Mark 15

Awɨn kɨ Jeju nõ Pilat't

(Oo Mat 27:1-2,11-14; Luk 23:1-5; Jã 18:28-38)

1Kɨsĩ ritit, kɨbog lo ngéjanyamosɨkadkari sed kɨbog lo Juipg kɨ ngéndang maktubg, kɨ ngékoogota ku juipgt ɔjɨn na ta dɔ Jejut. Ad dɔn Jeju, ɔrrɨna awɨn sia lana ji Pilat't. 2Pilat ndɨje Jeju an: Ĩ ngar lo Juipg je e? Jeju tura an: Ĩla el nõ.

3Kɨbog lo ngéjanyamosɨkadkari tetɨn tag ngãibe kɨ dɔ Jejut. 4Ad Pilat tel ndɨjea ta gog tɔ an: I turta mad ale? Oo tag tube'n tetɨn kɨ dɔit nõ ale? 5Na Jeju turta mad gog al, ad ta ya Pilat biw.

Deg gangɨn ta koi dɔ Jejut

(Oo Mat 27:15-26; Luk 23:13-25; Jã 18:39; Jã 19:16)

6Kaglo ɗanah Pakɨt kɨɗen ye, i nyabelɓe lo Pilat kad ɔrr de kɨɗa dangait, ad i de'n koosɨg ndɨjena kad nyàa dõ. 7De mad tɔa i Barabas ɗa kam dangait nõ sed nama ngéndu ɗɔɔg. Deg'n non tɔlɨn de mad lon ndun ne ɗɔɔ deg kɨ Romt. 8Koosɨdeg awɨn kɨ ro Pilat, lo gangtat, mbã girr ndɨjea kɨgo nyabelɓet loa. 9Pilat turd an: I ndigɨn kad m'ɔrr ngar lo Juipg m'adsɨ e? 10Kɨtɔ Pilat ger ɓet kad kɨbog lo ngéjanyamosɨkadkari lan Jeju jint kɨgo jangt. 11Na kɨbog lo ngéjanyamosɨkadkarig sɨlan koosɨdeg ad elɨn anan: Ɔrr Barabas adj.

12Pilat tel ndɨjed an: Ɗi i ndigɨn kad m'ɗa kɨ de'n i ndɨ kunɨna ngar lo Juipg ye a? 13Turɨna kɨ ndid kɨbo anan: I gaa kagdosɨt. 14Na Pilat eld an: Kɨtɔɗi? Majal ɗi ɗa a? Deg tel kon kɨ tɔgd tɔ anan: I gaa kagdosɨt.

15Na Pilat ndig kɨ'n sɔlkam koosɨdeg ye, ɔrr Barabas ad'd. Na ad ndan Jeju kɨ ndeh riw riw, kamla laa ji degt kad gana kagdosɨt.

Ngéɗɔɔg tajɨn Jeju

(Oo Mat 27:27-31; Jã 19:2-3)

16Ngéɗɔɔg ɔrrɨn Jeju awɨn sia natlot kɨ tɔa i Pretoir, ad i kuj kõɓe lo ngekõɓe. Kunɨn ɓut ngéɗɔɔg tube kɨ nat. 17Lana kub kɨ kɨrre wor wor, kad gona ne, gan jɔg kon lan dɔat. 18Kamla mbã girr ɗaa lapia anan: Lapia Ngar lo Juipg.

19Tɨndan dɔa kɨ kadnya, tiwɨn horr tad dɔat. Ɔsɨn gojd ber nõat ho, ɔsɨn dɔd ber nõat tɔ. 20Goot'n hã gona woi ye, ɔrrɨn kubji kɨ kɨrre'n non roat kɔ, na lana kubg loa. Kamla got gog ɔrrɨna kɨtɨga, awɨn sia kad gana kagdosɨt.

Gan Jeju kagdosɨt

(Oo Mat 27:32-56; Luk 23:26-49; Jã 19:17-37)

21De mad tee ko gid ɓet, tɔa i Simõ, i bɔw Alegjandɨr kɨ Rupus, i de kɨ Sirent, ɓai ndɔɔt lon a tɔi, ngéɗɔɔg ndɔdɨna dɔ ɗobt, na hɔna kɨ lo ngetɔgt kad to kagdosɨ lo Jeju, 22ɔrrɨn Jeju awɨn sia lot mad kɨ tɔa i Golgota, girr tɔ lon non i lokadɔ.

23Nõ be adɨn Jeju man nduu kɨ bur kɨ myrr kad kɨ ãi, na Jeju ãi al. 24Ngéɗɔɔg gana dɔ kagdosɨt got yan yuk kɨ n'oon ke dekɨɗen a un kub loa a? Kamla kegɨn na kubg loa kudt. 25I kɨ sĩ kɨ nõkadndah la gana ne kagdosɨt ye. 26Ndangɨn maktub ndan dõ dɔ Jejut, na tag'n ndangɨn la ten: Ngar lo Juipg.

