ಯೋಹಾನೆ 6

ಐನ್ ಸಾರ ಜನೊಕುಲೆಗ್ ವಣಸ್

(ಮತ್ತಾಯೆ 14:13-21; ಮಾರ್ಕೆ 6:30-44; ಲೂಕೆ 9:10-17)

1ಐಡ್ದ್ ಬೊಕ್ಕ ಯೇಸು ಗಲಿಲಾಯ ಕಡಲ್ದ ಆಯೆರೆಗ್ ಪೋಯೆ, ಐಕ್ ತಿಬೇರಿಯದ ಕಡಲ್ ಪಂಡ್ದ್‌ಲಾ ಪನ್ಪೆರ್. 2ಮಸ್ತ್ ಜನೊಕುಲು ಸೀಕ್‌ದಾಕುಲೆಡ್ ಮಲ್ತಿ ಕಾರ್ನಿಕೊಲೆನ್ ತೂದು ಯೇಸು ಬೆರಿಯೆ ಪೋವೊಂದಿತ್ತೆರ್. 3ಆಂಡ ಯೇಸು ಒಂಜಿ ಗುಡ್ಡೆದ ಮಿತ್ತ್ ಪೋದು ತನ ಶಿಷ್ಯೆರೆ ಒಟ್ಟುಗು ಕುಲ್ಲಿಯೆ. 4ಆ ಸಮಯೊಡು ಯೆಹೂದ್ಯೆರೆನ ಪಸ್ಕ ಪರ್ಬದ ದಿನ ಕೈತಲಾವೊಂದಿತ್ತ್ಂಡ್. 5ಇಂಚ ಉಪ್ಪುನಗ ಯೇಸು ತನ ಕೈತಲ್‌ ಬರ್ಪಿ ಜನೊಕುಲೆ ಗುಂಪುನು ತೂದು ಫಿಲಿಪ್ಪುಡ, “ಮೊಕ್ಲೆಗ್ ವಣಸ್ ನಮ ಒಲ್ತುಡ್ದು ದೆತ್ತೊನುಗ?” ಕೇಂಡೆ. 6ತಾನ್ ಮಲ್ಪೆರೆ ಇತ್ತಿನವು ತನ್ಕ್ ತೆರಿದಿತ್ತ್ಂಡಲಾ ಫಿಲಿಪ್ಪುನು ಪರೀಕ್ಷೆ ಮಲ್ಪೆರೆ ಈ ಪಾತೆರ ಪಂಡೆ.

7ಐಕ್ ಫಿಲಿಪ್ಪು, “ಒರಿಯೊರಿಯಗ್ ಒಂತೊಂತೆ ತಿಕ್ಕೊಡಾಂಡಲಾ ಇರ್ನೂದು ಬೊಳ್ಳಿದ ಪಾವೊಲಿದ ರೊಟ್ಟಿಲಾ ಯಾವಂದ್,” ಪಂಡೆ

8ಅಪಗ ಆಯನ ಶಿಷ್ಯೆರೆಡ್ ಸೀಮೋನು ಪೇತ್ರನ ಮೆಗ್ಯೆ ಅಂದ್ರೆಯೆ ಪಂಡೆ. 9“ಮುಲ್ಪ ಒರಿ ಆಣನ ಕೈತಲ್‌ ಐನ್ ಜವೆಗೋದಿದ ರೊಟ್ಟಿಲಾ ರಡ್ಡ್ ಮೀನ್‌ಲಾ ಉಂಡು. ಆಂಡ ಈತ್ ಜನೊಕುಲೆಗ್ ಅವು ಒಯಿಕಾವು.”

