Luk 14

Jeju yoot de'n yoman toa

1Jeju and kuju lo kɨkɨɗa ku kɨbogt lo Parisɨg kɨ ndɔ taakò mad kɨta sanya, na Parisɨg ndɨ oona maj. 2De mad ndɨ nõat ĩn yoman toa. 3Jeju un ta el ngendoo mberkɨnda kɨ Parisɨg an: I goɗobat kad yootɨn de ndɔ taakòt e?

4Na ndɨn tad mbo. Kamla Jeju un de'n non yoota, na ada aw. 5Eld an: Nõ kusɨt ĩla ngona ke mang loa so ɗe a ne, a ɔrra tentenbe ndɔ taakòt al a? 6Na asɨ turɨn ta dɔ tat'n non al.

Ta dɔ sɔl dɔt kɨ ɗa mburr ngaw kɨta ngéndog

7Jeju oo deg ndɨ kɔtɨn lo ndig kɨmaj tɔi ye, el deg ĩgɨn kunɨnd lo mburr ngawt terrta 'nten. 8Lon de mad ndei kɨ aw lo mburr ngawt a ne, ot ndɨ lo ndit kɨmajtɔi. Maj a ne, kunɨn de mad kɨ i kɨ bo tɔii. 9Kamla ĩn kunsɨ ĩ kɨ de mad nõ ho, ɗe eli an: Ad lo de'n ɗan; kamla i mba girr hɔ lo ndɨ kɨgog gid degt tube kɨ rosɔl ye. 10Kɨtɔ 'nten lon de mad kuni kad i sanya sia a ne, aw i ndɨ lo ndit kɨgog gid degt tube; kɨtakad lon de'n kuni a ɗe a ne, a eli an: Nam i ɗe kɨ kete so. Kamla a i ngah kɔsɨgon nõ degt'n ndɨn sei ta nyasat tube ye. 11Kɨtɔ dekɨɗen'n ndɨ sɔl dɔn a ne, a sɔlɨn dɔa, na de'n ndɨ sɔl dɔn a ne, a tɔin na kɨ dõ ho.

12Jeju el de'n kuna kad sanya sia an: Lon i ɗa mburr ngaw kada ke ndɔɔ a ne, ot kun namig, ke ngankõi, ke noojg, ke madɓeg ngénya; na ɓeta ĩn tɔ tel kuniɨn kɨ kɨ lod ad adin loat. 13Na lon i ɗa mburr ngaw a ne, i kun ngéndog, kɨ mootg kɨ tõg kɨ mundog. 14Kamla maj a uri, kɨta deg'n non oon nya ka adin loat al. Na Luwah a telɨn adi ndɔ'n deg kɨdenesew a ɓain lo koit.

Terrta dɔ degt'n mbet kawɨn mburr namt

(Oo Mat 22:2-14)

15De mad ku ĩgɨtɨn ndɨn ta nyasat sia lon oo dɔ ta 'nten ye el Jeju an: Ngeronel la i de'n a sanya kõɓet lo Luwah ye. 16Jeju ela an: De mad ɗa mburr nam kɨbo, kun deg ngãibe. 17Lon dɔkàd mburr nam asɨ woi ye, la ɓer lon, el ĩgɨn kund kad ɗen kɨta ɗago nyag tube woi. 18Na deg'n non tube ndan tad nat kɨɗabe mbã girr kɔita. Kɨdasa el an: M'ndugo ndɔ, kari na m'a m'aw kɨ m'oo, m'kɔi kɨ i ndɨ sem dɔt. 19Kɨmad el an: m'ndugo mangg joo joo mi, m'a m'aw kɨ m'nãd m'oo, m'kɔi kɨ i ndɨ sem dɔt. 20Kɨmad tɔ el an: M'taa dekɨdẽ tajigla m'asɨ kaw al. 21Ɓer tee ɗe ɔr hoi nyag 'nten tube Bɨraɓe lon. Ad wong tɔl ngeɓe sɔkɨr, el ɓer lon an: Aw kɨdõt kɨ natlogt kɨgo ɗobg kɨ kam ɓet, ɔi ngéndog kɨ mootg, kɨ mundog, kɨ tõg. I ɗe sed nẽbe. 22Ɓer el an: Bɨraɓe nya'n el ye, ɗan woi, na ndeg lo to kari ɓaitɔ. 23Ngeɓer ela an: Aw kɨ goɗobg kɨ kam kɨngag gawg ĩgɨn i ngahd a ne, i ɗadɨ ad andɨn, kɨtakad kam kuj lom ɗoosɨ. 24Kɨtɔ m'ndɨ m'elsɨ, ku degt'n non ĩgɨn m'kund ye, kɨɗa kɨ a ɔd mburnam lom tant goto.

Maj kad ngéndoog lo Jeju mbetɨn nyag kɨ duniat

(Oo Mat 10:37-39)

25Deg koosɨg ngãi awɨn kɨ Jeju la mbel kɨgog eld an: 26Ĩla de mad ɗe romt na ɔsɨ ta bɔwɨn kɨ kon, kɨ nẽn, kɨ ngankõng kɨdɨngãg kɨ kɨdẽg, mbã kɨ ron tɔ al a ne, asɨ kĩ ngendoo lom al. 27Ke dekɨɗen'n un kagdosɨ lon kɨ kɔsɨdɔn, na ndulo gom al a ne, asɨ kĩ ngendoo lom al. 28De'n ndig ɗa kuj kɨ ngal kɨ dõ a ne, a ndɨ ber kete, a tɨda kɔr nar ɗaa oo kamtã, ke ndɨ kɨ nya kɨ asɨ tɔl kona al a? 29Titbe al a ne, a la girra na a asɨ ɗa tɨga al, ad deg tube'n oon ye, a gon dɔat, 30anan de'n ɗan mba girr ɗa kuj kɨgal kɨ dõ, na asɨ ɗa tɨga al. 31Jeju elta mad ɓaitɔ an: Ke ngar mad kɨɗa ĩn aw kɨ'n ngahn na kɨta ɗɔɔ kɨ ngar mad a ne, a ndɨ ber kete kad ɔj ta kɨ deg lon oo kamtã, ke ĩ kɨ deg dub kɨlah a asɨ ngahn na kɨta ɗɔɔ kɨ ngar namɨn'n a ɗe ɗɔɔ dɔnt kɨ ngéɗɔɔg dub dɔjoo a? 32Ĩla asɨ al a ne, lon ngar'n non i sãi nu ɓaitɔ ye, a la ngombangkɨlag kad ndɨjena nya'n asɨ kad'n ɗa kad lapia ton mbɨnadt. 33Titbe tɔ la dekɨɗen kusɨt ĩn a nya nyangahg lon tube al a ne, asɨ tel ngendoo lom al. 34Kat i nya kɨmaj, na ĩla mɨrã kat ɔrr a ne, ɗi a tel kɨ mɨrã gog a? 35Kara gotot, ke kɨta dɔning, ke kɨta ɓirɓit, na a una kɔ. De'n ndɨ kɨ mbin kɨta koo dɔ a ne, kɨ oo dɔ.

Currently Selected:

Luk 14: MlL

Highlight

Copy