27Ngéɗɔɔg gan ngékumɗobg joo kagdosɨt kad Jejut. Kɨ kɨɗa ko kõat ho, kɨmad ko gelat. 28Titbe tɔlɨn ne ta ta'n ndangɨn kam maktubt anan: Tɨdana nat kɨ ngétɔidɔtag.

29Deg'n a tɔin nõbe ye, gan dɔd misɨmisɨ, kamla tajɨna ho ho, kɨ takɨmal anan: Ɓai ɓa'a. Ĩ kɨ ngetɔ kuj ndub Luwah, na ɗaa gog kam ndɔt kɨmita ye, 30Aj roi, na i ɗisɨ dɔ kagdosɨt ad j'oo. 31Titbe tɔ la ngéjanyamosɨkadkari kɨ ngéndang maktub, oon Jeju. Kamla elɨn kudt anan: Aj deg madg, na asɨ kajron al ma?

32Ad Krist Ngar lo Israel ɗisɨ tajigla dɔ kagdosɨt kɨ ber kɨtakad j'oo a ne, jadɨn kamj. Deg'n gand kagdosɨt kad Jejut ye tajɨna ho.

Koi Jeju kagdosɨt

(Oo Mat 27:45-56; Luk 23:44-49; Jã 19:28-30)

33Kàd ɗa ngawdenɓet, na til dub ut dɔning tube, mbã teen kàdt kɨmita kɨ lokɨsɔle. 34Kɨ kàd kɨmita baaba, Jeju ko kɨ ndin kɨbo an: Eloi, Eloi, lama sabaktani? Girra i titbe: Luwah lom Luwah lom, kɨtɔɗi i nyàmɨn kɨ nõbe a? 35Deg madg ku ĩgɨtɨn ɗan lot'n non oon dɔ ta'n el ye, elɨn anan: Oon ɗa kun Eli.

36Kɨmad kudt ãi ngɔd aw la ndɔkɔrɔ kam kasɨnduut kɨ m'asɨ jugug, un ta kadnyat ɗen kad Jeju ãi. El an: I ngoon ad j'oo ke Eli a ɗisɨ sia dɔ kagdosɨt a? 37Na ɓa ko kɨ ndin kɨbobe kamla oi ye.

38Tajigt kub ganglo kam kuj ndub Luwah til dene joo, ɓai dõ mbã ũ ber. 39Lon bɨradɔ ngéɗɔɔg'n ɗa nõ Jejut sumban sew oo titbãi Jeju oin ye el an: Rota de'n ɗan i Ngon Luwah jeje.

40Dekɨdẽ madg ɗan nõ, ɗa oon nyag'n ɗa nya nõ ko sãi; Mari kɨ Magdala, Mari kɨ kõ Jak kɨ du, kɨ Jose kɨ Salome ĩn kudt. 41Dekɨdẽg'n non ndulon go Jeju maɗi ho, ɗan kɨlaɓer adɨna lon ĩn dɔning Galilet ho. Dekɨdẽg madg ngãibe tɔ ndulon goa, awɨn sia Jerusalemt.

Duwɨn Jeju bulombalt

(Oo Mat 27:57-61; Luk 23:50-56; Jã 19:38-42)

42Ndɔt'n non, i ndɔ ɗago nyag tube kɨta loti i ndɔ taakò lo Juipg. Lon losɔl woi ye, 43Jojep de kɨ Arimatet, i de kɨbo ku ngékoogota mbɨna Juipgt, na ndɨ ndahkamɨn dɔ kõɓet lo Luwah'n ɓet a ɗe. Jojep ire kamɨn njirir, na aw ngah Pilat ndɨjea nĩn Jeju. 44Ta ya Pilat kɨta koin Jeju oi kanangbe. Ad kun bɨradɔ ngéɗɔɔg ada ɗe roat, kamla ndɨjea an: Ɗɨngãt hã Jeju oi a? 45Lon bɨradɔ ngéɗɔɔg ad Pilat ger ta koi Jeju jeje ye, Pilat ad nĩn Jeju Jojep. 46Jojep aw ndugo kub nĩn, gotɨn ɔrrɨn nĩn Jeju dɔ kagdosɨt kɨber ye, Jojep dulo nĩn kɨ kub nin'n non, na laa ɓe nint'n urrɨn kam mbalt. Kamla ut ta bulo'n non kɨ mbal kɨbobe. 47Mari kɨ Magdala kɨ Mari kõ Jak oon lon lan nĩn Jejut.

Currently Selected:

Mark 15: MlL

Highlight

Copy