Markos 14

Migin Phqilan Yesu

(Mat 26:1-5. Ruk 22:1-2. Yoh 11:45-53)

1Mk2 de snseman hrnasan ma mekan pang ini psai tgeda. Dpusu msapuh ma dmptpatis we lmngelung ttraki qmerac ma phuqil Yesu. 2Rmengo ka dheya: “Iya pdai smseman ciida. Maha mrrudu mbrebur ka seediq.”

Rcuhan Abura Meeniq Betania

(Mat 26:6-13. Yoh 12:1-8)

3Meniq Betania sapah Simon mnnarux msburo heyi tleung mekan hnpure ciida ka Yesu. Niqan 1 mqedil, madis malu ba 1 rusuq bale ba skeenux nrrudu ini gmaxi ani maanu. Gremun na ka rusuq, sheruy na tunux Yesu ka malu skenux. 4Mseang ka duma na seediq, mpprengo: “Hmuwa, ma smeeliq ba malu sknexan nii ho?” 5“Malu sknexan nii we tduwa brigun 3'00 hbangan ging, mtduwa sbege qrinuc.” Kiya de mseang rmengo mqedil ka dheya. 6Rmengo ka Yesu: “Laxi hiya! Ma namu pqnaqah kuxul heya ho? Malu ba qneepah na heyi mu. 7Msuupu yamu klaali ka seediq qrinuc, ani knuwan mtduwa namu meepah malu dheyaan. Uxe namu klaali niqan yaku ka yamu. 8Noda na so nii, pnooda nanak beyax na. Nii plaale rmicuh malu sknexan heyi mu ka heya. Nii psramal sseku kenan ka heya. 9Bale ba rngage maku, ani inu grangan malu kari meeniq bobo dxeral, ida namu asi ka srengo bale ka qneepah na, so uxe daha cchungi ka heya.”

Maruy Yesu ka Yehudah

(Mat 26:14-16. Ruk 22:3-6)

10Mosa mita dpusu msapuh ka 12 heyi 1 ka Yehudah seediq Iskariot Kiya ma bbaruy na dheya ka Yesu. 11Mqaras bale mbahang ka dheya ma sntangan mege pila heya. Kiya de Yehudah we lmngelung migin so bbege na dheya ka Yesu.

Mtheyaq Tnugsaan Smseman Hrnasan

(Mat 26:17-25. Ruk 22:7-14, 21-23. Yoh 13:21-30)

12Prading ba ali smseman pang ini psai tgeda, kiya ka smipaq miric smapuh smseman hrnasan ciida, smiling Yesu ka tnugsaan na: “Maha nami psramal inu ka ssaun uuqan su smseman hrnasan ho?” 13Kiya de skgulan na ka 2 tnugsaan na, rngagan na: “Osa mremux alang, mpniqan ka 1 seediq madis 1 rusuq ga niqan qsiya. Snegul heya ka yamu. 14Ani inu ka sapah tmayan na, rngagi ka tnpusu sapah: ‘Rmengo ka mptgesa, Ga inu ka tqiyan ssaun mekan smseman hrnasan mu ma tnugsaan mu ho?’ 15Heya we pqita na yamu ka 1 malu ba ma mttuku pnsrmalan paru nniqan. Kiya de osa psramal ita hiya ka yamu.” 16Mlatac ka tnugsaan na, mremux alang. Mntena ba rnengo Yesu ka ntaan daha. Kiya de mhedu psramal smseman hrnasan hiya ka dheya. 17Gbiyan de meyah ka Yesu ma 12 tnugsaan na. 18Msuupu tleung mekan ciida ka dheya, rmengo ka Yesu: “Bale ba rngage maku. Ckceka namu niqan 1 ka mbaruy kenan, seediq nii we ga msuupu mekan yaku.” 19Naqah bale kuxul daha, mskingal smiling heya: “Yaa yaku ho?” 20Rmengo dheya ka Yesu: “12 heyi 1 namu, kiya ka seediq nii msuupu kenan rmebu pang pngerah sara. 21Ado meeyah ka Laqi Seediq di, mntena so ga spatis Patis quri heya, so ka seediq bnaruy Laqi Seediq we so smtali! So seediq ga we, nuuqu malu ini ktuting ka heya.”

