Qneepah 5

Ananias ma Caphuyra

1Niqan 1 seediq, ngayan na we Ananias, msuupu mqedil na Caphuyra brigun daha ka qnpahan. 2Kiya de cpiqan na lmeing duma ka pila bnaruy na neepah, mnsngari na we saan na posa berah papak snkgulan. Mkela ka mqedil na uri. 3Rmengo ka Petros: “Ananias, ma ga stngayan Satang ka lnglungan su, mberiq su Bgihur Utux ma hmilic su lmeing pila bnaruy su neepah? 4Ini su brigi ka neepah han we uxe nnisu nanak peni? Bobo su bnrigan de uxe isu nanak ka dmoi pila peni? Hmuwa, ma niqan lnglungan so nii ka lhebun su ho? Uxe su ga pqberiq seediq ka isu, Utux Baro ka ga su qbriqun da.” 5Mnbahang kari so nii ka Ananias de asi takur ma msetuq hengak na da. Mnbahang ka seediq de miicu bale. 6Mtutuy ka duma rsriso ma lbuun daha ka bqerus na, saapa daha ma saan daha rmeus.

7Bobo na ya ba 3 cenga patis hido, meyah mremux ka mqedil na, ini kela noda nii ka heya. 8Rmengo heya ka Petros: “Rngage ku, bnaruy namu neepah we so nii ka pila na? Cmiyuk ka heya: Un, kiya ba nii.” 9Rmengo ka Petros: “Hmuwa, ma namu msuupu lnglungan pseung Bgihur Utux Bukung ho? Gisu dehuk rhengun ka papak seediq rmneus rseno su. Dheya we ddilun su daha paha nganguc ka isu uri.” 10Asi knssaya mtakur berah papak Petros ka mqedil nii ma msetuq ka hengak na. Meyah mremux ka rsriso mita heya ga mhuqil de, saapa daha nganguc ma reesun daha ssiyo rseno na. 11Kana seediq pssliyan ma mnbahang so nii ka seediq we miicu bale.

Pnskraya Qneepah Snkgulan

12Bukung we spooda na baga snkgulan qneepah egu ba pnskraya qnpahan ma meniq ckceka hbaro dseediq. Msuupu lnglungan daha ka kana dsnheyi ma meniq sbesuk Selomoh. 13Ini snhii ka seediq we uka ani 1 niqan pahung daha ssqapah dheya. Kiya de smparu dheya ka hbaro seediq. 14Kiya de krinah hbaro ka seediq snhii, rseno ma mqedil uri. 15Duma ge spaapa daha mosa paha elu ka seediq mnarux, ptqiun daha tqiyan ma pala tqiyan. Tmara mooda hiya ka Petros de ani sun wano snaso na ka meniq bobo heyi seediq. 16Hbaro seediq pneeyah lualang mtqiri Yerusalem we meyah msseli, desun daha ka mnarux ma ga pqrqilun dbgihur naqah. Kiya de wada pklmeun kana.

Moda Mqraqil ka Snkgulan

17Kiya de, pusu paru msapuh ma kana seediq msuupu dheya, kiya ka mnsuupu dseediq Sadokay ge, mtutuy kana ka dheya ma qnrquun daha ka snkgulan, 18kiya de qrapun daha ka snkgulan ma shetur daha sapah kuung. 19Kiya de keeman de, rmaguh neluk sapah kuung ka snkgulan Bukung ma dmudul dheya mlatac mosa nganguc. 20Rmengo: “Osa mheyu Sapah Thmkuwan ka yamu, rrngaani kana seediq ka kari knuudus nii.”