10ಇಂಚ ಪನ್ನಗ ಯೇಸು, “ಜನೊಕುಲೆನ್ ವಣಸ್‌ಗ್ ಕುಲ್ಲಾಲೆ.” ಪಂಡೆ. ಆ ಜಾಗ್‌ಡ್ ಎಡ್ಡೆ ಪಜಿರ್ ಬುಲೆದಿತ್ತ್‌ಂಡ್, ಜನೊಕುಲು ಕುಲ್ಲೊಂಡೆರ್. ಅಂಜೊವುಲೇ ಹೆಚ್ಚಿಕಡಿಮೆ ಐನ್ ಸಾರ ಇತ್ತೆರ್. 11ಐಡ್ದ್ ಬೊಕ್ಕ ಯೇಸು ರೊಟ್ಟಿನ್ ದೆತ್ತೊಂದು ದೇವೆರೆನ್ ಸುಗಿತ್‌ದ್ ಕುಲ್ಲುದಿತ್ತಿನಾಕುಲೆಗ್ ಪಟ್ಟ್‌ದ್ ಕೊರಿಯೆ. ಐತ ಲೆಕ್ಕನೆ ಮೀನ್‌ನ್ಲಾ ಅಕ್ಲೆಗ್ ಬೋಡಾಯಿನಾತ್ ಪಟ್ಟ್‌ದ್ ಕೊರಿಯೆ. 12ಅಕುಲು ಬಂಜಾರ ತಿಂದಿನೆಡ್ದ್ ಬೊಕ್ಕ ಯೇಸು ತನ ಶಿಷ್ಯೆರೆಗ್, “ಒರಿದಿನೆನ್ ಒಟ್ಟು ಮಲ್ಪುಲೆ, ನೆಟ್ಟ್ ಒವುಲಾ ಹಾಳಾವೆರೆ ಬಲ್ಲಿ,” ಪಂಡೆ. 13ಆ ಐನ್ ಜವೆಗೋದಿದ ರೊಟ್ಟಿನ್ ಜನೊಕುಲು ತಿಂದ್‌ದ್, ಅಕುಲು ಒರಿದಿ ತುಂಡುಲೆನ್ ಒಟ್ಟು ಮಲ್ಪುನಗ ಪದ್ರಾಡ್ ಪುಡಯಿ ದಿಂಜಿಂಡ್.

14ಯೇಸು ಮಲ್ದಿನ ಈ ಕಾರ್ನಿಕೊನು ಅವುಲು ಇತ್ತಿನ ಜನೊಕುಲು ತೂದು, “ಲೋಕೊಗು ಬರೊಡಾಯಿ ಆ ಪ್ರವಾದಿ ಉಂಬೆನೇ ನಿಜ!” ಅಂದ್‌ದ್ ಪಂಡೊಂಡೆರ್ 15ಅಪಗ ಯೇಸು, ಅಕುಲು ಬತ್ತ್‌ದ್ ತನನ್ ಲೆತ್ತೊಂದು ಪೋದು ಅರಸು ಮಲ್ಪುನ ಗೇನೊಡುಲ್ಲೆರ್ ಪನ್ಪಿನೆನ್ ತೆರಿಯೊಂದು, ಕುಡೊರ ತಾನ್ ಮದೆ ಆದ್ ಒರಿಯೇ ಗುಡ್ಡೆಗ್ ಪೋಯೆ.

ಯೇಸು ನೀರ್‌ದ ಮಿತ್ತ್ ನಡತೊಂದು ಪೋಪಿನವು

(ಮತ್ತಾಯೆ 14:22-33; ಮಾರ್ಕೆ 6:45-52)

16ಬೈಯದಗ ಯೇಸುನ ಶಿಷ್ಯೆರ್ ಕಡಲ್‌ದಡೆಗ್ ಪೋದು 17ಓಡ ಮಿತ್ತಾರ್ದ್ ಕಡಲ್ದ ಸಾದಿಯಾದ್ ಆಯೆರೆಗ್ ಕಪೆರ್ನೌಮುಗು ಪೋಯೆರ್. ಅಪಗನೆ ಕತ್ತಲೆ ಆದಿತ್ತ್ಂಡ್, ಆಂಡ ಯೇಸು ನನಲಾ ಅಕ್ಲೆನ ಕೈತಲ್‌ ಬತ್ತ್‌ತ್ತಿಜೆ 18ಆತ್‌ನೆಂಗೆ ಸುಳಿಗಾಳಿ ಬೀಜೊಂದು ಕಡಲ್ದ ನೀರ್ ಅಡಿಮೇಲ್ ಆವೊಂದಿತ್ತ್ಂಡ್ 19ಅಕುಲು ಓಡೊನು ಒಚ್ಚೊಂದು ಹೆಚ್ಚಿಕಡಿಮೆ #6:19 ಮುಪ್ಪ ಫರ್‌ಲಾಂಗ್ ಪಂಡ್ಂಡ ಒಂಜಿಡ್ದ್ ರಡ್ಡ್ ಕಿ. ಮಿ. ಮೂಜಿ ಇಜ್ಜಾಂಡ ನಾಲ್ ಮೈಲ್ ದೂರ ಪೋಯಿ ಬೊಕ್ಕ ಯೇಸು ಕಡಲ್ದ ಮೇಲ್‌ಡ್ ನಡತೊಂದು ಓಡದ ಕೈತಲ್‌ ಬರ್ಪಿನೆನ್ ತೂದು ಪೋಡಿಯೆರ್. 20ಐಕ್ ಯೇಸು, “ಪೋಡ್ಯಡೆ, ಯಾನೇ.” ಅಂದ್‌ದ್ ಪಂಡೆ. 21ಅಪಗ ಯೇಸುನು ಓಡದ ಉಲಯಿ ದೆತ್ತೊನಿಯೆರೆಗ್ ಮನಸ್ ಮಲ್ತೆರ್, ಆ ಕ್ಷಣೊಟೇ ಓಡ ಅಕುಲು ಪೋಪಿ ಕರೆಕ್ ಮುಟ್ಟುಂಡು.

