काम 21

पोलुस को यरूसलेम जाबो

1बठैऊँ बिदा होर म्हें पाणी क गेला कोस अर रूदुस टापू होताहोया दो दिन पाछै पतरा नगरी म पुग्या। 2जठै म्हानै फिनीके जातो एक झाज हात आगो जिपै म्हें सवार होर चाल पड़्या। 3म्हानै साईपरस टापू दिख्यो जणा म्हें बिकै दिखणाद म जार सिरीया जाबाळो गेलो पकड़ लिओ अर सूर नगरी म रूक्या क्युं क बठै झाजऊँ माळ उतारनो हो। 4अर बठै क्युंक बिस्वास्यानै देखर म्हें बाकै सागै सात दिना ताँई रिह्या अर पबितर आत्मा क बताया गेल बे पोलुसऊँ बोलता हा की यरूसलेम म जाबा को बिचार छोड दे। 5आठवा दिन म्हें बठैऊँ रवानगी करी अर बे आपका टाबर-टिकरा समेत म्हानै नगरी क बारनै छोडर गया अर समदर क किनारा प पुगर म्हें गोडा टे'कर अरदास करी, 6जणा बाऊँ बिदा होर म्हें तो पाणी का झाज प चढगा अर बे आप-आप क घरा चलेगा।

7जणा म्हें पाणी क गेला पतूलिमयिस आया अर बिस्वासी भायानै नमस्कार कर बाकै सागै एक दिन रिह्या। 8#काम 6:5; 8:5अर दुसरा दिन बठैऊँ चालर म्हें कैसरिया पुग्या अर फलिपूस जखो चोखा समचार को परचार कर्या करतो हो बिकै घरा रूक्या जखो यरूसलेम म टाळेड़ा बा सात जणा मऊँ एक हो। 9बिकै च्यार कुंआरी छोर्या ही जखी परमेसर की खेबाळी ही। 10#काम 11:28अर जद म्हानै बठै रेह्ता बोळा दिन होगा जणा अगबुस नाम को एक परमेसर की खेबाळो यहूदिआऊँ आयो। 11बो म्हारै कनै आर पोलुस को कमर बांदबा को पट्टो लेर बिऊँ आपका हात पगानै बांद लिओ अर खेबा लाग्यो, “जिको ओ कमर पट्टो ह बिनै यरूसलेम म यहूदि मिनख अंय्यांई बांदसी अर बिनै परमेसरनै नइ ध्यारबाळा मिनखा क हाता म सूपसी आ बात मनै पबितर आत्मा बतावै ह।” 12अर आ बात सुणर म्हें अर बठै का मिनख पोलुसऊँ अरदास करबा लागगा की यरूसलेम नइ जावै। 13पण पोलुस बाऊँ बोल्यो, “थे ओ काँई करो हो? आ ढंगा रो-रोर थे मेरो मन कचो करो हो, म तो परबु ईसु का नामऊँ यरूसलेम म खाली बंदि बणबा ताँई नइ पण मरबा ताँई बी त्यार हूँ।” 14अर जद बो कोनी मान्यो जणा म्हें अंय्यां खेर क, “परबु की इंछ्या पूरी होवै” चुप होगा।

15आ दिना क पाछै म्हें त्यार होर यरूसलेम ताँई रवानगी करी। 16कैसरियाऊँ बी क्युंक बिस्वासी म्हारै सागै होगा अर म्हानै साईपरस का मनासोन नाम का एक मिनख क घरा ल्याया जखो सरूपोत का बिस्वास्या मऊँ एक हो अर म्हें बठैई रूक्या।

पोलुस को याकूबऊँ मिलबो

17म्हारै यरूसलेम पुगबा क पाछै बिस्वासी भाईड़ा राजी होर म्हारूँ मिल्या। 18अर दुसरा दिन पोलुस अर म्हें याकूब क कनै गया जठै सगळा बिस्वासी मंडळी का मुखिया बी हा। 19जणा बो बानै नमस्कार कर सगळा कामा क बारां म बतायो जखा काम परमेसर बिकी सेवा क जरिए गैर-यहूदिआ क मांयनै कर्यो। 20आ सुणर बे परमेसर की बडाई करबा लागगा अर इकै पाछै बोल्या, “मेरा लाडला बिस्वासी भाईड़ा, तू देखै ह क यहूदिआऊँ मिनख झारा की तादाद म बिस्वास कर्या हीं अर मूसा का नेम-कायदा प चालबा ताँई कट्टर हीं। 21अर बानै तेरा बारां म आ पटी पढाई गई ह की तू गैर-यहूदि मिनखा म रेह्बाळा यहूदि मिनखानै आ सीखावै ह की थानै नइ तो नेम-कायदानै मानबा की जुर्त ह अर नइ थानै थारा टाबरा की सुन्नत कराबा की अर नइ पेलड़ा रिती-रिवाजा की लिकटी पिटबा की जुर्त ह। 22इब काँई कर्यो जाय? क्युं क मिनखानै तो बेरो पड़सी क तू आयड़ो ह। 23जणा इब तू म्हारो खेणो मान, अठै च्यार मिनख हीं जखा मन्नत माँगी ही। 24इब तू अंय्यां कर बाकै सागै सुद हो अर बानै सीर मुंडाबा को खरचो दे। अर जद तू अंय्यां करसी जणा कोईनै बी सपाई देबा की जुर्तई कोनी क्युं क बे तनै अंय्यां करता देखसी जणा सगळा मतैई जाणज्यासी क जखी बाता बे तेरा बारां म सुणी ही बे सगळी झूठी ह अर तू खुदई नेम-कायदानै मानबाळो ह। 25#काम 15:29अर जठै ताँई गैर-यहूदिआ का बिस्वास्या को सुवाल ह बा ताँई म्हें कागद मांडर दे दिओ क बे मूरती क आगै चढाईड़ो मास, लोय अर गळो घोटेड़ो ज्यानबर को मास खाबाऊँ अर पराई लूगाया क सागै गळत कामाऊँ परै रेह्‍वै।” 26जणा पोलुस दुसरा दिन बा मिनखा क सागै सुद होर मनदर म गयो अर आ बतायो की कूणसा दिन सुद होबा का दिन पूरा होसी अर बा सगळा ताँई चढावो चढायो जासी।