21Mbahang so nii ka snkgulan de, uxe beyo lmedax ka karac ciida, mremux sapah thmkuwan ma tmgesa seediq. Meyah ka pusu paru msapuh ma msuupu heya ka seediq we, pssliun daha mlawa ka seediq prngagan ma rdrudan duIsrael. Kiya de smkagul seediq mosa sapah kuung aangal daha snkgulan peeyah hiya. 22Dehuk ka mpqlahang de ini daha tai sapah kuung hiya ka snkgulan. Kiya de meyah smneeru rmengo: 23“Taan nami mgdehu ba nleban ka sapah kuung ma, mheyu rhengun neluk hiya ka dmpqlahang sapah kuung uri. Kiya de rwahan miyan ka rhengun de, ani ima ini miyan tai truma hiya.” 24Mbahang kari so nii ka mpqlahang Sapah Thmkuwan ma dpusu msapuh de mgedang ka lnglungan daha. Ini kela mmaha maanu ka so oda nii. 25Meyah ka 1 seediq ma mneeru dheya: “Seediq pnosa namu sapah kuung we ga mheyu Sapah Thmkuwan ma ga tmgesa seediq.” 26Kiya de mpqlahang Sapah Thmkuwan ma dmpqlahang we saan daha mangal ka snkgulan, ini daha yexi madis. Ado miicu seediq ccebu daha btunux ka dheya han.

27Desun daha de phyegun daha berah prngagan. Smiling dheya ka pusu paru msapuh, rmengo: 28“Uxe nami wada smdehu bale rmengo yamu, iya pooda ngayan nii tmgesa namu seediq peni? Wada namu krnahun pstenge tnugesa namu ka Yerusalem. Kmppaun namu heyi nami ka dara seediq nii!” 29Cmiyuk ka Petros ma duma na hiya snkgulan: “Smnegul Utux Baro, ini snegul seediq we bale ba ka nii. 30Pnttuwan namu jyujika ka Yesu we wada pkdusun Utux Baro nrudan ta cbeyo peeyah hnqilan ka heya. 31Yesu nii we kiya ka pnheyu Utux Baro psaun na narac na, ngalan na mpdudul ma Bukung mpkuudus. Bbege na seediq Israel ka knpriyux lnglungan ma psruwa qnquwan. 32Mpgkela nami noda nii ka yami, Bgihur Utux uri ka mpgkela na uri. Bgihur Utux we bnege na seediq theyi ka Utux Baro.”

33Mbahang ka seediq sapah pprngagan de sqama seang daha ma kmphuqil snkgulan. 34Kiya de mheyu ckceka sapah pnpprngagan ka 1 seediq Parisay, Gamliel ka ngayan na. Heya we mptgesa gaya ma spruun ba mita kana seediq. Mlawa seediq ma posa tnnais nganguc ka snkgulan kesun na. 35Kiya de rngagan na ka kana seediq: “Seediq Israel, quri so seediq nii we qlahang nanak. 36Tgberah na nii we mtutuy ka Tudas ma psparu bale. Sqapah heya ka seediq we yaa meyah 4'00 heyi. Wada phqilun ka heya de, kana seediq snnegul heya we wada mswaye ma wada mkuuka di. 37Bukuy na kiya dungal smepu ngayan ciida, mtutuy ka Yehudah seediq Galil ma straki na ka duma seediq smnegul heya. Wada phqilun ka heya duri ma, kana ka seediq snnegul heya we wada mkrehak. 38Saya rngage maku, laxi ka seediq nii, pdai lnglungan daha nanak! Pnsrmalan daha, noda daha, nasi pnoda lnglungan seediq we mpkuuka. 39Netun pneyah Utux Baro we uka namu tgklaan hmurah ka dheya. So kiya de ririh namu nii cmebu Utux Baro di.”

Thei ba heya ka dseediq sapah pprngagan hiya. 40Kiya de splawa daha ka snkgulan de psruwan daha. Kiya uri we rngagan daha, iya pooda ngayan Yesu tmgesa kari. Kiya de srwaan daha di. 41Mlatac peeyah sapah pprngagan ka snkgulan, ado dehuk mndungus ririh ngayan Yesu moda pqsiqa we mqaras bale lhebun daha. 42Kiya de meniq Sapah Thmkuwan ma sapah daha ini psetuq tmgesa seediq klaali, gmarang mesa Yesu we kika Kiristo.

Currently Selected:

Qneepah 5: Stgdaya

Highlight

Copy