22ಮನದಾನಿ ಕಡಲ್ದ ಆಪೆದ ಬರಿಟ್ಟ್ ಉಂತುದಿತ್ತಿ ಜನೊಕುಲು ಯೇಸುನು ನಾಡೊಂದಿತ್ತೆರ್. ಮುಲ್ಪ ಒಂಜಿ ಓಡ ಇತ್ತಿನತ್ತಂದೆ ಬೇತೆ ಓಡೊಲು ಇತ್ತ್‌ಜಿ ಅಂದ್‌ದ್ ಶಿಷ್ಯೆರ್ ಮಾತ್ರ ಪಿದಾಡ್ದ್ ಪೋಯಿನತ್ತಂದೆ, ಯೇಸು ತನ ಶಿಷ್ಯೆರೆಡೊಪ್ಪ ಓಡ ಮಿತ್ತಾರ್ದ್‌ಜೆ ಅಂದ್‌ದ್ ಅಕ್ಲೆಗ್ ತೆರಿದಿತ್ತ್‌ಂಡ್.

23ಆಂಡ ಆತ್ ಪೊರ್ತುಗು ಬೇತೆ ಓಡೊಲು ತಿಬೇರಿಯೊಡ್ದು ಪಿದಾಡ್ದ್, ಯೇಸು ದೇವೆರೆನ್ ಸುಗಿತ್‌ದ್ ಜನೊಕುಲೆಗ್ ವಣಸ್ ಮಲ್ಪಾಯಿ ಜಾಗ್‌ದ ಕೈತಲ್ ಬತ್ತ್‌ದಿತ್ತ್ಂಡ್. 24ಇಂಚ ಉಪ್ಪುನಗ ಯೇಸು ಅಲ್ಪ ಇಜ್ಜೆ, ಆಯ ಶಿಷ್ಯೆರ್‌ಲಾ ಇಜ್ಜೆರ್ ಪಂಡ್ದ್, ಆ ಜನೊಕುಲು ತೂದು ತನ್ಕುಲೆ ಎಲ್ಯ ಓಡೊಡು ಕುಲ್ಲೊಂದು ಯೇಸುನು ನಾಡೊಂದು ಕಪೆರ್ನೌಮುಗು ಬತ್ತೆರ್.

ಯೇಸು ಜೀವದ ರೊಟ್ಟಿ

25ಬೊಕ್ಕ ಕಡಲ್ದ ಅಂಚಿದ ಕರೆಟ್ ಉಂತುದಿತ್ತಿ ಯೇಸುನು ತೂದು, “ಗುರುಕುಲೇ, ಈರ್ ಏಪ ಇಡೆಗ್ ಬತ್ತರ್?” ಅಂದ್‌ದ್ ಕೇಂಡಿನೆಕ್ಕ್.