Pheyu Uqun Gbiyan nBukung

(Mat 26:26-30. Ruk 22:14-20. 1 Kor 11:23-25)

22Mekan ka dheya ciida, mangal pang ka Yesu. Mhedu mqaras Utux Baro de gbingun na ma sbege na tnugsaan na. Rmengo: “Aangal, nii ge heyi mu.” 23Dungal we mangal pngerah mahan ka Yesu. Mhedu mege mqaras Utux Baro de sbege na dheya. Wada mimah kana ka dheya. 24Rmengo dheya ka Yesu: “Nii we dara mu pnsdhegan. Ririh hbaro ba seediq ka psdara dara mu. 25Bale ba rngage maku. Betaq ku mimah bgurah sino meeniq ku qnlhangan Utux Baro ali ciida, uxe ku mimah sino nii dungal ka yaku.”

26Mnuuyas uyas ka dheya, kiya de mlatac mosa Dgiyaq Curung.

Kari Pgeela Mpdmeqo Bukung ka Petros

(Mat 26:31-35. Ruk 22:31-34. Yoh 13:36-38)

27Rmengo dheya ka Yesu: “Mpktakur namu kana ka yamu. Ado mesa ka ga spatis Patis:

‘Sbetun mu ka mtabu,

kiya de mkrehak ka miric rudu da.’

28Ani so kiya, bobo ku muudus peeyah hnqilan, maha ku mplaale yamu mosa Galil.” 29Rmengo heya ka Petros: “Ani mtakur kana ka dheya we uxe ku ka yaku.” 30Rmengo heya ka Yesu: “Bale ba rngage su mu. Keeman kiya mn2 qmqugu rodux berah na ciida we, maha su mpn3 dmeqo kenan.” 31Mbeyax ba rmengo ka Petros: “Yaku asi ku ka msuupu sunan mhuqil we uxe ku ba mdeqo sunan!” So nii rnengo kana ka tnugsaan na.

Dmurun Meniq Kesamani

(Mat 26:36-46. Ruk 22:39-46)

32Mosa Kesamani hiya ka dheya, rmengo tnugsaan na ka Yesu: “Tleung hini ka yamu. Maha ku dmurun.” 33Kiya de desun na msuupu heya ka Petros ma Yakobu ma Yohane. Prading mnkluwi ka Yesu, naqah ba kuxul na. 34Kiya de rmengo dheya: “Naqah ba kuxul mu betaq ku so mphuqil. Eeniq hini ka yamu ma kiiyo.” 35Mkkesa mosa tikuh thngali tgtemaq dxeral ka heya, dmurun rmengo: “Nasi mtduwa, phrnasi ku hiya ka ali kiya.” 36Rmengo ka heya: “Aba, Tama! Isu ge tgklaan su kana. Braho su bale, angal ka pngerah mahan nii. Kiya de iya pooda lnglungan mu, pooda lnglungan su nanak.” 37Meyah ka Yesu, taan na gisu mtaqi kana ka dheya. Kiya de rmengo Petros: “Simon, ga su mtaqi na? Ini su tduwa miiyo ani tnnais ho? 38Kiiyo ma druni so namu uxe psrdilun pnseengan. Ani so smruwa ka lnglungan namu, ida muuwic ka heyi namu.” 39Mosa dungal ka Yesu. Mosa dmurun, mntena ka rnengo na. 40Kiya de meyah mbrinah dungal ka Yesu, taan na nii mtaqi ka dheya na. Ado mchedil ka doriq daha. Ini kela huwa mesa cmiyuk Yesu ka dheya. 41Mn3 meyah ka Yesu ma rmengo dheya: “Mptbleyaq mtaqi namu na ho? Baka da, dehuk ka ali da. Tai, bbege daha baga dseediq niqan qnquwan noda ka Laqi seediq da. 42Tutuy, nita da! Tai, gisu meyah hini ka seediq mbaruy kenan da!”

Qrapun daha ka Yesu

(Mat 26:47-56. Ruk 22:47-53. Yoh 18:3-12)

43Rmengo ciida ka Yesu, asi eyah ka Yehudah 1 seediq ckceka daha 12 tnugsaan. Msuupu meyah duma seediq dmoi hlmadac ma qhuni. Dheya we skgulan dpusu msapuh, dmptpatis ma rdrudan. 44Tena mprengo pnugkela daha ka seediq mbaruy. Rmengo: “Ima ka tnuguhun mu quwaq we kika heya. Qerac ka heya, tqlahang ba madis.” 45Meyah ka Yehudah de asi osa berah Yesu, rmengo: “Mptgesa!” Kiya de asi tmunguh heya. 46Posa baga qmerac Yesu ka dheya. 47Niqan ka 1 seediq mheyu ckceka ssiyo hiya, hmgeluq hlmadac na. Wada smipaq tnqliyan paru msapuh ma slapi na ka icil birac na. 48Cmiyuk rmengo dheya ka Yesu: “Maadis namu hlmadac ma qhuni meyah qmerac kenan. Mntena namu so hari nii qmeraq mpgeeluk gmeeguy seediq ka yamu ho? 49Mnsuupu ku yamu klaali meniq Sapah Thmkuwan tmgesa seediq. Ini namu qerac kenan han. So nii we asi ka ma bale ba ga spatis Patis.” 50Wada malix Yesu qduriq kana ka tnugsaan na.

