मरकुस 5

ईसु नुगरी आत्मानै काड्यो

(मत्ती 8:28–34; लूका 8:26–39)

1बे दरिआव क परलै नाकै गिरासेनिया नाम का परदेस म गया, 2ईसु जद न्याव मऊँ उतर्यो जणा बठै एक मिनख मूसाणा मऊँ ईसु कनै आयो बिकै मांयनै नुगरी ओपरी बलाय ही 3बो मूसाणा क मांयनै रेह्तो हो बिनै कोईबी साँकळाऊँ कोनी बांद सक्यो। 4क्युं क बिनै बोळी बार साँकळाऊँ बांद्‍या हा पण बो साँकळानै तोड़ देतो अर बानै पिस गेरतो, बिनै कोईबी बस म कोनी कर सक्यो। 5बो मूसाणा अर डूँगरा म चिलाटी घालतो भटकतो, अर खुदनै भाठाऊँ मारतो हो।

6बो ईसुनै परैऊँ देखर बिकन भागर गयो अर बिकै धोक खाई 7अर बार घालतो बोल्यो, “ओ ईसु परमपिता परमेसर का बेटा थारो म्हारो काँई लेणदेण? ज मनै दिनघाल्या तो, थानै परमेसर की सोगन लागै।” 8(क्युं क ईसु बिनै खयो हो, “हे नुगरी इकै मांयनैऊँ निकळज्या।”) 9अर ईसु बिनै बुज्यो, “तेरो नाम काँई ह?” बो ईसुऊँ बोल्यो, “मेरो नाम पलटण ह क्युं क म्हें घणीसारी हां।” 10अर बो ईसुऊँ हात जो'ड़र अरदास करबा लाग्यो, “म्हानै देस निकाळो मना दे।”

11अर बि टेम बठै डूँगर प सूल्डा को रेवड़ चरै हो। 12जणा बा पलटण ईसुऊँ अरदास कर बोली, “म्हानै तू बामै जाबा दे जिऊँ म्हें बामै रळज्यावां।” 13जणा बो बानै हुकम दिओ अर बे सूगली ओपरी बलाय बि मिनख मऊँ निकळर बा सूल्डा क मांयनै जा रळी। सूल्डा करीब दो झार हा। बे सूल्डा डूँगर क उपरऊँई गुळगची खार दरिआव क मांयनै जार पड़्या अर डूबर मरगा।

14सूल्डानै चराबाळा भागर नगरी अर बिकै सारली ढाणी-ढ़फाण्या म जार ओ समचार सगळानै खे सुणायो। बठै जखो होयो हो बिनै देखबा ताँई लोग भेळा होगा। 15बे ईसु कनै आर देख्या जणा बो मिनख जिमै बे नुगरी-आत्मा ही बो पूरा गाबा पेर्या अर सतूना म बेठ्यो हो। अर बे बिनै देखर डरग्या। 16अर बि घटनानै देखबाळा बा मिनखानै बताबा लाग्या क जिकै मांयनै नुगरी-आत्मा ही बिकै सागै अर सूल्डा क सागै काँई होयो? 17लोग ईसुऊँ अरदास करबा लाग्या क, “तू अठैऊँ चल्यो जा।”

18जणा ईसु न्याव म चढबा लाग्यो जणा बो मिनख जिमै पेल्या नुगरी-आत्मा ही ईसुऊँ अरदास करबा लाग्यो, “मनै बी तेरै सागै लेचाल।” 19पण ईसु बिनै नट्यो अर बिनै बोल्यो, “तेरा घरा जा अर तेरा मिनखानै अ सगळी बाता बता जखो परबु तेरै ताँई कर्यो ह। अर बानै अंय्यां बी बता क परबु कंय्यांसिक तेर प दया करी ह।” 20अर बो मिनख चलेगो अर दस नगर्या म जार बठै का मिनखानै बताबा लाग्यो क ईसु बि ताँई कत्तो बडो चमत्कार कर्यो ह। इ काम की बजेऊँ मिनखानै ताजूब होयो।

मरेड़ी छोरी अर रोगली लूगाई।

(मत्ती 9:18–26; लूका 8:40–56)

