Luk 7

Jeju yoot ngon ngekɨla lo Roma mad

(Oo Mat 8:5-13)

1Lon Jeju eltag lon tube tɨga kɨ mbi degt ye, and kam ɓebot kɨ Kapernawm. 2Ngon ngekɨla lo bɨradɔ ngéɗɔɔg i nõ, mõi ɗaa ngãi ad to ta koit, na ngea tara ngãi. 3Lon bɨradɔ ngéɗɔɔg oo hoi Jeju ye, la kɨbo madg lo Juipg roat, kad ndɨjena kad kɨ ɗe yoot ngon ngekɨla lon. 4Ĩn tɔ lon ɗen ro Jejut ye, ndɨjena kɨ rotĩd, anan: Asɨ kad i ɗa nya 'nten ada. 5Kɨtɔ i de kɨ tar girrdeg loj, ĩ kɨɓe kɨ dɔn la ɗa kuj kawna loj adj ye. 6Taa ne, Jeju aw sed, na lon nãi nderbe kad teen ɓe ye, bɨradɔ ngéɗɔɔg la namɨng ro Jejut kad elɨna anan: Bɨraɓe, ot nda roi dɨlalot, kɨta m'asɨ kad and kuju lom al, 7kɨta 'nten la m'oon kad m'asɨ ɗe roit al ho ye; na ĩla elta koon a ne, ngonɨm a aj. 8Kɨtɔ mĩ'n, mĩ girr tɔgt lo kɨbog lom ye, m'ndɨ kɨ ngéɗɔɔg jimt; ĩla m'el kɨmad m'an: Ĩn ndɨn aw a ne, aw, ĩn i ɗan i ɗe, a ne ɗe; ĩla m'an ɓer lom i ɗa nya 'nten a ne ɗa.

9Lon Jeju oo dɔ ta 'nten ye, nela dum, mbel kɨ ro koosɨgt'n hã a ndulon goa, eld an: M'ndɨ m'elsɨ ke ku Israelgt kaa ne, m'ngaa kadkam kɨbo kɨ titbe al.

10Deg'n bɨradɔ ngéɗɔɔg lad ye, lon telɨn kɨɓe ngahn ɓer'n roa toa kɨ lapia.

Jeju ad basa mad ɓai lo koit

11Loti got Jeju aw ɓe madt'n tɔa i Nãi. Ngéndoog loa kɨ deg koosɨg awɨn sia nat. 12Lon tee ta tabit't kɨ kand kam ɓet ye, oon deg unɨn de mad kɨ koin hã i kɨɗabe ji kont, kõa tɔ i ngengawkoi. Deg ngãibe ko kam ɓet awɨn sia nat. 13Lon Bɨraɓe ooa ye, ta õ kama ngãibe kɨ tɔa ad el an: Ot nõn.

14Aw nderbe, ud gat kun nin. Ngétoa duban; Jeju el an: Basa, m'eli i ɓai dõ.

15Ngekoi ɓai ndɨ dõ, mba girr kelta, Jeju ada kõa. 16Ɓool ɗa deg tube ad ɔsɨn gon Luwah, anan: Ngekelta kɨ ta Luwaht mad kɨbo i denjt. Elɨn tɔ anan: Luwah ɗe aj deg lon.

17Kah nyag'n hã Jeju ɗa ye gang go dɔning Jude kɨtaagbe, kɨ ɓeg tube kɨ gugɨn dɔa.

Jã ngeɗa deg baptem la ngéndoog lon kad ndɨjen ta Jeju

(Oo Mat 11:2-19)

18Ngéndoog lo Jã aw ɔrrɨna hoi nyag 'nten tube. Jã ad kunɨn ngéndoog lon joo kɨront, 19lad ro Bɨraɓe an: Ĩla ĩ ngeɗe yo? Ke kɨ ndɨ kɨ ngoo de mad kɨɗang a? 20Lon deg'n non ɗen ro Jejut ye, anan: Jã kɨ ngeɗa deg baptem la laj roit kad kɨ ndɨjei, ke ĩ Jeju la ĩ ngeɗe yo, ke kɨ ndɨ ngoo de mad kɨɗang a?

21Kaglot'n non Jeju yoot deg ngãibe dɔ mõigt lod kɨ yo kɨ tod, ɔrr ndil kɨmajalg kam degt kɔ, na ad mundog ngãibe ngahn koo lo. 22Jeju tur deg lo Jã an: Aw elɨn Jã ta nyag'n oon, kɨ nyag'n oon dɔ; mundog ngahn koo lo, mootg a ɓan ning, ngébanjg arɨn, mboog oon dɔ ta, ndoolɨn ngékoig ndɨ elɨn hoita kɨmaj ngéndog. 23Ngeronel la i de'n ndɨ oron kadɨm kamɨn al ye.