26ಯೇಸು ಅಕ್ಲೆಡ, “ನಿಕ್ಲೆಗ್ ನಿಜಾದ್ ಪನ್ಪೆ, ನಿಕುಲು ತೂಯಿನ ಕಾರ್ನಿಕೊಲೆಡ್ದ್ ಅತ್ತ್, ಆಂಡ ಆ ರೊಟ್ಟಿ ತಿಂದ್‌ದ್ ಬಂಜಿ ದಿಂಜಿನೆಡ್ದೆ ಎನನ್ ನಿಕುಲು ನಾಡೊಂದುಲ್ಲರ್ 27ಬೆನ್ಲೆ, ಹಾಳಾದ್ ಪೋಪಿ ತಿನಸ್‌ಗಾದ್ ಬೆನೊಡ್ಚಿ, ನಿತ್ಯಜೀವೊಗು ಒರಿಯು ತಿನಸ್‌ಗಾದ್ ಬೆನ್ಲೆ. ಇಂಚಿತ್ತಿ ತಿನಸ್‌ನ್ ನರಮಾನಿ ಮಗೆ ನಿಕ್ಲೆಗ್ ಕೊರ್ಪೆ. ಐಕಾದೇ ಅಮ್ಮೆ ಆದುಪ್ಪು ದೇವೆರ್ ಆಯಗ್ ಮುದ್ರೆ ಪಾಡ್ದ್ ಅಧಿಕಾರ ಕೊರ್ತೆ.” 28ಅಪಗ ಅಕುಲು ಆಯಡ, “ದೇವೆರೆಗ್ ಮೆಚ್ಚಿಗೆ ಆಪಿ ಕೆಲಸೊಲೆನ್ ಮಲ್ಪೊಡಾಂಡ ಎಂಕುಲು ದಾದ ಮಲ್ಪೊಡು?” ಪಂಡೆರ್. 29ಯೇಸು ಉತ್ತರ ಕೊರ್ದು ಅಕ್ಲೆಗ್, “ದೇವೆರ್ ಮೆಚ್ಚುನ ಬೇಲೆ ದಾನೆಂದ್ಂಡ, ಆಯೆ ಕಡಪುಡ್ದು ಕೊರಿನಾಯನ್ ನಿಕುಲು ನಂಬುನವೇ,” ಪಂಡೆ.

30-31ಐಕ್ ಅಕುಲು ಅಂಚಾಂಡ, “ಎಂಕುಲು ತೂದು ನಂಬುಲೆಕ್ಕ ವಾ ಕಾರ್ನಿಕೊನು ತೋಜಾಪಾವ? ಎಂಕ್ಲೆನ ಹಿರಿಯೆರ್ ಕಾಡ್‌ಡ್ ಮನ್ನ ತಿಂದೆರ್, ಅಂದ್‌ದ್ ಶಾಸ್ತ್ರೊಡು ಬರೆತ್ತ್ಂಡತ್ತಾ, ‘ಉಂದೆನ್ ಪರಲೋಕೊಡ್ದು ಅಕ್ಲೆಗ್ ಕೊರಿಯೆ.’ ಈ ವಾ ಬೇಲೆ ಮಲ್ಪುವ?” ಅಂದ್‌ದ್ ಕೇಂಡೆರ್.

32ಯೇಸು ಅಕ್ಲೆಗ್, “ಯಾನ್ ನಿಕ್ಲೆಗ್ ನಿಜಾದ್ ಪನ್ಪೆ, ಮೋಶೆ ನಿಕ್ಲೆಗ್ ಪರಲೋಕೊಡ್ದು ರೊಟ್ಟಿ ಕೊರ್ತಿನಾಯೆ ಅತ್ತ್, ಎನ ಅಮ್ಮೆ ಪರಲೋಕೊಡ್ದು ನಿಜವಾಯಿನ ರೊಟ್ಟಿನ್ ನಿಕ್ಲೆಗ್ ಕೊರ್ಪೆ. 33ದೇವೆರ್ ಕೊರ್ಪಿನ ಆ ರೊಟ್ಟಿ ಒವು ಪಂಡ, ಆಯೆ ಪರಲೋಕೊಡ್ದು ಜತ್ತ್‌ದ್ ಬತ್ತ್‌ದ್ ಲೋಕದ ಜನೊಕುಲೆಗ್ ಜೀವ ಕೊರ್ಪಿನವೇ,” ಅಂದ್‌ದ್ ಪಂಡೆ.

