लूका 2

ईसु को जलम

(मत्ती 1:18–25)

1बा दिना राजा अगस्तुस ओ आदेस बटवायो क सगळा रोमी राज का मिनखा को नाम दरज कर्यो जावै#2:1 नाम दरज कर्यो जावै चुंगी लेबा बेई।। 2आ रोमी राज की पेली जणगणना ही। आ बि टेम का होई, जि टेम सिरीया को जमीदार कबरीनियुस हो। 3जणा सगळा मिनख नाम दरज कराबा आप-आप क गाँव गया। 4जणा युसूफ बी गलिल का नासरत नगरऊँ यहूदिआ म दाऊद की जन्मभौम बेतलम गयो क्युं क बो दाऊद का कूणबा अर बिकी पिडी को हो। 5नाम दरज कराबा बो मरीयम क सागै गयो जिकै सागै बिकी सगाई हो राखी ही अर बा आसऊँ ही 6अंय्यां होयो क बठैई मरीयम क जापा की घड़ी आगी। 7अर बिकै पेलीपोत को छोरो होयो जिनै बा गाबा म लपेटर ल्हास म सुवायो क्युं क बानै रेह्बा की झघा कोनी मिली।

गुवाळ्यानै ईस्बर नगरी दुता को संदेसो

8अर रातनै बि इलाका की रोई म गुवाळ्या आप-आपका रेवड़ा की रूखाळी करर्या हा। 9अर परबु को एक ईस्बर नगरी दुत बाकै सारै आर खड़्यो होगो अर बाकै च्यारूमेर परबु की मेमा को तेज चमक्यो जिऊँ बे डर क मारै धुजबा लागगा। 10जणा बो ईस्बर नगरी दुत बाऊँ बोल्यो, “डरो मना म थानै चोखो समचार सुणाऊँ हूँ, जखो सगळा मिनखा ताँई होसी। 11क्युं क थानै बचाबाळा मसी परबु को जलम आज दाऊद की नगरी म होगो ह। 12अर इकी पिछाण आ ह क थानै बो जलम्यो टाबर ल्हास म गाबा म लिपटेड़ो मिलसी।” 13अत्ता मई बठै ईस्बर नगरी दुत क सागै ईस्बर नगरी दुता की भीड़ की भीड़ परगट होई अर अंय्यां बोलर परमेसर को गुणगान करबा लागी 14क, “ईस्बर नगरी म परमेसर की जे-जैकार हो अर धरती प बा मिनखानै स्यांती मिलै जिऊँ बो राजी ह।”

15जद बे ईस्बर नगरी दुत बठैऊँ ओटा ईस्बर नगरी चलेग्या जणा बे गुवाळ्या आपसरी म बतळाया क, “आओ क्युंनै आपा इ बातनै बेतलम चालर देखां जखी आपानै परबु बताई ह।” 16जणा बे तावळासा जार मरीयम, युसूफनै अर ल्हास म बि टाबरियानै देख्या। 17अर देखर बे गुवाळ्या इ टाबरिया क बारां म बोलेड़ी बाता बानै बताई। 18अर जत्ता बी गुवाळ्यानै सुण्या बे ताजूब कर्या। 19पण मरीयम बा सगळी बातानै आपका हिया म राखर बिचार्या करती ही। 20अर बे गुवाळ्या जंय्यां की बाऊँ बोल्यो गयो हो बंय्यांई सगळी बातानै देखर परमेसर को गुणगान करता पाछा चलेग्या।

ईसुनै मनदर म लेर जाबो

21 # लूक 1:31 आठवा दिन जद बि टाबर की सुन्नत करबा को टेम आयो जणा बिको नाम ईसु काड्यो, ओ नाम ईस्बर नगरी दुत बिकै पेट म पड़बाऊँ पेलीई बता दिओ हो। 22जणा मूसा का नेम-कायदा गेल जच्चा को सुद होबा#2:22 सुद होबा यहूदि मिनखा का समाज म मूसा का नेम-कायदा गेल जच्चा चाळिस दिना ताँई असुद समजी जावै ह ओज्यु सुद होबा ताँई बिनै दो बाता करबो जरूरी होवै 1 ओ टेम चाळिस दिना को ह 2 बिनै बलि चढाणी पड़ै ह। को दिन आयो बि टेम युसूफ अर मरीयम बि टाबरनै परमेसर क सामै हाजिर करबानै यरूसलेम लेग्या। 23जंय्यां परबु का नेम-कायदा म मंडर्यो ह, “हर पेलीपोत का छोरानै परमेसर की सेवा ताँई टाळबो पड़सी।” 24अर बे बि परबु का नेम-कायदा गेल मोडी को एक जोड़ो नहिस कबूतरा को जोड़ो बलि चढाबा गया।

