यहून्ना 20

खाली कबर

(मत्ती 28:1–8; मरकुस 16:1–8; लूका 24:1–12)

1सपता का पेला दिन दितबारनै, भागपाट्याई मरीयम मगदलिनी कबर प आई अर देखी क कबर का मुंडा को भाठो हटेड़ो ह। 2जणा बा भागर समोन पतरस अर बि दुसरा चेला क, जखो लाडलो खुवातो हो कनै गई। अर बाऊँ बोली, “बे परबुनै कबरऊँ काड लेग्या हीं अर म्हानै कोनी बेरो क बानै कठै धर्या हीं।”

3इकै पाछै पतरस अर बो दुसरो चेलो कबर प जाबा ताँई रवाना होया। 4बे दोन्यु एक सागै भागर्या हा पण दुसरो चेलो पतरसनै गेलनै छोडगो अर कबर प बिऊँ अगाऊ जा पुग्यो। 5बो झुकर देख्यो क बठै कफन हाळा गाबल्या पड़्या हीं पण बो मांयनै कोनी गयो। 6जणा बि टेमई समोन बी बठै आ पुग्यो अर कबर क मांयनै जार देख्यो क बठै कफन हाळा गाबल्या पड़्या हीं। 7अर जखो गाबो कबर म म्हेलती टेम बाकै सीर प हो बो कफन क सागै कोनी हो, पण एक झघा सामटेड़ो पड़्यो हो। 8इकै पाछै बो दुसरो चेलो जखो कबर प पेल्या पुग्यो हो, मांयनै जार देख्यो अर बिस्वास कर्यो। 9बे हाल बी सास्तर का आंकनै कोनी समज्या क, “बो मरेड़ा मऊँ पक्कोई जी उठसी।” 10इकै पाछै बे चेला पाछा घरा चलेगा।

मरीयम मगदलिनीनै ईसु को दरसाव

(मत्ती 28:9,10; मरकुस 16:9–11)

11मरीयम रोती कूकती कबर क बारनै खड़ी ही अर रोती कूकती बा कबर क मांयनै झुकाळी मारी। 12जणा बिनै जठै ईसु की लास पड़ी ही बठै दो ईस्बर नगरी दुत भळका मारता गाबा पेर्या दिख्या। एक तो सीराणै हो अर दुसरो पगात्या बेठ्यो हो। 13बे बिऊँ बुज्या, “स्याणी, तू क्याले रोवै ह?”

बा बोली, “बे मेरा परबुनै उठा लेग्या अर मनै बेरो बी कोनी क, बे बानै कठै धर्या।” 14आ बोलर बा मुड़ी अर बा देखी क बठै ईसु खड़्या हीं पण बा कोनी जाणी क बो ईसु ह।

15ईसु बिऊँ बोल्यो, “स्याणी, तू क्याले रोवै ह अर तू किनै ढुंढै ह?”

बा आ सोचर क ओ माळी ह, बाऊँ बोली, “स्याणो ज थे बानै कठिनै धर्या हो जणा मनै बताओ क थे बानै कठै धर्या हो? म बानै मेरै सागै लेज्यास्युं।”

16ईसु बिऊँ बोल्यो, “मरीयम।”

बा गेलनै घूमी अर इबरानी भासा म बोली, “रब्बूनी,” जिको मतबल “गरूजी ह।”

17ईसु बिऊँ बोल्यो, “मेरै हात मना अड़ा क्युं क म हाल ताँई परम-पिता क कनै उपर कोनी गयो हूँ। तू तो अंय्यां कर मेरा भाई-भाणा कनै जा अर बानै बता, ‘म मेरा अर थारा परम-पिता, परमेसर क कनै उपर जार्यो हूँ।’ ”

18मरीयम मगदलिनी आ बोलतीई चेला कनै आई क, “म परबुनै देखी हूँ।” अर जोक्यु ईसु बिऊँ बोल्यो हो बे बाता बानै खे सुणाई।

ईसु को चेलानै दरसाव

(मत्ती 28:16–20; मरकुस 16:14–18; लूका 24:36–49)

19सपता का पेला दिन दितबारनै, आथण्या बिका चेला यहूदि नेता क डर का मारै किवाड़ जड़र मांयनै बड़र्या हा। बि टेमई ईसु बठै मांयनै आर बाकै बिचमै खड़्यो होगो अर बाऊँ बोल्यो, “थानै स्यांती मिलै।” 20आ बोलर बे बानै आपका हाता का अर पासळ्या का घाव दिखाया। चेला जद परबुनै देख्या जणा बे बोळा राजी होया।

21जणा ईसु बाऊँ ओज्यु बोल्यो, “थानै स्यांती मिलै। जंय्यां परम-पिता मनै भेज्यो ह, ठिक बंय्यांई म थानै भेजूँ हूँ।” 22आ खेर बे बापै फूंक मारी अर बाऊँ बोल्यो, “पबितर आत्मानै ल्यो। 23#मत्त 16:19; 18:18जखा मिनखा का पाप थे माफ करस्यो बानै माफी मिलसी अर जाका पाप थे माफ कोनी करो बे माफ कोनी कर्या ज्यासी।”

ईसु अर थोमा

24थोमा बा बारां मऊँ एक हो जिनै जोड़लो बी खेवै ह, बो ईसु क आबा की टेम बठै बा चेला क सागै कोनी हो। 25जणा बे दुसरा चेला बिऊँ बोल्या, “म्हें परबुनै देख्या हां।”

पण बो बानै बोल्यो, “जद ताँई म बाकै हाता म किलां का निसान नइ देखल्युं अर बामै मेरी आँगळी नइ घालल्युं अर बिकी कोल म मेरो हात नइ घालर देखल्युं जद ताँई मनै बिस्वास कोनी होवै।”

26जणा आठ दिना का पाछै ईसु का चेला ओज्यु घर क मांयनै हा। इबकै थोमा बी बाकै सागै हो अर किवाड़ बंद हा। जणा ईसु आगो अर बाकै बिचमै आर बोल्यो, “थानै स्यांती मिलै।” 27जणा बो थोमाऊँ बोल्यो, “आ, अर तेरी आँगळ्या घालर मेरा हात देख अर तेरा हातनै मेरी कोल म घाल। भेम करबो छोड अर बिस्वास राख।”

28जणा जुबाब म थोमा बोल्यो, “ओ मेरा परबु, ओ मेरा परमेसर।”

29ईसु बिऊँ बोल्या, “तू मनै देखर मेर प बिस्वास कर्यो ह। पण भागहाळा हीं बे मिनख जखा मनै बिना देख्या बिस्वास करीं हीं।”

आ पोथी यहून्ना क्याले मांडी?

30ईसु ओर बी बोळा चमत्कार आपका चेलानै दिखाया जाको जिकर इ पोथी म कोनी मांड्यो गयो। 31अर जखी बाता अठै मांडेड़ी ह बे इ ताँई ह क, थे बिस्वास करो क ईसुई परमेसर को बेटो मसी ह अर बिस्वास करके, थे बिका नाम म जीवन पाओ।

Currently Selected:

यहून्ना 20: एस डब्लु वी

Highlight

Copy