Luk 4
4
Sitan ná Jeju kam dɨlalot
(Oo Mat 4:1-11; Mrk 1:12-13)
1Jeju ɗoosɨ kɨ Ndil Kɨkunjɗang, ɓai ta bah Jurdẽt ndɨ tel kɨ gog, Ndil Luwah ɔrra aw sia kam dɨlalot. 2Nu la Sɨtan náa ndɔ dɔsɔɔ, kam ndɔt kɨ dɔsɔɔ'n non sanya mad al; na lon ndɔg'n non tɔin woi ye, ɓo õa. 3Na Sɨtan ela an: Ĩla i ngon Luwah a ne, el mbal'n ɗan ad tel nyasa. 4Na Jeju tur an: Ndangɨn kam maktubt: De a ndɨ kɨ dɔn dõ kɨtakul nyasa hã kɨɗabe al, na kɨtakul ta kɨɗen'n ndɨ tee ta Luwaht tã. 5Kamla Sɨtan ɔrr Jeju aw sia lot mad kɨ ɓai kɨ dõ ngãi daa kõɓeg kɨ dɔningt tube. 6Sitan el Jeju an: M'a m'adi tɔg dɔ kõɓegt 'nten tube kɨmajd kɨta mĩ la admɨn ye, na dekɨɗen m'ndig kada a ne, m'a m'ada. 7Ĩla i so kɨnomt, ɔsɨ dɔi ber nõmt a ne, nyag 'nten tube a telɨn loi. 8Jeju tur an: Ndangɨn kam maktubt a ɔsɨ dɔi ber nõ Bɨraɓe Luwaht, ĩ kɨɗabe la a i ɗa ɓer loa ye. 9Goot Sɨtan ɔrra aw sia ɓebo Jerusalemt, ndaa dɔ bɔg kuj ndub Luwaht, ela an: ĩla ĩ ngon Luwah a ne, i kɨla i so kɨber nẽbe. 10Kɨtɔ ndangɨn kam maktubt: Luwah a ndamber malaikag lon kad oon goi. 11Malaikag a tɔin kɨ dajid, na ɓeta i ga njai mbalt. 12Jeju tur an: Elɨn kam maktubt anan: A i ná Bɨraɓe Luwah loi al. 13Lon Sɨtan ná Jeju kɨ ɗob kɨdandang tɨga woi ye, tĩ nyàa kaglo tẽbe.
Jeju mba girr kɨla lon dɔning Galilet
(Oo Mat 4:12-17; Mrk 1:14-15)
14Kamla Jeju tel ɗe dɔning Galilet. Tɔg Ndil Luwah i nat sia. Hoia ɔrr lo wom kɨ dɔningt'n non tube. 15Ndɨ ndoo deg kam kuj kawnagt lo Juipg. Deg tube ɔsɨn gona.
Deg kɨ kam ɓet kɨ Najaret mbetɨn Jeju
(Oo Mat 13:53-58; Mrk 6:1-6)
16Kamla Jeju aw kam ɓet kɨ Najaret lot'n tonat. And kam kuj kawnat lo Juipg kɨ ndɔ taakò kɨgo nyabeɓelt loa, ɓai ɗa dõ kad n'da Maktub lo Luwah. 17Lan Maktub lo ngekelta kɨ ta Luwaht Ejai adɨna. Tee Maktub, na ngah lon ndangɨn ta 'nten tit anan: 18Ndil Bɨraɓe i dɔmt kɨta wurɨm, kɨ m'la mber hoita kɨmaj ngéndog, lam kad kɨ m'la mber deg'n hɔnd dangait kad ĩn kɨ taa nya dõ, kad mundog oon lo ar nyang, kɨ m'taa deg'n dan kumd ndo m'nyad dõ, 19kɨ m'la mber ɓal kamkẽ lo Bɨraɓe. 20Jeju ɓir maktub'n non ad ut, tel la ji ngekoogo kuj kawnat, na ndɨ ber. Deg tube kɨ kam kuj kawnat lo Juipg ye, ndan kumd kɨ dɔat ndã. 21Mbagɨr keld ta an: Ɓone tɔlɨn ta ta 'nten lon i ndɨ oon dɔ kɨ mbisɨ. 22Deg'n non tube hitɨn Jeju. Tag kɨmaj maj'n ndɨ teen taat yad ngãibe ad anan: De'n ndɨn ye i ngon Jojep ale?