25यरूसलेम म पबितर आत्माऊँ भरेड़ो समोन नाम को एक खरो अर भगत मिनख हो जखो इजरायल की अजादिनै उडिकर्यो हो। 26अर पबितर आत्मा बिनै आ बता राखी ही क परबु का भेजेड़ा मसीनै देख्या बिना तनै मोत कोनी आवै। 27अर पबितर आत्मा बिनै बडा अरदास घर म ल्याई। अर बि टेमई ईसु मसी का माँ-बाप नेम-कायदा की रिती पूरी करबा ताँई ईसुनै ल्याया। 28जणा समोन बि टाबरनै आपकी गोद्‍या म लेर, परमेसर को गुणगान कर बोल्यो, 29“परबु थे थारा कह्यानै पूरो कर्या हो इब थारो दास सुक-स्यांतीऊँ मर सकै ह। 30क्युं क मेरी आँख्या थारा भेजेड़ा छुटकारो देबाळानै देखली। 31जिनै थे सगळा मिनखा की आँख्या क सामै रच्यो ह। 32ओ बा गैर-यहूदि मिनखा ताँई थारो गेलो दिखाबाळो उजाळो अर थारा इजरायल का मिनखा ताँई मेमा ह।” 33बिकै बारां म आ बातानै सुणर बिका माँ-बाप ताजूब कर्या। 34आ बात होबा क पाछै समोन बानै आसिरबाद देर बिकी माँ मरीयमऊँ बोल्यो, “इ टाबरनै इजरायल म कयानै डूबाबा अर तारबा को कारण बणबा अर परमेसर की पिछाण बणबा ताँई जिको बिरोद कर्यो ज्यासी पैदा कर्यो गयो ह। 35जिऊँ कया की पोल चोड़ै आसी। अर तेरी आत्मा तड़पसी।”

हन्ना की गुवाई

36अर बठै हन्ना नाम की परमेसर की खेबाळी एक बूडी लूगाई ही। अर बा आसेर का कूणबा का फानूल की छोरी ही। अर बा आपकै ब्या क सात बरसा ताँई सुहागण ही। 37इब बा चोरासी बरस की होरी ही। अर बा कदैई मनदरनै कोनी तज्यो बा रात-दिन बरत अर अरदास क सागै परबु की भगती करती। 38बि टेम बा आर परमेसर को धनेवाद दिओ अर बा सगळानै जखा यरूसलेम का छुटकारानै उडिकर्या हा बि टाबर क बारां म बतायो।

युसूफ अर मरीयम को पाछो घरा जाबो

39 # मत्त 2:23 परबु का नेम-कायदा गेल सक्यु सलटार बे पाछा गलिल म आपकी नगरी नासरत म आग्या। 40अर बो टाबरियो होळ्या-होळ्या सागेड़ो मोट्यार होगो अर बुदी म बढतो गयो अर बिपै परमेसर की दया ही।

टाबर ईसु

41बिका माँ-बाप फसै का त्युंहार प आई बरस यरूसलेम जाया करता हा। 42जद बो बारा बरसा को होयोक जणा बे फसै का त्युंहार की रीत गेल यरूसलेम गया। 43जद त्युंहार खतम होयो जणा बे घरा जाबा लाग्या पण ईसु बठैई रेह्गो अर बिका माँ-बापनै इको बेरो कोनी हो। 44अर बिकाळा माँ-बाप इ भेम म हा क बो अठैई आपणा कोईसा सागैहाळा क सागै होसी। अंय्यां करता-करता एक दिन बितगो। जणा बे आपका सगा-सम्बंदिआ अर जाणकारा म बिनै ढुंढबा लागगा। 45अर बो बानै लाध्योई कोनी जणा बे बिनै ढुंढता-ढुंढता ओज्यु यरूसलेम आया। 46तीन दिना क पाछै बो बानै ज्ञानीधान्या म बेठ्यो बाकी सुणतो अर बाऊँ सुवाल जुबाब करतो मनदर म लाध्यो। 47अर जत्ता बी बिनै सुणै हाक बे सगळा बिका समजदारी भर्या जुबाबा प ताजूब कर्यो। 48बिका माँ-बाप बिनै देखर भोचंगा होगा अर बिकी माँ बिऊँ बोली, “मेरा लाल तू म्हारै म आ काँई करी? तेरो बापू अर म तनै ढुंढता-ढुंढता हिरान होगा।” 49जणा ईसु बाऊँ बोल्यो, “थे मनै क्याले ढुंढा हा? थानै बेरो कोनी के? मनै मेरा परम-पिता क घरा होणोई ह।” 50पण ईसु की बात बाकै पलै कोनी पड़ी। 51अर इकै पाछै बो बाकै सागै पाछो नासरत आगो अर बाकै कह्या म चालतो हो। बिकी माँ आ सगळी बातानै आपका हिया म धर राखी ही। 52ईसु काया, बुदी, परमेसर अर मिनखा की छतर-छाया म बढतो गयो।

Currently Selected:

लूका 2: एस डब्लु वी

Highlight

Copy