Markos 16

Muudus Peeyah Hnqilan ka Yesu

(Mat 28:1-8. Ruk 24:1-12. Yoh 20:1-10)

1Hmrinas ka Ali sngayan, Maria seediq Magdalene, Maria bubu Yakobu ma Calome we maruy ricuh malu sknexan oosa daha rmicuh heyi Yesu. 2Mgrebu bale prading ali 1 cenga sngayan, mosa habung hiya ka dheya. 3Mpprengo ka dheya: “Ima ka mptdoruy tasil ita peeyah rhengun habung di ho?” 4Mita baro ka tunux daha, taan daha tena wada tdroyun ka tasil da. 1 paru ba tasil ka kiya. 5Mremux habung ka dheya, mita 1 riso mlukus rila bhege gaga tleung narac hiya. Kiya de mskluwi ba ka dheya. 6Rmengo dheya ka riso nii: “Iya skluwi. Gisu namu migin Yesu seediq Najare pnttuwan jyujika. Heya we wada muudus peeyah hnqilan! Uka hini da. Yahi mita ka sngkuwan daha heya. 7Osa ka yamu, sai tmgesa tnugsaan na ma Petros: ‘Heya we plaale yamu mosa Galil. Mqita namu hiya ka heya, ida so rnengo na yamu.’” 8Pkrkerang heyi daha ma mskluwi bale uka daha kklaan. Kiya de meyah nganguc, qduriq peeyah habung hiya ka dheya.

Niqan Kari Nii ka Cmucac Patis

Kari Llebu:

[ 9Kana tnugesa Yesu we, wada daha tleus tmgesa Petros ma dseediq ssiyo na. Bobo na nii, Yesu we spoda na tnugsaan na, speeyah na nklaan hido betaq pryaxan hido sgarang na ka malu kari mrtaso, ini ksburo ma, meeniq ani betaq knuwan grangi ka malu kari mdoi baga nii. Ameng!]

Kari Bbaro:

Mtqita Maria Magdalene ka Yesu

(Mat 28:9-10. Yoh 20:11-18)

[ 9Mgrebu bale prading ali 1 cenga sngayan, muudus peeyah hnqilan ka Yesu da. Plaale ba mtqita Maria seediq Magdalene. Pnqdriqan na 7 bgihur naqah ka heya. 10Mosa rmengo dseediq ida smnegul mnsuupu Yesu. Tsdamac lmingis ciida ka dheya. 11Wada mbahang muudus peeyah hnqilan ka Yesu, qntaan Maria ka nii. Ani so kiya ini snhii ka dheya.]

Mtqita 2 Tnugsaan ka Yesu

(Ruk 24:13-35)

[ 12Bobo so nii, niqan 2 tnugsaan mosa nklualang biciq. Nii mkkesa elu ciida, Ini pntena heyi na ka spqita na dheya. 13Mosa smneru uxe mnsuupu dheya ka dheya, kiya ka kiya de ida ini snhii ka tnugsaan na.]

Qmeepah Snkgulan ka Tnugsaan

(Mat 28:16-20. Ruk 24:36-49. Yoh 20:19-23. Qne 1:6-8)

[ 14Bobo nii, msuupu tleung mekan ciida ka 11 tnugsaan. Yesu we yahan na mtqita ka dheya. Mseang uka snhiyan daha ma mkere lhebun daha. Ado ini daha snhii ka ddseediq qmnita hiya bobo mnuudus peeyah hnqilan. 15Rmengo dheya dungal ka Yesu: “Osa mtqiri kana qnlangan ka yamu, sai gmarang kana seediq ka malu kari. 16Snhii ma ptgaya psino ka seediq we mpkuudus. Ini snhii ka seediq we niqan qnquwan. 17Snhii ka seediq we maha niqan pnskraya mptheyaq dheya. Spooda daha ngayan mu pqduriq bgihur naqah ma mprengo lmlamu klegan kari. 18Baga daha mdoi quyu. Nasi mimah mahun hhuqil pnugcahu we uxe bale mpluqah dheya. Saun daha posa heyi mnarux ka baga daha we mpkmalu ka seediq mnarux.”]

Wada Baro ka Yesu

(Ruk 24:50-53. Qne 1:9-11)

[ 19Mhedu rmnengo kari dheya ka Yesu Bukung, wada ngalun baro ma tleung narac Utux Baro. 20Kiya de mlatac ka tnugsaan na, mosa gmarang kari ani inu. Msuupu dheya qmeepah ka Yesu Bukung, pgkela knbale kari gnarang daha ka pnskraya qqeepah smnegul dheya.]

Currently Selected:

Markos 16: Stgdaya

Highlight

Copy