Luka 20

A Thungeihnak parih Thudilnak

(Mat 21:23-27; Mar 11:27-33)

1Ni khat cu biakinn sungah mipi thu a zirh hngai leh thuthangṭha a sim hngai lioah, tlangbawi upapawl leh daanzirhtupawl cu upale rum an pha, 2culeh, “Itu thungeihnak in hi thilpawl hi na vua hngai? Hi thungeihnak tan pia tu hi ahu a ii? ti man sim hnik,” tiah an ti. 3Jesuh ni, “Thu ka tan dil hngai ve thok, cun ma sim uh: 4Johan ih timihnimnak hi vancung in maw a phat, iklole minung hemin a thawh?” tiah a let hngai. 5Pakhat leh pakhat rontia in, “ ‘Vancung in’ ti hu la le, ani ni ‘Ica’h nan zum lo hmen?’ a ti thok. 6‘Minung hemin a thawh’ ti hu la mi hmawhhmawh ni lung in a man phon thok; icatile Johan cu profet pakhat a ik an fiang,” tiah an ti. 7Curuangah khawnang in a phat an tiah lo thu an let. 8Cutikah Jesuh ni, “Kei khaw itu thungeihnak in hi thilpawl ka vua hngai rero ti kan tan sim hngai ve thok lo,” tiah a ti hngai.

Rianṭuantu Hrokhrawl Thuṭhim

(Mat 21:33-46; Mar 12:1-12)

9Mipi cu hi thuṭhim hi sim hngai a thawh, “Pakhat pa cu sabit duum vua in hlawhsetmile hemah a sawn hngai, culeh caan hla pi sung ram pace ah a tat. 10Sabit lawh a zat tikah sabit duum in a suakmi a covo a piala taw uh e tia a sal pakhat cu a hlawhsetmile hemah a thlah; a i nain hlawhsetmile ni an vel ih a kut rom in an thlah mianmi. 11Cuhnukah sal pace a thlah; acu pa khaw an vel ih an hmuhsit, cun kut rom in an thlah mianmi. 12Culeh a pathumnak pa a thlah rih; acu pa khaw maa baihin an zam. 13Cutikah sabit duum ngeitu ni, ‘Itu ka ti thok he hmen? Ka tiapa dawt ngaimi ka thlah thok, ani cu an upat men mah na’ tiah a ti. 14A i nain hlawhsetmile ni an hmuh tikah, anmah lakah rontia in, ‘Hi pa hi rocotu a ii; that le hu khawh rorah cu kan ta a i thok’ tiah an ti. 15Curuangah sabit duum pawnla ah zam hratin an that. Sabit duum ngeitu ni itu ti hngai thok na? 16Pha lei khawh hlawhsetmile cu that hngai in sabit duum cu mipace a pia hngai thok,” tiah a ti. Ahihi an zak tikah, “Acuti cu i hram hlah seh,” tiah an ti.

17Jesuh ni a zoh hngai ih,

“ ‘Innsatule ih hnonmi

lung cu inn kil ih

lung ah a cang,’#Saam 118:22.

18Acui lung parih a tla tupoh an kuaizan remro thok; cun a tlaknon mi cu a rialmaan thok, ti’h nganmi hi a sullam itu i hmen?” tiah a ti. 19Daanzirhtupawl leh tlangbawi upapawl ni hi thuṭhim hi anmah a simsan hngai ti an tiahthiam tikah, acui caan rori ah a parih kut thlah an daw, ihmansela mipi an ṭih.