34ಐಕ್ ಅಕುಲು, “ಕರ್ತವಾ, ಎಂಕ್ಲೆಗ್ ಆ ರೊಟ್ಟಿನ್ ಏಪಲಾ ಕೊರು,” ಪನ್ನಗ, 35ಯೇಸು ಅಕ್ಲೆಗ್, “ಜೀವದ ರೊಟ್ಟಿ ಯಾನೇ, ಎನ ಕೈತಲ್ ಬರ್ಪಿನಾಯಗ್ ಏಪೊಗ್ಲಾ ಬಡವು ಆವಂದ್, ಎನನ್ ನಂಬುನಾಯಗ್ ಏಪೊಗ್ಲಾ ಬಾಜೆಲ್ ಆವಂದ್. 36ನಿಕುಲು ಎನನ್ ತೂಯರ್ಡಲಾ ನಂಬುಜರ್ ಅಂದ್‌ದ್ ನಿಕ್ಲೆಗ್ ಪಂಡ್ದಿತ್ತೆ ಅತ್ತಾ? 37ಅಮ್ಮೆ ಎಂಕ್ ಕೊರ್ಪಿನವು ಮಾತಲಾ ಎನ ಕೈತಲ್‌ ಬರು; ಬೊಕ್ಕ ಎನ ಕೈತಲ್‌ ಬರ್ಪಿನಾಕುಲೆಗ್ ಯಾನ್ ಕಂಡಿತಾದ್ ದಂಕ್‌ದ್ ಪಾಡಯೆ. 38ದಾಯೆಗಂದ್ಂಡ ಎನ ಚಿತ್ತದ ಲೆಕ್ಕ ನಡಪೆರೆಗಾದ್ ಯಾನ್ ಬೈದಿಜಿ, ಎನನ್ ಕಡಪುಡ್ದಿನಾಯನ ಚಿತ್ತೊನು ಈಡೇರಿಸಾವೆರೆ ಪರಲೋಕೊಡ್ದು ಬೈದೆ. ಎನನ್ ಕಡಪುಡ್ದಿನಾಯನ ಚಿತ್ತ ದಾನೆಂದ್ಂಡ 39ಆಯೆ ಕೈ ದೆರ್ತ್ತ್‌ದ್ ಕೊರಿನೆಟ್ಟ್ ಒರಿಯನ್ಲಾ ದಂಕ್‌ದ್ ಪಾಡಂದೆ, ಯಾನ್ ಕಡೆ ದಿನೊಟು ಜೀವೊಡು ಲಕ್ಕಾವೊಡು ಇನ್ಪಿನವೇ ಆಯ ಚಿತ್ತ. 40ಮಗನ್ ತೂದು ಆಯನ್ ನಂಬುನ ಪ್ರತಿಯೊರಿಯಗ್ಲಾ ನಿತ್ಯಜೀವ ತಿಕ್ಕೊಡು ಪನ್ಪಿನವೇ ಎನ ಅಮ್ಮೆರೆನ ಚಿತ್ತ ಆದುಂಡು, ಬೊಕ್ಕ ಯಾನ್ ಕಡೆ ದಿನೊಟು ಆಯನ್ ಜೀವೊಡು ಲಕ್ಕಾವೆ,” ಪಂಡೆ.

41ಆಯೆ, “ಪರಲೋಕೊಡ್ದು ಜತ್ತ್‌ದ್ ಬತ್ತಿ ರೊಟ್ಟಿ ಯಾನೇ,” ಅಂದ್‌ದ್ ಪಂಡಿನೆಕ್ಕ್ ಯೆಹೂದ್ಯೆರ್ ಆಯನ ಸಂಗತಿಡ್ ಗುಣುಗುಟ್ಟುದು, 42“ಉಂಬೆ ಯೋಸೇಫು ಮಗೆ ಯೇಸು ಅತ್ತಾ, ಆಯನ ಅಪ್ಪೆಅಮ್ಮನ್ ಎಂಕುಲು ತೆರಿದತ್ತಾ, ಇತ್ತೆ ಉಂಬೆ ಪರಲೋಕೊಡ್ದು ಬೈದೆ ಅಂದ್‌ದ್ ಪನ್ಪಿನಿ ಎಂಚ?” ಅಂದ್‌ದ್ ಪಂಡೆರ್.

