Smnlean 9
9
Utux Baro we Mssdehu daha Noax
1Utux Baro we psbleyaq Noax ma dlaqi na, rmengo dheya: “Krana tmlaqi ma mkrehak stenge dxeral nii. 2Kana camac dxeral, kana qqbheni karac, kkuwi mkkarang dxeral ma, kana qqcurux rcilung we mpkiicu yamu ma miicu riyung yamu. Dheya we bege mu baga namu kana. 3Kana camac ga muudus we maha namu ngalun uuqun. Kana nii we bnege mu yamu, mntena so sama uqun namu. 4Wano heyi madis knuudus, kiya ka madis dara we, iya bale uqi. 5Psdara yamu, smeeliq knuudus namu we, mciyuk ku mesa heya. Mciyuk ku mesa knuudus seediq mquri kana camac mkkesa, seediq ma, mtswai seediq. 6Kana psdara seediq we, dara na maha psdraun taxa seediq ka heya uri. Ado Utux Baro we pnuyu hnegan na smalu ka seediq. 7Krana tmlaqi ma mrana pkrehak bobo dxeral ka lqlaqi laqi namu.”
8Rmengo Noax ma lqlaqi na ka Utux Baro: 9“Tai, mpsdehu ku yamu ma lqlaqi ltlutuc namu. 10Ga ckceka hiya msuupu yamu ka kana mlgelu muudus we, kiya ka qbheni, tnbugan ma, kana camac mkkesa bobo dxeral ma, kana knuudus ga mlgelu pneyah asu. 11Yaku we mpsdehu ku yamu: Kana ga niqan heyi we uxe sliqun rnecux dungal, uxe mpniqan dungal ka rnecux mpseelaq dxeral nii da.” 12Rmengo ka Utux Baro: “Nii we kiya ka pnskraya pnsdehu mu yamu ma, kana mlgelu muudus ga msuupu yamu betaq ani knuwan: 13Psaun mu ckceka plabu ka hako utux, kiya ka pnskraya pnsdehu mu dxeral ka nii da. 14Paha ku plabu mubung dxeral ciida we, maha niqan ka hako utux mpcriyu ckceka plabu. 15Kiya de mplmngelung ku pnskraya pnsdehu mu yamu ma: Kana mlgelu muudus ga niqan heyi, uxe sliqun rnecux dungal ka kana niqan heyi da. 16Mcriyu ckceka plabu ka hako utux, taan mu de, mplmngelung ku pnskraya pnsdehu betaq ani knuwan Utux Baro daha ka kana mlgelu muudus niqan heyi.” 17Rmengo Noax ka Utux Baro: “Nii we kiya ka pnskraya pnsdehu mu kana mlgelu muudus ga niqan heyi meniq bobo dxeral.”
Noax Ma Lqlaqi Na
18Lqlaqi Noax, pneyah asu meyah nganguc na we, Sem, Xam ma Yepet. Xam we tama Kenaan. 19Nii we 3 laqi Noax, lqlaqi ltlutuc daha we mrana mkrehak kana dxeral. 20Seediq mpqeepah ka Noax, heya ka pnrading ba mnhuma lipas. 21Mnimah sino ka heya de bsukan da. Mbberas ini plukus mtaqi ckceka kobu na. 22Xam, tama Kenaan we qmita gisu mbberas ka tama na de, wada nganguc tmgesa 2 mtswai na. 23Kiya de mangal 1 lukus rila ka Sem ma daha ka Yepet, psaun daha ahing daha ma, pmkmbukuy mosa truma kobu mubung heyi mbberas tama daha. Dheya we mqquri bukuy ka dqeras daha, ini qita mbberas ka tama daha. 24Bobo mtkela bnsukan ka Noax de, klaun na ka ndaan laqi na swai bale de, 25asi rengo:
“Kenaan we asi ka syusan,
mptnqliyan tnqliyan dqbsuran na ka heya.”
26Rengo dungal:
“Utux Tmninun, Utux Baro Sem we tndhui!
Tai so mptnqliyan Sem ka Kenaan.
27Tai so prnaun Utux Baro ka Yepet.
Tai so meniq kobu Sem ka heya.
Tai so mptnqliyan na ka Kenaan.”
28Bobo paru rnecux, Noax we muudus 3'50 knkawas dungal ka heya. 29Betaq 9'50 knkawas knuudus na ka Noax de, wada mhuqil di.
Currently Selected:
Smnlean 9: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