पोलुस को पकड़्यो जाबो

27अर जद बे सात दिन पूरा होबाळा हा जणा एसिया का यहूदि मिनख मनदर म पोलुसनै देखर भीड़ का सगळा मिनखा का कान भर दिआ अर अंय्यां चिलार बिनै पकड़ लिआ। 28“ओ इजरायल का रेह्बाळो म्हारी मदद करो ओ बोई मिनख ह जखो हर कठै मूसा का नेम-कायदा, आपणै अर इ मनदर क खिलाप सीख देतो फिरै ह। अर ओ यूनानीयानै मनदर म ल्यार इ पबितर झघानै सूगलो कर्यो ह।” 29#काम 20:4क्युं क इऊँ पेली बे बिनै इफिसीआ तरीफिमुस क सागै देख्या हा अर आ समजर्या हा की बो बिनै मनदर म लेर आयो हो। 30इकै पाछै पूरी नगरी म बबाळ माचगो अर लोग भाग-भागर भेळा होगा अर पोलुसनै पकड़र मनदर मऊँ बारनै घसिटताई ल्याया अर हात्युहात मनदर का कुआड़ बंद कर दिआ। 31अर जद बे बिनै मारबाळाई हाक जणा रोमी पलटण का सरदारनै#21:31 रोमी पलटण का सरदारनै ओ एक झार सिपाईड़ा क उपर हो। खबर लागी क सगळी यरूसलेम नगरी म बबाळ माचर्यो ह। 32जणा बो सिपाईड़ा अर सुबेदारनै लेर बेगोसो मोका प पुग्यो जणा भीड़ सिपाईड़ा अर सरदारनै देखर पोलुसनै पिटबो बंद कर दिओ। 33जणा पलटण को सरदार बिकन आर बिनै साँकळऊँ बांदबा ताँई ओडार बुज्यो, “ओ कूण ह अर ओ काँई अपराद कर्यो ह?” 34पण भीड़ मऊँ कोई क्युं बकबा लागर्यो अर कोई क्युं अर इ रोळा-बेदा क चलतै पलटण का सरदारनै कोनी बेरो पड़्यो क होयो के ह, जणा बो बिनै सेनाहाळा गड म लेज्याबा ताँई ओडायो। 35अर जद बे सिढ्या प पुग्या जणा झाळा भरेड़ी भीड़ की बजेऊँ सिपाईड़ा पोलुसनै अधर उठार लेज्याणो पड़्यो। 36क्युं क बे अंय्यां चिलाता बिकै गेल होर्या हा क, “इनै मार गेरो।”

पोलुस क मुंडा खुदको बचाव

37अर जद बे बिनै सेनाहाळा गड म लेज्याबाळा हा, जणा पलटण का सरदारनै पोलुस बोल्यो, “थे ओडाओ तो म थारूँ क्युं बोलबो चाऊँ हूँ।”

जणा बो बोल्यो, “तनै यूनानी बोलबो आवै ह के? 38जणा तो तू बो मिसरी मिनख कोनी के? जखो क्युंक दिना पेली बगावत कर च्यार झार बगावत्यानै उजाड़ म लेगो हो।”

39जणा पोलुस बोल्यो, “अजी म बो कोनी। म तो कलिकीया की मानेड़ी नगरी तरसुस को रेह्बाळो यहूदि मिनख हूँ। म थारूँ हात जो'ड़र खेऊँ हूँ की थे मनै मिनखाऊँ बात करबा को मोको द्‍यो।” 40अर जद बो बिनै बोलबा ताँई ओडायो जणा बो पेड़ी प खड़्यो होर आपका हातऊँ इसारो कर्यो। अर जद लोग चुप होगा जणा बो इबरानी भासा म बोलबा लागगो।

Currently Selected:

काम 21: एस डब्लु वी

Highlight

Copy