43ಐಕ್ ಯೇಸು ಅಕ್ಲೆಡ, “ನಿಕುಲು ನಿಕ್ಲೆನ ಉಲಯಿ ಗುಣುಗುಟ್ಟಡೆ. 44ಎನನ್ ಕಡಪುಡ್ದು ಕೊರಿನ ಅಮ್ಮೆ ಲೆಪ್ಪಂದೆ ಏರ್ಲಾ ಎನ ಕೈತಲ್‌ ಬರಯೆರ್, ಬೊಕ್ಕ ಯಾನ್ ಆಯನ್ ಆ ಕಡೇ ದಿನೊಟು ಜೀವೊಡು ಲಕ್ಕಾವೆ. 45‘ಅಕುಲು ಮಾತೆರ್ಲಾ ದೇವೆರೆಡ್ದ್ ಕಲ್ತಿನಾಕುಲಾದುಲ್ಲೆರ್,’ ಅಂದ್‌ದ್ ಪ್ರವಾದಿಲೆಡ್ ಬರೆತ್ಂಡ್. ಅಮ್ಮೆರೆಡ್ದ್ ಕೇಂಡ್ದ್ ಕಲ್ತಿನಾಕುಲು ಮಾತೆರ್ಲಾ ಎನ ಕೈತಲ್‌ ಬರ್ಪೆರ್. 46ಏರಾಂಡಲಾ ಅಮ್ಮೆರೆನ್ ತೂತ ಪಂಡ್ಂಡ ನಂಬಡೆ. ದೇವೆರೆ ಕಡೆಡ್ದ್ ಬೈದಿನಾಯೆ ಒರಿಯೇ ಅಮ್ಮೆರೆನ್ ತೂತಿನಾಯೆ. 47ಯಾನ್ ನಿಕ್ಲೆಗ್ ನಿಜಾದ್ ಪನ್ಪೆ, ನಂಬುನಾಯೆ ನಿತ್ಯಜೀವ ಪಡೆಪೆ. 48ಜೀವ ಕೊರ್ಪಿ ರೊಟ್ಟಿ ಯಾನೇ. 49ನಿಕ್ಲೆನ ಹಿರಿಯೆರ್ ಕಾಡ್‌ಡ್ ಮನ್ನ ತಿಂದ್‌ಂಡಲಾ ಸೈತ್‌ದ್ ಪೋಯೆರ್. 50ಪರಲೋಕೊಡ್ದು ಜತ್ತ್‌ದ್ ಬರ್ಪಿ ರೊಟ್ಟಿ ಎಂಚಿನವು ಪಂಡ, ಅವೆನ್ ತಿಂದಿನಾಯೆ ಸೈಪಿನೇ ಇಜ್ಜಿ. 51ಪರಲೋಕೊಡ್ದು ಜತ್ತ್‌ದ್ ಬೈದಿ ಜೀವ ಕೊರ್ಪಿ ರೊಟ್ಟಿ ಯಾನೆ, ಈ ರೊಟ್ಟಿನ್ ಏರಾಂಡಲಾ ತಿಂದೆಡ ಆಯೆ ಏಪೊತ್ತುಗ್ಲಾ ಬದುಕುವೆ, ಬೊಕ್ಕ ಯಾನ್ ಕೊರ್ಪಿನ ರೊಟ್ಟಿ ಎನ ಮಾಸನೇ, ಅವೆನ್ ಲೋಕದ ಜನೊಕುಲೆಗ್ ಜೀವ ತಿಕ್ಕೊಡು ಅಂದ್‌ದ್ ಕೊರ್ಪೆ,” ಪಂಡೆ.

