Ruka 1
1
1-3Teopilos qbsuran! Hbaro ba seediq we wada matis patis quri ndaan ckceka menan. Patis nii we ida muyu so pnrdingan qntaan seediq gnarang kari ma wada na sgarang kenan dungal. Ado wada mu ndwaun ba muyu lmngelung ka kana noda nii, kiya de speeyah mu pnrdingan ma tsgasuc ku ba matis sunan, mesa ku lmngelung. 4So su maha mkela ba ka kari snlhayan su we bale ba kana.
Kari Pgeela Meyah ka Yohane Mptgaya Smino
5Hrodes qbsuran paru Yudaya ciida, niqan ka 1 msapuh ckceka Abiyah. Ngayan na we Jekaryah. Mqedil na we pneeyah ltlutuc Aharon, ngayan na we Elisabet. 6Msderux ooda berah Utux Baro ka 2 daha, muyu ba kana gaya pndakar Bukung ma gaya Bukung qmeepah. 7Ado kdungean ka Elisabet ma uka laqi daha. Ado wada rudan ka knkawas daha seediq nii.
8Dehuk ka psryuxan qmeepah Jekaryah de smapuh berah Utux Baro ka heya. 9Pnooda blebil qreti gaya qpahun msapuh, heya ka maha ppsqama malu sknexan Sapah Thmkuwan Utux Baro. 10Psqama malu sknexan ciida ka heya we dmurun meeniq nganguc ka kana knhbaro seediq. 11Kiya de mtqita heya ka 1 snkgulan baro mheyu narac spuhan psqmaan malu sknexan hiya. 12Mita ka Jekaryah de asi sklui bale ma miicu da. 13Kiya de rmengo heya ka snkgulan baro: “Jekaryah, iya kiicu. Ado wada bhangan Utux Baro ka dnurun su. Mqedil su Elisabet we mptnlaqi 1 laqi rseno, Yohane kesa tmngayan. 14Mpqaras su ma mppqaras su. Maha qrasun hbaro ba seediq ka pnttingan na uri. 15Mmaha paru bale berah Bukung ka heya. Uxe miimah ani biciq sino ma sino mbeyax ka heya. Stngayun Bgihur Utux ida peeyah lbuwan bubu na. 16Mpspgeriq hbaro ba seediq Israel ka heya, mpsquri Bukung, Utux Baro daha.” 17Heya we mpniqan knuutux ma beyax Eliyah mkkesa berah Bukung. So maha pspgeriq mquri laqi lnglungan na ka tama. So maha pspgeriq mquri knkela msderux lnglungan na ka seediq tbrinah. Kiya dungal we mpsramal Bukung smterung seediq na. 18Rmengo snkgulan baro ka Jekaryah: “Huwa mu kesun mkela ka so nii? Rudan ku ka yaku da, wada rudan ka knkawas mqedil mu uri da.” 19Cmiyuk rmengo heya ka snkgulan baro: “Mheyu ku berah Utux Baro, Gabriel ka yaku. Snkgulan ku na meyah rmengo isu, malu kari nii ka srengo mu sunan. 20Dehuk ka ciida de maha mpbale ka kari nii. Ado ini su snhii, kiya de maha su mpngangah ma uxe su mptduwa rmengo betaq ali mpbale ooda nii.”
21Ga tmara heya ka seediq ma sklwiun daha bale ka bsiyaq ba ida meeniq truma Sapah Thmkuwan hiya ka Jekaryah. 22Mlatac nganguc ka heya de ini tduwa rmengo dheya. Klaun daha sa qmnita tuutux truma Sapah Thmkuwan ka heya. Ado pnngangah pgkela ka heya, ado mngangah da. 23Mnhedu ka ali qnpahan na de mosa sapah na ka heya da.
24Bobo na hiya de mchedil ka Elisabet mqedil na dima mosa tgleing 5 idas, 25rmengo: “Bukung we psbrinah mita ali mu, so nii ka qntaan na kenan. Kiya ka pkaangal siqa mu peeyah kana seediq.”
Kari Pgeela Mptuting ka Yesu
26Betaq 6 idas, snkgulan Utux Baro ka Gabriel maha 1 alang dxeral Galil, Najare ka ngayan alang nii. 27Mosa 1 weewa hiya, heya we sdngiyan Yosehu 1 seediq Mslutuc Dawid. Ngayan weewa nii we Maria. 28Meyah mremux rmengo heya ka Gabriel: “Weewa smbleqan, Malu su ho? Ga msuupu sunan ka Bukung!” 29Ado so nii ka kari na de mskluwi ka Maria, kiya de yaa maanu ka nii na srengo kenan mesa lmngelung uri. 30Rmengo heya ka snkgulan baro:
“Maria, iya kiicu. Wada su sbleqan berah Utux Baro da.
31Mpchedil su ma mptnlaqi su rseno ma Yesu kesun su tmngayan.
32Heya we mmaha paru ma laqi Tgpusu baro kesun mlawa.
Utux Baro Bukung we sbege na heya ka tnlungan rudan na Dawid qbsuran paru.
33Ani betaq knuwan mpqbsuran paru sapah Yakobu ka heya.
Qnlhangan na we uxe mpkuuka qnhdean.”
34Rmengo snkgulan baro ka Maria: “Mphuwa mesa ka so nii ini ku osa seediq nana ho?” 35Cmiyuk rmengo heya ka snkgulan baro:
“Meeyah heyi su ka Bgihur Utux.
Mbubung sunan ka beyax Tgpusu baro,
maanu so kiya de mrtaso mptuting we, laqi Utux Baro kesun tmngayan.