21ईसु ओज्यु दरिआव पार कर किनारै प हो जदई बिकै च्‍यारूमेर घणीसारी भीड़ भेळी होगी। 22जणा यहूदि अरदास घर का अधिकारी मऊँ याईर नाम को कोई मिनख हो, बो बठै आयो अर बो ईसुनै देख्यो अर बिकै पगा पड़र 23अरदास करतो बोल्यो, “मेरी नानी छोरी मरबाळी ह, म तेरूँ हात जोड़ खेऊँ हूँ मेरै सागै चालर तेरो हात बिपै धरदे जिऊँ बा बच जावै।” 24जणा ईसु बिकै सागै चाल पड़्यो अर घणीसारी भीड़ बी बिकै गेल होली। अर लोग बिपै टूटर पड़ै हा।

25बामै एक लूगाई ही जिकी बारा बरसाऊँ न्याह्णी कोनी थमरी ही। 26बा सगळा जतन कर देखली अर भात-भात का बेदा की दवाई लेर देखली पण भापड़ी क क्युंई अराम कोनी हो। अर जोक्यु बिकन पुण-पावलो हो बो बी इ बिमारी की दवा-दारू म बोया बेठी ही। पण बिकी दसा घणी खराब होगी। 27-28जद बा ईसु क बारां म सुण्यो जणा बा भीड़ क मांयनैऊँ ईसु क गेल आई, क्युं क बा आपका हिया म ध्यार राखी ही, “ज म ईसु का कुर्ता की कोर क हात अड़ा द्‌युँ जणा म निरोगी होज्यास्युं।” अर जंय्यांई बा बिका गाबा क हात अड़ायो। 29बिको हात्युहात लोय भेबो बंद होगो अर बा आपकी काया म जाणगी क म निरोगी होगी हूँ। 30अर जदकी जद ईसुनै बी लाग्यो क बिकै मांयनैऊँ सक्‍ति निकळी ह। ईसु गेलनै मुड़र बुजबा लाग्यो, “मेरा गाबा क कूण हात अड़ायो ह?” 31जणा ईसु का चेला बिनै बोल्या, “तू देखर्यो ह क भीड़ तनै च्‍यारूमेरूँ दबाया जारी ह। अर तू बुजै ह क थारै कूण हात अड़ायो?” 32पण ईसु च्‍यारूमेर देख्तो रिह्यो क अंय्यां को काम कूण कर्यो ह। 33बा लूगाई जाणती ही क बिकै सागै काँई होयो ह? बा डरती-डरती आई अर ईसु क पगा म पड़र सगळी बाता सची-सची बता दि। 34अर ईसु बिऊँ बोल्यो, “बेटी तू तेरा बिस्वास की बजेऊँ निरोगी करी गई ह, सुकऊँ चली जा अर बिमारीऊँ बची रेह।”

35बो अंय्यां बोलई रिह्यो हो अत्ता मई यहूदि अरदास घर का अधिकारी क घराऊँ लोग आया अर बे याईरऊँ बोल्या, “इब गरूजीनै दिन मना घालो क्युं क थारी छोरी तो चलती री।” 36ईसु बाकी बातानै सुण्यो अर याईरऊँ बोल्यो, “डरै मना बस तू तो बिस्वास राख।” 37अर ईसु बठै सगळानै छोड आपकै सागै पतरस, याकूब अर याकूब का भाई यहून्नानै लेर 38याईर क घरा गयो। अर बठै देख्यो क लोग जोर-जोरऊँ बार-घोड़ो मचा राख्यो ह। 39बो मांयनै गयो अर बाऊँ बोल्यो, “थे क्युं बार-तोबा मचार्या हो? छोरी तो मरी कोनी पण सुती ह।” 40बिकी इ बातनै सुणर लोग बिको तमासो करबा लाग्या। पण ईसु मिनखानै बारनै का'डर छोरी का माँ-बाप अर आपका चेलानै सागै लेर बठै गयो जि कोठा म छोरी ही। 41ईसु छोरी को हात पकड़्यो अर बोल्यो, “तलीता कूमी! (इको मतबल ह नानी छोरी) म तनै बोलुँ हूँ खड़ी होज्या।” 42अर बा नानी छोरी तावळिसी खड़ी होगी अर अठिनै-बठिनै चालबा-फिरबा लागी। (बा छोरी बारा बरस की ही) बे बिनै देखर ताजूब म पड़गा। 43ईसु क सागै जखा हा बानै बो चेतार ओडायो क इ बात क बारां म कोईनैई मना खिज्यो अर बो बोल्यो, “इ छोरीनै खाबा ताँई क्युं द्‍यो।”

Currently Selected:

मरकुस 5: एस डब्लु वी

Highlight

Copy