Ruka 21

Bnege Mqedil Mqrinuc

(Mrk 12:41-44)

1Pstutuy tunux qmita ka Yesu de taan na ka mbleyaq seediq posa bnege psaan pila Sapah Thmkuwan. 2Kiya uri we taan na posa 2 pila ka 1 mqedil mqrinuc, 3kiya de rmengo: “Bale ba rngage maku. Bnege mqedil mqrinuc nii we mgkala kana dseediq. 4Ado msngari psaun daha kana seediq. Kiya ma mqedil mqrinuc nii we ani qrinuc, wada na sbege kana ka dnoi na. Kiya kana kkuudus na ka wada na psaun.”

Kari Pgeela Mhurah ka Sapah Thmkuwan

(Mat 24:1-2. Mrk 13:1-2)

5Mpprengo, malu ba btunux ma snapuh ka ppdeping Sapah Thmkuwan, ka duma seediq ciida. 6Rmengo ka Yesu: “Kana qnita namu, nii dehuk ka ali. Maha uka ani 1 btunux mptnetun bobo btunux ini hrahi smeeliq.”

Pnskraya ma Pqraqil

(Mat 24:3-14. Mrk 13:3-13)

7Smiling Heya ka dheya: “Mptgesa, knuwan mpniqan ka nii ho? Mmeyah ciida we mpmaanu ka pnskraya na ho?” 8Rmengo ka Yesu: “Qlahang ka yamu, so namu uxe ppsrdilun. Ado nexal we meeyah ka hbaro seediq pooda ngayan mu ma mprengo: ‘Yaku ka Kiristo’. Mprengo uri: ‘Nii daling ka ali da!’ Yamu we iya snegul dheya. 9Qbhangan namu ka mtgdiyal ma mrrudu mesa we iya ba kiicu. Ado ida mpniqan ka so nii. Kiya de uxe asi eyah ka qnhdean.” 10Kiya de rmengo dheya ka Yesu: “Seediq we mpkremux mtgdiyal, qnlhangan ma qnlhangan we mpkremux mtgdiyal. 11Dxeral we maha paru runu, meeyah hhiya ka krayan ma mnarux mpunu. Mpeyah baro ka so tuutux smtali ma paru ba pnskraya. 12Kiya de berah eeyah na ka kana so nii we mqerac yamu ka seediq ma mptraqil yamu ka dheya. Bege namu daha sapah pssliyan ma sapah kuung. Ririh ngayan mu desun namu daha berah dqbsuran paru ma dmpdudul. 13Kiya de noda nii we maha pgkela yamu. 14Maanu so kiya de krkere lhebun namu, iya mnama lmngelung mprengo maanu. 15Ado mbege ku yamu ka knkela rmengo ma kkela lmngelung. Uxe mptduwa cmiyuk ma gmnhetur so nii ka dkmpais yamu. 16Ani tama ma bubu su, mtswai, lutuc ma dangi su bbege su daha pprngagan. Phqilun daha ka duma ckceka namu uri. 17Ririh ngayan mu ka pqnqihun namu daha kana seediq. 18Kiya de uxe mpqnaqah ka ani 1 snuunux namu. 19Knremun ka yamu kiya ka mpkuudus kndesan.”

Kari Pgeela Mpuuka ka Yerusalem

(Mat 24:15-21. Mrk 13:14-19)

20“Taan namu tlbuwan supi ka Yerusalem de mpkela namu smdaling ka ali ssliqan da. 21Ciida, so ka ga Yudaya we asi ka qduriq dgiyaq. Ga alang paru we latac peeyah hiya. So ka ga lualang biciq lualang biciq we iya teme alang. 22Ado ali nii we ali ccyukan, maha bale ba kana ga spatis Patis. 23Ali ciida, maha paru ba mqraqil ka ga mchedil ma ga mnunuh laqi! Ado maha meeniq bobo dxeral hini ka paru ba mqraqil ma meeniq bobo seediq nii ka paru ba seang Utux Baro. 24Mptakur toma hlmadac ka dheya ma qrapun desun daha kana qlhangan, qtmaqun seediq icil qnlhangan ka Yerusalem betaq mttuku ka ali seediq icil qnlhangan.”

Eeyah Laqi Seediq

(Mat 24:29-31. Mrk 13:24-27)

25“Mptuura pnskraya ka hido, idas ma pngerah. Mpqraqil ka qnlhangan bobo dxeral. Ado hrenang bale ka rcilung de mslhebun bale. 26Mplgelu ka beyax ga baro. Lmngelung quri mmeyah bobo dxeral ka seediq de mpkrunge. 27Ciida, dheya we mpqita dmoi beyax ma paru knledax paapa plabu meyah ka Laqi seediq. 28Niqan ka so nii de qita baro ma ptdango tunux namu. Ado smdaling ka ali pkuudus yamu!”

Smluhe Peeyah Qhuni Nunuh

(Mat 24:32-35. Mrk 13:28-31)

29Kiya de rmengo 1 pnungalan kari dheya dungal ka Yesu: “Tai ka qhuni nunuh ma kana qhuni. 30Smtasil ka waso na ciida, taan namu de klaun namu nii smdaling ka rbagan da. 31Mntena so nii uri taan namu meyah ka so ooda nii de klaun namu nii smdaling ka qnlhangan Utux Baro. 32Bale ba rngage maku. Ini kuuka ciida na ka mknexal saya, maha mooda kana ka so nii. 33Mpkuuka ka karac ma dxeral. Kiya de kari mu we uxe mpkuuka ani betaq knuwan.”

Dmudul Tnugsaan Tqlahang

34“Qlahang nanak ka yamu, so uxe pehung msnekan, kbsukan ma pslhebun bobo dxeral ka lhebun namu. Ali kiya we asi eyah yamu. 35Ado ida meeyah kana seediq meniq kana bobo dxeral ka ali so nii. 36Kiiyo bale ma druni klaali so namu maha qduriq kana mmeyah so nii ma mptduwa namu mheyu berah Laqi seediq.”

37Kiya de meniq Sapah Thmkuwan tmgesa seediq knkingal ali ka Yesu. Keeman we mlatac peeyah hiya mosa meniq Dgiyaq Curung. 38Mgrebu bale meyah Sapah Thmkuwan, mosa Yesu hiya qqbahang daha tnugesa na.

Currently Selected:

Ruka 21: Stgdaya

Highlight

Copy