Qduriq ka Riso

51niqan ka 1 riso ini plukus, wano galiq nuqah nanak ka spilan na. Smnegul Yesu ka heya ma qrapun daha. 52Kiya de htiyan na qmada ka galiq tninun nuqah ma mbberas wada qduriq.

Psiling berah Prngagan Ka Yesu

(Mat 26:57-68. Ruk 22:54-55, 63-71. Yoh 18:13-14, 19-24)

53Desun daha paru msapuh hiya ka Yesu. Meyah msseli hiya ka kana dpusu msapuh, rdrudan ma dmptpatis. 54Smtheya smnegul Yesu ka Petros, betaq mremux nganguc sapah paru msapuh. Msuupu tleung dmpqlahang malah puniq. 55Dpusu msapuh ma kana seediq prngagan hiya we mkmigin pgkela qnquwan Yesu, klaan daha pphuqil heya. Kiya de ini daha sllai. 56Niqan ka hbaro seediq ptraki pgkela qnquwan Yesu, kiya ka kiya ini pntena ka pnugkela daha. 57Niqan duma ka seediq mheyu pgkela qnquwan Yesu, rmengo: 58“Qnbhangan miyan ka rnengo na: ‘Yaku we hrahun mu smeeliq ka Sapah Thmkuwan snmalu baga seediq nii, mk3 de smleun mu ka 1 dungal Sapah Thmkuwan uxe snmalu baga seediq.’” 59Ani so nii we ida ini pntena ka pnugkela daha. 60Kiya de mheyu ckceka daha hiya ka paru msapuh ma smiling Yesu: “Seediq nii pnugkela daha qnquwan su we, uka ka cciyuk su ho?” 61Mgmelux ka Yesu, ini ciyuk ani maanu. Smiling heya dungal ka paru msapuh: “Isu we Kiristo su, laqi tndhuun ho?” 62Rmengo ka Yesu: “Un!

Mpqita namu Laqi Seediq

tleung narac pusu beyax,

mpaapa plabu baro meyah ka heya.”

63Kiya de smgaliq lukus na ka paru msapuh, rmengo: “Ma lux asi ka niqan mpgkela seediq dungal ho? 64Qnbhangan namu kana ka kari na nii smngayan Utux Baro da. Huwa mesa lnglungan namu ho?” Kiya de kana dheya we ngalan daha mndungus phqilun ka Yesu. 65Kiya de duma daha we prading tmuruq heya ma mubung dqeras na. Tmkemu baga beebu heya ma, rmengo heya: “Rengo kari mpgeela na!” Smebuc baga dqeras na ka dmpqlahang uri.

Mn3 Dmeqo Yesu ka Petros

(Mat 26:69-75. Ruk 22:56-62. Yoh 18:15-18, 25-27)

66Ga meeniq nganguc truma hiya ka Petros, kiya de meyah ka 1 weewa mdayo paru msapuh. 67Taan na ga malah puniq ka Petros, tgleesun na mita ma rmengo: “Mntheyaq su Yesu seediq Najare ka isu uri.” 68Dmeqo rmengo ka Petros: “Ini ku kela. Ini ku kela lmngelung ma ini ku kela uri maanu ka ga su srengo!” Kiya de mlatac ma dehuk nganguc ka heya. Qmqugu ka rodux da. 69Mita heya ka weewa mdayo, rmengo seediq ga mheyu ssiyo hiya: “Ddheya ka seediq nii.” 70Dmeqo dungal ka Petros. Ini qbsiyaq, rmengo Petros dungal ka seediq dmheyu ssiyo: “Ddheya bale ka isu, ado seediq su ba Galil.” 71Knchedil ba smdehu ka Petros, rmengo: “Ini ku kela ka seediq gaga namu srengo!” 72Asi qqugu mn2 ka rodux. Petros de lnglungun na ka kari rnengo Yesu: “Mn2 qmqugu rodux berah na ciida, maha su mpn3 dmeqo rmengo kenan.” Lmngelung so nii de lmingis da.

Currently Selected:

Markos 14: Stgdaya

Highlight

Copy