ್ಯ ಕೆರಿಯೆರೆ ಬಲ್ಲಿ, ಕಂಡೊನಿಯೆರೆ ಬಲ್ಲಿ, ಸುಳ್ಳು ಸಾಕ್ಷಿ ಪನಿಯೆರೆ ಬಲ್ಲಿ, ನಿನ ಅಪ್ಪೆಅಮ್ಮನ್ ಸನ್ಮಾನ ಮಲ್ಪೊಡು ಪನ್ಪಿ ದೇವೆರೆ ಅಪ್ಪಣೆಲು ನಿಕ್ಕ್ ಗೊತ್ತುಂಡತ್ತಾ?’” ಅಂದ್‌ದ್ ಪಂಡೆ. 21ಐಕ್ ಆಯೆ, “ಯಾನ್ ಎಲ್ಲಿಡ್ದಿಂಚಿಲಾ ಉಂದೆಕ್ಕ್ ಮಾತೆಕ್ಲಾ ಸರಿಯಾದ್ ನಡತೊಂದು ಬೈದೆ.” ಪಂಡ್ದ್ ಪನ್ನಗ, 22ಯೇಸು ಅವೆನ್ ಕೇಂಡ್ದ್ ಆಯಡ, “ನಿನಡ ಒಂಜಿ ಕಮ್ಮಿ ಉಂಡು. ಪೋದು ನಿನ ಆಸ್ತಿನ್ ಮಾತೆನ್ ಮಾರ್ದ್ ಬಡವೆರೆಗ್ ಕೊರ್ಲ. ಪರಲೋಕೊಡು ನಿಕ್ಕ್ ಆಸ್ತಿ ಉಪ್ಪುಂಡು; ಬೊಕ್ಕ ಎನ ಬೆರಿಯೆ ಬಲ,” ಪಂಡ್ದ್ ಪಂಡೆ. 23ಆಯೆ ಮಸ್ತ್ ಐಶ್ವರ್ಯವಂತೆ ಆದಿತ್ತಿನೆಡ್ದ್ ಉಂದೆನ್ ಕೇಂಡ್ದ್ ಮಸ್ತ್ ದುಃಖ ಮಲ್ತೆ. 24ಅಪಗ ಯೇಸು ಆಯನ್ ತೂದು, “ಐಶ್ವರ್ಯ ಇತ್ತಿನಾಕುಲು ದೇವೆರೆ ರಾಜ್ಯೊಡು ಸೇರುನವು ಏತೋ ಕಷ್ಟ. 25ಅಂದ್, ಐಶ್ವರ್ಯವಂತೆ ದೇವೆರೆ ರಾಜ್ಯೊಡು ಸೇರುನೆಡ್ದ್ ಒಂಟೆ ಸೂಜಿದ ಕಣ್ಣ್‌ಡ್ ನೂರುನವು ಸುಲಭ,” ಪಂಡೆ. 26ಈ ಪಾತೆರೊನು ಕೇಂಡಿನಾಕುಲು, “ಏರೆಗ್ ರಕ್ಷಣೆ ಆವು?” ಅಂದ್‌ದ್ ಕೇನ್ನಗ 27ಯೇಸು, “ನರಮಾನಿಲೆಗ್ ಅಸಾಧ್ಯದ ಕಾರ್ಯೊಲು ದೇವೆರೆಗ್ ಸಾದ್ಯ,” ಪಂಡೆ. 28ಅಪಗ ಪೇತ್ರೆ, “ಇಂದಾ, ಎಂಕುಲು ಎಂಕ್ಲೆ ಇಲ್ಲ್ ಬದ್‌ಕ್‌ನ್ ಬುಡ್ದು ನಿನ ಬೆರಿಯೆ ಬೈದ,” ಅಂದ್‌ದ್ ಪಂಡೆ. 29ಐಕ್ ಆಯೆ, “ನಿಕ್ಲೆಗ್ ನಿಜಾದ್ ಪನ್ಪೆ ಏರ್ ದೇವೆರೆ ರಾಜ್ಯೊಗಾದ್ ಇಲ್ಲ್‌ನಾವಡ್ ಬೊಡೆದಿನಾವಡ್ ಮೆಗ್ಯೆಪಲಯಾಡ್ಲೆನಾವಡ್ ಅಪ್ಪೆಅಮ್ಮನಾವಡ್ ಬಾಲೆಲೆನಾವಡ್ ಬುಡ್ತಿನಾಕುಲೆಗ್‌ 30ಇತ್ತೆದ ಲೋಕೊಡೇ ಮಸ್ತ್ ಪಾಲ್ ತಿಕ್ಕ್‌ದೇ ತಿಕ್ಕುಂಡು, ಬೊಕ್ಕ ಬರ್ಪಿ ಲೋಕೊಡು ನಿತ್ಯಜೀವಲಾ ತಿಕ್ಕುಂಡು,” ಅಂದ್‌ದ್ ಪಂಡೆ.