52ಅಪಗ ಯೆಹೂದ್ಯೆರ್, “ಉಂಬೆ ತನ ಮಾಸೊನು ನಂಕ್ ತಿನಿಯೆರೆ ಎಂಚ ಕೊರ್ಪೆ?” ಅಂದ್‌ದ್ ತನ್ಕುಲೆ ಉಲಯಿ ಚರ್ಚೆ ಮಲ್ತೊಂಡೆರ್. 53ಐಕ್ ಯೇಸು ಅಕ್ಲೆಡ, “ನಿಕ್ಲೆಗ್ ನಿಜಾದ್ ಪನ್ಪೆ, ನಿಕುಲು ನರಮಾನಿ ಮಗನ ಮಾಸೊನು ತಿನಂದೆ ಆಯನ ನೆತ್ತೆರ್‌ನ್ ಪರಂದೆ ಇತ್ತ್ಂಡ ನಿಕ್ಲೆನ ಉಲಯಿ ಜೀವ ಇಜ್ಜಿ. 54ಎನ ಮಾಸೊನು ತಿಂದ್‌ದ್ ಎನ ನೆತ್ತೆರ್‌ನ್ ಪರ್ಪಿನಾಯೆ ನಿತ್ಯಜೀವೊನು ಪಡೆಪೆ. ಬೊಕ್ಕ ಆಯನ್ ಯಾನ್ ಕಡೇ ದಿನೊಟು ಜೀವೊಡು ಲಕ್ಕಾವೆ. 55ದಾಯೆ ಪಂಡ ಎನ ಮಾಸನೇ ನಿಜವಾಯಿನ ತಿನಸ್, ಎನ ನೆತ್ತೆರ್ ನಿಜವಾಯಿನ ಬಾಜೆಲ್. 56ಎನ ಮಾಸೊನು ತಿಂದ್‌ದ್ ಎನ ನೆತ್ತೆರ್‌ನ್ ಪರ್ಪಿನಾಯೆ ಎನಡೊಪ್ಪ ಉಪ್ಪುವೆ, ಯಾನ್ ಆಯಡೊಪ್ಪ ಉಪ್ಪುವೆ. 57ಜೀವಸ್ವರೂಪೆ ಆದುಪ್ಪು ಅಮ್ಮೆ ಎನನ್ ಕಡಪುಡುದೆ ಯಾನ್ ಅಮ್ಮೆರೆಡ್ದ್ ಬದುಕುಲೆಕ್ಕನೆ; ಎನನ್ ತಿನ್ಪಿನಾಯೆ ಆಯೆಲಾ ಎನಡ್ದ್ ಬದುಕುವೆ. 58ಪರಲೋಕೊಡ್ದು ಜತ್ತ್‌ದ್ ಬೈದಿ ರೊಟ್ಟಿ ಉಂದೇ. ನಿಕ್ಲೆನ ಹಿರಿಯೆರ್ ಮನ್ನ ತಿಂಡಲಾ ಸೈತೆರ್; ಉಂದು ಅಂಚತ್ತ್, ಈ ರೊಟ್ಟಿನ್ ತಿನ್ಪಿನಾಯೆ ಏಪೊತ್ತುಗ್ಲಾ ಬದುಕುವೆ,” ಪಂಡೆ 59ಯೇಸು ಕಪೆರ್ನೌಮುದ ಸಭಾಮಂದಿರೊಡು ಬೋಧನೆ ಮಲ್ಪುನಗ ಉಂದೆನ್ ಪಂಡೆ.

ನಿತ್ಯಜೀವದ ಪಾತೆರೊಲು

60ಆಯ ಶಿಷ್ಯೆರೆಡ್ ಮಸ್ತ್ ಜನ ಉಂದೆನ್ ಕೇಂಡ್ದ್, “ಉಂದು ಕಠಿಣದ ಪಾತೆರ, ಉಂದೆನ್ ಏರ್ಲಾ ಕೇನಯೆರ್?” ಅಂದ್‌ದ್ ಎನ್ನೊಂಡೆರ್. 61ಯೇಸು ತನ ಶಿಷ್ಯೆರ್ ಉಂದೆಕ್ಕಾದ್ ಗುಣುಗುಟ್ಟುವೆರ್ ಅಂದ್‌ದ್ ತಾನೆ ತೆರಿಯೊಂದು ಅಕ್ಲೆಡ, “ಈ ಪಾತೆರೊಲೆಡ್ದ್ ನಿಕ್ಲೆಗ್ ಬೇಜಾರ್ ಆಂಡ? 62ಅಪಗಾಂಡ ನರಮಾನಿ ಮಗೆ ತಾನ್ ಸುರು ಇತ್ತಿ ನಡೆಗೇ ಏರ್ದ್ ಪೋಪಿನೆನ್ ನಿಕುಲು ತೂಯರ್ಡ, ದಾನೆ ಎನ್ನ್‌ವರ್? 63ಆತ್ಮಡೇ ಜೀವ ಕೊರ್ಪಿನವು ಆತ್ಮನೇ. ಮಾಸ ಒಯಿಕ್‌ಲಾ ಬರಂದ್ ಯಾನ್ ನಿಕ್ಲೆಗ್ ಪಂಡಿ ಪಾತೆರೊಲೇ ಆತ್ಮಲಾ ಜೀವಲಾ ಆದುಂಡು 64ಆಂಡ ನಿಕ್ಲೆಡ್ ಕೆಲೆವೆರ್ ಉಂದೆನ್ ನಂಬಂದಿನಾಕುಲಾದುಲ್ಲರ್,” ಪಂಡೆ. ನಂಬಂದಿನಾಕುಲು ಏರ್, ಬೊಕ್ಕ ತನನ್ ಪತ್ತ್‌ದ್ ಕೊರ್ಪಿನಾಯೆ ಏರಂದ್‌ದ್ ಯೇಸುಗು ಸುರುಡ್ದೇ ತೆರಿದಿತ್ತ್‌ಂಡ್. 65ಬೊಕ್ಕ ಯೇಸು ಅಕ್ಲೆಡ, “ಅಮ್ಮೆರೆನ ಅಪ್ಪಣೆದಾಂತೆ ಎನ ಕೈತಲ್ ಬರಿಯೆರೆ ಸಾದ್ಯ ಇಜ್ಜಿ, ಅಂದ್‌ದ್ ಯಾನ್ ನಿಕ್ಲೆಗ್ ಸುರುಡ್ದೇ ಪನೊಂದಿತ್ತೆ,” ಪಂಡೆ.