23Jeju eld an: Rota a i elmɨn terrta 'nten: Nge kĩ maj kad i yoot roi. A elɨn tɔ anan: Nyag tube'n oon dɔ m'ɗa ɓebo Kapernawm nõ ye, kɨ m'ɗa nẽbe kam ɓekoojɨmt ho. 24Kamla Jeju el an: Rota la m'ndɨ m'elsɨ ye; ngekelta kɨ ta Luwaht ye, deg kɨ ɓekoojat a ndigna al. 25Na rota la m'ndɨ m'elsɨ ye, ngéngawkoig ngãibe ndɨn nõ kaglot lo Eli, ngekelta kɨ ta Luwaht kam dɔning Israelt. Kaglot'n non Luwah ut dɔrã, ad ndii ed al ɓal mɨta kɨ nah kɨbojidet, ad ɓo kɨbo so dɔningt tube; 26na Luwah la Eli ro kɨkɨɗat kudt al, na laa ro ngengawkoit mad kam ɓet kɨ Serepta kam dɔning Sidõt tã. 27Ngébanjg ngãibe tɔ ndɨn dan Israelgt nõ, kaglot lo Elije ngekelta kɨ ta Luwaht na yootɨn kɨkɨɗa kudt al, na Naama'n i de kɨ Sirit tã. 28Lon deg tube'n ndɨn kam kuj kawnat lo Juipg oon dɔ tag 'nten ye, wong tɔld sɔkɨr. 29Ɓain dõ, tuɓana kɨ tɨga gid ɓet, kamla ɔrrɨna awɨn sia mbã kɨ tasom mbalbot'n ndahn ɓe lod dɔt, kɨtakad ɔsɨ lana kɨber. 30Na Jeju tee dandt tɔi.
Ta lo de kɨ ngendil kɨyerr
(Oo Mrk 1:21-28)
31Kamla Jeju tee ɓebo Kapernawmt, kam dɔning Galilet. Ndoo koosɨdeg kɨ ndɔ taakò kam ɓet'n non. 32Nyandoo loa ya dɔd kɨta ta loa aw kɨ tɔg. 33Kam kuj kawnat lo Juipg de mad kɨ ngendil kɨyerr ndɨt nõ, ɓako kɨ ndin kɨbobe an: 34A. Jeju kɨ Najaret ɗi goj nat sei? I ɗe kɨta nuj'j kɔ ɔ? M'geri maj, ĩ Ngekunjɗang lo Luwah.
35Jeju ndánga an: I ndɨ tai mbo. I tee kam det'n ɗan kɔ.
Ndil kɨmajal ɔrr laa dan ngékawnat, kamla tee kamat kɔ, na ɗaa majal al. 36Ĩn tube ta yad biw, ad elɨn na ta kudt anan: Ta ɗi kɨbe ten a? Ɗa ndáng ndil kɨyerrg kɨ kam kɨmisɨmisɨ, kɨ tɔg, ad teen tɔ.
37Hoi nya'n non ɔrr lo wom kam dɔning Galilet kɨtaagbe.
Jeju yoot deg koosɨg
(Oo Mat 8:14-17; Mrk 1:29-34)
38Jeju tee kam kuj kawnat lo Juipg, aw ɓe lo Simõ. Mum Simõ nélbo ndaa mburung, ad to ber kɨ kɔtɨn, ndɨjen Jeju kad ɗa nya mad kɨ tɔa. 39Jeju aw ɗa dɔat, ndáng nélbo'n non, ad nélbo tĩ nyàa. Tentenbe ɓai dõ oo go mbahg kɨ nyasa. 40Lon kàd ndɨ ud ye, deg tube, ĩgɨn awɨn kɨ ngérotog'n mõig kɨ dang dang ɗad ye, ɗen sed ro Jejut. Ĩ tɔ nda jin dɔdt kɨɗa kɨɗa tube yootdɨn 41Ndilg kɨmajal teen kam degt ngãibe a kon anan: Ĩla ĩ ngon Luwah ye, Jeju ndángd, nyad ad elɨn ta al, kɨta gerɨn maj i Krist.
Jeju tee aw kɨta la mber ta
(Oo Mrk 1:35-39)
42Lon loti ye, Jeju tee aw lot mad kɨ de gotot. Deg koosɨg ɓai sahna mbã teen dɔat, ndigɨn kad Jeju aw al, na kɨ ndɨ sed. 43Na eld an: Sumba kad m'la mber hoita kɨmaj kõɓe lo Luwah kam ndeg ɓe madgt ho kɨta 'nten la Luwah lamɨn ye.
44Ɗa la mber ta kam kuj kawnagt lo Juipg kɨ dɔning Galilet.
Currently Selected:
Luk 4: MlL
Highlight
Share
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