Ngunkhuai thu ah Thudilnak

(Mat 22:15-22; Mar 12:13-17)

20Curuangah amah an bawh-langlang ih, a simmi in amah thang ah awkih thuṭhentu leh mangki ih thungeihnak ah phatpi kho dingin, tluangtlam saktia mi thlingthlatule cu Jesuh hemah an thlah hngai. 21Acule ni Jesuh cu, “Zirhtupa, na simmi leh na zirhmi in nang hi na hmaan, cun ahu ih thudawt khaw na zul lo, Pathian dawtzawng hi a iknak mangin na zirh, ti kan tiah. 22Khumpi hemih ngunkhuai piak hi kan caah a phung ii maw i hlah?” tiah an dil. 23Ihmansela an depdetnak a hmu ih, 24“Nan denarii deem khat ma hmuh hnik uh, ahu ih min leh lu a cuang hmen?” tiah a ti hngai. Anmimi ni, “Khumpi ih,” an ti. 25Jesuh ni, “Acu i taw ah, Khumpi cu khumpibawi ih thilpawl pia u la, cun Pathian cu Pathian ih thilpawl pia uh,” tiah a ti hngai. 26Culeh mipi omhngan ahcun Jesuh cu a aanmi in an awk thiamlo; a thulehnak ni an don a har aw hngai ih daitein an om.

Thawhṭhannak Thudil

(Mat 22:23-33; Mar 12:18-27)

27Thawhṭhannak a om lo tiah a ti tu Sadusile hrekkhat Jesuh hem an pha, 28culeh, “Zirhtupa, Moses ni: pakhat pa cu a upa a thi ih, a nupi a mata nain tianau a mattaak lo ahcun, acu pa ni a mo nuhmei cu pi lei khawh, a upa caah tianau a ngeih thok, tiah lai a man nganta. 29Unau pasarih an om ta; upatleng ni nu a pi, cun tiangeiloin a thi; 30cutikah a pahnihnak, 31cun a pathumnak ni an pi, culeh acumangin an pasarih cu tiangeiloin an thi. 32Netatleng ah acu nu khaw a thi ve. 33Curuangah, thawhṭhannak ah numinu cu ahu ih nupi tleng i lei maw? Icatile an pasarih ni an pi vek,” tiah an ti. 34Jesuh ni, “Hi san mi cu nu pi in pumah an ngei; 35a i nain cui san ah iseh, mithi thawhṭhannak ah iseh hmun co tlak ih ruahmipawl cu nu pi in pumah an ngei thok lo. 36A ngaingai ahcun an thi thiam ti lo, icatile thawhṭhannak tiale an ik ruangah vanmipawl leh Pathian tiale mang an ii. 37Mithi thawhsak an ik thu ah Moses amah rori ni, Bawipa cu Abraham ih Pathian, Isaak ih Pathian, cun Jakob ih Pathian tiah a tinak, hluaibuah thu sungah a hmuh rom. 38Pathian cu mithile ih Pathian a i lopi, minungle ih Pathian a ii hekhawh; icatile Amah a’cun an zate an nungkau,” tiah a ti hngai. 39Cutikah daanzirhtule hrekkhat ni, “Zirhtupa, na sim ṭha ngai,” tiah an sawn. 40Icatile thu pace dil an ngam ti lo.

David ih Tiapa A Ii Maw?

(Mat 22:41-46; Mar 12:35-37)

41Cuhnukah Jesuh ni, “Messiah cu David Tiapa a ii tiah khawti’n an ti thiam? 42Icatile David amah rori ni Saam Laibu sungah,

‘Bawipa ni ka Bawipa hemah,

Na ralle na keteih ih

ka vuak hngai hlansung

43ka vorhla ah to,’#Saam 110:1.

tiah a ti hin.

44David ni amah cu acuti’n Bawipa tiah a kawh a’cun; khawti’n hmen a tiapa a ik thiam?” tiah a ti hngai.

Daanzirhtule Ṭhuatsiatnak

(Mat 23:1-7; Mar 12:38-40)

45Mipi zate zakhngan ah a kaizulle cu, 46“Angki tualpi rum vak ih, dawr hmun ah upatnak rum domi ik, cun sinakok ah tonak ṭhatleng leh cawdoh puai ih upatnak hmun tipawl ngah a daw tu daanzirhtule hi ralring uh. 47Nuhmei inn pok-in an ngeihsiah an dinghmuar, cun lan dawt ah saupipi in thla an cam. Anmah hi sualthuṭhennak ngekdeuh an tuak thok,” tiah a ti.

Currently Selected:

Luka 20: KHBF

Highlight

Copy