66ಆನಿಡ್ದ್ ಬೊಕ್ಕ ಆಯನ ಶಿಷ್ಯೆರೆಡ್ದ್ ಮಸ್ತ್ ಜನ ಆಯನ್ ಬುಡ್ದು ಪಿರ ಪೋಯೆರ್ ಬೊಕ್ಕ ಆಯನ ಒಟ್ಟುಗು ಪೋಯಿಜೆರ್. 67ಯೇಸು ಉಂದೆನ್ ತೂದು ತನ ಪದ್ರಾಡ್ ಶಿಷ್ಯೆರೆಲೆಗ್ಲಾ, “ನಿಕುಲುಲಾ ಪೋವೊಡುಂದುಲ್ಲರಾ?” ಅಂದ್‌ದ್ ಕೇಂಡೆ.

68ಐಕ್ ಸೀಮೋನು ಪೇತ್ರೆ, “ಕರ್ತವಾ, ನಿನನ್ ಬುಡ್ದು ಎಂಕುಲು ನನ ಬೇತೆ ಏರೆಡೊಪ್ಪ ಪೋವೊಲಿ? ನಿತ್ಯಜೀವ ಕೊರ್ಪಿನ ಪಾತೆರೊಲು ನಿನಡನೇ ಉಂಡು; 69ಈ ದೇವೆರೆ ಪರಿಶುದ್ಧದಾಯೆನೇ ಪಂಡ್ದ್ ಎಂಕುಲು ನಂಬುದ ಬೊಕ್ಕ ತೆರಿದ.” ಅಂದ್‌ದ್ ಪಂಡೆ.

70ಐಕ್ ಯೇಸು, “ಪದ್ರಾಡ್ ಮಂದಿ ಆಯಿ ನಿಕ್ಲೆನ್ ಯಾನ್ ಅಜತ್‌ದ್ ದೆತ್ತೊಂಡೆ ಅತ್ತಾ? ನಿಕ್ಲೆಡ್ಲಾ ಒರಿ ಸೈತಾನ ಮಗೆ ಉಲ್ಲೆ,” ಪಂಡೆ. 71ಯೇಸು ಸೀಮೋನು ಇಸ್ಕಾರಿಯೋತನ ಮಗೆ ಯೂದನ ಪರವಾದ್ ಈ ಪಾತೆರೊನು ಪಂಡೆ. ಉಂಬೆ ಆ ಪದ್ರಾಡ್ ಮಂದಿಡ್ ಒರಿ ಆದಿತ್ತ್‌ದ್ ದುಂಬಗ್ ಯೇಸುನು ಪತ್ತ್‌ದ್ ಕೊರ್ಪಿನಾಯೆ ಆಯೆ.

Currently Selected:

ಯೋಹಾನೆ 6: ತುಳು

Highlight

Copy