ಯೇಸುನ ಮರಣೊನು ಮೂಜನೆ ಸರ್ತಿ ತೆರಿಪಾವುನವು

(ಮತ್ತಾಯೆ 20:17-19; ಮಾರ್ಕೆ 10:32-34)

31ಆಯೆ ತನ ಪದ್ರಾಡ್ ಶಿಷ್ಯೆರೆನ್ ಬರಿಕ್ಕ್ ಲೆತ್ತೊಂದು ಪೋದು ಅಕ್ಲೆಗ್, “ತೂಲೆ, ಎಂಕುಲು ಯೆರೂಸಲೇಮುಗು ಪೋವೊಂದುಲ್ಲ; ಬೊಕ್ಕ ನರಮಾನಿ ಮಗನ ಬಗೆಟ್ ಪ್ರವಾದಿಲು ಬರೆತಿನವು ಮಾತಲಾ ಪೂರ್ತಿ ಆವು; ಎಂಚ ಪಂಡ, 32ಆಯನ್ ಪಿದಯಿದ ಜನೊಕುಲೆ ಕೈಕ್ ಒಚ್ಚಿದ್ ಕೊರುವೆರ್. ಮೊಕುಲು ಆಯಗ್ ಗೇಲಿ ಮಲ್ತ್‌ದ್, ನೆರ್ಪೆರ್, ಆಯನ ಮಿತ್ತ್ ಉಬ್ಬಿದ್, ಆಯಗ್ ಚಾಟಿಡ್ ಹಾಕ್‌ದ್, ಕೆರ್ದ್ ಪಾಡ್ವೆರ್, 33ಬೊಕ್ಕ ಆಯೆ ಮೂಜನೇ ದಿನೊಟು ಜೀವಾದ್ ಲಕ್ಕ್‌ದ್ ಬರ್ಪೆ.” 34ಅಕುಲು ಈ ಸಂಗತಿನ್ ಒಂಜೆನ್ಲಾ ಅರ್ಥ ಮಲ್ತೊನ್ಜೆರ್, ಈ ಪಾತೆರೊಲು ಅಕ್ಲೆಗ್ ಮದೆಯಾಯಿನೆಡ್ದ್ ಐತ ಅರ್ಥೊನು ಅಕುಲು ತೆರಿಯಂದೆ ಪೋಯೆರ್.

ಯೇಸು ಕುರುಡನ್ ಗುಣ ಮಲ್ತಿನವು

(ಮತ್ತಾಯೆ 20:29-34; ಮಾರ್ಕೆ 10:46-52)

35ಯೇಸು ಯೆರಿಕೋವುಗು ಕೈತಲ್‌ ಬನ್ನಗ ಸಾದಿದ ಬರಿಟ್ಟ್ ಒರಿ ಕುರುಡೆ ಕುಲ್ಲೊಂದು ನಟ್ಟೊಂದಿತ್ತೆ. 36ಆಯೆ ಜನೊಕುಲೆನ ಶಬ್ಧೊನು ಕೇಂಡ್ದ್, “ಉಂದು ದಾದ?” ಅಂದ್‌ದ್ ಕೇನ್ನಗ 37ಅಕುಲು ಆಯಡ, “ನಜರೇತ್‌ದ ಯೇಸು ಆ ಸಾದಿಡ್ ಪೋವೊಂದುಲ್ಲೆ,” ಅಂದ್‌ದ್ ತೆರಿಪಾನಗ 38ಆಯೆ ಯೇಸೋ, “ದಾವೀದ್ ಮಗಾ, ಎನನ್ ಕರುಣೆ ಮಲ್ಪುಲ,” ಅಂದ್‌ದ್ ಬುಲ್ತೆ. 39ದುಂಬುಡು ಪೋವೊಂದಿತ್ತಿನಾಕುಲು ಆಯನ್ ಮನಿಪಂದೆ ಉಪ್ಪೊಡಂದ್‌ದ್ ದಟ್ಟಿನಗ ಆಯೆ, “ದಾವೀದ ಮಗಾ, ಎಂಕ್ ಕನಿಕರ ತೋಜಾಲ,” ಅಂದ್‌ದ್ ಬೊಕ್ಕಲಾತ್ ಬೊಬ್ಬೆ ದೀಯೆ. 40ಅಪಗ ಯೇಸು ಉಂತುದು ಆಯನ್ ಲೆತ್ತೊಂದು ಬರಿಯೆರೆ ಅಪ್ಪಣೆ ಕೊರಿಯೆ. ಅಕುಲು ಆಯನ್ ಲೆತ್ತೊಂದು ಬತ್ತೆರ್. 41ಯೇಸು ಆಯಡ, “ಯಾನ್ ನಿಕ್ಕ್ ದಾದ ಮಲ್ಪೊಡು?” ಅಂದ್‌ದ್ ಕೇನ್ನಗ ಆಯೆ, “ಕರ್ತವಾ, ಎಂಕ್ ಕಣ್ಣ್ ತೋಜುಲೆಕ್ಕ ಮಲ್ಪೊಡು,” ಅಂದ್‌ದ್ ಪಂಡೆ. 42ಯೇಸು ಆಯಡ, “ನಿಕ್ಕ್ ಕಣ್ಣ್‌ಗ್ ದೃಷ್ಟಿ ಬರಡ್, ನಿನ ನಂಬಿಕೆನೇ ನಿನನ್ ಗುಣ ಮಲ್ತ್ಂಡ್,” ಪಂಡ್ದ್ ಪಂಡೆ 43ಅಪಗನೆ ಆಯಗ್ ಕಣ್ಣ್ ತೋಜ್ಂಡ್. ಆಯೆ ದೇವೆರೆನ್ ಪುಗರೊಂದು ಆಯನ ಬೆರಿಯೆ ಪೋಯೆ. ಜನೊಕುಲು ಮಾತೆರ್ಲಾ ನಡತಿ ಸಂಗತಿನ್ ತೂದು ದೇವೆರೆನ್ ಸುಗಿತೆರ್.

Currently Selected:

ಲೂಕೆ 18: ತುಳು

Highlight

Copy