24Lon ngombangkɨlag lo Jã ɓain ye, Jeju mba girr kelta deg koosɨg dɔ Jãt an: Awɨn kam dɨlambot kɨta koo ɗi a? Ke kadnya kɨ nel ɗa yee a? 25Na awɨn kɨta koo ɗi a? Ke awɨn kɨta koo de kɨ ngelakub kɨmaj a? Oon ĩgɨn ndɨ lan kubg kɨ majmaj, na ndɨ oon maj rod titbe ndɨn kujgt lo ngarg. 26Na awɨn kɨta koo ɗi a? Awɨn kɨta koo ngekelta kɨ ta Luwaht a? Ã m'ndɨ m'elsɨ, oon de'n tɔi ngékelta kɨ ta Luwaht ngãibe. 27Kɨtɔ Jã i de'n ndangɨn ta dan ne dɔa kam maktubt an: Oon m'ndɨ m'la ngombangkɨla lom kete nõit. 28M'ndɨ m'elsɨ, ku degt'n dekɨdẽg oojɨnd ye, de mad kɨbo tɔi Jã goto, na ĩn hã i kɨ du tɔi kam kõɓe lo Luwah i kɨbo tɔia. 29Deg tube, kɨ ngétirrdɔnyag oon dɔ ta lo Jã, ĩgɨn non la telɨn rod go tat kɨdenesew kɨ tee ta Luwaht ad ndɨ ɗan baptem kɨgo baptemt lo Jã ye. 30Na Parisɨg kɨ ngéndoodeg mberkɨnda lo Moij ye, mbetɨn takɔj lo Luwah, ad ndigɨn kad Jã ɗad baptem al. 31Ke ɗi m'a m'dan deg kɨ kaglot'n ɗan a? Taan na kɨ ɗia? 32Tit'n kɨ ngan kɨ dug kɨ ndɨn suku ndɨ kunɨn namdg anan: Kɨ kun townal jadsɨ, na i ndõmɨn al, kɨ tɔi pa nõ, na i nõn al. 33Kɨtɔ Jã ngeɗa deg baptem deg ɗe, na ɔg ron nyasa, kɨ nya kãi, na elɨn anan: I ɓood de.

34Ngon de ɗe, na sa ho ãi ho, na anan: Oon i dekɨ ngesanyaboot, ngekãi kasɨnduu boot, i nam ngétaa lambo kɨ ngéɗamajalg.

35Na deg tube'n taan terr lo Luwah, adɨna kamd kad i terr kɨ jeje.

Jeju aw kam kujt lo Parisɨ mad'n tɔa i Simõ

36De mad ku Parisɨgt nde Jeju kɨ sa sen nya. Jeju and kuju lo Parisɨ'n non, ndɨ ta nyasat. 37Oon kaya dekɨdẽ mad ndɨ kam ɓet'n non. Lon ger kad Jeju ndɨ kam kujt lo Parisɨ'n non ye, ɗe kɨ kú albatɨr kɨ yib kɨ kootmbĩ i kamt, 38ɗan gid Jejut ko njat ɗa nõ, mba girr nyom njaa kɨ man kumɨn. Kamla bɔrr kɨ bisɨ dɔn; ndɨ il njaa, wur kɨ yib kɨ kootmbĩ'n non. 39Lon Parisɨ'n nde Jeju kɨ sa sen nya oo nya 'nten ye, elta kamɨnt an: Ĩla de'n ndɨn i ngekelta kɨ ta Luwaht a ne, ni a ger dekɨdẽ'n ndɨn, ĩn ndɨ ɔda nõ, kad i dekɨdẽ kɨ nyaɗaa i kɨmajal tɔ. 40Kamla Jeju el an: Simõ m'aw kɨ ta mad la kɨ m'eli. Simõ el an: El. 41Jeju el an: De mad kɨ ngekadgɨrra ad girra deg joo, de kɨdasa baa nar ɓumi, kɨkõjoo, maj kad baa nar dɔmi. 42Lon oon nya'n a ban ne al ye, ngegɨrra nya kɨ dɔdt tujoo. Ku degt kɨ joo'n non ye, de'n tara ngãi i nõ a? 43Simõ tura an: m'ga dɔmt m'an i ĩn hã nyan girra ngãi adɨna nõ. Jeju el an: I gangta dene.

44Kamla mbel kɨ ro dekɨdẽt, el Simõ an: Oo dekɨdẽ'n ndɨn? Lon m'and kuju loi, na adɨm man kɨ tugo njam al, na ĩ taa nyom njam kɨ man non, na bɔrr kɨ bisɨ dɔn. 45Ĩ taa ne, i ɗam lapia njuta al, na dekɨdẽ tã dɔkàd kandɨm kam kujt loi mbã tajigla nya ta nju njam al. 46Ĩ i wur dɔm kɨ yib al, na dekɨdẽ'n ndɨn wur njam kɨ yib kɨ kootmbĩ. 47Kɨtɔ 'nten m'ndɨ m'elɨn m'an dekɨdẽ'n ndɨn tarɨm ngãi, na kɨta tar kɨ tarɨm ngãi la i gerɨn ne Luwah nyàgo majalg loa kɨ ngãi kɔ. Na de'n majalg loa kɨ tẽbe ĩn kɨ nyàgo kɔ tar loa i tẽbe ho. 48Jeju el dekɨdẽ an majalg loi ĩn kɨ nyàgo kɔ. 49Deg'n ndɨn sia ta nyasat ye, mbã girr kelta kamdt anan: De'n ndɨn ndɨ nyàgo majalg lo deg kɔ ye i nõ a? 50Na Jeju el dekɨdẽ an: kadkam loi aji, aw kɨ lapia.

Currently Selected:

Luk 7: MlL

Highlight

Copy