36Elisabet dadal su, kiya ka ini bale tnlaqi, ani rudan ciida betaq mchedil laqi rseno we, 6 idas saya ka knchdilan na da. 37Ado pneyah kari Utux Baro we uka ani 1 ka uka beyax.” 38Rmengo ka Maria: “Tnqliyan ku Bukung ka yaku. Tai so maha muyu kari su mpkchaya kenan heyi mu.” Kiya de wada mlatac peeyah heya ka snkgulan baro.
Mosa Mita Irisapic ka Maria
39Ciida, mtutuy peeyah hiya ka Maria ma tgaaguh mosa quri dgiyaq, meyah 1 alang ga Yehudah hiya. 40Mremux sapah Jekaryah, smbleyaq rmengo Elisabet. 41Mnbahang kari smbleyaq rmengo Maria ka Elisabet de mlgelu lbuwan na ka laqi. Kiya de stmaan Bgihur Utux ka Irisapic. 42Pmbaro ba quwaq na mdiras rmengo:
“Paru ba smbleqan ckceka mmqedil ka isu!
Paru ba smbleqan ka pnuglaqi lbuwan su uri.
43Dehuk meyah kenan ka bubu Bukung mu we ooda nii we ma betaq meyah kenan ho? 44Ado meyah birac mu ka kari smbleyaq rnengo su de mlgelu mqaras lbuwan mu ka laqi. 45Snhii ka mqedil nii we mbleyaq bale! Ado Ida maha mpbale ba kana rnengo na heya ka Bukung!”
Tmdahu Bukung ka Maria
46Rmengo ka Maria:
“Smparu Bukung ka lnglungan mu.
47Utux mu we mqqaras Utux Baro pkuudus kenan.
48Ado psbrinah ba lmngelung tgbiciq tnqliyan na ka Utux Baro.
Peeyah saya, niqan mbleyaq ka yaku, kesun ku na daha betaq ani knuwan mknexal.
49Ado mdoi kana beyax we wada qmeepah paru oda mu.
Mrtaso ka ngayan na.
50Sgaalu na ka dseediq miicu heya,
betaq ani kana mknexal.
51Poda hiqur baga na ptuura paru ba beyax.
Srehak na ka dseediq psparu lmngelung psmhemuc.
52Wada na sladu tluungan ka niqan beyax,
wada na pkpruun ka dtgbiciq.
53Wada na pktngiun malu puqun ka dmuure,
wada na plmexun posa ka dmbleyaq.
54Wada na dyagan ka Israel tnqliyan na,
55mntena so rnengo na rdrudan ta cbeyo,
mpgaalu Abraham ma lqlaqi mslutuc na betaq ani knuwan.”
56Msuupu meeniq hiya yaa 3 idas ka Maria ma Irisapic de wada sapah na da.
Mtuting ka Yohane mptgaya Smino
57Dehuk ka idas mttuku tnlqiyan na ka Elisabet de tmlaqi 1 laqi rseno. 58Qbhangan seediq ssiyo hiya ma lutuc na wada gmaalu heya ka Bukung de msuupu heya mqaras. 59Mk8 ali de maadis laqi mooda ptgaya psalak ka dheya ma satang daha ppuyu ngayan Jekaryah tama na tmngayan. 60Kiya de rmengo ka bubu na: “Uxe, Yohane kesun ka ngayan na.” 61Rmengo heya ka dheya: “Kana lutuc su we uka ka ngayan so nii.” 62Pnngangah rmengo tama na ptngayun su maanu ka ngayan na laqi nii ka dheya. 63Mesa qrtinuh ptasan ka heya, kiya de matis: “Yohane ka ngayan na.” Kiya de mkluwi kana ka dheya. 64Asi traguh ka quwaq Jekaryah da, ptrherah ka hema na uri. Kiya de rmengo ka quwaq na tmdahu Utux Baro. 65Miicu kana ka seediq mtqiri meniq hiya. Wada mkgarang kana ddgiyaq Yudaya hiya ka kana noda nii da. 66Mnbahang noda nii ka kana seediq we wada daha psaun lhebun daha, rmengo: “Laqi nii we mpmaanu ho?” Ado msuupu heya ka baga Bukung.
Pnugeela Kari Jekaryah
67Stngayan Bgihur Utux ka Jekaryah tama na de pgeela rmengo:
68“Bukung, Utux Baro nuIsrael we bale ba tndhuun!
Ado qmlahang seediq na ma dmoi baga dheyaan.
69Meniq sapah Dawid tnqliyan na,
ririh ita ka sptutuy na ka urung pkuudus.
70Ida so mntena rnengo Bukung spooda na quwaq mrtaso dmpgeela kari cbeyo:
71‘Pkdusun tana peeyah pais ma,
mlatac peeyah baga kana tmraqil ita.
72Sgaalu na ka rdrudan ta ma,
lnglungun na ka mrtaso pnsdhegan na.
73Kiya ka sndhegan na Abraham rudan ta.
74-75Kiya ka wada tana pkdusun peeyah baga pais ta de,
mptduwa meniq berah na kana kndesan ta,
uxe ta mpkiicu dmoi mrtaso ma msderux noda qmeepah heya.
76Lqlaqi! Isu we mpgeela kari Tgpusu baro kesun tmngayan.
Ado mpkkesa su tgberah Bukung ma ppsramal elu na.
77Maha srwaan ka qnquwan noda seediq ni,
kiya de mpgkela ddoi daha baga.
78Ado gnaalu lhebun Utux Baro ta,
mlawa hido mgrebu pkledax ita peeyah baro.
79Maha pkledax seediq ga tleung ckceka kuung ma ckceka saso hhuqil,
mpdudul papak ta mquri elu mtbale.’”
80Laqi kiya we dmudul mdakil ma mbeyax ka lnglungan na. Meeniq tadus brenux betaq ali pqtaan na seediq Israel.
Currently Selected:
Ruka 1: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
